Read Gaddi मत्ती 22 Bible Online

मत्ती 22 - Gaddi bible

मत्ती 22

¹यीशु फिरी तियां सोगी उदाहरण मन्ज कणैणा लगा,

²“स्वर्गा रा राज्य तैस राजै साईयें हा, जिनी अपणै पुत्रा रा बैह करू।

³अतै अपणै नौकरा जो भैजु कि नियून्दुरूरै मणु जो बैह री धामा तांयें हैदी लैईन; पर तिन्यै ईणा ना चाऊ।”

⁴फिरी तिनी अपणै नौकरा जो ऐह बली करी भैजु कि, “नियून्दुरूरै मणु जो बला, ‘अऊँ धाम तैयार करी बैहुरा, मैंई तूसु तांई खरा खरा मांस अतै सब कुछ तैयार करूआ; बैहा री धामा मन्ज अईआ।’ ”

⁵पर सो मणु अणहुणा करीके चली गै कोई अपणी बगड़ी जो, कोई अपणै व्यपार जो।

⁶होर मणु जैड़ै बची गै तिन्यै सो नौकर पकड़ै अतै तंयारी बेईज्ती करी अतै सो मारी दितै

⁷ता राजा जो गुस्सा आ, अतै तिनी अपणी सेना भैजी करी तियां हत्यारै रा नाश करू, अतै तंयारै नगरा जो फूकी दिता।

⁸ता राजै अपणै नौकरा सितै बल्लू, “बैहा री धाम ता तैयार हा पर नियून्दुरूरै मणु ता ऐस लायक ना हिन।

⁹ठेरैतांये सब जगह मन्ज गच्छा अतै जैतणै मणु तुसिओ मुळन, सबी जो बैह तांयें लेई अईआ।”

¹⁰ता तिन्यै नौकरै सबी जगह गिच्ची करी कै भलै, कै बुरै, जैतणै भी मुळै, सबिजो कठेरू, अतै बैहा रा घर परौणै सितै भरी गो।

¹¹“जैहणै राजा परौणै जो हेरना अन्दर आ, ता तिनी तैड़ी अक्की मणु जो हेरू, जिनी सो ओढण ना लाऊरै थियै जैड़ै राजै पैहननै जो बलुरा थू।

¹²राजै तैस थऊँ पूछु, ‘हे मित्रा; तैंई सो ओढण कजो ना लाऊरै जैड़ै मैंई लाणै जो दितुरै थियै?’ तसेरा मुँह बन्द भूच्ची गो।

¹³ता राजै नौकरा सितै बल्लू, ‘सेरै हत्थ पैर बन्‍नी करी बाहर नैहरै मन्ज फैंकी देय्आ, जैड़ी रूणा अतै दन्द पीणा भूणा।’

¹⁴क्ओकि हैदुरै ता मतै हिन पर चुणुरै थोड़ै हिन।”

¹⁵ता फरीसी अप्पू मन्ज ऐह सोचणा लगै कि ऐसिओ कस तरीकै गल्ला मन्ज फसान।

¹⁶ता तिन्यै अपणै चेलै हेरोदेस रै गुट रै मणु सोगी ऐह कणैणै तांयें भैजै कि, “हे गुरू, अहै जाणदै कि तुहै सचै हिन, अतै प्रमात्मैं री बत्ता जो सच्चाई सोगी दसदै हिन

¹⁷ठेरैतांये असिओ दस्सा की तुहै कै सोचदै हिन? कैसर जो कर दिणा ठीक हा कि ना?”

¹⁸यीशु तंयारै मना री जाणी करी बल्लू, “हे कपटिओ, मिन्जो कजो परखु करदै हिन?

¹⁹अक्क दीनार मिन्जो दस्सा।” ता सो तैस वलै अक्क दीनार लेई आये।

²⁰तिनी तियां थऊँ पूछु, “ऐह छाप अतै नां कसेरा हा?”

