Read Gaddi मत्ती 12 Bible Online

मत्ती 12 - Gaddi bible

मत्ती 12

¹अक्क विश्रामदिन यीशु बगड़ी मितै चलूरा थू, अतै तसेरै चेलै जो भूख लगी अतै सो बगड़ी थऊँ हिल्लै त्रोड़ी त्रोड़ी करी खाणा लगै।

²फरीसी धर्मगुरू ऐह हेरी करी तैस सोगी बलणा लगै, “हेर, तेरै चेलै सो कम करू करदै हिन, जैडा विश्रामदिन करना ठीक निय्आ।”

³तिनी तियां जो जवाव दिता, “कै तुहै ना पढुरा कि जैहणै राजा दाऊद अतै तसेरै साथी भूखै थियै ता तियैं कै करू थू?

⁴सो किआं प्रमात्मैं रै तम्बू मन्ज गिच्ची करी तैड़ी चढ़ाऊरी रोटी खाई, जिंआ जो खाणा ना तैस तांयें अतै ना ही तसेरै चेलै तांयें बल्कि सिर्फ याजका तांयें ठीक थू।

⁵या कै तुहै व्यवस्था मन्ज ना पढुरा कि याजक विश्रामदिन मन्दरा रै नियमा जो त्रोड़णै पुर भी निर्दोष ही भुन्दै हिन।

⁶पर अऊँ तूसु सोगी सच बलदा, कि ऐड़ी सो हा, जैडा मन्दरा थऊँ भी बड़आ हा।

⁷अगर तुहै ठेरा अर्थ ना जाणदै कि अऊँ दया थऊँ खुश हा, बलिदान थऊँ ना, अगर तुहै ठेरा अर्थ जाणदै ता तुहै मेरै निर्दोष चेलै जो गुनागार ना ठहरान्दै।

⁸मणु रा पुत्र ता विश्रामदिन रा भी प्रभु हा।”

⁹तैड़ी थऊँ चली करी सो यहूदी रै सभागार मन्ज आ।

¹⁰अतै हेरा, अक्क मणु थू, जैसेरा हत्थ डुण्ड़ा थू; अतै तिन्यै तैस पुर दोष लाणै तांयें तैस थऊँ पूछु, “कै विश्रामदिन चंगा करना ठीक हा?”

¹¹तिनी तियां सितै बल्लू; “तूसु मन्ज ऐसा कुण हा, जसेरी अक्क ही भैड़ भोआ, अतै सो विश्रामदिन गत्ता मन्ज पैई गच्छा, ता सो तैहा जो गत्ता थऊँ ना नकाळा?

¹²भला, मणु रा मूल भैड़ा थऊँ कैतना बददी करी हा; ठेरैतांये विश्रामदिन भलाई करना ठीक हा।” ता तिनी तैस मणु सोगी बल्लू “अपणा हत्था अगो कर।”

¹³तिनी अगो करू, अतै सो फिरी दूये हत्था सैईये ठीक भूच्ची गो।

¹⁴ता फरीसी झट बाहर गिच्ची करी सलाह करना लगै कि तसेरा किआं नाश करन?

¹⁵ऐह जाणी करी यीशु तैड़ी थऊँ चली गो; अतै मतै सारै मणु तसेरै पिचो चली पै; अतै तिनी सबी जो ठीक करू।

¹⁶अतै तियां जो समझाऊ, कि मेरै बारै मन्ज मत दसदै।

¹⁷कि जैडा बचन यशायाह भविष्‍यवक्तै बलुरा थू, सो पुरा भोआ :

¹⁸“हेरा, ऐह मेरा सेवक हा, जैसिओ मैंई चुणुरा; मेरा प्यारा हा, जैस थऊँ मेरा मन खुश हा मुँ अपणी आत्मा ऐस पुर पाणी आ अतै ऐस गैर यहूदी जो न्याय रा समाचार दिणा।

¹⁹ऐस ना लड़ाई करनी हा, अतै ना ही हुड़दगं मचाणा; अतै ना बजारा मन्ज कोई सेरा हल्ला हुणीना।”

