Read Futuna-Aniwa NOKOFARAIRO O ANEA KEIMAI, 18 Bible Online

NOKOFARAIRO O ANEA KEIMAI, 18 - Futuna-Aniwa bible

NOKOFARAIRO O ANEA KEIMAI, 18

¹WAMURI ane iotshi ra avou neicitia tasi foci agelo nokofanifo ia taragi, aia nakamo tomatua sore, ma iafanua neimna merama ia tshana noneate.

²Ma aia nitapa ia noreo sore kage, nokoutucua nokotu nokotu, ko Babelon ta sore, ma aia konofo ta none o agelo isa nofo iai, ma ta tumrai o iotshi nokano isa, ma ta fare o iotshi amanu isa.

³Ma ia ta weina o ta fakainina o tshana tshigo fafine ma fakou tagata o iafanua iotshi neinumea, ma fateriki o iafanua nitshigo fafine ia aia, ma fakou nifakamata anea mane nakamo outa nalupai ia tomatua o tshana maganisa.

⁴Ma avou neirogona tasi foci noreo nimai taragi nokoutucua, komai watafa aia tshaku tagata, pe acoua sekotu ia tshana maganisa, ma pe acoua seamo nuntafa o ta fakamata ioria o tshana maganisa.

⁵Ma tshana amaganisa konace ia taragi, ma Atua nakamentua tshana amaganisa.

⁶Ioria aia hepe aia neitufwa ioria, ma tufwa aia fakarua ioria, ta fakarua hepe tshana avere, ia ta kup aia repua, repua fakarua ia aia.

⁷Ia ane aia neimna aia ta sore, ma tshana roto nifeferace ia amaganisa, totonu hepera tufwa aia o tasa ma tagi, ma aia nokoutucua ia tshana roto, avou konofo tasi fine riki, ma jimra tasi fine nofo ana, ma sekacitia nokotagi.

⁸Ianenei ia tasi nopoge tshana amy kamai, mate, ma nokomakuru, ma tshitogi, ma katugeace aia ia tiafi, ma tomatua sore ko ta Teriki ioria aia.

⁹Ma fatoriki o iafanua nitshigo ma maganisa ia aia, ma nibisa feiferace nofo iateia, katagi ma kamakuru ia aia ia ta nopoge acre koucitia ta tousafi o tshana nokotugia.

¹⁰Nokotu papai kumtacu tshana tasa, nokoutucua, Kawe, kawe ta sore umrai Babelon, ta tumrai tomatua, ma ia tasi our tshou ioria tasa komai.

¹¹Ma fakou nokofakamata anea mane o iafanua kotagi ma komakuru ia aia, ma tagata sefakamata niare anea mane wamurira;

¹²Ta anea mane o colt ma selver, ma afatu fakamata sore, ma aperl, ma lenen erefisa, ma ouroura tumega, ma selk, ma ferfero, ma iotshi thyni tererakou, ma iotshi aganea o aivery, ma iotshi aganea neimna o tererakou erefisa, ma bras, ma airon, ma marbel;

¹³Ma sinamon, ma spaisi, ma anea konamu, ma tavai iamosia, ma rosin, ma weina, ma avaineu, ma flou erefisa, ma wit, ma akurimatou, ma asip, ma ahos, ma akaraiot, ma anotshino o tagata, ma anokano o tagata.

¹⁴Ma anohua tshou roto acitiafakarafia nefeke akoi, ma anea iotshi erefia, ma akai nifakamata sore nijimra iatakoi, ma fakou sekacitia acre foci ia akoi wamurira.

¹⁵Fakou nifakamata ane iotshira, acre ia aia niamo outa sore, kakotu papai ma kumtacu tshana tasa, nokotagi ma nokomakuru.

¹⁶Nokoutucua, Kawe, kawe, ta tumrai sore, aia nitaka ia ta umega lenen erefisa ma ouroura ma ferfero, ma nikarakaia aia colt ma afatu nomata sore ma aperl!

¹⁷Ma ia tasi our outa sorera ko nitakaroiaice. Ma iotshi fateriki o avaka, ma iotshi fakou ia fanua papai, ma fakou o avaka, ma iotshi fetshicou nakamo niare akai ma fakamata nokovere ia tatai, nikotu papai.

¹⁸Ma nitagi sore hepe acre neicitia ta tousafi o tshana nokotugia, nokoutucua taha tumrai hepe tenei tumrai sore?

¹⁹Ma acre nikotuturefu ia niare anouru, ma nivaro nokotagi ma nokomakuru, nokoutucua, Kawe, kawe, ta tumrai sore, ia aia iotshi tagata niamo outa sore ia niare avaka ia tatai ia tshana nifakamata anea mane! ma ia our tasi aia ko takaroiai.

²⁰Kabisa ia takaroiai aia, akoi taragi, ma acoua tagata o Iesu, ma acoua apostolo, ma acoua aprofeta, ma Atua nakaioria niaua ioria ia aia.

²¹Ma tasi tomatua agelo neitshicitshiakace tasi tafatu sore hepe tasi sore tafatu soroa flou ia aia, ma nitouwaki aia ia tatai, nokoutucua, Hepe nei ia ta sore kotu Babelon ta tumrai sore katouwaki iraro, ma sekacitia aia foci.

²²Ma ta noreo o acre feke agoro ia aharp, ma ia anoreo, ma ia anabula, ma ia atupu sekarogona foci ia akoi, ma jirma tasi tagata vere, ia avere tasi kanofo foci ia akoi, ma ta noreo o ta fata soroa flou sekarogona foci ia akoi.

²³Ma ta alama o ta lamp sekalama foci ia akoi, ma ta noreo o tatane mo o tafine nikovaga sekarogona foci ia akoi, ma niaua tagata nifakamata anea mane neinofo afateriki o iafanua, ma ia tshou tafegeitu akoi niarasia tagatotshi iafanua iotshi.

²⁴Ma neicitia ia aia ta toto o aprofeta ma o tagata o Iesu, ma o iotshi nitaia mate iafanua.