Read Gaddi मत्ती 15 Bible Online

मत्ती 15 - Gaddi bible

मत्ती 15

¹तैहणै यरूशलेम थऊँ कुछ फरीसी अतै शास्त्री यीशु बलै ईच्ची करी बलणा लगै,

²“तून्दै चेलै स्याणै रै रीति रवाजा जो कजो टालदै हिन, ऐह बिना हत्थ धोऐ रोटी खान्दै हिन?”

³तिनी जवाव दिता, “तुहै अपणै रीति रवाजा जो मनणै तांयें प्रमात्मैं रै हूक्मा टालदै हिन?

⁴क्ओकि प्रमात्मैं बलुरा कि, ‘अपणै माता पिता रा आदर करना’, अतै ‘जैडा कोई अपणै माता पिता जो बुरा बल्ला, सो मारया गच्छा।’

⁵पर तुहै मणु जो बलदै हिन कि तुहै अपणै माता पिता जो बल्ला कि जैड़ी मदद अहै करी सकदै थियै सो अबै प्रमात्मैं सोगी करनै रा वायदा करू हा।

⁶ता सो अपणै पिता रा आदर ना करदै, ऐस तरीकै तुहै भी अपणै नियमा मुताबक प्रमात्मैं रा बचन टाळी दिन्दै हिन।”

⁷“हे कपटिओ, यशायह ऐह भविष्‍यवाणी तून्दै बारै मन्ज ठीक ही करूरी हा” कि :

⁸“ऐह मणु लवड़ा थऊँ ता मेरा आदर करदै हिन, पर तंयारा मन मिन्जो थऊँ दूर रैहन्दा।

⁹अतै ऐह बेकार मन्ज मेरी पूजा करदै हिन, क्ओकि मणु री व्यवस्था जो धर्मा रा उपदेश बणाई करी सखादैं हिन।”

¹⁰ता तिनी मणु जो अप्पू बलै हैदी करी बल्लू, “हुणा, अतै समझा

¹¹जैडा मुँहा मन्ज गान्दा, सो मणु जो अशुद्ध ना करदा, पर जैडा मुँहा थऊँ नकैन्दा, सो ही मणु जो अशुद्ध करदा।”

¹²ता चेलै ईच्ची करी तैस सोगी बलणा लगै, “कै तुहै जाणदै कि फरीसी ऐह गल्ल हुणी करी तूसु थऊँ नराज भुएै?”

¹³तिनी बल्लू, “हर पौधा जैडा मेरै स्वर्गीय पितै ना लाऊरा, पुट्टी दिणा।

¹⁴तियां जो गाणा देय्आ ऐह अंधे रस्तै दसणै बाळै हिन अतै अंधा अगर अंधे जो रस्ता दसणा लगा, ता दूनी ही गत्ता मन्ज पैई गाणा।”

¹⁵ऐह हुणी करी पतरसै तैस सोगी बल्लू, “ऐह उदाहरण असिओ भी समझाई दे।”

¹⁶तिनी बल्लू, “कै तुहै हालि भी नासमझ हिन?

¹⁷कै तुहै ना जाणदै कि जैडा कुछ मुँहा मन्ज गान्दा सो पेटा मन्ज पैन्दा अतै शौच मितै नकैई गान्दा?

¹⁸पर जैडा कुछ मुँहा थऊँ निकळदा, सो मना थऊँ निकळदा, अतै सो ही मणु जो अशुद्ध करदा हा

¹⁹क्ओकि मना थऊँ बुरै-बुरै विचार, व्यभिचार, चोरी, हत्या, दूये री जनानी रै बारै मन्ज गलत सोच, अतै निन्दा निकळदी हा।

²⁰ऐह सो ही गल्ला हिन जैड़ी मणु जो अशुद्ध करदी हिन, पर हत्थ धोऐ बगैर खाणा मणु जो अशुद्ध ना करदा।”

