Read Gaddi मत्ती 27 Bible Online

मत्ती 27 - Gaddi bible

मत्ती 27

¹जैहणै भ्याग भूई ता सब प्रधान याजकै अतै मणु रै स्याणै यीशु जो मारी दिणै री सलाह करी।

²तियैं तैसिओ बन्‍नू अतै बाहर नी करी पिलातुस हाकिम रै हत्था मन्ज सौंपी दिता।

³जैहणै तसेरै पकड़ाणै बाळै यहूदै हेरू कि यीशु जो दोषी ठहराऊ हा यहूदा जो पछतावा भूआ अतै सो तीह चाँदी रै सिक्कै प्रधान याजका अतै स्याणै बलै फेरी आ।

⁴अतै बल्लू, “मैंई निर्दोष मणु जो मारनै तांयें पकड़ाई करी पाप करूआ!” पर तियैं बल्लू,, “असिओ किया? तू ही जाण।”

⁵ता सो तियां सिक्कै जो मन्दरा रै अँगणा मन्ज फैंकी करी चली गो, अतै गिच्ची करी अपणै आप जो फांसी दिती।

⁶प्रधान याजकै सो सिक्कै लेई करी बल्लू, “व्यवस्था रै अनुसार ईयां सिक्कै जो मन्दरा रै भण्ड़ार घरा मन्ज रखणा ठीक निय्आ, क्ओकि ऐह सिक्कै ता कसकि मणु जो मारनै तांई दितुरै थियै।”

⁷ता तियैं सलाह करी की तियां सिक्कै सितै परदेसी जो दबाणै तांयें कुम्हार री अक्क बगड़ी खरीदी लेई।

⁸ठेरी वजह थऊँ तैहा बगड़ी रा नां अजा तक खूना री बगड़ी हा।

⁹ता जैडा बचन यिर्मयाह भविष्‍यवक्तै बलुरा थू पुरा भोआ “तियैं सो तीह सिक्कै मतलब तैसा किमता जो (जैतिओ इस्त्राएल रै मणुऐ दिणै तांयें ठहराऊरा थू) लेई लैऊ,

¹⁰अतै जियां प्रभुऐ मिन्जो हूक्म दितुरा थू तियां ही तियैं कुम्हार री बगड़ी जो खरीदणै तांयें सो पैसै इस्तेमाल करू।”

¹¹जैहणै यीशु पिलातुस राजा रै सामणै खडूरा थू ता पिलातुसै तैस थऊँ पूछु, “कै तू यहूदी रा राजा हा?” यीशुऐ तैस सोगी बल्लू, “तू अप्पू ही ता बल्लू करदा।”

¹²जैहणै प्रधान याजक अतै स्याणै तैस पुर दोष लगाऊ करदै थियै, ता तिनी कुछ भी जवाव ना दिता

¹³ता पिलातुस तैस सोगी बलणा लगा, “कै तू ना हुणु करदा कि तेरै वरोधा मन्ज कैतनी गवाही दिच्छु करदै हिन?”

¹⁴पर तिनी तैसिओ अक्की गल्ला रा भी जवाव ना दिता, ऐड़ी तक कि हाक्म जो भी बड़ी हैरानी भूई।

¹⁵हाकमा रा ऐह रवाज थू कि तैस त्यौहारा रै टैमैं सो मणु तांयें अक्की कैदी जो जैसिओ मणु चाहन तैसिओ सो छड़ी दिन्दा थू।

¹⁶तैस टैमैं तियां वलै बरअब्बा नां रा अक्क मना तना कैदी थू।

¹⁷ता जैहणै सो इकट्ठै भुएै ता पिलातुसै तियां जो बल्लू, “तुसै कसिओ चाहन्दै कि तूसु तांयें छड़ी दिच्छु? बरअब्बा जो या यीशु जो जैसिओ मसीहा भी बलदै हिन?”

¹⁸क्ओकि सो जाणदा थू कि प्रधान याजकै जळणी री वजह थऊँ ऐसिओ पकड़ाऊरा।

¹⁹जैहणै सो न्याय रै सिंहासना पुर बैहुरा थू ता तसेरी घरावाळी तैसिओ बली भैजु, “तू ऐस धर्मी रै मामलै मन्ज हत्थ मत पान्दा, क्ओकि मैंई अज सुपनै मन्ज सेरी वजह थऊँ बड़ै दुख सहै हिन।”

²⁰प्रधान याजकै अतै स्याणै मणु जो उकसाऊ कि सो बरअब्बा जो मँगी लैन, अतै यीशु जो मारी दीन।

²¹हाक्मे तियां थऊँ पूछु, “इआं दूँ मन्ज कस जो चाहन्दै हिन अऊँ तूसु तांयें छड़ी दिच्छु?” तियैं बल्लू, “बरअब्बा जो।”

²²पिलातुसै तियां थऊँ पूछु, “फिरी यीशु सोगी, जैसिओ मसीहा बलदै, कै करू?” सबीये तैस सोगी बल्लू, “ऐसिओ क्रूस पुर चढ़ाई देय्आ!”

