Read luganda Mateo 26 Bible Online

Mateo 26 - luganda bible

Mateo 26

¹Ni eba mli ake̱, beni Iesu egbe wiemo̱i ne̱ fẽ nā le̱, ekē̱ ekaselo̱i le̱ ake̱:

²Nyele ake̱ eſe̱ gbĩĩ enyo̱ ní ayeo̱ Hehō le̱, ni aadšie gbomobi le̱ ahã ni ase̱ṅle̱. [434]

³No mli le̱ oso̱fonukpai le̱ ke̱ woloṅmãlo̱i le̱ ke̱ maṅ onukpai le̱ yabua ame̱he nā ye̱ oso̱fonukpa ní atšé̱o̱le̱ Kaiafa le̱ mō̃ le̱ mli.

⁴Ni ame̱te āpam, bo̱ni ame̱afe ame̱mõ Iesu ṅā mli ní agbele̱;

⁵ši ame̱kē̱: Dšee gbĩdšŭrõ le̱ no̱, ní maṅ le̱ akababú.

⁶Ši beni Iesu yo̱ Betania ye̱ Simon, kpitiyelo̱ le̱, we le̱,

⁷yō ko hĩe alabastro-to̱ ke̱ emli mũ-ke̱-ṅma ni dšra wa ke̱-ba emase̱i, ni beni etá niyenii aši le̱, efo̱se eſie eyiteṅ.

⁸Ši beni ekaselo̱i le̱ na le̱, ame̱mli wo la ame̱kē̱: Té yaka-nifitemo̱ ne̱ šišiṅ?

⁹Edšake̱ mũ-ke̱-ṅma ne̱ kũle̱ aanyẽ ahõ ahe šika pī ni aṅõ-hã ohĩafoi.

¹⁰Ši beni Iesu na ene̱ le̱, ekē̱ame̱ ake̱: Mẽba nyegbaä yō le̱ nā? Ši etšu nitšumo̱ fe̱fe̱o ehãmi.

¹¹Edšake̱ *ohĩafoi le̱, nyeke̱ame̱ ye̱ dã, ši mi le̱, dšee dā mike̱nye aahĩ ši. [435]

¹²Edšake̱ mũ-ke̱-ṅma ne̱ ní efo̱se eſie migbomotšo le̱ no̱ ne̱, efe eto mifũ le̱.

¹³Le̱le̱ṅ, mīkē̱nye ake̱: Hefẽhe ní aadšadše sanekpakpa ne̱ ye̱, ye̱ dšeṅ fẽ le̱, aatšĩ noni yō ne̱ fe ne̱ hũ tã aṅõ-kaile̱.

¹⁴Ke̱ke̱ ni mei nyoṅma ke̱ enyo̱ le̱ ateṅ mokome ní atšé̱o̱le̱ Iuda Iskariot le̱ yiṅ ete oso̱fonukpai le̱ aṅõ

¹⁵ni eyakē̱: *Meni nyeahãmi, ní madšiele̱ mawo nyedeṅ? Ni ame̱kane dſie̱te̱i kukudši †nyoṅmai-etẽ ame̱hãle̱. [436]

¹⁶Ni ke̱-dše̱ no be le̱ no̱ le̱ etao ehe gbe̱ ní eṅōle̱ ewo ame̱deṅ. [437]

¹⁷Ši *akpītĩgbĩĩ dšudši le̱ amli kleṅkleṅ gbĩ le̱ no̱ le̱ kaselo̱i le̱ ba Iesu ṅõ ame̱babile̱ ake̱: Nẽgbe̱ osumoo̱ ake̱ wo̱-yasā wo̱hão ní oyaye Hehō le̱ ye̱ dše̱i? [438]

¹⁸Ni ekē̱: Nyeyaä mā le̱ṅ ni nyeyakē̱a ašimaši ake̱: Tšõlo̱ le̱ kē̱: Mihe le̱ eše̱ etã; owe le̱ mike̱ mikaselo̱i le̱ baye Hehō le̱ ye̱. [439]

¹⁹Ni ekaselo̱i le̱ yafe bo̱ni Iesu kē̱ame̱ le̱, ni ame̱sā Hehō Ie̱ ame̱to.

²⁰Ši beni še̱ gbe̱ke̱ le̱, eke̱ mei nyoṅma ke̱ enyo̱ le̱ yatrá niyenii le̱ ahe.

