Read Gaddi मत्ती 14 Bible Online

मत्ती 14 - Gaddi bible

मत्ती 14

¹तैस टैमैं चोथै हेस्सै रै देशा रै राजा हेरोदेसै यीशु री चर्चा हुणी।

²अतै अपणैं सेवका सीतै बल्लू यह यूहन्‍ना बपतिस्मा दिणै बाळा हा, सो मरुरै थऊँ जी ऊठु आ, ठेरेतांई तैस थऊँ सामर्थ रै काम प्रगट भुन्दै।

³क्योकि हेरोदेसै अपणै भाई फिलिप्पुस री लाड़ी हेरोदियास रै कारण, यूहन्‍ना जो पकड़करी बनू अतै जेलखानै मन्ज पाई दित्ता थू।

⁴क्योकि यूहन्‍नै तैस सोगी बलुरा थू की ऐहा जो रखणा तिजो तांई ठीक निया।

⁵अतै हेरोदेस यूहन्‍ना जो मारना चाहन्दा थू, पर मणु थऊँ डरदा थू क्ओकि सो तैसिओ भविष्‍यवक्ता मन्दै थियै।

⁶पर जैहणै हेरोदेस रा जन्मदिन आ, ता हेरोदियास री कुल्ळी हेरोदेस रै जन्मदिना रै जशना मन्ज नची करी हेरोदेस जो खुश करू।

⁷ता तिनी तैहा सितै सौगन्द खाई करी बचन दिता कि, “तू जैडा कुछ मंगली, अऊँ तिजो दिला।”

⁸तैहै अपणी माता हेरोदियास रै बहकाणै पुर बल्लू कि, “मिन्जो यूहन्‍ना बपतिस्मा दिणैबाळै रा सिर थाळा मन्ज ऐठीये ही मँगवाई देय्आ।”

⁹हेरोदेस दुखी भूआ, पर अपणी सौगन्द री वजह थऊँ, अतै अपणै सोगी बैहुरै मणु री वजह थऊँ, हूक्म दिता कि; दि देय्आ।

¹⁰अतै तिनी जेला मन्ज ही सपाई भैजी करी यूहन्‍ना रा सिर कटवाई दिता;

¹¹अतै तसेरा सिर थाळा मन्ज रखी करी अन्दा अतै कुल्ळी जो दी दिता, तैतिओ सो अपणी माता बलै लेई गई।

¹²ता यूहन्‍ना रै चेलै आये अतै तसेरी लाशा जो लेई गै अतै दब्बी दिता, अतै गिचीकरी यीशु जो ऐह खबर दिती।

¹³जैहणै यीशुऐ ऐह हुणु ता सो किस्ती पुर चढ़ी करी कसकि सुनसान जगहा जो, एकान्त मन्ज चली गो। मणु ऐह हुणी करी नगरा नगरा थऊँ पैदल ही तसेरै पिचो चली पै।

¹⁴तिनी सो भीड़ हेरी अतै तियां पुर तरस खाऊ, अतै तियां मन्ज बमारा जो ठीक करू।

¹⁵जैहणै सँझ भूई ता तसेरै चेलै तैस बलै ईच्ची करी बलणा लगै, “ऐह अक्क सुनसान जगह हा अतै देर भी भूचु करदी हा; मणु जो भैजी दिन्दै कि ऐह ग्राँ मन्ज गिच्ची करी अपणै तांयें खाणै जो लैईन।”

¹⁶पर यीशुऐ चेलै सितै बल्लू, “ईआंरा गाणा जरूरी निय्आ! तुहै ही ईयां तांयें खाणै जो देय्आ।”

¹⁷चेलै यीशु सोगी बल्लू, “असु बलै पँज रोटी अतै दूँ मछली जो छड़ी करी होर कुछ भी निय्आ।”

¹⁸तिनी बल्लू, “तियां जो मिन्जो बलै लेई अईआ।”

¹⁹ता तिन्यै मणु जो घा पुर बैहणै जो बल्लू, अतै तियां पँज रोटी अतै दूँ मछली जो लैऊ; अतै स्वर्गा री कनारी हेरी करी धन्यवाद करू अतै रोटी त्रोड़ी त्रोड़ी करी चेलै जो दिती, अतै चेलै मणु जो दिन्दै गै।

²⁰जैहणै सब खाई करी रजी गै ता चेलै बचुरी टुकड़ै री रोटी री बारह टोकरी चुकी।

²¹अतै खाणैबाळै मन्ज जनानी अतै बच्चै जो छड़ी करी लगभग पँज हजार सिर्फ मर्द ही मर्द थियै।

²²ता, जैहणै तक कि यीशु मणु थऊँ विदा लैन्दा, तिनी झट अपणै चेलै जो किस्ती पुर चढ़णै तांयें मजबुर करू कि सो पैहलै पारा जो चली गान

²³सो मणु थऊँ विदा लेई करी, प्रार्थना करना अलग पहाड़ा पुर चली गो; अतै संझा सो तैड़ी अकेला थू।

²⁴तैहणै तक किस्ती झीला री लैहरा मन्ज डगमगाऊ करदी थी, क्ओकि सामणै थऊँ हवा लगू करदी थी।

²⁵यीशु राती रै चोथै पैहरै झीला पुर चलदा चलदा तियां बलै आ।

²⁶चेलै तैसिओ झीला पुर चलदै हेरी करी ड़री गै। अतै बलणा लगै, “ऐह भूत हा।” अतै ड़रा रै लेरा पाणा लगै।

²⁷ता यीशुऐ झट तियां सितै गल्ला करी अतै बल्लू, “हिम्मत रखा! अऊँ हा ड़रा मत!”

²⁸पतरसै जवाव दिता, “हे प्रभु, अगर तुहै हिन ता, मिन्जो पाणी पुर चली करी अप्पू बलै ईणा देय्आ।”

²⁹यीशुऐ वलु, “अई” ता पतरस किस्ती थऊँ ओसी करी पाणी मन्ज चलना लगा।

³⁰पर जैहणै पतरसै तेज हवा री कनारी ध्यान करू ता सो ड़री गो, अतै जैहणै डुबणा लगा ता लेरा पाणा लगा, “हे प्रभु, मिन्जो बचा!”

³¹यीशु झट अपणा हत्थ अगो करी कै तैसिओ पकड़ी लैऊ अतै तिनी बल्लू, “हे थोड़ा विस्वास रखणै बाळै, तू कजो शक करदा हा?”

³²जैहणै सो किस्ती पुर चढ़ी गै, ता हवा रूकी गई।

³³ऐह हेरी करी जैड़ै किस्ती पुर थियै, तैसिओ प्रणाम करीके बलणा लगै, “सच मन्ज ही तू प्रमात्मैं रा पुत्र हा।”

³⁴सो गलील झीला पार गन्नेसरत नां रै ग्राँ मन्ज पुजै।

³⁵तैड़ीआ रै मणुऐ तैसिओ पछैणी लैऊ अतै अखै-ब्रखा रै सब देशा मन्ज समाचार भैजु, अतै सब बमारा जो तैस वलै लेई आये,

³⁶अतै तैस सोगी बिनती करणा लगै कि सो तियां जो अपणै कपड़ै रै पल्लै जो छुणा दे, अतै जैतणै तैसिओ छुन्दै गै सो सब ठीक भुन्दै गै।