Read Gaddi मत्ती 11 Bible Online

मत्ती 11 - Gaddi bible

मत्ती 11

¹जैहणै यीशु अपणै बारह प्रेरिता जो ईयां गल्ला री शिक्षा दी बैहु ता सो तैड़ी थऊँ गलील रै नगरा मन्ज उपदेश अतै प्रचार करना चली गो।

²यूहन्‍नै जेला मन्ज मसीह रै कम्मा री खबर हुणी अतै अपणै चेलै जो ऐह पुछणै तांयें तैस बलै भैजु।

³कि “कै ईणै बाळा मसीहा तू ही हा जसेरै बारै मन्ज प्रमात्मैं वायदा करूरा या अहै कसकि होरी री भाळ करन?”

⁴यीशुऐ जवाव दिता “तुहै जैडा कुछ हेरदै अतै हुणदै हिन, सो सब गिच्ची करी यूहन्‍नै जो दसी देय्आ।

⁵कि अन्धै हेरदै हिन, लट्टै चलदै फिरदै हिन; कोढ़ी ठीक भुन्दै हिन, टोणै हुणदै हिन, मुरदै जी भुन्दै; अतै कंगाला जो सुसमाचार हुणादै हिन।

⁶अतै धन्य हिन सो, जैड़ै मिन्जो पुर भरोसा करदै हिन।”

⁷जैहणै यूहन्‍ना रै चेलै तैड़ी थऊँ चली गै, ता यीशु यूहन्‍ना रै बारै मन्ज मणु सितै बलणा लगा; “तुहै बियावान जगह मन्ज कै हेरना गच्छुरै थियै? कै अक्क मणु जो जैड़ा आसानी सोगी गल्ला बदलदा अतै सरकण्ड़ैं सांईयै हव्वा मन्ज हिलदा?

⁸फिरी तुहै कै हेरना गच्छुरै थियै? कै कोमल कपड़ै लाऊरै मणु जो, हुणा जैडा कोमल कपड़ै लान्दै हिन, सो मैहला मन्ज रैहन्दै हिन।

⁹ता फिरी कै हेरना गच्छुरै थियै? कै कसकि भविष्‍यवक्ता जो? हाँ; अऊँ तूसु सोगी बलदा, भविष्‍यवक्ता ना पर तैस थऊँ भी बड़ै जो।”

¹⁰ऐह तैस यूहन्‍ना रै बारै मन्ज पवित्रग्रन्था मन्ज लिखुरा हा कि : हेर; अऊँ अपणै दूता जो तेरै अगो भैजदा हा, जैस तेरै अगो तिजो तांयें रस्ता तैयार करना।

¹¹“अऊँ तूसु सोगी सच बलदा, कि जैड़ै जनानी थऊँ पैदा भच्छुरै हिन, तियां मन्ज यूहन्‍ना बपतिस्मा दिणैबाळै थऊँ बड़ा होर कोई भी ना भुआ; पर जैड़ै स्वर्गा रै राज्य मन्ज हल्कै थऊँ हल्का हा सो तैस थऊँ भी बड़ा हा।

¹²यूहन्‍ना बपतिस्मा दिणैबाळै रै दिना थऊँ अज तक प्रमात्मां रा राज्य तेजी सोगी अगो फैलु करदा, अतै बेरहम मणु तैस पुर कब्जा करनै री कोशिश करदै रैहन्दै हिन।

¹³यूहन्‍ना तक सब व्यवस्था अतै भविष्‍यवक्ता भविष्‍यवाणी करदै रैह।

¹⁴अतै तुहै चाहन ता मनी सकदै हिन कि एलिय्याह जैडा ईणैबाळा थू, सो ऐह ही हा।

¹⁵कन्‍ना खोली करी मेरी ऐसा गल्ला हुणी लेय्आ।”

