Read Futuna-Aniwa JUTE. 1 Bible Online

JUTE. 1 - Futuna-Aniwa bible

JUTE. 1

¹JUTE ta fetshicou o Iesu Kristo, ma ta noso o Jakobus, iacre neipenpena erefia i Atua ta Mana, ma nipare ia Iesu Kristo, ma nitapa;

²Karofa iacowa, ma aroto mereno, ma acitiafakarafia, konofo fakosore.

³Akuso, nopoge ra avou tomatua keiserea tatapuria iacowa o ta anea mouri taragi, aia erefia iateia avou keiserea tatapuria iacowa, ma koutucua mukei iacowa pe acowa tomatua sore kofiatu ane iotshi feimacowa ta fakarogrogo aia fakatasi neitufwa ia tagata neipenpena erefia.

⁴Ma faru fakou nitoro ia ta kalasia mune niare feiva iateia, acre mokagi ituai neinagi ia tenei ioria o maganisa, fakou feimacowa Atua, nokotafuri ta karofa o tshote Atua ia maganisa, ma nokovetea ta Teriki sore Atua mari, ma tshote Teriki sore Iesu Kristo.

⁵Avou acitiafakarafia imna acowa kamentua, kaia ia nopoge ituai acowa nikeiro tenei, pe ta Teriki sore nokopare ma niarafia tagata watafa ta fanua o Ijipt, wamuri ra nitakaroiai aore pe sefakarogrogo;

⁶Ma agelo senofo mukei ia tshare none, kaia nifeke niare umrai, aia nakapurutshia ia aus tou ma tou ia apouri ia ta ioria o ta nopoge sore.

⁷Hepe Sotoma ma Comora, ma umrai iotshi nifori acrawa, hepra neitufwa niare roto ia tshigo fafine tsha faruke, ma nokororo wamuri magane pouri ia konouri tapu, keinage acre fakairo tagata ioria amaganera, nokomy arotorea sore ia ioria o tiafi sore atou ma tou.

⁸Hepra foci tagata ra nimitshi maganisa ia konouri, feimacowa iotshi fasao neitucuasane magane tapu, ma fasosa o fatoriki, ma takou sore.

⁹Kaia Maikel ta agelo erefisa, ia nopogi ra nokofiatu ia tiapolo aia nifiatu ia ta noaga o Moses, nimtacu neitucua fasao sore iateia, kaia neitucua, Ta Teriki sore eisaceiria akoi.

¹⁰Kaia acre ra fasosa o anea ra acre nipuspusi; kaia taha acre keiro hepe tapakasi ma, i ane ra acre takaroiai acre.

¹¹Kawe iacre! ma acre nakaroro ia teretu o Ken, ma nifura, keiremu sore wamnri ta magane safi o Belam ia ioria, ma ioria nitakaroia acre ia nifiatu o Kora.

¹²Acre ra anopito kopaku ia tshoua tacripoga o acitiafakarafia, i nopoge ra acre kakeina ia acowa, nokokeina acre sumtacu, acre apa tavai jimra iacre, atumtagi kaifia acre kofori, afoirakou niare nohua komero, acre sehua, fakarua komate, tacina ia noaka;

¹³Apiau isa nokotapa o tatai, eifatshi kofakairo niare maganisa, afatú nokatakaro, iacre aia neinage auri sa o apouri atou ma tou.

¹⁴Inok ma, ta fitu wamuri Atam, nifasao mokagi o acre, nokoutucua, Kowcitia, ta Teriki sore nokomai ia ten thousant o niana tagata neipenpena erefisa,

¹⁵Kei ioria tagatotshi, ma keimna iotshi o acre nifeimacowa Atua keiro ta mari iotshi amaganisa tshare, acre ra ia feimacowa Atua acre neimna, ma o iotshi niare afasao mukei tagata isa neitucua ia feimacowa aia.

¹⁶Acre ra afasosa nokomusia, nokofasao hepe feimacowa amagane iotshi, nokotaro wamuri niare acitiafakarafia maganisa; ma niare arogoutu nokoutucua afasao sore palo, nokobisa ia notshino o tagata ianenei niare ane acre amo.

¹⁷Kaia, akuso, kamentua acowa afasao nokoutucua mokagi o ta apostolo o tshote Teriki sore Iesu Kristo;

¹⁸Ane ra acre neitucua iacowa takou soutari karomai i anopoge wamuri, acre karoro wamuri niari maganisa feimacowa Atua.

¹⁹Acre ra keivaia acre, acitiafakarafia amaganisa o notshino, sekoamo ta Nokano Tapu.

²⁰Kaia acowa, akuso, noatu acowa ia tshou fakarogrogo erefisa, nokomori ia ta Nokano Tapu,

²¹Konofo acowa ia ta acitiafakarafia o Atua, nokowcitia ia ta karofa o tshote Teriki sore Iesu Kristo ia anea mouri tou ma tou.

²²Ma o faru arotowa karofa acre, emna magane sece iacre.

²³Ma faru foci arafia ia Iesu ia kumtacu, nokotorotshia acre watafa ta tiafi; nokofeimacowa ta tumega kopuko sisi ia maganisa o konouri.

²⁴Milow ia aia ko tomatua keipurutshia acowa sekoto, ma keinage acowa neipenpena erefisa emoa ta foimata o tshana ta sore ia kabisa sore su,

²⁵Ia ta Atua ana sore arapakou tshote Iesu kapare acitia, keitufwa ta sore ma ta noneate, ma ta fatoriki, ma ta tomatua, milow, ma tou ma tou. Amen.