Read Gaddi मत्ती 21 Bible Online

मत्ती 21 - Gaddi bible

मत्ती 21

¹जैहणै सो यरूशलेम रै नेड़ै पुजै अतै जैतून पहाड़ पुर बैतफगे रै नेड़ै आये, ता यीशुऐ दूँ चेलै जो ऐह बली करी भैजू कि,

²“सामणै रै ग्राँ मन्ज गच्छा। तैड़ी पुजदै ही तुसिओ अक्क गदही बनुरी अतै तैहा सोगी बच्चा मुळना हा। तियां जो खोली करी मिन्जो वलै लेई अईआ।

³अगर कोई तूसु थऊँ पुछला ता बलै कि प्रभु जो इन्यारी जरूरत हा, ता तैस झट सो भैजी दिणै हिन।”

⁴ऐह ठेरैतांये भुआ कि जैडा बचन भविष्‍यवक्तै बलुरा, सो पुरा भोआ :

⁵“सिय्योन री कुल्ळी सोगी बला, हेर, तेरा राजा तिजो वलै ईच्छु करदा; सो नम्र हा, अतै गदहै पुर बैहुरा हा; बल्कि लादू रै बच्चै पुर।”

⁶चेलै गिच्ची करी तियां ही करू जिंआ यीशुऐ बलुरा थू।

⁷अतै गदही अतै बच्चै जो अणीकरी, तियां पुर कपड़ै पायै, अतै सो तियां पुर बैही गो।

⁸ता मतै मणुऐ अपणै कपड़ै बत्ता मन्ज बछाये, अतै कई मणुऐ रूखा री डाळी कटीकरी बत्ता मन्ज बछाई।

⁹जैड़ी मणु री भीड़ अगो अतै पिचो चलुरी थी, जोरा जोरा सितै बल्लू करदै थियै, “दाऊद रै पुत्रा री जय जयकार, धन्य हा सो जैडा प्रभु रै नां सितै इन्दा, अम्बरा मन्ज जय जयकार।”

¹⁰जैहणै यीशु यरूशलेम मन्ज प्रवेश करू, ता पूरै नगरा मन्ज हलचल मची गई, अतै मणु बलणा लगै, “ऐह कुण हा?”

¹¹मणुऐ बल्लू, “ऐह गलील रै नासरत रा भविष्‍यवक्ता यीशु हा।”

¹²यीशुऐ प्रमात्मैं रै मन्दरा मन्ज गिच्ची करी तियां सबी जो, जैड़ै मन्दरा मन्ज लेन-देन करू करदै थियै कड्ड़ी दिता, अतै पैसै बदलणै बाळै री पीढ़ी अतै कबूतर बेचणै बाळै री चौकी फैंकी दिती;

¹³अतै तिनी बल्लू, “पवित्रशास्त्र मन्ज लिखुरा कि, ‘मेरा मन्दर प्रार्थना करनै री जगह भुणीआ’; पर तुहै ऐह डाकू रा खोह बणाई दितुरा।”

¹⁴ता अंधे अतै लटटै, मन्दरा मन्ज तैस बलै आये, अतै तिनी तियां जो ठीक करू।

¹⁵पर जैहणै प्रधान याजकै अतै शास्त्रीये ईयां हैरानी भरै कम्मा जो, जैड़ै तिनी करै, अतै मन्दरा मन्ज दब्बू जो दाऊद री सन्ताना री जय जयकार करदै हेरू ता सो बड़ै गुस्सै भुएै,

¹⁶अतै तैस सोगी बलणा लगै, “कै तू हुणदा कि ऐह मणु कै बल्लू करदै हिन?” यीशुऐ तियां सोगी बल्लू, “हाँ; कै तुहै ऐह ना पढुरा; ‘दब्बू अतै दुध पिन्दै बच्चै रै मुँहा थऊँ तैंई अपार स्तुति कराई?’ ”

¹⁷ता सो तियां जो छड़ी करी चेलै सोगी नगरा रै बाहर बैतनिय्याह जो गो अतै तैठी रात बताई।

