Read Gaddi मत्ती 24 Bible Online

मत्ती 24 - Gaddi bible

मत्ती 24

¹जैहणै यीशु मन्दरा थऊँ निकळी करी चलूरा थू, ता तसेरै चेलै मन्दरा री कलाकारी दसणै तांयें तैस बलै आये।

²तिनी तियां सितै बल्लू, “तुहै ऐह सब हेरू करदै हिन ना! अऊँ तूसु सोगी सच बलदा, ऐड़ी पत्थर पुर पत्थर भी ना टिकणा जैडा ढाणा निय्आ।”

³जैहणै सो जैतून पहाड़ा पुर बैहुरा थू, ता चेलै एकान्त मन्ज तैस बलै ईच्ची करी बल्लू, “असिओ दस्सा कि ऐह गल्ला कैहणै भूणी? तून्दै ईणै रा अतै संसारा रै अन्त री कै नशाणी भुणीआ?”

⁴यीशुऐ तियां जो जवाव दिता, “चौकनै रेय्आ! कोई तुसिओ भटका ना,

⁵क्ओकि मतै सारै ऐसै भूणै कि जिंआ मेरै नां थऊँ ईच्ची करी बलणा, ‘अऊँ मसीहा हा’, अतै मतै जो भटकाणा।

⁶तूसु लड़ाई या झगड़ै री अफवाह हुणनी, ता डरदै मत क्ओकि ईआंरा भूणा जरूरी हा, पर तैस टैमैं अन्त ना भूणा।

⁷क्ओकि जाति पुर जाति अतै राज्य पुर राज्य चढ़ाई करनी, अतै जगह जगह अकाल पैणै, अतै हिल्‍लण भूणै।

⁸इन्या सबी गल्ला री शुरूआत ईयां भुणीआ, जियां बच्चा जमणै री पीड़ा रै टैमं भून्दिआ।”

⁹“ता क्‍लेश दिणै तांयें तियां तुसिओ पकड़ाणा, अतै तुसिओ मारी दिणा, अतै मेरै नां री वजह थऊँ सबी जाति रै मणु तूसु सोगी बैर रखणा।

¹⁰ता मतै मणु विस्वास करना छड़ी दिणा, अतै अक्की दूये जो पकड़वाणा, अतै अक्की दूये सितै बैर रखणा।

¹¹मतै सारै भविष्‍यवक्ता ईणै, अतै मतै जो भरमाणा।

¹²अधर्म रै बदणै थऊँ मतै विस्वासी अक्की दूये सोगी प्रेम ना करना,

¹³पर जैस अन्त तक धीरज रखणा, तसेरा ही उद्धार भूणा।

¹⁴अतै राज्य रा ऐह सुसमाचार पूरै संसार मन्ज प्रचार करया गाणा, कि सब जाति पुर गवाही भोआ, तैहणै संसारा रा अन्त चली ईणा।”

¹⁵“ठेरैतांये जेहा उजाड़णैवाळी घृणित चिजा जो पवित्र जगह पुर तुहै खडुरै हेरन, जठेरी चर्चा दानिय्येल भविष्‍यवक्तै करूरी हा (जैडा पढ़ा, सो समझा),

¹⁶ता जैड़ै यहूदिया मन्ज हिन सो पहाड़ा जो नह्ही गान।

¹⁷जैड़ै छपरा पुर हिन, सो अपणै घरा जो समान लैणा ना ओसन।”

¹⁸“जैड़ै बगड़ी मन्ज हिन, सो अपणै कपड़ै लैणा पिचो ना फिरन।

¹⁹तियां दिन मन्ज जैड़ी गर्भवती अतै दुध पयाणै बाळी माता भोली तियां पुर हाय! हाय!

²⁰प्रार्थना करा कि तुसिओ सर्दी मन्ज या विश्रामदिन मन्ज नहणा ना पैय्आ।

²¹क्ओकि तैस टैमैं ऐसा भारी क्‍लेश भूणा, जिन्‍ना ना ता संसार रै शुरूआत थऊँ अज तक भुआ अतै ना ही भूणा।

²²अगर प्रभु तियां दिन जो ना घटान्दा ता सब मणु मरी गान्दै, पर तियां चुणुरै री वजह थऊँ सो दिन घटाई दिणै।

²³तैस दिन अगर कोई तूसु सोगी बला, ‘हेरा, मसीह ऐठीआ! या ओठीआ!’ ता विस्वास मत करदै।”

²⁴“क्ओकि झूठै मसीह अतै झूठै भविष्‍यवक्ता भी भूणै हिन, अतै मतै चिन्ह, अतै अनोखै कम करीके दसणै कि अगर भूच्ची सका ता चुणुरै जो भी भरमाई दीन।

²⁵हेरा, मैंई तूसु सोगी सब गल्ला पैहलै थऊँ ही दस्सी दितुरी हिन।”

²⁶“ठेरैतांये अगर ऐह तूसु सोगी बलन, ‘हेरा, सो बणा मन्ज हिन’, ता बाहर मत निकळी गान्दै; या ‘हेरा, सो कोठै मन्ज हिन’, ता विस्वास मत करदै।

²⁷क्ओकि जिंआ बिजळी पूर्वा थऊँ नकैई करी पश्‍चिम तक चमकदी हा अतै मणु तैतिओ हेरदै हिन, तियां ही मणु रै पुत्रा जो इंदै हेरना।

