Read Futuna-Aniwa NOKOFARAIRO O ANEA KEIMAI, 7 Bible Online

NOKOFARAIRO O ANEA KEIMAI, 7 - Futuna-Aniwa bible

NOKOFARAIRO O ANEA KEIMAI, 7

¹WAMURIRA avou neicitia efa agelo nokotu ia ta efa nunturi o iafanua, nokopurutshia ta efa atumtagi o iafanua wararonei, pe jimra tasi tumtagi kosau ia iafanua, mo ia tatai, mo ia tasi tererakou,

²Ma avou neicitia tasi foci agelo neinace ia nontafa tara nokonace iai, aia nikamo ta fakamouga o ta Atua mouri; ma aia nitapa ia noreo sore ia ta efa agelo, neitufwa iacre keiiauiai iafanua ma ta tai.

³Nokoutucua seiauiai iafanua, mo tatai, mo aterakou ia taha nopoge acime nafakamouga ta afetshicou o o tshote Atua ia niare anomugarai.

⁴Ma avou neirogona ta tawa o nifakamouga ia tatapuria tasi hunteret ma forte ma four thousant, nifakamouga fetacina ia iotshi anofoga o tagata o Isreil.

⁵O ta nofoga o tagata o Juta nifakamouga ia tatapuria twelv thousant. O ta nofoga o tagata o Ruben twelv thousant; nifakamouga. O ta nofoga o tagata o Cat twelv thousant; nifakamouga.

⁶O ta nofoga o tagata o Ashir twelv thousant; nifakamouga. O ta nofoga o tagata o Naftali twelv thousant; nifakamouga. O ta nofoga o tagata o Manasi twelv thousant; nifakamouga.

⁷O ta nofoga o tagata o Saimon twelv thousant; nifakamouga. O ta nofoga o tagata o Livai twelv thousant; nifakamouga. O ta nofoga o tagata o Isakar twelv thousant; nifakamouga.

⁸O ta nofoga o tagata o Sebulon twelv thousant; nifakamouga. O ta nofoga o tagata o Josef twelv thousant; nifakamouga. O ta nofoga o tagata o Benjamin twelv thousant nifakamouga.

⁹Wamuri ane iotshi ra avou neicitia, ma tagata nalupai su jimra tatane tasi tomatua tawa acre, o iafanua iotshi, ma o iotshi anofoga o tagatoshi, ma o iotshi afasao, nikotu mokagi ta thron ma mokagi ta Lam, nitaka ia umega kego ma palo, ma apam ia niare arima;

¹⁰Ma acre nitapa ia noreo sore, nokoutucua, Kapare ia aneamouri ia tshote Atua nokonofo ia ta thron, ma ia ta Lam.

¹¹Ma iotshi agelo nikotu kofori ta thron, ma kofori aelter, ma ta efa anea mouri, ma acre nito mokagi ta thron ia foimatorea, ma nimori Atua,

¹²Nokoutucua, Amen: Afasao erefisa, ma ta sore noneate, ma arapakou, ma athank, ma ta sore, ma tomatua keitufwa ia tshote Atua atou ma tou. Amen.

¹³Ma tasi o aelter neifasao neitucua iatavou, Akai acre nitaka ia umega palo ma kego, ma acre nimai wehe?

¹⁴Ma avou neitucua iateia, Thsaku Teriki, akoi keiro. Ma aia neitucua iatavou, acrera nimai watafa sore sewa ma nakatataroa niare umega palo, ma neimna acre kego ia ta toto o ta Lam.

¹⁵Ianenei acre nofo mokagi ta thron o Atua; ma acre vere iateia tiau ma tupo ia tshana fare mori sore, ma aia neinofo ia ta thron konofo ia acre.

¹⁶Acre sekatshitogi foci, mo sekamate tavai foci, ma tara sekatshi acre, mo tasi evera sore.

¹⁷Ma ta Lam aia konofo ia ta roto o ta thron kafatshigeia acre, ma karafia acre ia avai anupu nokonace o mouri; ma Atua iamosiace iotshi noreimata ia niare foimata.