²¹यीशु तैड़ी थऊँ नकैई करी सूर अतै सैदा रै परदेसा जो गो।

²²अतै हेरा, तैस देशा री अक्क कनानी जनानी आई अतै जोरा सितै बलणा लगी, “हे प्रभु, दाऊद री सन्तान मिन्जो पुर दया कर। मेरी कुल्ळी बुरी तरह थऊँ दुष्‍टात्मा मन्ज हा।”

²³पर तिनी कुछ भी जवाव ना दिता। चेलै तैस वलै ईच्ची करी बलणा लगै, “ऐसा जो दूर करी दे क्ओकि ऐह बकदी-बकदी इन्दै पिचो लगुरी हा।”

²⁴पर तिनी तियां सितै बल्लू, “अऊँ सिर्फ इस्त्राएल रै घरानै री गवाचुरी भैड़ा तांयें ही भैजुरा।”

²⁵पर सो आई अतै तसेरै पैरै पैई करी बलणा लगी, “प्रभु, मेरी मदद कर।”

²⁶तिनी तैहा सोगी बल्लू, “बच्चै री रोटी लेई करी कुत्रा अगो पाणा ठीक निय्आ।”

²⁷ऐह हुणी करी तैहै जनानी बल्लू, “हाँ प्रभु, पर कुत्र भी ता मालका रै मेजा थऊँ थलै पैऊरी चूर-चारा खान्दै हिन।”

²⁸ता यीशुऐ बल्लू, “हे जनानी, तेरा विस्वास बड़ा हा। जिंआ तू चाहन्दी हा तियां ही तिजो तांयें भोआ।” तसारी कुल्ळी तैहणै ही ठीक भूच्ची गई।

²⁹तैड़ी थऊँ चली करी यीशु गलील री झीला रै कनारै गो अतै तैड़ी पहाड़ा पुर बैही गो।

³⁰ता मती भारी भीड़ तैस बलै आई, सो अपणै सोगी लंगड़ै, लूले, अन्धै, गूंगै अतै मतै सारै होर मणु जो भी लेई करी आये, तियां जो तसेरै पैरा मन्ज रखी दिता ता यीशुऐ तियां जो ठीक करू।

³¹ठेरैतांये जैहणै भिड़ै हेरू कि गूंगै बलणा लगै, टूण्ड़ै ठीक भुएै, लंगड़ै चलना लगै अतै अन्धै हेरना लगै ता सो हैरान भुएै ता तिन्यै इस्त्राएल रै प्रमात्मैं री महिमा करी।

³²यीशुऐ अपणै चेलै जो हैदी करी बल्लू, “मिन्जो ऐसा भिड़ा पुर तरस ईच्छु करदा, क्ओकि ऐह मणु त्राई दिन थऊँ मेरै सोगी हिन। अतै ईयां बलै खाणै जो कुछ भी निय्आ, अऊँ ईयां जो भूखै ना भैजणा चाहन्दा, करखी ऐसा ना भोआ कि ऐह रस्तै मन्ज ही बेहोश भूच्ची गान।”

³³चेलै तैस सोगी बल्लू, “अहै ऐस सुनसान जगह मन्ज ऐतनै मणु जो खाणै तांयें कंऊ लैईन?”

³⁴यीशुऐ तियां जो बल्लू, “तूसु बलै कैतनी रोटी हिन?” तियैं बल्लू, “सत, अतै थोड़ी जिनी मछली।”

³⁵ता तिनी तैहा भीड़ जो जमीना पुर बैहणै रा हूक्म दिता।

³⁶फिरी तिनी सत रोटी अतै मछली जो लेई करी धन्यवाद करी कै त्रोड़ी अतै चेलै जो दिन्दा गो, अतै चेलै भिड़ा जो।

³⁷सो सब खाई करी रजी गै अतै चेलै बचुरै टुकड़ै री सत टोकरी भरी करी चुकी।

³⁸जैतणै सो खाई तियां मन्ज जनानी अतै बच्चै जो छड़ी करी चऊर हजार मणु थियै।

³⁹ता सो भिड़ा थऊँ विदा लेई करी किस्ती पुर चड़ी गो अतै मगदन देश रै इलाकै मन्ज आ।