Read Futuna-Aniwa NOKOFARAIRO O ANEA KEIMAI, 10 Bible Online

NOKOFARAIRO O ANEA KEIMAI, 10 - Futuna-Aniwa bible

NOKOFARAIRO O ANEA KEIMAI, 10

¹MA avou neicitia tasi foci tomatua agelo nokonifo ia taragi, nitaka ia tasi apa, ma ta tumutu neinofo iluga tshana nouru, ma tshana foimata hepe ta tara, ma tshana novai hepe apou o tiafi;

²Ma aia nipurutshia ia tshana norima tasi tatapuria sisi nifogia, ma aia neinagi tshana novai matou ia tatai, ma tshana novai masui ia fanua.

³Ma aia nitapa ia noreo sore su, hepe noreo o ta laion pe aia nokovaro, ma hepe aia nitapa ta fitu afatshiri nitagurgnuru ia niare anoreo.

⁴Ma wamuri ta fitu afatshiri nitagurgnuru; ma avou neirogona tasi noreo nokomai ia taragi nokoutucua, pofna mukei anea ta fitu afitshiri neitucua, ma seserea acre.

⁵Ma ta agelo avou neicitia nokotu ia tatai ma ia ta fanua neitshicitshiakace tshana norima matou ia taragi,

⁶Ma nifasao mukei tapu ia aia komouri atou ma tou, aia neimna ataragi ma anea iotshi ia aia, ta afanua ma anea iotshi nofo ia aia, ma tatai ma anea iotshi ia aia, pe atou, senofo wamurira.

⁷Kaia i anopoge o ta anoreo o ta fakafitu agelo, roaia aia ko itata keipuia, ia taha nopoge ra ko kurava ta mune o Atua, hepe ta afasao erefia aia neitucua ia tshana afetshicou ta aprofeta.

⁸Ma ta norio avou neirogona nokomai ia taragi, avou neirogona aia foci nokofasao ia avou, ma nokoutucua, Fano amo ta tatapuria aia kofogia ia ta norima o ta agelo nokotu ia tatai ma ta fanua

⁹Ma avou nifano ia ta agelo, nokoutucua ia aia tufwa avou ta tatapuria sisi. Ma aia neitucua iatavou, Amo aia, ma keinace aia, ma aia kamna tshou nonai kona, kaia aia ia tshou rogoutu kamugaro hepe hone.

¹⁰Ma avou niamke ta tatapuria sisi nipurutshia ia ta norima o ta agelo, ma nikeina iotshi o aia, ma ia tshaku rogoutu aia nimugaro hepe hone, ma wamuri avou nikeinace aia, tshaku nonai aia neimna kona.

¹¹Ma aia neitucua iatavou, Akoi katucua foci afasao o anea kamai ia nalupai tagata, ma nalupai afanua, ma afasao nalupai, ma fatoriki.