Read Futuna-Aniwa NOKOFARAIRO O ANEA KEIMAI, 14 Bible Online

NOKOFARAIRO O ANEA KEIMAI, 14 - Futuna-Aniwa bible

NOKOFARAIRO O ANEA KEIMAI, 14

¹MA avou neicitia ta Lam nokotu ia ta ora Seion, ma ia aia tasi huntret ma forte ma four thousant, nakamo tshana neigo ma ta neigo o tshana Tamana neiserea ia niare mugarai.

²Ma avou neirogona tasi noreo nimai ia taragi, hepe ta noreo o avai tafe nalupai, ma hepe ta noreo o tafatshiri sore, ma ta noreo avou neirogona aia hepe tagata nalupai nokogoro ia niare aharp.

³Ma acre feke hepe tagaro fou mokagi ta thron, ma mokagi ta efa anea mouri ma aelter; ma jimra tatane tasi tomatua keiro ta tagoro, acre ana ta huntret ma forte ma four thousant, acre ana nifakamata ia iafanua wararonei.

⁴Acre semaganisa ia fafine, ma acre hepe tamafine fou ekira, acre ra roro wamuri ta Lam wehe aia kofano. Acre ra nifakamata o tagata keinofo takofeigota ia Atua ma ia ta Lam.

⁵Ma ia rugoutorea korefu sefano, ma acre ekeira erefisa kagi mokagi ta thron o Atua.

⁶Ma avou neicitia tasi foci agelo nokorere ia avavania o taragi, nakoamo ta atou ma tou afasao erefisa keikova iacre nokonofo ia iafanua, ma ia afanua iotshi, ma nofoga o tagata, ma afasao, ma tagatotshi;

⁷Ma aia neitucua ia noreo sore, Kumtacu Atua, ma tufwa aia ta sore, ma ta our o tshana ioria komai, ma mori aia neimna taragi ma iafanua, ma tatai ma avai nupu.

⁸Ma tasi foci, ta fakarua agelo wamuri aia, nokoutucua, Kotu, kotu ko Babylon ta sore, aia neimna tagata o iafanua iotshi keinumea o ta weina o ta fakainina o tshana tshigo afine.

⁹Ma tasi foci agelo, ta fakatoru nifano wamuri acre, nokoutcua ia ta noreo sore, pe tatane tasi komori ta ane mouri ma tshana noata, mo koamo tshana tatapuria ia tshana cumarai, mo ia tshana norima matou.

¹⁰Aia foci kanumea o ta weina o ta fakainina o Atua, aia ko penpena sefakafirofiro ia ta kup o tshana fakainina; ma aia katasa ia tiafi ma arukasi mokagi ta agelo erefisa, ma mokagi ta Lam.

¹¹Ma ta tousafi o niare tasa kopukace atou ma tou, ma acre seamo kogapu tiau mo tupo, acre mori ia ta ane mouri ma tshana noata, ma acre iotshi nakamo ta tatapuria o tshana neigo.

¹²Icunei ko ta merino o tagata o Iesu, acre maganerefia ia afasao tapa mukei o Atua, ma ta fakarogrogo o Iesu.

¹³Ma avou neirogona tasi noreo nimai ia taragi nokoutucua, Serea, Erefisa kagi acre nimate pe acre nimate ia ta Teriki, wamurira; keini koutucua ta Nokano, pe acre kogapu ia niare avere, ma niare avere roro wamuri acre.

¹⁴Avou nikamata ma neicitia tasi kego apa, ma iluga ta apa avou neicitia tasi nokonofo hepe ta nontariki o tagata, nakamo ia tshana nouru tasi kroun o colt, ma ia tshana norima tasi emtakai tomatshira safi.

¹⁵Ma tasi foci agelo nimai watafa ta fare mori sore, nokotapa ia noreo palo ia aia neinofo ia ta apa, Tuciace tshou safi tomatshira ma kafakafuriacina, ma ta our keiserea komai, ma ta nohua o ta fanua ko koleu fakasore.

¹⁶Ma aia neinofo ia ta apa nifakariace tshana safi tomatshira iafanua, ma ta iafanua nifakafuriacina.

¹⁷Ma tasi foci agelo nimai watafa tafare mori sore ia taragi, aia foci nakamo emtakai tomatshira safi.

¹⁸Ma tasi foci agelo nimai watafa tafata, aia nakamo tomatua ia tiafi; ma aia nitapa ia noreo sore ia aia niamo ta emtakai safi tomatshira, nokoutucua, kounace, fakariace ma fafuracina, ma fetacina ta nomwi o avaini o iafanua wararonei, ma tshana nohua acrep koleu fakasore kagi.

¹⁹Ma ta agelo nifakareace tshana tomatshira palo ra iafanua ma nifakafuriacina ta anohua o avaini o iafanua, ma neinage iotshi ia taganea tomea, ra sore taganea tomea wena iai o ta fakainina o Atua.

²⁰Ma taganea o weina nitomea watafa ta tumrai sore, ma toto o ta nohua nimarigi watafa taganea ia ta braital o ahos papai hepe ia tu mail.