Read Futuna-Aniwa NOKOFARAIRO O ANEA KEIMAI, 2 Bible Online

NOKOFARAIRO O ANEA KEIMAI, 2 - Futuna-Aniwa bible

NOKOFARAIRO O ANEA KEIMAI, 2

¹IA ta agelo o ta Kalasia nofo ia Efesus serea; ane iotshira neitucua aia kopurutshia ta fitu afatu ia tshana norima matou, aia katakaro ia ta roto o ta fitu aganea o kantel o colt;

²Avou keiro tshou avere, ma tomatua vere setaru ma merino, ma pe akoi feimacoua fakou isa, ma akoi nifatshigeia ta magane o acre neitucua acre apostolo, ma acre jimra apostolo, ma nakeiro acre neirefu.

³Ma akoi nakamo fenagaro merino, ma niavere ia tshaku neigo, ma setaru.

⁴Kaia avou nakamo tenei ane isa o akoi, pe akoi nifeke tshou fakatasi acitiafakarafia.

⁵Ianenei akoi kamentua taha akoi nitouwaki, ma tagi, ma emna ta fakatasi maganerefia hepe mokagi, mo avou kamai iatakoi, ma keiamke tshou lampe watafa tshana none, pe akoi setagi.

⁶Kaia tenei akoi nakamo, pe akoi feimacoua ta magane o ta Nikoletens, ma avou foce feimacoua acre.

⁷Aia nakamo ta nontariga erefia aia fakarogona taha ta Nokano koutucua ia ta akalasia. Ia aia tomatua ia ta kurava, ia aia avou katufwa keina o tererakou o ta mouri, aia konofo ia ta vere o Atua.

⁸Ma ia ta agelo o ta Kalasia ia Smyrna serea; ane iotshi ra neitucua aia ta fakatasi, ma aia ta wamuri aia nimate, ma komouri foci.

⁹Avou keiro tshou roto nimy ia anea emna akoi tagi, ma tshou outa jimra, kaia tshou outa ko sore, ma avou keiro ta fasosa o acre koutucua acre tagata o Juteia, ma acre ko jimra, kaia acre tasi fare mori o Satana.

¹⁰Sumtacu anea mane nokomai keitakaroiai tshou roto, koucitia tiapolo ko itata touwaki faru o acoua ia tafare mukei, pe iarmesosa acoua, ma takaroiai iacoua anopoge tumtagahuru; kaia nofo akoi nokopurutshia mukei ta fakarogrogo ia ta mate, ma avou katufwa akoi ta (krown) topurau o ta mouri.

¹¹Aia nakamo ta nontarega, erefia aia fakarogona taha ta Nokano koutucua ia ta akalasia, aia tomatua maganerefia ia ta nopoge wamuri, setakaroiai aia ia ta mate fakarua.

¹²Ma ia ta agelo o ta kalasia ia Percamus serea; anera koutucua aia nakamo ta emtakai warumwara tomatshira palo.

¹³Avou keiro ta none wehe akoi konofo, iai ta fata o Satana konofo, ma akoi kopurutshia mukei tshaku neigo, ma seneivetea tshaku fakarogrogo, i anopoge o Antepas tshaku tane mari, aia nitaia mate ia acoua, wehe Satana konofo.

¹⁴Kaia avou nakamo faru anea tshou isa, Ianei akoi nakamo faru o acoua kopurutshia ta nokofakairo o Belem, aia nifakairo Belek keinagi tarefoi neimna keitshipatshipa iai tagata o Isreil, keina anea takavari neitshia mate ma nikavatu ia tetua isa, ma keitshigo atamafine.

¹⁵Ma foci akoi nakamo faru tagata kopurutshia ma fakairo ta fasao ma magane o ta Nikoletans, amaganera avou feimacoua.

¹⁶Tagi ianenei, mo avou komai iatakoi meloua, ma avou kamna tatoua ia acre, ia tomatshira palo o tshaku rogontu.

¹⁷Aia nakamo ta nontariga, erefia aia fakarogona taha ta Nokano koutucua ia ta Akalasia. Ia aia maganerefia ma fakarogrogo ia nopoge wamuri, ia aia avou katufwa o ta muni mana, ma avou katufwa aia tasi fatu keigo, ma ia ta fatu tasi neigo fou neiserea aia jimra tane tasi keiro aia, kaia aia ana nakamo aia.

¹⁸Ma ia ta agelo o ta kalasia o Thyataira serea, anera koutucua ta Nontariki o Atua, tshana foimata hepe ta koura o tiafi, ma tshana avai hepe bras kotaptapa erefisa.

¹⁹Avou keiro tshou avere, ma tshou acitiafakarafia, ma tshou fakarogrogo ma karofa ma fenagaro merino, ma pe tshou avere wamuri sore kagi acre ia neikamata.

²⁰Kaia avou nakamo faru ane akoi seneimna erefia, pe akoi setouwaki ta fine Jesebel, pe aia koutucua aia tasi fine o aprofeta, ma aia fakairo ma arafia tshaku afetshicou keitshigo afine tsha faruke, ma keina akavari nikavatu ia tetua pouri.

²¹Ma avou neitufwa aia faru atou pe aia tagi ma feke tshana maganisa, kaia aia sekatagi ma senatshicina.

²²Koucitia avou katouwaki aia ia tapotu, ma acre maganisa ia aia ia niare aroto nokomy sore su, pe acre setagi ma senatshicina tshana avere isa.

²³Ma avou katshi mati tshana erecriki ia amace isa, pe iotshi akalasia kakeiro pe avou aia fatshigeia afenagaro ma aroto, ma avou katufwa ta fakamata ia tasi ma sece iotshi o acoua hepe niawa avare.

²⁴Kaia ia acoua avou koutucua, ma ia acre iotshi konofo ia Thyataira, ia iotshi seamo tenei fakairo isa o Satana, hepe acre koutucua, avou senage ia acoua tasi foci amoga.

²⁵Kaia anea iotshi acoua nakamo purutshia mukei ia taha nopoge avou kamai.

²⁶Ma ia aia tomatua maganerefia, ma aia kopurutshia tshaku avere ia ta nopoge wamuri, ia aia avou katufwa tomatua keifakairo tagata o iafanua.

²⁷Ma aia kafakairo acre ia ta tokotoko o tafaru (iron) hepe aganea neimna o takere kofatshi ia kogofogo, hepe nakatufwa ia tshaku Tata;

²⁸Ma avou katufa aia tafatuau.

²⁹Aia nakamo ta nontarega, erefia aia keifakarogona taha ta Nokano koutucua ia ta akalasia.