Read Gaddi मत्ती 20 Bible Online

मत्ती 20 - Gaddi bible

मत्ती 20

¹“स्वर्गा रा राज्य कसकि घरा रै मालका सांईयै हा जैडा भ्यागा ही घरा थऊँ निकळू कि अंगुरा रै बगीचे मन्ज गिच्ची करी मजदूरा जो कमै ला।

²तिनी मजदूरा जो अक्क दीनार[10] रोज दिणै री गल्ल करी अतै तियां जो अपणै अंगुरा रै बगीचे मन्ज कम करनै तांयें भैजु।”

³फिरी तिनी नौ बजै रै टैमैं बजारा मन्ज कुछ बेकार खडुरै मणु जो हेरू,

⁴अतै तिनी बल्लू, “तुहै भी अंगुरा रै बगीचे मन्ज गच्छा अतै कम करा, अतै जैडा कुछ ठीक हा, तुसिओ दिला।” ता सो भी चलै गै।

⁵फिरी तिनी दोफारा रै अतै लगभग त्राई बजै भी गिच्ची करी तियां ही मजदूरा जो कम्मै लाऊ।

⁶फिरी सझां रै लगभग पँज बजै रै करीब तिनी मालकै फिरी निकळी करी होरी मणु जो बजारा मन्ज खडुरै हेरू, अतै तिनी बल्लू, “तुहै कजो ऐड़ी दिन भरी बेकार खड़ी रैह?” तिन्यै बल्लू, “ठेरैतांये कि असिओ कुणिए कंमै ही ना लाऊ।”

⁷मालकै तियां सितै बल्लू, “तुहै भी अंगुरा रै बगीचे मन्ज गच्छा।”

⁸“सँझ भूई ता अंगुरा रै बगीचे रै मालकै अपणै खजांची सोगी बल्लू, मजदूरा जो हैदी करी भ्यागा थऊँ लेई करी तक जैड़ै कमै लगुरै थियै मजदूरी दे। पर संझा कम करनैवाळै जो पैहलै दे”

⁹जैहणै सो आये ता जिन्यैं घंटा भरी ही कम करू थू, ता तियां जो अक्क-अक्क दीनार मूळु।

¹⁰जैड़ै पैहलै छुरै थियै तिन्यै ऐह सोचु कि असिओ मता मुळना, पर तियां जो भी अक्क-अक्क दीनार मूळु।

¹¹ता सो मणु मालका पुर कुड़कुड़ाई करी बलणा लगै,

¹²“अहै दिन भरी रा भार अतै धूपा मन्ज कमाऊ हा, पिचै छुरै मणुऐ ता अक्क घंटा ही कम करू हा, अतै तुहै असिओ भी इन्यारै बराबर ही मजदूरी दितिआ।”

¹³पर तिनी तियां मन्ज अक्की जो जवाव दिता, “मित्रा, अऊँ तिजो सोगी कोई अन्याय ना करू करदा। कै मैंई तूसु सोगी अक्क दीनार मजदूरी तय ना करूरी थी?

¹⁴जैड़ी तेरी मजदूरी हा तैतिओ लै अतै चली गा। मेरी इच्छा ऐह हा कि जैतनी मजदूरी तिजो दितिआ तैतना ही तेरै बाद ईणैबाळै जो दिछुं।

¹⁵कै ऐह ठीक निय्आ कि जैडा मेरा हा तैत सोगी अऊँ जो चाहे सो करूं? कै मेरा भला करना तेरी हाख्री मन्ज खटकदा?”

