Read luganda Ester 2 Bible Online

Ester 2 - luganda bible

Ester 2

¹Sãdši ne̱ ase̱ le̱, beni maṅtše̱ Ahašweroš mlila le̱ nā dšo̱ le̱, ekai Wašti ke̱ noni efe le̱ ke̱ noni akpe̱ mli ye̱ ehe le̱.

²Ke̱ke̱ ni maṅtše̱ le̱ tšũdši le̱ ni súmoo̱le̱ le̱ kē̱ ake̱: Hã atao oblayei froi ní he yo̱ fe̱o ahã maṅtše̱,

³ni maṅtše̱ ato no̱kwe̱lo̱i ye̱ emaṅtše̱yeli šikpõdši le̱ fẽ no̱, koni ame̱bua oblayei froi ní he yo̱ fe̱o le̱ fẽ nā ke̱ba Šušan mō̃ le̱ṅ ye̱ yei awe le̱, ni atuame̱ awo Hegai, maṅtše̱ piafonyo ni kwe̱o̱ yei le̱, deṅ, ni ahãame̱ ame̱hesāmo̱ nibii;

⁴ni oblayō ní aasa maṅtše̱ hĩe le̱ atšṍ maṅnye ye̱ Wašti nãdšiaṅ. Ni wiemo̱ le̱ sa maṅtše̱ le̱ hĩe, ni efe nakai.

⁵Agbe̱ne̱ Iudanyo ko ye̱ Šušan mō̃ le̱ṅ, ni egbe̱i dši Mordekai, ni Benyaminnyo *Kiš bi Šimei bi Iair bi dši le̱, [4]

⁶ni aṅõle̱ nom ke̱-dše̱ Ierusalem ke̱ nomi ní aṅõ afata Iuda maṅtše̱ Iekonia he, mei ní Babel maṅtše̱ Nebukadnezar baṅõ le̱. [5]

⁷Ni le̱ dši moṅi kwe̱o̱ Hadasa, ní dši Ester, *etše̱kwẽ biyō le̱; edšake̱ ebe̱ tše̱ ebe̱ nye. Ni oblayō le̱ he ye̱ fe̱o, ni ehĩe hũ ye̱ fe̱o; ní beni etše̱ ke̱ enye gboi le̱, Mordekai ṅõle̱ fe le̱dientše̱ ebiyō. [6]

⁸Ke̱ke̱ ni eba mli ake̱, beni anu maṅtše̱ kitã ke̱ ekpo̱ le̱ ní abua oblayei pī anā ke̱-ba Šušan mō̃ le̱ṅ ni ake̱-ame̱ bawo Hegai deṅ le̱, aṅõ Ester hũ ke̱-ba maṅtše̱ le̱ we le̱, ni ake̱le̱ bawo Hegai, yei akwe̱lo̱ le̱, deṅ.

⁹Ni oblayō le̱ sa ehĩe, ni ehĩe ba nyam ye̱ ehĩe; ni oyá ke̱ke̱ ni ehãle̱ ehesāmo̱nii le̱ ke̱ egbe̱nānii le̱, ni esã eṅō oblayei kpawo ni ahala ke̱-dše̱ maṅtše̱ we le̱ ehāle̱; ni edšiele̱ ke̱ eblayei le̱ eyato yei awe le̱ heni hĩ fé fẽ.

¹⁰Bĕle̱ Ester náko atšõ emaṅ ke̱ eweku; edšake̱ Mordekai ewole̱ kitã ake̱ ekatšõ.

¹¹Ši dāne̱ Mordekai yašēraä ši ye̱ yei le̱ awe le̱ kpo le̱ hĩe, koni ele bo̱ni Ester yo̱ ke̱ noni abafele̱.

