Read Futuna-Aniwa NOKOFARAIRO O ANEA KEIMAI, 6 Bible Online

NOKOFARAIRO O ANEA KEIMAI, 6 - Futuna-Aniwa bible

NOKOFARAIRO O ANEA KEIMAI, 6

¹MA avou neicitia ta Lam nitshiki tasi o ta fitu fakamougo, ma avou neirogona tasi o ta efa anea mouri nokoutucua hepe ta noreo o tafatshiri, Komai ma koucitia.

²Ma avou neicitia, tasi hos kego, ma aia neinofo iluga aia niamo ta fana, ma neitufwa aia tasi kroun, ma aia nimai watafa nokotaia, ma keitaiace acre.

³Ma wamuri aia nitshiki ta fakarua fakamouga, avou neirogona ta fakarua anea mouri nokoutucua, Komai ma koucitia.

⁴Ma tasi foci hos nimai watafa, aia ouroura, ma ia aia neinofo iluga neitufwa keiamke ta merino ia iafanua wararonei, ma pe acre taia tasi ma sece o acre, ma neitufwa aia tasi sore tomatshira palo.

⁵Ma wamuri aia nitshike ta fakatoru fakamouga avou neirogona ta fokatoru anea mouri nokoutucua Komai ma keicitia, ma avou neicitia, ma tasi ouri hos, ma aia neinofo iluga aia niamo tasi fakarogoi ia tshana norima.

⁶Ma avou neirogona hepe tasi noreo ia aroto o ta efa anea mouri nokoutucua, tasi taganea o wit fakamata o aia tasi pene, ma toru aganea o barli fakamato tasi pene, ma ta vai oliv ma veini akoi setakaroiai.

⁷Ma wamuri aia nitshiki ta fakaefa fakamouga, avou neiregona ta noreo o ta fakaefa ane mouri nokoutucua, Komai koucitia.

⁸Ma avou neicitia tasi hos ferfero, ma aia neinofo iluga aia, tshana neigo ko Mate, ma tiafi sore nifano wamuri aia. Ma neitufwa ia acrawa tomatua ia fakafa nopito o iafanua, keitaia ia tomatshira palo, ma ia tshitogi akoi nibune, ma ia ta mate, ma ia aneiro o iafanua wararonei.

⁹Ma wamuri aia nitshiki ta fakarima fakamouga, avou neicitia iraro ta fata anokano o acre nitaia mate ia acre feimacoua ta fasao o Atua, ma afasao acre nikotamousa iai;

¹⁰Ma acre nitapa ia ta noreo sore, nokoutucua, Efia atou, Teriki sore, ta itapu ma tamari, akoi seioria ma foupani tshome toto ia acre konofo ia ta fanua?

¹¹Ma neitufwa iacre iotshi tasi umega kego, ma aia neitucua iacre, pe erefia acre kogapu faru foci atou, ia taha nopoge faru foci afetshicou ma niare anoso, nakataia mate hepe acre, nitaia acre nakamna kurava.

¹²Ma avou neicitia wamuri aia nitshiki ta fakaono fakamouga, ma tasi tamahuke sore nimai, ma tara nitafuri ouri hepe umega o akato o afoiuru, ma iotshi tumrama nitafuri hepe toto.

¹³Ma afatú o taragi nito ia ta kere, hepe tererakou tsharupe touwaki tshana tsharupe sekoleu wamuri tumtagi sore nakaruruiace aia.

¹⁴Ma ta taragi niamkece hepe puria o pepe kopuria, ma iotshi aora ma fanua motu niamke ia niare anone.

¹⁵Ma ta fateriki o iafanua, ma fakou sore, ma fakou sore o tatoua, ma acre niare outa sore, ma acre tomatua, ma iotshi fakou nifousia, nifura ia apunaga ma ia afatu sore o ta aora.

¹⁶Ma acre neitucua ia ta aora ma ia ta fatu sore, kotu ia acime, ma funa acime ia ta foimata o aia konofo ia ta thron, ma ia ta fakainina o ta Lam;

¹⁷Ma ta sore nopoge o tshana fakainina komai, ma akai ko tomatua keikotu?