Read Futuna-Aniwa FAKATASI JOANES, 5 Bible Online

FAKATASI JOANES, 5 - Futuna-Aniwa bible

FAKATASI JOANES, 5

¹IOTSHI tagata fakarogrogo pe Iesu aia ta Kristo kofarere o Atua; ma iotshi e acitiafakarafia aia niamo aia acitiafakarafia foci aia koamo o aia.

²Ia ane nei acitia keiro pe acitia acitiafakarafia erecriki o Atua, pe acitia acitiafakarafia Atua, ma maganerefia ia tshan afasao tapu.

³Ma tenei ko acitiafakarafia o Atua, pe acitia maganerefia ia tshanafasao tapu, ma tshanafasao tapu semukei.

⁴Ma iotshi tagata kofarere o Atua tatumea magane o fanua wararonei, ma tenei ta tomatua asitu acre tatumea ta magane o fanua wararonei, tshote fakarogrogo.

⁵Akai aia tatumea ta magane o fanua wararonei, kaia aia pe fakarogrogo pe Iesu ko ta Nontariki o Atua?

⁶Tenei aia nimai ia tavai mo toto, Iesu Kristo; jimra ia tavai ana, kaia ia tavai ma toto. Ma aia ta Nokano Tapu fakairo iateia, ianenei ta Nokano Tapu komari.

⁷Ma toru konofo fakairo iateia ia taragi, ta Mana, ta Fasao, ma ta Nokano Tapu; ma acratou ra kotasi ana.

⁸Ma toru konofo fakairo iateia ia fanua wararonei, ta Nokano ma ta vai, ma ta toto; ma acratou ra fakairo totonu hepe tasi ana.

⁹Pe acitia amo ta fakairo o tagata, ta fakairo o Atua kosorekage; ma tinei ta fakairo o Atua, afasao ra aia neitucua o tshana Nontariki.

¹⁰Aia pe fakarogrogo ia ta Nontariki o Atua nakoamo ta fakairo ia tshana roto; aia pe sefakarogrogo Atua nakamna aia korefu; ianenei aia sefakarogrogo tatapuria neisereace ia Atua neitufwa o tshana Nontariki.

¹¹Ma tenei tatapuria neisereace, Atua nakatufwa iacitia anea mouri tou ma tou, ma anea mouri tenei konofo ia tshana Nontariki.

¹²Aia nakoamo ta Nontariki nakoamo anea mouri; ma aia seamo ta Nontariki o Atua seamo anea mouri.

¹³Ane iotshi ra avou neiserea iacowa fakarogrogo ia neigo o ta Nontariki o Atua; pe acowa keiro pe acowa nakoamo anea mouri tou ma tou, ma pe acowa fakarogrogo ia ta neigo o ta Nontariki o Atua.

¹⁴Ma tenei ta fakarogrogo acitia nakoamo ia aia, pe acitia nogia i mori ane tasi hepe tshana afasao fakairo, aia fakarogona acitia;

¹⁵Ma pe acitia keiro aia fakarogona acitia, ane iotshi acitia nogia, acitia keiro pe acitia nakoamo ane iotshi ra acitia neinogia aia iateia.

¹⁶Pe tatane tasi kowcitia tshana noso maganisa, ia tasi maganisa pe aia jimra ia ta mate, aia kanogia, ma aia katufwa aia anea mouri iacre pe acre semaganisa ia ta mate. Tasi maganesa konofo ia ta mate; avou sekoutucua iacowa kamori ia aia.

¹⁷Amaganisa iotshi ko isa; ma tasi maganisa sekonofo ia ta mate.

¹⁸Acitia keiro iotshi tagata kofarere o Atua semaganisa; kaia aia Atua nakoama kofatshigeia tshana magane, ma aia isa ana setofia aia.

¹⁹Ma acitia keiro pe acitia koromai o Atua, ma iotshi fanua wararonei komoy ia maganisa.

²⁰Ma acitia keiro pe ta Nontariki o Atua komai, ma nakatufwa acitia arapakou, pe acitia makeiro aia tasi komari, ma acitia konofo i aia tasi komari, ia tshana Nontariki Iesu Kristo. Tinei ko ta Atua mari, ma anea mouri tou ma tou.

²¹Erecriki sisi, konofo papai acowa ia tetua isa. Amen.