¹²Agbe̱ne̱ ké̱ še̱ oblayō-fẽ-oblayō no̱ le̱, eyaã maṅtše̱ Ahašweroš ṅõ, beni eye nyõdši nyoṅma ke̱ enyo̱ ye̱ yei le̱ amla le̱ nā le̱; (edšake̱ bo̱ni ame̱hesāmo̱ gbĩĩ le̱ anā šio̱ dši no: nyõdši ekpa ke̱ mire mũ, ke̱ nyõdši ekpa hũ ke̱ tsofai-ke̱-ṅmai ke̱ yei le̱ ahesāmo̱nii le̱;)

¹³ni ne̱ke̱ gbe̱ no̱ oblayō le̱ tšṍo̱ ke̱-yaä maṅtše̱ le̱ ṅõ, nofẽno ni ebio̱ le̱ ahãale̱ ke̱-dše̱o̱ yei awe le̱ ni eke̱-yaä maṅtše̱ le̱ we le̱.

¹⁴Eyaä gbe̱ke̱, ni lebi le̱ ekũo̱ ese̱ ke̱-yaã yei awe kroko le̱, ni ake̱le̱ woo Šaašgaz, maṅtše̱ piaſonyo ni kwe̱o̱ ehemei le̱, deṅ; eyaa maṅtše̱ le̱ ṅõ doṅṅ, dša maṅtše̱ le̱ ná ehe tšui, ni awo egbe̱i atã atšé̱le̱.

¹⁵Agbe̱ne̱ beni še̱ Ester, Mordekai tše̱kwẽ Abihail biyō ni eṅõle̱ efe le̱dientše̱ ebiyō le̱, no̱, ní ebaya maṅtše̱ le̱ ṅõ le̱, ebii nokonoko ake̱ dša noni Hegai, maṅtše̱ piafonyo ní kwe̱o̱ yei le̱, tšõ. Ši Ester hĩe ba nyam ye̱ mei fẽ ni naäle̱ le̱ ahĩe.

¹⁶Ni aṅõ Ester ke̱-te maṅtše̱ Ahašweroš ṅõ ye̱ emaṅtše̱yeli šĩa le̱ ye̱ nyõṅ ni dši nyoṅma, ni dši Tebet nyõṅ le̱ no̱, ye̱ emaṅtše̱yeli afi ni dši kpawo le̱ no̱.

¹⁷Ni maṅtše̱ le̱ sumo̱ Ester fè yei le̱ fẽ, ni ehĩe ba nyam ye̱ ehĩe ni ená ehe mīše̱ fè oblayei le̱ fẽ; ni eṅō maṅnyeyeli akekre efĩ eyitšo, ni ewole̱ maṅnye ye̱ Wašti nãdšiaṅ.

¹⁸Ke̱ke̱ ni maṅtše̱ le̱ ṅmẽ elumei le̱ ke̱ etšũdši le̱ fẽ okplõ kpeteṅkple, Ester yino̱ okplõ ni, ni ehã šikpõdši wo ame̱tšui, ni ekekē nii bo̱ni sa maṅtše̱.

¹⁹Agbe̱ne̱ beni abua oblayei le̱ anā noni dši ši enyo̱ le̱, no mli le̱ Mordekai yatáa maṅtše̱ le̱ koi le̱ ši.

²⁰Bĕle̱ Ester náko atšõ eweku ke̱ emaṅ, take̱ bo̱ni Mordekai ewole̱ kitã le̱; edšake̱ Ester yeo̱ Mordekai kitã no̱, tamo̱ be mli ni ekwe̱o̱le̱ le̱ noṅṅ. [7]

²¹Nakai gbĩĩ le̱ amli, beni Mordekai yatáa maṅtše̱ koi le̱ ši le̱, Bigtan ke̱ Tereš, maṅtše̱ piafoi enyo̱, ni dši mei ni buo̱ šĩnā le̱ nā le̱ ateṅ meikomei le̱, gri, ni ame̱mītao ni ame̱nine asa maṅtše̱ Ahašweroš he.

²²Ni Mordekai ná ne̱ke̱ sane ne̱ le, ni eyakē̱ maṅnye Ester, ni Ester yakē̱ maṅtše̱ le̱ ye̱ Mordekai gbe̱i ano̱.

²³Ni beni atao sane le̱ mli le̱, ana ake̱ eye̱ mli nakai, ni ase̱ṅ ame̱yi enyo̱ le̱ ye̱ tšo no̱; ni aṅmã ye̱ *yino̱sãdši awolo le̱ mli ye̱ maṅtše̱ le̱ hĩe. [8]