¹⁶“अऊँ ऐस टैमां रै मणु री तुलना कस सोगी करू? सो तियां बच्चै सैईये हिन, जैड़ै बजारा मन्ज बैही करी अक्की दूये सितै बलदै हिन।”

¹⁷“अहै तूसु तांयें बंसरी बजाई पर तुहै ना नचै; अहै विलाप करू, पर तुहै अपणी हिक्का ना जक्की।”

¹⁸“क्ओकि यूहन्‍ना ना ता खान्दा अतै ना पिन्दा थू, पर सो बलदै हिन कि ‘तैस मन्ज दुष्‍टात्मा हा।’

¹⁹मणु रा पुत्र खान्दा-पिन्दा आ, अतै सो बलदै हिन कि हेरा, पेटू अतै पियक्कड़ मणु, चुंगी लैणैबाळै अतै पापी रा मित्र हा! पर तैस मणु रै कम्मा रै द्वारा पता लगदा कि सो कैतना धर्मी हा।”

²⁰ता सो तियां नगरा रै मणु जो धिक्कारना लगा, जिंआ मन्ज तिनी मतै सामर्थ रै कम करूरै थियै; फिरी भी तियां नगरा रै मणुऐ अपणा मन ना फिराऊरा थू।

²¹“हाय, खुराजीन! अतै हाय बैतसैदा शहरा मन्ज रैहणै बाळै मणुओ जैड़ै सामर्थ रै कम तूसु मन्ज करूरै हिन, अगर सूर अतै सैदा मन्ज रैहणै बाळै गैर यहूदी तांई करदा ता तैड़ी रै दुष्‍ट मणु फटै पूराणै कपड़ै लपेटी करी, अतै धूड़ी मन्ज बैही करी, अपणै मना फेरी लैन्दै।” (तैस टैमां रै मणु पच्छतावा करनै तांयै ऐसा कम करदै थियै)

²²“पर अऊँ तूसु सोगी बलदा; कि न्याय रै दिन तुन्दी दशा थऊँ सूर अतै सैदा री दशा खरी भुणीआ हा।

²³अतै हे कफरनहूम रै मणुओ कै तुसिओ स्वर्ग मुळना? तूसु ता नरका तिकर पुजणा। जैड़ै सामर्थ रै कम तिजो मन्ज करूरै हिन अगर सदोम मन्ज करदै ता, सो अज तक बणी रैहन्दा।

²⁴पर अऊँ तूसु सोगी बलदा, कि न्याय रै दिन तेरी दशा थऊँ सदोम रै देशा री दशा खरी भुणीआ।”

²⁵तैस टैमैं ही यीशुऐ बल्लू, “हे पिता, स्वर्ग अतै धरती रै प्रभु; अऊँ तून्दा धन्यवाद करदा, कि तुहै ईयां गल्ला जो ज्ञानी अतै समझदारा थऊँ छुपाई रखूरा हा, पर नासमझा पुर प्रकट करूरी हिन।

²⁶हाँ, हे पिता, क्ओकि तुसिओ ऐह ही खरा लगन्दा।”

²⁷“मेरै पितै मिन्जो सब कुछ दितुरा हा अतै पितै रै अलावा कोई ना जाणदा कि पुत्र कुणआ अतै पुत्रा रै अलावा कोई ना जाणदा कि पिता कुणआ अतै सो मणु जाणदा जैस पुर पुत्र प्रकट करना चाह।”

²⁸“हे सब मेहनत करनै बाळै अतै बोझा थलै दबुरै मणुओ, मिंजो बलै अईआ; मुँ तुसिओ आराम दिणा।

²⁹मेरा जुंगळा अपणै ऊपर चुकी लेय्आ; अतै मिन्जो थऊँ सिखा; क्ओकि अऊँ नम्र अतै मना रा दीन हा; अतै तूसु अपणै मना मन्ज आराम पाणा।

³⁰क्ओकि मेरा जुंगळा आसान अतै मेरा बोझ पोला हा।”