²⁸जैहणै मुँ दोबारा फिरी ईणा ता सबी जो आसानी सोगी पता लगी गाणा। जियां जैड़ी मुरदा भुन्दा तैड़ी इल्लणी भुन्दी।”

²⁹“तियां दिन मन्ज क्‍लेश थऊँ बाद सूरज नैहरा भूच्ची गाणा, अतै चन्द्रमा री लौ चली गाणीआ, अतै तारै अम्बरा थऊँ पैई गाणै। अम्बरा री शक्ति हिलाई गाणी।”

³⁰“ता मणु रै पुत्रा रा चिन्ह अम्बरा मन्ज हुजणा हा, अतै ता धरती रै सब कुला रै मणु हिक्का जकणी; अतै मणु रै पुत्रा जो बड़ी सामर्थ अतै महिमा सोगी अम्बरा रै बदळा पुर इन्दै हेरना।

³¹तैस बाजै री बड़ी आवाज सोगी धरती पुर स्वर्गदूता जो भैजणा, अतै तियां धरती रै ऐस कनारै थऊँ दूये कनारै तक, पूरै संसार रै चुणुरै मणु जो इकट्ठा करना।”

³²“अंजीरा रै रूखा थऊँ ऐह उदाहरण सिखा जैहणै तठेरी डाली कोमल भूच्ची गान्दी अतै पत्तै निकलणा लगदै, ता तुहै जाणी लैन्दै कि गर्मी रै दिन नेड़ै हिन।

³³ऐस तरीकै जैहणै तुहै ईयां गल्ला जो हेरन, ता ऐह जाणी लेय्आ कि यीशु रा दुआ आगमन नजदीक हा।

³⁴अऊँ तूसु सोगी सच बलदा कि जैहणै तक ऐह गल्ला पूरी ना भूच्ची गान, तैहणै तक ऐसा पीढ़ी खत्म ना भूणा।

³⁵अम्बर अतै धरती टळी सकदै हिन, पर मेरी गल्ला कदी भी ना टलणी।”

³⁶“तैस दिन अतै तैहा घड़ी रै बारै मन्ज कोई ना जाणदा, न स्वर्गा रै स्वर्गदूत अतै ना पुत्र, पर सिर्फ पिता।

³⁷जिंआ नूह रै दिन थियै, तियां ही मणु रै पुत्रा रा ईणा भी भूणा।

³⁸क्ओकि जिंआ जल-प्रलय रै पैहलै दिन मन्ज, जैस दिन तक नूह जहाजा पुर ना चढु, तैस दिन तक मणु खान्दै पिन्दै रैह, अतै तियां मन्ज बैह भुन्दै थियै।

³⁹अतै जैहणै तक जल-प्रलय ईच्ची करी ईयां सबी जो लुढाई ना लेई गो, तैहणै तक तियां जो पता ना लगु; तियां ही मणु रै पुत्रा भी ईणा।

⁴⁰तैस टैमैं बगड़ी मन्ज दोई मणु भूणै, अक्क लेई लैणा अतै दूये जो छड़ी दिणा।

⁴¹दोई जनानी चक्की चलाऊँ करदी भोली, अक्क लेई लैणी हा दुई छड़ी दिणिआ।”

⁴²“ठेरैतांये जागदै रेय्आ, क्ओकि तुहै ना जाणदै कि तून्दा प्रभु कैहणै ईणा।

⁴³पर तुहै ऐह गप्‍प जाणी लेय्आ कि अगर घरा रै मालका जो पता भोआ कि चोरा कैहणै चोरी करना ईणा ता तैस जागदै रैहणा, अतै अपणै घरा मन्ज चोरी ना भूणा दिणी।

⁴⁴ठेरैतांये तुहै भी तैयार रेय्आ, क्ओकि जैस घड़ी रै बारै मन्ज तुहै सोचदै भी ना हिन, तैहा ही घड़ी मणु रै पुत्रा ईच्ची रैहणा।”

⁴⁵“अतै सो विस्वास लायक अतै अक्‍लमंद दास कुण हा, जसेरा मालक तैस जो अपणै नौकरा-चाकरा पुर चौंकीदार बणाऊ कि टैमां पुर तियां जो खाणै जो देय्आ?

⁴⁶धन्य हा सो दास, जैस जो तसेरा मालक इन्‍नी साभै कम करदा ईच्ची करी हेरा।

⁴⁷अऊँ तूसु सोगी सच बलदा, तैस मालका सो दास अपणी पूरी जायदात पुर अधिकारी बणाई दिणा।

⁴⁸पर जे सो दुष्‍ट दास सोचणा लगा कि हल्ली तिकर मालका रै ईणै जो देर हा,

⁴⁹अतै अपणै दासा जो मारा जक्का, अतै खाई पी करी मतबाळा रैहणा लगी पेआ।

⁵⁰ता तैस दासा रा मालक ऐसै टैमैं फिरी ईणा, जैहणै तैस दासा जो मालका री भाळ भी ना भूणी, अतै ऐसी घड़ी जैतिओ सो जाणदा भी ना भोआ।

⁵¹ता मालका तैस दासा जो भारी ताड़ना दिणिआ अतै सो तैस कपटी मन्ज गिणया गाणा, अतै तैहा जगह भैजणा जैड़ी सिर्फ रूणा अतै दन्द पीणै हिन।”