Read Gaddi मत्ती 13 Bible Online

मत्ती 13 - Gaddi bible

मत्ती 13

¹तैस ही दिन यीशु घरा थऊँ निकळी करी झीला रै कनारै गिच्ची बैईठा।

²अतै तैस बलै ऐसी भीड़ किटठी गई कि सो किस्ती पुर चड़ी गो, अतै पूरी भीड़ कनारै पुर खड़ी रैई।

³अतै तिनी उदाहरण मन्ज तियां सितै मती सारी गल्ला करी “अक्क बी बाणैबाळा बी बाणा निकळू।

⁴बान्दै टैमैं कुछ बी बता रै कनारै पै अतै पखेरू ईच्ची करी सो चुगी लै।

⁵कुछ बी पथरीली जमीना पुर पै, जैड़ी तियां जो मिट्टी ना मुळन री वजह थऊँ झट जमीं पै।

⁶पर सूरज निकळनै री वजह थऊँ सो फूकी गै।

⁷कुछ बी झिन्ड़ा मन्ज पै पर झिन्ड़ै सो दबाई दितै।

⁸पर कुछ बी खरी जमीना पुर पै, अतै फळी पै, कोई सौ गुणा, कोई सठ गुणा, अतै कोई तीह गुणा।

⁹कन्‍ना खोली करी मेरी ऐसा गल्ला हुणी लैन।”

¹⁰चेलै तैस बलै ईच्ची करी बल्लू, “तुहै मणु सोगी उदाहरण मन्ज गल्ला कजो करदै?”

¹¹तिनी जवाव दिता, “तुसिओ स्वर्गा रै राज्य रै भेदा री समझ दितुरी हा, पर तियां जो ना।

¹²क्ओकि जैड़ा मेरी शिक्षा जो हुणदै अतै समझदै हिन तियां जो होर समझ दिणिआ, पर जैड़ी ना हुणदै ता तियां बलै जैड़ी समझ हा सो भी तियां थऊँ लेई लैणीआ।”

¹³अऊँ ईयां सितै उदाहरण मन्ज गल्ला ठेरैतांये कणैन्दा कि ऐह हेरी करी भी समझी ना पान अतै हुणी करी भी ना समझन; ऐसा ना भोआ कि ऐह समझन।

¹⁴इन्यारै बारै मन्ज यशायाह री ऐह भविष्‍यवाणी पूरी भुन्दी हा: “तूसु कना थऊँ हुणना पर समझणा निय्आ; अतै हाख्री हेरना पर तुसिओ ना हुजणा।”

¹⁵“क्ओकि ईयां मणु रा मन मोटा भूच्ची गच्छुरा, अतै ऐह कना रा उच्चा हुणदै अतै इन्यै अपणी हाख्री बन्द करी लैऊरी।” “करखी ऐसा ना भोआ कि ऐह हाख्री सितै हेरन, कना सितै हुणन, अतै मना मन्ज समझन, अतै मना फेरन अतै अऊँ ईयां जो ठीक करूं।”

¹⁶“पर धन्य हिन तुन्दी हाख्री जैड़ी मेरै करूरै कमां जो हेरदी हिन अतै धन्य हिन तून्दै कन जैड़ै मेरा कणैऊरा हुणदै हिन।

¹⁷क्ओकि अऊँ तूसु सोगी सच बलदा कि मतै सारै भविष्‍यवक्तै अतै धर्मीये चाऊ कि जैड़ी गल्ला तुहै हेरू करदै सो भी हेरन पर सो ना हेरी सकै; अतै जैड़ी गल्ला तुहै हुणदै सो भी हुणन, पर सो ना हुणी सकै।”

¹⁸“अबै तुहै बी बाणैवाळै रै उदाहरण रा अर्थ हुणा।

¹⁹जैडा कोई प्रमात्मैं रा बचन हुणी करी ना समझदा, तसेरै मना मन्ज जैडा कुछ बाऊ, तैतिओ शैतान ईच्ची करी लेई गान्दा। ऐह सो बी हा जैडा बत्ता रै कनारै मन्ज बाऊ थू।

²⁰अतै जैड़ै पथरीली जमीना मन्ज बाऊ, ऐह सो हिन, जैड़ै बचन हुणी करी झट खुशी सोगी मनी लैन्दा।

