Read Gaddi मत्ती 2 Bible Online

मत्ती 2 - Gaddi bible

मत्ती 2

¹हेरोदेस राजा जैहणै यहूदिया परदेस मन्ज राज्य करू करदा थू ता बैतलहम ग्राँ मन्ज यीशु रा जन्म भुआ। तैस टैमैं पूर्व दिशा थऊँ कई ज्योतिषी मणु जैड़ै तारै रा अध्ययन करदै थियै, यरूशलेम मन्ज ईच्ची करी पुछणा लगै,

²कि “यहूदी रा राजा जसेरा जन्म भुआ, सो कड़िआ? क्ओकि अहै पूर्व दिशा मन्ज अक्क तारा हेरूआ जैड़ा तसेरै जन्म रै बारै मन्ज दसदा ता अहै तैस बच्चै जो प्रणाम करना आये।”

³राजा हेरोदेस अतै यरूशलेम शहर रै कैई मणु जैहणै ऐह हुणु कि अक्क नौआ राजा पैदा भूआ ता सो ड़री गै।

⁴ता राजै प्रजा रै सब प्रधान याजका अतै शास्त्री जो हैदी करी तियां थऊँ पूछु, “पवित्रशास्त्र कै बलदा कि मसीहा रा जन्म कड़ी भूणा चहिन्दा?”

⁵तिऐं राजै सोगी बल्लू, “यहूदिया रै बैतलहम ग्राँ मन्ज जैड़ा यहूदिया परदेस मन्ज हा” क्ओकि भविष्‍यवक्तै लिखुरा कि

⁶“हे बैतलहम रै मणुओ, तुहै जैड़ै यहूदिया रै परदेसा मन्ज हिन, तुसै कसी भी तरीकै, यहूदा परदेस रै अधिकारी थऊँ हल्कै ना हिन; क्ओकि तूसु थऊँ अक्क ऐसा राज्य करनै बाळा अधिकारी नकैणा, जैस मेरी इस्त्राएली प्रजा री रखबाळी करनी हा।”

⁷ता राजै तियां ज्ञानी मणु जो चुपचाप हैदी करी तियां थऊँ पूछु कि, “तारा ठीक कस टैमैं हुजुरा?”

⁸राजै तियां ज्ञानी मणु जो ऐह बली करी बैतलहम जो भैजु कि, “गच्छा, तैस गोबरू रै बारै मन्ज ठीक-ठीक पता करा। अतै जैहणै सो मुळी गाला ता मिन्जो ईच्ची करी खबर दिन्यै ताकि अऊँ भी गिच्ची करी तैसिओ प्रणाम करूं।”

⁹ज्ञानी मणु तसेरी गल्ला हुणी करी चली गै, अतै जैडा तारा तिऐं पूर्व दिशा मन्ज हेरूरा थू सो तंयारै अगो-अगो चल्‍लु; अतै जैड़ी सो गोबरू थू तैस घरा रै ऊपर पुजीकरी रूकी गो।

¹⁰तैस तारै जो हेरी करी सो बड़ै खुश भुएै।

¹¹तिऐं तैड़ी पुजीकरी गोबरू जो तसेरी माता मरियमा सोगी हेरू, अतै हैरा झुकाई करी गोबरू जो प्रणाम करना लगै, फिरी अपणा-अपणा झोल्ळू खोली करी तैसिओ सोना, लोबान, अतै गन्धरस भेंट करू।

¹²तियां ज्ञानी मणु जो सुपना भुआ कि हेरोदेसा बलै फिरी करी मत गान्हदै, ता सो होरी बत्ता मितै अपणै देशा जो फिरी गै।

¹³ज्ञानी मणु रै गाहणै थऊँ बाद प्रभु रा अक्क स्वर्गदूत यूसुफ रै सुपनै आ अतै बल्लू, “उठ, ऐस गोबरू जो अतै सेरी मौआ जो लेई करी मिस्त्र देशा जो नह्ही गा; अतै जैहणै तक अऊँ ना बल्लू तैहणै तिकर तैठिये ही रैंह; क्ओकि राजा हेरोदेस ऐस गोबरू री तोपा पेऊरा कि ऐसिओ मरवाई देय्आ।”

¹⁴ता सो राती ही ऊठु अतै गोबरू अतै तसेरी माता जो लेई करी मिस्त्र देशा जो चली गो,

¹⁵अतै राजा हेरोदेस रै मरनै तक तैठिये ही रैऊ। ठेरैतांये कि सो बचन जैड़ा प्रभुऐ भविष्‍यवक्ता रै द्वारा बलुरा थू सो पुरा भोआ “मैंई अपणै पुत्रा जो मिस्त्र देशा थऊँ हैदुरा।”

¹⁶जैहणै राजा हेरोदेस जो पता लगा कि ज्ञानी मणु तैस सोगी धोखा करूआ, ता सो बड्डा क्रोधित भुआ, अतै सपाई जो भैजी करी ज्ञानी मणु रै दसुरै ठीक-ठीक टैमां रै मुताबक बैतहलम ग्राँ अतै तठेरै नेड़ै तेड़ै री जगह मन्ज दूँ साला थऊँ हल्कै सबी बच्चै जो मरवाई दिता।

¹⁷ता जैडा बचन यिर्मयाह भविष्‍यवक्तै बलुरा थू सो पुरा भुआ कि

¹⁸“रामाह ग्राँ मन्ज, रूण-कलत पेऊरा; राहेल अपणै गोबरू तांऐ रोऊ करदी थी, अतै शान्त भूणा ना चाहन्दी थी, क्ओकि सो मरी गच्छुरै थियै।” अतै जैहणै तिकर हेरोदेस ना मरू सो तैठिये रैऊ। ठेरैतांये कि ऐह बचन जैडा भविष्‍यवक्तै बलुरा थू पुरा भोआ कि “मैंई अपणै पुत्रा जो मिस्त्र थऊँ हैदुरा।”

¹⁹राजा हेरोदेस रै मरनै थऊँ बाद, जैहणै यूसुफ अतै तसेरा परिवार मिस्त्र देश मन्ज ही थियै ता प्रभु रा अक्क स्वर्गदूत यूसुफ रै सुपनै आ अतै बल्लू,

²⁰“उठ, गोबरू अतै सेरी मौआ जो लेई करी इस्त्राएल जो फिरी गा, क्ओकि जैडा ऐस गोबरू जो मारना चाहन्दै थियै सो मरी गै हिन।”

²¹तिनी उूठी करी गोबरू अतै तसेरी मौआ जो लैऊ, अतै इस्त्राएल जो फिरी आ।

²²पर जैहणै तैसिओ ऐह पत्ता लगु कि हेरोदेसा रा पुत्र अरखिलाउस यहूदिया परदेस पुर राज्य करू करदा, ता सो तैड़ी गाणै थऊँ डरू। पर सुपनै मन्ज प्रमात्मैं री चेतावनी पाई करी गलील परदेसा जो चली गो,

²³अतै नासरत नां रै शहरा मन्ज गिच्ची बसु, ताकि ऐह बचन पुरा भोआ, जैडा भविष्‍यवक्तै बलुरा थू; कि “तैस नासरी कहलाणा।”