²¹Ni heni ame̱yeo̱ nii le̱, ekē̱: Le̱le̱ṅ, mīkē̱nye ake̱, nyeteṅ mokome batšō mise̱gbe̱.

²²Ni edo̱ame̱ tšṍ, ni ame̱bõile̱ bimo̱ ekomekome ye̱ ame̱teṅ ake̱: Nuntšo̱, miṅ lo?

²³Ši ehere no̱ ekē̱: Mo nine ni ke̱ minine kpeo̱ ye̱ kã le̱ mli le̱, le̱ noṅṅ ebatšõ mise̱gbe̱ le̱.

²⁴Gbomobi le̱ miya take̱ bo̱ni aṅmã ye̱ ehe le̱ moṅ; ši kpóo hã no gbomo le̱ ni tšõo̱ gbomobi le̱ se̱gbe̱ le̱; fãṅ noni anáá afo̱ nakai gbomo le̱.

²⁵Ni Iuda, ese̱gbe̱tšõlo̱ le̱, here no̱ ekē̱: Ani miṅ, Rabi? Ekē̱le̱ ake̱: Okē̱!

²⁶Ši beni ame̱yeo̱ nii le̱, Iesu ko̱ abolo, ni edšō̱ no̱ ni ekũmo̱ mli, ni eṅõ-hã ekaselo̱i le̱, ni ekē̱: Nyehea, nyeyea! ene̱ dši migbomotšo le̱. [440]

²⁷Ni ewó kpulu le̱, ni eda ši, ni eṅõ-hãame̱ ni ekē̱: Nyefẽ nyenua eko!

²⁸edšake̱ ene̱ dši *milá ní dši †kpãṅmo̱ hē le̱ nõ le̱, ní afo̱se aſie ši ye̱ mei pī ahewo̱ hã ešaifã le̱. [441]

²⁹Ši mīkē̱nye ake̱: Ke̱-dše̱ ene̱ no̱ ke̱-yaä ne̱ minuṅ weintšo yibii ne̱ eko doṅṅ, ke̱-yaši gbĩ no̱ ní mike̱nye aanule̱ ehē ye̱ mitše̱ maṅtše̱yeli le̱ mli le̱.

³⁰Ni beni *ame̱lá yidšiemo̱-lala ko le̱, †ame̱dše kpo ame̱te Mũgoṅ le̱ no̱. [442]

³¹Ke̱ke̱ ni Iesu kē̱ame̱ ake̱: Nyō ne̱ṅ le̱ mihe sane bahã nyefẽ nyenane atõtõ; edšake̱ aṅmã ake̱: *“Matſa tōkwe̱lo̱ le̱ nõ, ni tōku le̱ aagbe̱ aſã.” [443]

³²Ši mišitē se̱ le̱ matšṍ nyehĩe ke̱-ate Galilea. [444]

³³Ši Petro here no̱ ekē̱le̱ ake̱: Ke̱dši mei le̱ fẽ nane aatõtõ ye̱ ohe le̱, mi le̱ minane etõtõṅ gbĩkogbĩko.

³⁴Iesu kē̱le̱ ake̱: Le̱le̱ṅ, mīkē̱o ake̱: Nyō ne̱ṅ noṅṅ, dãni wuo̱ aagbe̱ le̱, ookpá ye̱ mise̱ šii etẽ. [445]

³⁵Petro kē̱le̱ ake̱: Ke̱dši gbo mike̱o aagbo tete le̱, mikpáṅ ye̱ ose̱! Nakai noṅṅ *kaselo̱i le̱ fẽ hũ kē̱. [446]

³⁶Agbene̱ Iesu ke̱ame̱ ba heko ní atšé̱o̱ dše̱i Getsemane; ni ekē̱ ekaselo̱i le̱ ake̱: Nyetráa ši ye̱ bie̱, koni maya mayaso̱le ye̱ dše̱i.

³⁷Ni eṅõ Petro ke̱ Zebedeo bibii enyo̱ le̱ efata ehe ni *ew̌ere̱ bõi ehe hō ni ehao. [447]

³⁸Ke̱ke̱ le̱ ekē̱ame̱ ake̱: Misusnma mīhao ke̱-yaši gbĕle mli po; nyehĩa ši ye̱ bie̱ ni nyeke̱mi ašia kpe! [448]

³⁹Ni ete hĩe fiō, ni eṅõ ehĩe ebú ši, ni eso̱le ekē̱: Mitše̱, ke̱dši aaho le̱, hã ní *kpulu ne̱ aho mihe aya; †ši kẽle̱ dšee bo̱ni mi misumoo̱, ši moṅ bo̱ni bo osumoo̱. [449]

⁴⁰Ni beni eba kaselo̱i le̱ aṅõ le̱, ena ake̱ ame̱wo̱; ni ekē̱ Petro ake̱: Aso nyenyẽẽ nyeke̱mi aši kpe ṅmle̱tſā kome pe̱?