²¹तिन्यै तैस सोगी बल्लू, “कैसर रा।” ता यीशुऐ बल्लू, “जैडा कैसर रा हा, सो कैसर जो; अतै जैडा प्रमात्मैं रा हा, सो प्रमात्मैं जो देय्आ।”

²²ऐह हुणी करी तियां जो हैरानी भूई, अतै तैसिओ छड़ी करी चली गै।

²³तैस दिन सदूकि जैड़ै बलदै हिन मरूरै रा दोबारा जीणा हा हि ना, तैस वलै आये अतै तैस थऊँ पूछु,

²⁴“हे गुरू, मूसा बलदा थू कि अगर कोई मणु बिना सन्तान मरी गच्छा, ता तसेरा भाई तसेरी घरावाळी सोगी बैह करीके अपणै भाई तांयें वंश पैदा करा।

²⁵अबै असु वलै सत भाई थियै; पैहला बैह करीके मरी गो, अतै औलाद ना भूणै री वजह थऊँ अपणी घरावाळी जो अपणै भाई तांयें छड़ी गो।

²⁶ऐस तरीकै दूये अतै त्रियै भी करू, अतै सत भाई तक ईयांईं ही भूआ।

²⁷सबी थऊँ बाद सो जनानी भी मरी गई।

²⁸ता दोबारा जीणै थऊँ बाद सो तियां सत मन्ज कसेरी घरावाळी भुणीआ? क्ओकि सो ता सबी री घरावाळी रैई चुकुरी थी।”

²⁹यीशुऐ तियां जो जवाव दिता, “तुहै पवित्रग्रन्थ अतै प्रमात्मैं री सामर्थ ना जाणदै; ऐसा वजह थऊँ तुहै भूला मन्ज पैऊरै।

³⁰क्ओकि दोबारा जीणै थऊँ बाद तियां ना ता बैह करनै अतै ना बैहा तांयें सो दिणै हिन पर स्वर्गा मन्ज प्रमात्मैं रै स्वर्गदूता बराबर भूणै।

³¹पर मरूरै थऊँ दोबारा जीणै रै बारै मन्ज तुहै ऐह बचन ना पढुरा, जैडा प्रमात्मैं तूसु सोगी बलुरा

³²‘अऊँ अब्राहम रा प्रमात्मां, अतै इसहाक रा प्रमात्मां, अतै याकूब रा प्रमात्मां हा’? सो मरूरै रा ना पर जिन्दै रा प्रमात्मां हा।”

³³ऐह हुणी करी सब मणु तसेरै उपदेशा थऊँ हैरान भुएै।

³⁴जैहणै फरीसीये हुणु कि यीशुऐ सदूकि रा मुँह बन्द करी दिता, ता सो किटठी गै।

³⁵ता तियां मन्ज अक्क शास्त्री तैसिओ परखणै तांयें तैस थऊँ पुछणा लगा,

³⁶“हे गुरू, व्यवस्था मन्ज कुण जिन्‍ना हूक्म बड़ा हा?”

³⁷यीशुऐ तैस सोगी बल्लू, “तू प्रमात्मैं अपणै प्रभु सोगी अपणै पूरै मना अतै पूरै प्राणा सोगी अतै अक्ला सोगी प्‍यार कर।

³⁸तसेरा सबी थऊँ बड़ा हूक्म ऐह ही हा।

³⁹अतै अक्क होर भी ऐह हा कि तू अपणै पड़ेही सोगी अप्पू साईयें प्रेम रख।

⁴⁰ऐह ही दोई हूक्म पूरी व्यवस्था अतै भविष्‍यवक्ता रा आधार हा।”

⁴¹जैहणै फरीसी किटठै थियै, ता यीशुऐ तियां थऊँ पूछु,

⁴²“मसीह रै बारै मन्ज तुहै कै सोचदै हिन? सो कसेरा पुत्र हा?” तिन्यै तैस सोगी बल्लू, “दाऊद रा।”

⁴³तिनी तियां थऊँ पूछु, “ता दाऊद आत्मा मन्ज तैसिओ प्रभु कजो बलदा हा?

⁴⁴‘प्रभुऐ, मेरै प्रभु सोगी बल्लू, मेरै सज्जै कनारी बैह, जैहणै तक कि अऊँ तेरै बैरी जो तेरै अगो झुकाई ना दिच्छु।’

⁴⁵भला, जैहणै दाऊद तैसिओ प्रभु बलदा हा, ता सो तसेरा पुत्र किआं भुआ?”

⁴⁶ऐसा गल्ला रा कोई भी जवाव ना दी सकू। तैस दिन थऊँ बाद फिरी कसी जो तैस थऊँ पुछणै री हिम्मत ना भूई