Read Futuna-Aniwa NOKOFARAIRO O ANEA KEIMAI, 19 Bible Online

NOKOFARAIRO O ANEA KEIMAI, 19 - Futuna-Aniwa bible

NOKOFARAIRO O ANEA KEIMAI, 19

¹WAMURI ane iotshi ra avou neirogona hepe anoreo sore o tagata nalupai su ia taragi, nokoutucua, Haliluia, Kapare ia aneamouri, ma ta noneate, ma ta tomatua, tsha tshote Atua.

²Ma tamari ma totonu tshana ioria iotshi, ma aia neiioria ta fine sore tshigo tagata, aia neimna iafanua purou ia tshana tshigo tagata, ma aia nakaioria ta toto o niana afetshicou ia tshana arima.

³Ma afakarua acre neitucua, Haliluia. Ma tshana tousafi nopukoce atou ma tou.

⁴Ma ta twente ma efa aelter, ma ta efa anea mouri, nito iraro ma nimori Atua aia konofo ia ta thron, nokoutucua, Amen; Haleluia.

⁵Ma tasi noreo nimai watafa ta thron, nokoutucua, Tufwa agoro ia tshote Atua, iotshi acoua tshana afetshicou, acoua pe kumtacu aia, tasisi ma ta sore

⁶Ma avou neirogona ta noreo hepe o tagata nalupai su, ma hepe anoreo o avai nalupai, ma hepe ta noreo o afatshiri nalupai sore, nokoutucua, Haliluia; ma ta Teriki tshote Atua, ta tomatua ia ane iotshi, ko ta sore Teriki.

⁷Erefisa acitia kabisa sore su, ma erefisa keitufwa aia ta sore noneate, ma ta fakavageina o ta Lam komai, ma tshana fine nakarakaia aia kofakana.

⁸Ma neitufwa aia nakataka ia umega erefisa lenen, kego ma ema, ma ta lenen erefisa ko ta avere totonu o tagata o Iesu.

⁹Ma aia neitucua iatavou, serea, Erefisa ko acre nitapa ia ta toktokoga o ta Lam. Ma aia neitucua iatavou, acrera afasao tamari o Atua.

¹⁰Ma avou nito mokagi tshanavai keimori aia, ma aia neitucua iatavou, Fatshigeia akoi semori iatavou; Avou tasi fetshicou ia akoi ma ia tshou anoso pe kopurutshia ta fasao o Iesu; mori Atua; ma ta fasao Iesu ko ta nokano o akova o aprofeta.

¹¹Ma avou neicitia ta taragi nitshiki, ma neicitia tasi kego hos, ma aia nikoike iluga aia, nitapa Erefisa ma Tamari, ma ia magane totonu aia ioria ma imna tatoua.

¹²Ma tshana foimata hepe ta koura o tiafe, ma ia tshana nouru neinofo nalupai akroun erefisa, ma aia nakamo tasi neigo neiserea, ma jimra tasi keiro aia, kaia aia ana.

¹³Ma aia ko taka ia umega nitasocina ia toto, ma tshana neigo ko Tafasao o Atua.

¹⁴Ma acre nalupai o tatoua ia taragi niroro muri aia nikoike ia ahos kego, nitaka ia lenen erefisa, kego ma ema.

¹⁵Ma nimai watafa tshana rogoutu tasi emtakai tomatshira palo, pe ia aia aia kasawa tagata o iafanua, ma aia kamna acre maganerefia ia ta tokotoko o airon, ma aia nitakumea ta weina taganea o ta tomatua fakainina o ta Tomatua Atua.

¹⁶Ma aia nakamo ia tshana umega ma ia tsana nobile tasi neigo neiserea Teriki Sore o Iotshi Teriki, ma Tatane Sore o Iotshi Atane Sore

¹⁷Ma avou neicitia tasi agelo nokotu ia ta tara, ma aia nitapa ia noreo sore, nokoutucua ia iotshi amanu korere ia avavania o taragi, komai ma fetacina ia ta sore akai fiafi o Atua sore.

¹⁸Pe acoua keina ta konouri o fateriki, ma ta konouri o akapten, ma ta konouri o fakou tomatua sore, ma ta konouri o ahos, ma o acre koike iluga acre, ma ta konouri o tagatotshi nokaragragi ma safsafe sisi ma sore.

¹⁹Ma avou neicitia ta ane mouri ma fateriki o iafanua, ma niare tagata o tatoua, nifetacina ia tatoua ia aia nikoike ia ta hos ma ia acre wamuri aia.

²⁰Ma ta ane mouri nipurutshia, ma ia aia ta profeta nikorefu, pe neimna anea sore mokagi aia, ia acre aia niarasia acre niamo ta tatapuria o ta ane mouri, ma acre nimori ia tshana noata. Acrawa nimouri nitouwaki ia tiafi sore koura ia rukasi;

²¹Ma acre iotshi nofo wamurira neitshi mate ia tomatshira palo o aia nikoike ia ta hos, aia nimai watafa tshana rogoutu, ma iotshi amanu nimakona ia niare konouri.