¹⁶“ऐस तरीकै जैड़ै अगो हिन सो पिचो करनै अतै जैड़ै पिचो हिन सो अगो करनै।”

¹⁷जैहणै यीशु यरूशलेम जो चलु ता सो बारह चेलै जो एकान्त मन्ज लेई गो, अतै बत्ता मन्ज तियां सोगी बलणा लगा,

¹⁸“हेरा, अहै यरूशलेम जो चलै हिन, अतै मणु रा पुत्र प्रधान याजका अतै शास्त्री रै हत्थै पकड़ाया गाणा, अतै तियां सो मारनै तांयें ठहराणा।

¹⁹अतै तैसिओ गैर यहूदी रै हत्थै सौंपी दिणा ताकि सो तसेरा मजाक उड़ान, अतै कोड़ै मारन, अतै क्रूस पुर टुन्गी दीन, अतै सो त्रियै दिन फिरी जी भोआ।”

²⁰ता यहून्‍ना अतै याकूब री माँ (जबदी रै पुत्र) अपणै दूनी दब्बू सोगी यीशु बलै ईच्ची करी तैसिओ प्रणाम करू, अतै तैस थऊँ कुछ मगंणा लगी।

²¹तिनी तैहा सोगी बल्लू, “तू कै चाहन्दी हा?” सो तैस सोगी बलणा लगी, “ऐह बचन दे कि मेरै ऐह पुत्र तेरै राज्य मन्ज अक्क सज्जै कनारी अतै अक्क खब्बै कनारी बैहा।”

²²यीशुऐ जवाव दिता, “तुहै ना जाणदै कि कै मँगू करदै हिन। जैडा दुख अऊँ सैहणै जो तैयार हा, कै तुहै भी सही सकदै हिन?” तिन्यै तैस सोगी बल्लू, “अहै सही सकदै हिन।”

²³तिनी तैस सोगी बल्लू, “तूसु मिन्जो सांईयै दुख ता सैहणा, पर अपणै सज्जै अतै अपणै खब्बै बहालना मेरा कम निय्आ, पर जैस तांयें मेरै पितै तैयार करूरा, तैस ही बैहणा हा।”

²⁴ऐह हुणी करी बाकी दस चेलै तियां पुर गुस्सा करना लगै

²⁵यीशुऐ तियां जो नेड़ै हैदी करी बल्लू, “तुहै जाणदै हिन कि गैर यहूदी रै हाकम तियां पुर राज्य करदै हिन; अतै जैड़ै बड़ै हिन, सो तियां पुर हक्क जतादैं हिन।

²⁶पर तूसु मन्ज ऐसा ना भूणा; जैडा तूसु मन्ज बड़ा भूणा चाहन्दा, सो तून्दा सेवक बणा;

²⁷अतै जैडा तूसु मन्ज प्रधान भूणा चाहन्दा, सो तून्दा दास बणा;

²⁸जिंआ कि मणु रा पुत्र ठेरैतांये ना आ कि अपणी सेवा चाकरी करवा, पर ठेरैतांये आ कि मतै रै छुटकारै तांयें अपणै प्राण देय्आ।”

²⁹जैहणै सो यरीहो थऊँ नकैऊ करदै थियै, ता अक्क बड़ी भीड़ तसेरै पिचो चली पैई।

³⁰अतै दोई अन्धै, जैड़ै सड़का रै कनारै बैहुरै थियै, ऐह हुणी करी कि यीशु गाणा लगुरा, जोरा सितै बकणा लगै, “हे प्रभु, दाऊद री सन्तान, असु पुर दया कर।”

³¹मणुऐ तियां जो झिड़कू कि चुप रेय्आ; पर सो होर भी जोरै जोरै बलणा लगै, “हे प्रभु दाऊद रै पुत्रा, असु पुर दया कर।”

³²ता यीशुऐ खड़ी करी तियां जो हैदु अतै बल्लू, “तुहै कै चाहन्दै कि अऊँ तूसु तांयें करू?”

³³तिन्यै तैस सोगी बल्लू, “हे प्रभु, ऐह कर कि इन्दी हाख्री खुली गान।”

³⁴यीशुऐ तरस खाई करी तंयारी हाख्री छुई, अतै सो तैहणै ही हेरना लगी पै; अतै तसेरै पिचो चली पै।