²⁰“जैहणै तक सो न्याय री जीत ना करा तैस दरूडूरै सरकण्ड़ैं ना त्रोड़णै अतै ना ही धूंआ दिन्दी बत्ती बुझाणी हिन, मतलब तैस कमजोर, मणु रै प्रति दयावान अतै कोमल रैहणा।”

²¹अतै गैर यहूदी तैस पुर उम्मीद रखणीआ।

²²ता मणु अक्की अन्धै-गूंगै जो जैस मन्ज दुष्‍टात्मा थी, तैस बलै लेई आये; अतै तिनी तैसिओ खरा करू; अतै गूंगा बलणा अतै हेरना लगी पैऊ।

²³ऐह हेरी करी सब मणु हैरान भूच्ची करी बलणा लगै, “कै ऐह दाऊद री औलाद हा?”

²⁴पर फरीसीये ऐह हुणी करी बल्लू, “ऐह ता दुष्‍टात्मा जो ठेरैतांये नकाळी पाऊ करदा कि ऐह ता शैतान रा दास हा।”

²⁵तिनी तंयारै मना री जाणी करी तियां सितै बल्लू; “जैस कसकि राज्य मन्ज फूट पैई गच्छा, सो उजड़ी गान्दा, अतै कोई नगर या घराना जैस मन्ज फूट भुन्दी हा, सो टिक्की ना सकदा।

²⁶अतै अगर शैतान ही दुष्‍टात्मा जो कड़आ, ता सो अपणा ही वरोधी भूच्ची गाणा; फिरी तसेरा राज्य किआं करी बणी रैहणा?

²⁷भला, अगर अऊँ शैतान री मदद सोगी दुष्‍टात्मा जो कड़दा, ता तून्दै चेलै कसेरी मदद सोगी कड़दै हिन? ठेरैतांये सो ही तून्दा न्याय करलै।

²⁸पर अगर अऊँ प्रमात्मैं री आत्मा री मदद सोगी दुष्‍टात्मा जो कडदा, ता प्रमात्मैं रा राज्य तूसु बलै ईच्ची पुजुरा हा।”

²⁹या किआं कोई मणु कसकि ताकतवर मणु रै घरा मन्ज घुसड़ीकरी तसेरा घर ना लुटी सकदा जैहणै तक पैहलै सो तैस ताकतवर जो बनी ना लेय्आ अतै तां फिरी सो तसेरा घर लुटी सकदा हा।

³⁰“जैडा मणु विस्वास ना करदा कि अऊँ पवित्र आत्मा री शक्ति सोगी दुष्‍टात्मा जो कड़दा हा सो मेरा विरोधी हा, अतै जैड़ा मणु जो मिन्जो वलै लैईन्दा सो कठेरनै बाळा हा, अतै जैड़ा मणु मेरा चेला ना बणना दिन्दा सो तियां जो मिन्जो थऊँ दूर लेई गान्दा।

³¹ठेरैतांये अऊँ तूसु सोगी बलदा, कि मणु रा सब तरह रा पाप अतै बुराई माफ करी दिणिआ, पर जे कोई आत्मा री बुराई करदा ता सो कदी माफ ना भूणा।

³²जैस कसी मणु रै पुत्रा रै वरोधा मन्ज बलणा, तसेरा पाप माफ भूच्ची गाणा, पर जैडा कोई पवित्र आत्मा रै वरोधा मन्ज कुछ बलणा, तसेरा अपराध ना ता ऐस लोक मन्ज ना ही परलोक मन्ज माफ भूणा।”

³³“अगर रूखा जो खरा बलदै हिन ता तसेरै फळा जो भी खरा बला; या रूखा जो निकम्मा बलदै हिन, ता तसेरै फळा जो भी निकम्मा बला, क्ओकि रूखा री पछैण फळा सोगी ही भुन्दी हा।

³⁴हे कीड़ै सांईयै जहरीलै मणुओ, तुहै बुरै भूच्ची करी किआं खरी गल्ला करी सकदै हिन? क्ओकि जैडा मना मन्ज भरूरा सो ही मुँहा पुर इन्दा हा।