¹⁸भ्यागा ही जैहणै सो नगरा जो फिरना लगुरै थियै ता तैसिओ भूख लगी

¹⁹सड़का रै कनारै तिनी अक्क अंजीरा रा रुख हेरी करी सो तैस बलै गो अतै तैत मन्ज पत्रा जो छड़ी करी होर कुछ ना लगुरा थू ता तैस रूखा सोगी बल्लू, “अजा थऊँ बाद तिजो मन्ज कदी फळ ना लगलै।” अतै सो अंजीरा रा रुख हुकी गो।

²⁰ऐह हेरी करी चेलै जो हैरानी भूई अतै तिन्यै बल्लू, “ऐह अंजीरा रा रुख झट ही किआं हुकी गो?”

²¹यीशुऐ तियां जो जवाव दिता, “अऊँ तूसु सोगी सच बलदा अगर विस्वास रखलै अतै शक ना करलै, ता ना सिर्फ ऐह करी सकदै बल्कि अगर ऐस पहाड़ा सोगी भी बललै कि ‘उखड़ी करी समुंद्र मन्ज गिच्ची पै’ ता ऐह भी भूच्ची गाणा।

²²अतै जैडा कुछ तुहै प्रार्थना मन्ज विस्‍वासा सोगी मंगलै सो सब तुसिओ मुळना।”

²³सो मन्दरा मन्ज गिच्ची करी उपदेश दिणा लगा, ता प्रधान याजकै अतै स्याणै तैस बलै ईच्ची करी बलणा लगै, “तू ऐह कम कस हक्का सितै करदा हा? अतै तिजो ऐह हक्क कुणी दितुरा?”

²⁴यीशुऐ तियां जो जवाव दिता, “अऊँ भी तूसु थऊँ अक्क गल्ल पूछदा; अगर सो मिन्जो दसलै ता अऊँ भी तुसिओ दसला कि ऐह कम कस हक्का सितै करदा।

²⁵यूहन्‍ना रा बपतिस्मा कड़ी थऊँ थू? स्वर्गा री तरफा थऊँ या मणु री तरफा थऊँ?” ता सो अप्पू मन्ज बैंहसणा लगी पै, “अगर अहै बलदै कि स्वर्गा री तरफा थऊँ, ता ऐस असु सोगी बलणा कि, फिरी तुहै तसेरा विस्वास कजो ना करू?

²⁶अतै अगर अहै बलदै मणु री तरफा थऊँ, ता असिओ भिड़ा रा डर हा, क्ओकि सो सब यूहन्‍ना जो भविष्‍यवक्ता मन्दै हिन।”

²⁷ता तिन्यै यीशु जो जवाव दिता, “अहै ना जाणदै।” यीशुऐ भी बल्लू, “ता मुँ भी तुसिओ ना दसणा कि ऐह कम अऊँ कस हक्का सोगी करदा।”

²⁸“तुहै कै सोचदै हिन? अक्क गल्ल हुणा, कसकि मणु रै दोई पुत्र थियै; तिनी पैहलै वलै गिच्ची करी बल्लू, ‘हे पुत्रा, अज अंगुरा रै बगीचे मन्ज कम कर।’

²⁹तिनी जवाव दिता, मुँ ना गाणा, पर बादा मन्ज पछताऊ अतै बगीचे मन्ज कमाणा चली गो।”

³⁰“फिरी तिनी मणुऐ अपणै दूये पुत्रा जो भी तियां ही बल्लू, तिनी जवाव दिता, ‘जी हबजु ही गान्दा’, पर सो ना गो।

³¹ईयां दूनी मन्ज कुणी जिन्‍नै अपणै पिता री इच्छा पूरी करी?” तिन्यै बल्लू, “पैहलै बाळै पुत्रै।” यीशुऐ तियां सोगी बल्लू, “अऊँ तूसु सोगी सच बलदा कि चुंगी लैणैबाळै अतै वेश्या तूसु थऊँ पैहलै प्रमात्मैं रै राज्य मन्ज प्रवेश करदै हिन।

