Read Gaddi मत्ती 19 Bible Online

मत्ती 19 - Gaddi bible

मत्ती 19

¹जैहणै यीशु ऐह गल्ला करी बैहु ता, ता गलील जो चली गो, अतै यरदन रै पार यहूदिया रै परदेसा मन्ज आ।

²ता बड़ी भीड़ तैस पिचो चली पैई, अतै तिनी तियां मन्ज बमार मणु जो तैड़ी ठीक करू।

³ता फरीसी परीक्षा करनै तांयें तसेरै नेड़ै ईच्ची करी बलणा लगै, “कै हरेक वजह थऊँ अपणी घरावाळी जो तलाक दिणा सही हा?”

⁴तिनी जवाव दिता, “कै तुहै पवित्रग्रन्था मन्ज ना पढुरा कि जिनी तियां जो बणाऊरा, तिनी शुरू थऊँ मर्द अतै जनानी करी कै बणाऊरा,” अतै बलुरा कि :

⁵ऐसा वजह थऊँ मणु अपणै माता पिता थऊँ अलग भूच्ची करी अपणी घरावाळी सोगी रैहणा अतै सो अक्क तन भूणै?

⁶“अतै अबै सो दोई ना, पर अक्क तन हिन। ठेरैतांये जैसिओ प्रमात्मैं जोडुरा, तियां जो मणु अलग ना करन।”

⁷तिन्यै तैस सोगी बल्लू, “फिरी मूसै कजो बलुरा कि तलाक पत्र दी करी तैहा जो छड़ी देय्आ?”

⁸यीशुऐ तियां सोगी बल्लू, “मूसा तून्दै मना री कठोरता जो हेरी करी तुसिओ अपणी अपणी घरावाळी जो तलाक दिणै री इजाजत दितुरी थी पर शुरू थऊँ ऐसा ना थू।

⁹पर अऊँ तूसु सोगी बलदा कि जैडा कोई अपणी घरावाळी जो व्यभिचार रै अलावा कसकि होरी वजह थऊँ छड़ी देय्आ, ता सो तैहा थऊँ व्यभिचार करवान्दा; अतै जैडा कोई तैहा तलाकशुदा सितै बैह करदा, सो व्यभिचार करदा।”

¹⁰चेलै तैस सोगी बल्लू, “अगर मर्दा रा जनानी सोगी ऐसा सम्बध हा, ता बैह करना खरा निय्आ।”

¹¹यीशुऐ तैस सोगी बल्लू, “सब ईयां बचना जो ना मन्दै, सिर्फ सो जिंआ जो ऐह दान प्रमात्मैं दितुरा हा।

¹²क्ओकि कुछ नपुंसक ऐसै भी हिन, जैड़ै मौआ रै गर्भ मन्ज ही इन्‍नै पैदा भुएै; अतै कुछ नपुंसक ऐसै हिन, जिंआ जो मणुऐ नपुंसक बणाऊ; अतै कुछ नपुंसक ऐसै हिन जिन्यैं स्वर्गा रै राज्य तांयें अपणै आपा जो नपुंसक बणाऊ हा। जैडा ऐहा गल्ला जो मनणै लायक हा सो ही मना।”

¹³ता मणु तैस बलै अपणै अपणै दब्बू लेई करी आये कि सो तियां पुर हत्थ रखी करी प्रार्थना करा, पर चेलै सो झिड़कै।

¹⁴यीशुऐ बल्लू, “बच्चेओ मिन्जो बलै ईणा देय्आ, अतै ईयां जो ना मत करा क्ओकि जैड़ै बच्चै सांईयै नम्र अतै भोळै हिन इन्‍नै मणु ही स्वर्गीय राज्य मन्ज प्रवेश करना।”

¹⁵अतै सो तियां पुर हत्थ रखी करी तैड़ी थऊँ चली गो।

¹⁶अक्क मणु यीशु बलै आ अतै तिनी बल्लू, “हे उत्तम गुरू, अऊँ कुण जिन्‍ना भला कम करूं कि अनन्त जिन्दगी पाऊ?”

¹⁷तिनी तैस सोगी बल्लू, “तू मिन्जो उत्तम कजो बल्लू करदा? प्रमात्मैं रै सिवाये कोई भी उत्तम निय्आ, पर अगर तू जिन्दगी पाणा चाहन्दा ता, ता आज्ञा जो मनु कर।”

¹⁸तिनी बल्लू, “कुण जिनी आज्ञा?” यीशुऐ बल्लू, “ऐह कि : हत्या ना करना, व्यभिचार ना करना, चोरी ना करना, झूठी गवाही ना दिणी,

¹⁹अपणै माता पिता रा आदर करना, अतै अपणै पड़ेही सोगी अपणै साईयें प्रेम रखणा।”

²⁰तिनी जवान मणुऐ तैस सोगी बल्लू, “ईयां सबी गल्ला ता अऊँ मन्दा; अबै मिन्जो मन्ज कहा चिजा री कमी हा?”

²¹यीशुऐ तैस सोगी बल्लू, “अगर तू सिद्ध भूणा चाहन्दा हा ता गा, अपणा सब कुछ बेचीकरी कंगाला जो दी दे, ता तिजो स्वर्गा मन्ज धन मुळना; अतै ईच्ची करी मेरै पिचो चलना लगी पै।”

²²पर सो जवान मणु ऐह गल्ल हुणी अतै उदास भूच्ची करी चली गो, क्ओकि सो बड़ा अमीर थू।

²³ता यीशुऐ अपणै चेलै सोगी बल्लू, “अऊँ तूसु सोगी सच बलदा कि अमीर रा स्वर्गा रै राज्य मन्ज प्रवेश करना मुसकल हा।

²⁴तूसु सोगी फिरी बलदा प्रमात्मैं रै राज्य मन्ज अमीर रै प्रवेश करनै थऊँ ऊँटा रा सुई रै भोका मितै नकैई गाणा आसान हा।”

²⁵ऐह हुणी करी चेलै बड़ै हैरान भूच्ची करी बल्लू, “फिरी कसेरा उद्धार भूच्ची सकदा?”

²⁶यीशुऐ तंयारी कनारी हेरी करी बल्लू, “मणु थऊँ ता ऐह ना भूच्ची सकदा, पर प्रमात्मैं थऊँ सब कुछ भूच्ची सकदा।”

²⁷ता पतरसै तैस सोगी बल्लू, “हेर अहै ता सब कुछ छड़ी करी तेरै पिचो चली पैऊरै हिन ता असिओ कै मुळना?”

²⁸यीशुऐ तियां सोगी बल्लू, “अऊँ तूसु सोगी सच बलदा कि नोई धरती मन्ज जैहणै मणु रै पुत्रा अपणी महिमा रै सिंहासना पुर बैहणा, ता तूसु भी जैड़ै मेरै पिचो चली पैऊरै हिन, बारह सिंहासना पुर बैही करी इस्त्राएल रै बारह गोत्रा रा न्याय करना।

²⁹अतै जिनी कसकिऐ घरा जो, या भाई जो, या बैहणी जो, या माता पिता जो, या बाल-बच्चै जो या बगड़ी जो मेरै नां तांयें छड़ी दितुरा हा, तियां जो सौ गुणा मुळना, अतै तियां प्रमात्मैं सोगी अनन्त जिन्दगी तक रैहणा।

³⁰पर मतै सारै हिन जैड़ै अगो हिन सो पिचो करनै; अतै जैड़ै पिचो हिन सो अगो करनै।”