³⁵भला मणु भलै मना रै भण्ड़ारा थऊँ भली गल्ला कड़दा हा; अतै बुरा मणु बुरै भण्ड़ारा थऊँ बुरी गल्ला कड़दा हा।

³⁶अतै अऊँ तूसु सोगी बलदा, कि जैड़ी जैड़ी निकम्मी गल्ला मणु बलणी हिन, न्याय बाळै दिन हर अक्क गल्ला रा लेखा दिणा पैणा।

³⁷क्ओकि तू अपणी गल्ला री ही वजह थऊँ निर्दोष अतै दोषी ठहराया गाणा।”

³⁸ता कैतनै शास्त्री अतै फरीसीये तैस सितै बल्लू, “हे गुरू, अहै तूसु थऊँ अक्क चमत्कार हेरना चाहन्दै हिन।”

³⁹तिनी जवाव दिता, “ऐस युगा रै बुरै अतै अविस्वास योग्य मणु चिन्ह तोपदै हिन; पर योना भविष्‍यवक्ता सोगी जैड़ा भूआ तैतिओ छडी होर कोई भी चिन्ह तियां जो ना हुजणा।

⁴⁰जिआं योना त्राई रात दिन पाणी मन्ज मच्छी रै पेटा मन्ज रैऊ, तियां ही मणु रा पुत्र भी त्राई राती दिन धरती रै अन्दर रैहणा।

⁴¹नीनवे शहर रै मणु न्याय बाळै दिन ऐस युगा रै मणु सोगी उूठी करी तियां जो दोषी ठहराणा, क्ओकि तियैं योना रा प्रचार हुणी करी, मन फिराऊरा थू। अतै हेरा, ऐठी ता सो हा जैडा योना थऊँ भी बड़ा हा, फिरी भी तुहै मन फेराणै थऊँ इन्कार करदै हिन।

⁴²दक्षिण दिशा री राणी न्याय बाळै दिन ऐस युगा रै मणु सोगी उूठी करी तियां जो दोषी ठहराणा, क्ओकि सो राजा सुलैमान रा ज्ञान हुणनै तांयें दूर देशा थऊँ छुरी थी, अतै हेरा, ऐड़ी ता कोई सुलैमान थऊँ भी बड़ा हा, फिरी भी तुहै मन फेराणै थऊँ इन्कार करदै हिन।”

⁴³“जैहणै कोई दुष्‍टात्मा मणु थऊँ नकैई गान्दी ता सो सुनसान जगह मन्ज आराम करना तोपदी हिन, पर जगह ना मुळदी।

⁴⁴ता बलदी हा, ‘मुँ तैस ही मणु मन्ज जैड़ी थऊँ अऊँ नकैऊरी थी, फिरी गाणा।’ अतै ईच्ची करी तैस मणु री जिन्दगी जो खाली घरा सांईयै साफ सुथरा अतै सजुरा सजाऊरा पान्दी हा।

⁴⁵ता सो गिच्ची करी अपणी सोगी होर सत दुष्‍टात्मा जो लेई इन्दीआ, अतै सो सब तैस मन्ज वास करदी हिन, तैस मणु री हालत पैहली हालति थऊँ भी होर खराब भूच्ची गान्दी हा; ऐस युगा रै बुरै मणु री हालत भी इन्‍नी ही भुणीआ।”

⁴⁶जैहणै सो भीड़ सोगी गल्ल करू ही करदा थू, ता तसेरी माता अतै हल्का भाई बाहर खडुरै थियै, सो तैस सोगी मुळना चाहन्दै थियै।

⁴⁷कुणकी तैस सोगी बल्लू; “गुरू तुन्दी माता अतै भाई बाहर खडुरै हिन, अतै तूसु सोगी कणैणा चाहन्दै हिन।”

⁴⁸ऐह हुणी करी तिनी जवाव दिता; “कुण हा मेरी माता? अतै कुण हा मेरा भाई?”

⁴⁹अपणै चेलै री कनारी इशारा करीके बल्लू, “हेरा, मेरी माता अतै मेरै भाई ऐह हिन।

⁵⁰क्ओकि जैडा कोई मेरै स्वर्गीय पिता री मर्जी पुर चलला, सो ही मेरा भाई, बैहण अतै माता हा।”