Read Futuna-Aniwa NOKOFARAIRO O ANEA KEIMAI, 1 Bible Online

NOKOFARAIRO O ANEA KEIMAI, 1 - Futuna-Aniwa bible

NOKOFARAIRO O ANEA KEIMAI, 1

¹TA anea nifakariaria o Iesu Kristo, Atua neitufwa aia keifakariaria ia tshana afetshicow, ta anea itata keimai, ma aia nikouna ma neitucua acre ia tshana agelo ia tshana fetshicou Joanes;

²Aia nokatamou iai o tafasao o Atua, ma o tafasao neitucua ia Iesu Kristo, ma o ane iotshi aia neicitia.

³Erefisa aia tawa, ma acre pe fakarogona ta afasao tenei o anea kamai, ma maganerefia ia anea neiserea ia aia, ma ta nopoge ko itata.

⁴Joanes ia ta fitu akalasia konofo ia Esia; karofa iacoua ma merino, mai ia aia konofo, ma neinofo, ma ko keimai, ma o ta fitu anokano emoa thsana afata thron.

⁵Ma nimai ia Iesu Kristo, aia ko tamari nokotamou iai, ta touramatua o acre nimate, ma ta teriki sore o ta fatoriki o iafanua wararonei. Ia aia neicitiafakarafia acitia, ma neitetaroace acitia keifeke niote amaganisa ia tshana toto.

⁶Ma aia neimna acitia keinofo fateriki ma fakou tapu ia tshana Atua ma Ta Mana, ia aia tufwa ta sore noneate ma ta tomatua atou ma tou. Amen.

⁷Koucitia aia komai ia ta Apa, ma iotshi foimata kacitia aia, ma acre nitaro aia; ma iotshi nofoga o tagata o iafanua kamakuru ia aia. Hepera, Amen.

⁸Avou ta Alfa ma ta Omeca, nokoutucua ta Teriki Atua, aia konofo, ma neinofo, ma ko keimai, ta Tomatua ia ane iotshi.

⁹Avou Joanes, niaua noso, ma niamo ia acoua faru o ta karoiai aroto, ma ia tavaka ma merino ia Iesu, avou neinofo ia ta fanua Motu Patmos, neisewa ia afasao o Atua, ma ta kotamousa o Iesu.

¹⁰Avou neinofo ia ta Nokano ia ta Nopoge tapu o ta Teriki, ma avou neirogona wamuri avou tasi noreo sore, hepe o ta tupu nokoutucua,

¹¹Avou ta Alfa ma ta Omeca, ta neikamata ma ta wamuri; ma taha akoi koucitia serea ia tasi tatapuria ma kouna aia ia ta fitu akalasia; ia Efesus, ma ia Smyrna, ma ia Percamus, ma ia Thyataira, ma ia Sartes, ma ia Filatelfia, ma ia Laotasia.

¹²Ma avou nitafuri keicitia ta noreo nifasao ia avou, ma nakatafuri avou neicitia fitu aganea nage kantel iai, o colt,

¹³Ma ia aroto o ta fitu aganea o kantel nofo iai, tasi hepe ta nontariki o tagata, nitaka ia tasi mega nirocofia ia tshana avai, ma nifousia kofori ta anou ia ta toutshi o colt.

¹⁴Tshana nouru ma tshana fouru kego ana hepe kego fouru o asip, kego hepe asno, ma tshana foimata nikoura hepe tourafi o tiafi;

¹⁵Ma tshana novai hepe bras erefisa, hepe aia neimna erefisa ia tiafi sore; ma tshana noreo hepe ta noreo o nalupai avai tafe.

¹⁶Ma aia nipurutshia ia tshana norima matou fitu afatu, ma nokomai watafa tshana rogoutu tasi umtakai waramwaru tomatshira palo, ma tshana foimata hepe ta tara nokoneate ia tshana tomatua.

¹⁷Ma hepe avou neicitia aia avou nito ia tshana vai hepe tasi nimate. Ma aia neinagi tshana norima matou iluga avou, nokoutucua, natshicina kumtacu; avou ta neikamata ma ta wamuri.

¹⁸Ma avou ta tasi nokomouri; avou nimate, ma koucitia avou komouri atou ma tou, ma avou nakamo akai o ta mate ma o tiafi sore.

¹⁹Ianenei serea ane iotshi akoi nakacitia, ma anea nofo melou, ma anea kamai wamuri nei.

²⁰Ta mune nokano o ta fitu afatu akoi neicitia ia tshaku norima matou, ma ta fitu aganea o akantel. Ta fitu afatu nofo ta agelo o ta fitu akalasia, ma ta fitu aganea o kantel acre ta fitu akalasia.