⁴¹Nyešia kpe ni nyeso̱lea, koni nyekabote kā mli; mumo̱ le̱ mīkplẽ moṅ, ši *helo le̱ egbede. [450]

⁴²Eyiṅ ete ekoṅ noni dši šii enyo̱, ni eyaso̱le ekē̱: Mitše̱, ke̱dši kpulu ne̱ nyẽṅ mihe aho aya ake̱ dša minu le̱, hā afe bo̱ni osumoo̱.

⁴³Ni beni eba le̱, ena ake̱ ame̱wo̱ ekoṅ; edšake̱ ame̱hĩṅme̱ii etšī.

⁴⁴Ni esā ešĩame̱ eyiṅ ete ekoṅ, ni eyaso̱le noni dši *šii etẽ, ni ewie nakai wiemo̱ le̱ noṅṅ. [451]

⁴⁵Ke̱ke̱ ni eba ekasele̱i le̱ aṅõ, ni ekē̱ame̱ ake̱: Nye le̱ nyehe edšo̱nye ni nyewoo ne̱? na, ṅmle̱tſā le̱ eše̱ etã, ni aaṅõ gbomobi le̱ awo ešafelo̱i adeṅ.

⁴⁶Nyetea ši, nyehãa wo̱yaä; na, moni batšõ mise̱gbe̱ le̱ eše̱ ši etã.

⁴⁷Ni beni ewieo lolo le̱, na, Iuda, mei nyoṅma ke̱ enyo̱ le̱ ateṅ mokome le̱, ba, ni asafo pī, ní dše̱ oso̱fonukpai le̱ ke̱ maṅ onukpai le̱ aṅõ, ke̱le̱ nyie ke̱ klantei ke̱ tšei.

⁴⁸Ši moni tšõ ese̱gbe̱ le̱ etoame̱ okadi ake̱: Mo nã ní maſo̱ le̱, le̱ ni; nyemõale̱!

⁴⁹Ni amrō le̱ eba Iesu ṅō ebakē̱: Oſĩē, Rabi! ni eſo̱ enā.

⁵⁰Ši Iesu kē̱le̱ ake̱: Nanyo, meni fe-mo̱ oba ye̱ bie̱? Ke̱ke̱ ni mei le̱ batutua Iesu ni ame̱mõle̱.

⁵¹Ni na, mei ní ke̱ Iesu ye̱ le̱ ateṅ mokome kpã enine mli egbla eklante, ni eṅõ-bã oso̱ſonakpa le̱ tšũlo̱, ni efo etoi.

⁵²Ke̱ke̱ le̱ Iesu kē̱le̱ ake̱: Ṅõ oklante le̱ oto etōhe; edšake̱ mei fẽ ní kō̱lo̱ō̱ klante le̱, klante noṅṅ ake̱-akpãtã ame̱hĩe. [452]

⁵³Alo osusuo̱ ake̱ minyẽṅ mitše̱ fai makpa ní amrõ ne̱ noṅṅ eehãmi ṅwei-bo̱foi fè asafoi nyoṅma ke̱ enyo̱?

⁵⁴Ši no lo̱ té aafe tēṅ ní ṅmãle̱i le̱ aaba mli, ake̱ dša afe ne̱ke̱ noṅṅ?

⁵⁵No ṅmle̱tſā le̱ no̱ noṅṅ le̱ Iesu kē̱ asafoi le̱ ake̱: Mimõmo̱ nyeba tamo̱ amõo̱ odšotſalo̱ ko, ke̱ klante ke̱ tšei ne̱. Mitáa so̱lemo̱we le̱ dā mitšõo̱ nii, ni nyemõõmi.

⁵⁶Ši afe ene̱ fẽ, koni nii ní gbalo̱i lo̱ ṅmã le̱ aba mli. *Ke̱ke̱ ni kaselo̱i le̱ fẽ dšo foi šĩle̱. [453]

⁵⁷Ši mei ni mõ Iesu le̱ kplale̱ ke̱-te Kaiafa, oso̱fonukpa le̱, ṅõ, heni woloṅmãlo̱i le̱ ke̱ onukpai le̱ ebua amehe nā ye̱ le̱.