²¹पर ऐह अपणै दिला मन्ज गहरी जड़ा ना रखणै री वजह थऊँ थोड़ै ही दिना रा विस्वासी हा अतै जैहणै सताव या क्‍लेश इन्दा ता सो प्रमात्मैं रै बचना पुर विस्वास करनै थऊँ फिरी गान्दै हिन।

²²जैडा बी झिन्ड़ा मन्ज पेऊरा, ऐह तियां मणु सांईयै हिन जैड़ै बचन हुणदै पर ऐस संसारा री चिन्ता अतै धन रा धोखा बचन जो दबी दिन्दा, अतै सो फलदा निय्आ।

²³जैडा बी खरी जमीना पुर पैऊ, ऐह सो हिन, जैड़ै बचन जो हुणी करी समझदा अतै फलदा; कोई सौ गुणा, कोई सठ गुणा, अतै कोई तीह गुणा।”

²⁴यीशुऐ तियां जो अक्क होर उदाहरण हुणाऊ “स्वर्गा रा राज्य तैस किसाना साईये हा जिनी अपणी बगड़ी मन्ज कणका रा खरा खरा बी बाऊ।

²⁵पर जैहणै मणु सोई गै ता बैरी ईच्ची करी कणका री बीआ मन्ज जंगली बी फड़ाई गै।

²⁶जैहणै बी लूंगी पैऊ अतै हिल्लै आये ता जंगली बीया रै पोधै भी हुजै।”

²⁷ऐह हेरी करी मालका सोगी नौकरै बल्लू, “हे स्वामी, कै तुहै अपणी बगड़ी मन्ज खरा बी ना बाऊरा थू? फिरी जंगली दाणै रै पोधै तैत मन्ज कंऊ आये?”

²⁸तिनी तियां सितै बल्लू, “ऐह कसकि बैरी रा कम भूणा। नौकरै तैस सोगी बल्लू, कै तुन्दी इच्छा हा, कि अहै गिचीकरी जगंली दाणै जो बीणी लैन?”

²⁹तिनी बल्लू, “ना ऐसा मत करदै, ऐसा ना भोआ कि जंगली पोधै जो बीणदै बीणदै तुहै कणका जो भी पुट्टी दीन।

³⁰वढाई तक दूनी जो सोगी सोगी मोटिणा देय्आ, अतै कटनी रै टैमैं कटणैवाळै जो मुँ बलणा कि पैहलै जंगली दाणै रै पोधै बीणीकरी तियां जो फुक्णै तांयें बनी लेय्आ, अतै कणका जो मिन्जो तांयें मेरै पेडू मन्ज इकट्ठा करा।”

³¹तिनी तियां जो अक्क होर उदाहरण हुणाऊ “स्वर्गा रा राज्य राई रै दाणै रै बराबर हा, जिनी किसाने अपणी जमीना मन्ज तैतिओ बाई दिता।

³²सो सबी बीआ मन्ज हल्का ता भुन्दा पर जैहणै मोट्टिन्दा ता सब साग-पात थऊँ बड़ा भुन्दा; अतै इन्‍ना रुख भूच्ची गान्दा कि अम्बरा रै पखेरू भी तठेरी छाई मन्ज अपणा बसेरा करदै हिन।”

³³तिनी अक्क होर उदाहरण हुणाऊ “स्वर्गा रा राज्य तैस खमीरा साईये हा जैसिओ अक्की जनानी लगभग तीह किलो आटै मन्ज मलाई दिता अतै फूली करी सो सब आटा खमीर भूच्ची गो।”

³⁴ऐह सब गल्ला यीशुऐ उदाहरण मन्ज मणु सितै बली, अतै सो अपणी सब गल्ला उदाहरण मन्ज ही बलदा थू,

³⁵कि जैडा बचन भविष्‍यवक्तै बलुरा थू सो पुरा भोआ : “मुँ उदाहरण मन्ज गल्ला करनी मुँ तियां गल्ला जो जैड़ी संसार मन्ज उत्पति थऊँ गुप्त रैई प्रकट करना।”

³⁶ता सो तैहा भिड़ा जो छड़ी करी घरा मन्ज आ, अतै तसेरै चेलै ईच्ची करी तैस सोगी बल्लू, “बगड़ी रै जंगली बीआ रा उदाहरण असिओ समझाई दे।”

³⁷तिनी तियां जो जवाव दिता, “खरै बी बाणैबाळा मणु रा पुत्र हा।

³⁸बगड़ी ऐह संसार रै मणु हिन, खरा बी सो मणु हिन जियां पुर प्रमात्मां राज्य करना चाहन्दा, अतै जंगली बी शैतान री सन्तान हा।

