Read Futuna-Aniwa NOKOFARAIRO O ANEA KEIMAI, 15 Bible Online

NOKOFARAIRO O ANEA KEIMAI, 15 - Futuna-Aniwa bible

NOKOFARAIRO O ANEA KEIMAI, 15

¹MA avou neicitia tasi foci ane sore ia taragi, sore ma masaro iateia, fitu agelo nakamo fitu amace isa sore, acre ta kurava amace mo ia acre ta kurava o afakainina o Atua.

²Ma avou neicitia tasi tatai hepe o clas repua ia tiafi, ma acre nimai setakaroiai ma semori ia ta ane mouri, mo tshana noata, ma ia ta tatapuria nitaua tshana neigo, nokotu itata ta tatai o clas, nakamo aharp o Atua.

³Ma acre feke ta tagoro o Moses ta fetshicou o Atua, ma ta tagoro o ta Lam, nokoutucua, Sore ma mesaro tshou avere nofo. Teriki Atua ta Tomatua, totonu ma tamari tshou afakairo, Akoi Teriki o tagata o Jesu.

⁴Akai sekamtacu akoi Teriki sore, ma kabisa ia tshou neigo? Ma Akoi ana tapu erefisa, ma tagata o iafanua iotshi kamai ma mori mokagi akoi, ma tshou avere totonu erefisa iotshi nakacitia.

⁵Ma wamuri ane iotshi ra avou neicitia, ma ta fare mori sore o tafasao erefisa ia taragi nitshike;

⁶Ma nimai watafa ta fare mori sore, ta fitu agelo niamo ta fitu amace sore isa, nifeferace ia afatu nomata sore erefisa ma nokononeate, ma nifousia kofori niare nofafata ia abelt o colt.

⁷Ma tasi o ta efa ane mouri neitufwa ia ta fitu agelo fitu aboul o colt nifonu o ta fakainina o Atua, aia komouri atou ma tou.

⁸Ma ta fare mori sore nifonu ia ta tousafi o ta sore o Atua, ma ia tshana tomatua, ma jimra tasi tomatou keifano ia ta fare mori sore, mokagi ta fitu amaci sore isa o ta fitu agelo kuravace.