⁵⁸Ši Petro nyie ese̱ ye̱ šoṅṅ ke̱-ba oso̱fonukpa le̱ mō̃ le̱ mli, ni ebote dše̱i eke̱ tšũdši le̱ yatá ši, koni ekwe̱ bo̱ni nāgbē aate ahã.

⁵⁹Ši oso̱fonukpai le̱ ke̱ onukpai le̱ ke̱ gwabō̱ le̱ fẽ tao amale-odase ye̱ Iesu he, koni ame̱gbele̱;

⁶⁰ni ame̱náá eko. Ni tše̱bele̱ amale-odasefoi pī ba moṅ, ši kẽle̱ ame̱náá eko. Fe se̱ le̱ amale-odasefoi enyo̱ ba

⁶¹ame̱bakē̱: Mone̱ kē̱ ake̱: *Manyẽ ake̱ mikũmoo̱ Nyoṅmo̱ so̱lemo̱we le̱, ní mitſaäle̱ gbĩĩ etẽ. [454]

⁶²Ni oso̱fonukpa le̱ te ši ekē̱le̱ ake̱: Odšiee odase ní mene̱meĩ yeo̱ ye̱ ohe ne̱ nā?

⁶³Ši Iesu *etſaa edāṅ. Ni oso̱fonukpa le̱ here no̱ ni ekē̱le̱ ake̱: Mina Nyoṅmo̱, hĩekālo̱ le̱, ake̱, ke̱dší bo dši Kristo, Nyoṅmo̱ bi le̱, kē̱mo̱wo̱! [455]

⁶⁴Iesu kē̱le̱ ake̱: Okē̱. Ši mīkē̱nye ake̱: Ke̱-dše̱ be ne̱ no̱ ke̱-yaä le̱, nyeana gbomobi le̱ ake̱ *etá hewale̱ ninedšŭrõ no, ni †ēba ye̱ ṅwei atatui le̱ amli. [456]

⁶⁵Ke̱ke̱ ni oso̱fonukpa le̱ gblá etadei ni ekē̱: Ebo̱ musu! meni wo̱sā wo̱taoo̱ odasefoi wo̱fe doṅṅ? Na, agbe̱ne̱ nyenu emusubō̱ le̱! [457]

⁶⁶Té nyesusuo̱ tēṅ? Ame̱here no̱ ame̱kē̱: *Esa gbĕle! [458]

⁶⁷*Ke̱ke̱ ni ame̱fẽ ladšõ ame̱ſie ehĩe, ni ame̱gblále̱ mãi; ni meikomei hũ tſiale̱ nii. [459]

⁶⁸ame̱kē̱: Kristo, gbā otšõwo̱, namo dši moni yio le̱?

⁶⁹Ši Petro tá se̱ fle̱ṅṅ ye̱ kpo te le̱ṅ; ni oblayō ko ba eṅõ bakē: Bo hũ te oke̱ Iesu, Galileanyo le̱, nyĩeo̱!

⁷⁰Ši etšo ye̱ ame̱fẽ ame̱hĩe, ni ekē̱: Milee noni okē̱o̱ ne̱.

⁷¹Ši beni ete ši ete koi le̱ ši le̱, mokroko hũ nale̱, ni ekē̱ mei ní yo̱ dše̱i le̱ ake̱: Mone̱ hũ ke̱ Iesu, Nazarenyo le̱, yo̱.

⁷²Ni etšo ekoṅ ke̱ kitãkãmo̱ ekē̱: Milee gbomo le̱.

⁷³Ni fe se̱ fiō le̱, mei ní damo̱ dše̱i le̱ bakē̱ Petro ake̱: Ano̱kwale dši ake̱, ame̱teṅ mokome dsio; edšake̱ owiemo̱ tete mīkpáo ši!

⁷⁴Ke̱ke̱ ni ebõi lōmo̱ ke̱ kitãkãmo̱ ake̱: Milee gbomo le̱! Ni amrõ le̱ wuo gbe̱.

⁷⁵Ni Petro kai Iesu wiemo̱ ni ekē̱le̱ ake̱: *“Dãni wuo̱ aagbe̱ le̱, ookpá ye̱ mise̱ šii etẽ” le̱. Ni edše kpo eyafó āhũ. [460]