³⁹जिनी बैरीये तैसिओ बाऊ सो शैतान हा; कटनी संसार रा अन्त हा, अतै कटणैवाळै स्वर्गदूत हिन।”

⁴⁰“अतै जिंआ जंगली बी बीणदै अतै फुकदै हिन तियां ही संसार रै अन्त मन्ज भूणा।

⁴¹मणु रै पुत्रा अपणै स्वर्गदूता जो भैजणा, अतै तियां तसेरै राज्य थऊँ सब पाप करनै बाळै अतै पाप करवाणै बाळै जो नकाळी दिणा।

⁴²अतै स्वर्गदूता तियां जो अगी रै कुण्ड़ा मन्ज पाई दिणा, जैड़ी रूणा अतै दन्द पीणै हिन।

⁴³तैस टैमैं धर्मी अपणै पिता रै राज्य मन्ज सूरजा साई चमकणा। कन्‍ना खोली करी ईयां गल्ला हुणी लेय्आ।”

⁴⁴“स्वर्गा रा राज्य तैस बगड़ी मन्ज छिपुरै धना साईये हा, जैडा कसकि मणु जो मूळु अतै तिनी भी सो छुपाई दिता, अतै खुशी सितै अपणा सब कुछ बेची दिता अतै तैसा बगड़ी जो खरीदी लैऊ।”

⁴⁵“स्वर्गा रा राज्य तैस अक्क व्यपारी साईये हा जैडा सुच्चै मोती री खोज मन्ज थू।

⁴⁶जैहणै तैसिओ सो किमती मोती मूळु ता तिनी अपणा सब कुछ बेची दिता अतै तैसिओ खरीदी लैऊ।”

⁴⁷“स्वर्गा रा राज्य तैस बड़ै जाळा साईये हा जैडा समुंद्र मन्ज पाऊ, अतै हर तरह री मछली जो लेई आ।

⁴⁸अतै जैहणै जाल भरी गो, ता मछुआरै तैसिओ कनारै पुर खिन्जी लेई आये, अतै बैही करी खरी खरी मच्छली ता भान्डै मन्ज कठेरी अतै बेकार फैंकी दिती।

⁴⁹संसारा रै अन्त मन्ज ईयां ही भूणा। स्वर्गदूता ईच्ची करी दुष्‍टा मणु जो धर्मी मणु थऊँ अलग करना,

⁵⁰अतै तियां दुष्‍ट मणु जो अगी रै कुण्ड़ा मन्ज पाणा, जैड़ी रूणा अतै दन्द पीणा ही भूणा।”

⁵¹“कै तुहै ऐह सब गल्ला समझी?” तिन्यै बल्लू, “हाँ।”

⁵²यीशुऐ तियां सितै बल्लू, “ठेरैतांये हर अक्क शास्त्री जैडा स्वर्गा रै राज्य रा चेला बणुरा, सो तैस घरा रै मुखिया साईयें हा जैडा अपणै भण्ड़ारा थऊँ नोई अतै पुराणी चिजा कड़दा।”

⁵³जैहणै यीशु ऐह सब उदाहरण कणैई बैहु, ता तैड़ी थऊँ चली गो।

⁵⁴अतै अपणै नगरा मन्ज ईच्ची करी यहूदी रै सभागार मन्ज उपदेश दिणा लगु कि हुणनैबाळै हैरान भूच्ची करी बलणा लगै, “ऐसिओ ऐह ज्ञान अतै सामर्थ रै कम कंऊ आये?

⁵⁵अहै जाणदै ऐह ता तरखाण हा, अतै कै सेरी मौआ रा नां मरियम अतै सेरै भाई रै नां याकूब, यूसुफ, शमौन अतै यहूदा नियां?

⁵⁶अतै कै सेरी सब बैहणी इन्दै मन्जै ना रैहन्‍दी? फिरी ऐसिओ ऐह सब कंऊ मूळु?”

⁵⁷ऐस तरीकै तिन्यै तैस पुर विस्वास ना करू, पर यीशुऐ तियां सितै बल्लू, “भविष्‍यवक्ता रा अपणै देशा अतै अपणै घरा जो छड़ी करी बाकी सबी जगह आदर भुन्दा हा।”

⁵⁸अतै तिनी तैड़ी तंयारै अविस्वास री वजह थऊँ मतै सामर्थ रै कम ना करै।