³²क्ओकि यूहन्‍ना तुसिओ दस्सु कि तुहै कियां धर्मी जीवन जीन, पर तुहै तसेरा विस्वास ना करूरा; पर चुंगी लैणैबाळै अतै वेश्या तसेरा विस्वास करूरा, पर तुहै ऐह हेरी करी भी ना पछताये कि बादा मन्ज ही तंयारा विस्वास करी लैन्दै।”

³³“अक्क होर उदाहरण हुणा अक्क घरा रा मालक थू, जिनी अंगुरा रा बगीचा लगाऊ, तिनी चंऊ कनारी बाड़ लगाऊ, अतै तैत मन्ज अक्क रस नचोढ़णै तांयें कुण्ड़ बणाऊ, अतै किसाना जो तठेरा ठेका दी करी अप्पू परदेस चली गो।

³⁴जैहणै फळा रा टैमैं नेड़ै आ, ता तिनी अपणै नौकरा जो फळ लैईणै तांयें तियां किसाना बलै भैजु।

³⁵पर किसाने तसेरै नौकरा जो पकड़ी करी मारू, अतै कोई जानी थऊँ मारी दितै, अतै कसकि जो पत्थर मारै।

³⁶फिरी तिनी मालकै पैहलै थऊँ ज्यादा नौकरा जो भैजु, किसाने तियां सोगी भी तियां ही करू।

³⁷आखरी मन्ज तिनी अपणै पुत्रा जो ऐह सोची करी तियां बलै भैजु कि तियां मेरै पुत्रा रा आदर करना।

³⁸पर किसाने पुत्रा जो हेरू करी अप्पू मन्ज बल्लू कि, ‘ऐह ता वारिस हा, अईआ, अहै ऐसिओ मारी दिन्दै अतै सेरी सब मीरास अहै लेई लैदैं।’

³⁹ता तिन्यै तैसिओ पकडु अतै अंगुरा रै बगीचे थऊँ बाहर कड्ड़ी कै मारी दिता।”

⁴⁰“ठेरैतांये जैहणै अंगुरा रै बगीचे रा मालका ईणा ता तैस तियां किसाना सोगी कै करना?”

⁴¹तिनी तैस सोगी बल्लू, “तैस तियां बुरै मणु जो बुरी तरह सितै नष्‍ट करना अतै अंगुरा रै बगीचे रा ठेका होरी किसाना जो दिणा, जिंआ टैमां पुर तैसिओ फळ दिणै।”

⁴²यीशुऐ तैस सोगी बल्लू, “कै तुहै कदी पवित्रग्रन्था मन्ज ना पढुरा” : “जैस पत्थर जो राजमिस्त्रीये निकम्मा ठहराऊ थू, सो ही कूणा रा पत्थर बणी गो? ऐह प्रभु री तरफा थऊँ भूआ, अतै इन्दी नजरा मन्ज अदभुत हा।”

⁴³“अऊँ तूसु सोगी ऐह बलदा, तूसु यहूदी अगुवै अबै प्रमात्मैं री प्रजा ना भूणा कि प्रमात्मां तूसु पुर राज्य करा, पर होरी मणु पुर प्रमात्मैं राज्य करना जियां तसेरै अनुसार कमाणा।

⁴⁴जैस ऐस पत्थर पुर पैणा, तैस चकनाचूर भूच्ची गाणा अतै जैस पुर ऐह पैणा तैस पिह गाणा।”

⁴⁵प्रधान याजक अतै फरीसी तसेरै उदाहरण हुणी करी समझी गै कि सो तंयारै बारै मन्ज ही बल्लू करदा हा।

⁴⁶अतै तिन्यै तैसिओ पकडणा चाऊ, पर मणु थऊँ ड़री गै क्ओकि मणु तैसिओ भविष्‍यवक्ता मन्दै थियै।