²³पिलातुसै फिरी तियां जो बल्लू, “कजो, ऐस मन्ज कै बुराई हा?” पर सो फिरी भी बक्की नकैऐ, “ऐसिओ क्रूस पुर चढ़ाई देय्आ!”

²⁴जैहणै पिलातुसै हेरू कि कुछ बनणा ना लगु पर हौ हल्ला बदणा लगा, ता तिनी पाणी लेई करी भिड़ा रै सामणै अपणै हत्थ धोऐ अतै बल्लू, “अऊँ ऐस धर्मी रै खूना थऊँ निर्दोष हा तुहै ही जाणा।”

²⁵सब मणुऐ जवाव दिता, “अहै अतै इन्दै बच्चै ही सेरै खूना रै जिम्मेदार भोलै!”

²⁶ता तिनी बरअब्बा जो तियां तांयें छड़ी दिता, अतै यीशु जो कोड़ै लगाई करी तंयारै हवालै करी दिता कि सो क्रूस पुर चढ़ान।

²⁷सपाई यीशु जो किलै रै अन्दरा बाळै अँगणा जो लेई गै, अतै पूरी सपाई री पलटण तसेरै चंऊ कनारै इकट्ठी करी,

²⁸तसेरै कपड़ै उतारै तैसिओ लाल रंगा रा चोळा लुआऊ,

²⁹अतै कण्ड़ै रा ताज बणाई करी तसेरै मुण्ड़ा पुर लगाऊ, अतै तसेरै सज्जै हत्थै सरकण्ड़ा दिता अतै तसेरै अगो पैरा रै भारै पैई करी तसेरा मजाक उड़ाणा लगै अतै बल्लू, “हे यहूदी रै राजा, नमस्कार!”

³⁰अतै तैस पुर थूकु; अतै सो डण्डै़ सितै तसेरै मुण्ड़ा पुर मारना लगै।

³¹जैहणै सो तसेरा मजाक उड़ाई बैहै, ता जैडा चोगा तैसिओ लुआऊरा थू उतारी दिता अतै तसेरै ही कपड़ै लुआऐ, अतै क्रूस पुर चढ़ाणै तांयें लेई चलै।

³²बाहर गान्दै टैमैं तियां जो शमौन नां रा अक्क कुरैनी नगर रा मणु मूळु। तिन्यै तैसिओ पकडु ताकि सो यीशु रा क्रूस चुकी करी लेई चला।

³³तैसा जगह जैतिओ गुलगुता या खोपड़ी री जगह भी बलदै हिन पुजीकरी

³⁴तियैं पित्त मिलाई करी दाखरस तैसिओ पीणै जो दिता, पर तिनी चखी करी पीणा ना चाऊ।

³⁵ता तिन्यै तैसिओ क्रूस पुर चढ़ाऊ अतै तियां कपड़ै तांयें चिट्ठी पाई की कसिओ कै कै मुळदा, अतै अप्पू मन्ज बन्डी लै

³⁶अतै तैड़ी बैही करी तसेरा पैहरा दिणा लगै।

³⁷अतै यीशु रा दोषपत्र भी अक्की तख्ती पुर लिखीकरी तसेरै क्रूसा पुर टुन्गी दिता कि “यहूदी रा राजा”।

³⁸ता तसेरै सोगी दोई डाकू अक्क सज्जै अतै अक्क खब्बै कनारी क्रूसा पुर चढ़ाई दितै।

³⁹ईणै-गाणै बाळै मुण्ड़ा हिलाई हिलाई करी तसेरी निन्दा करदै थियै,

⁴⁰अतै ऐह बलदै थियै, “हे मन्दरा जो ढ़ाणैवाळै अतै त्रीं दिन मन्ज बणाणै बाळै, अपणै आपा जो बचा! अगर तू प्रमात्मैं रा पुत्र हा, ता क्रूसा थऊँ ओसी आई।”

⁴¹ऐस तरीकै प्रधान याजक भी शास्त्री अतै स्याणै सोगी मजाक करदै अतै बलदै थियै,

⁴²“ईनी ता होरी जो बचाऊरा, अतै अपणै आपा जो ना बचाई सकदा। ऐह ता इस्त्राएल रा राजा हा। अबै क्रूसा थऊँ ओसी आई ता अहै भी विस्वास करन।

⁴³ईनी प्रमात्मैं पुर भरोसा रखूरा; अगर प्रमात्मां ऐसिओ चाहन्दा, ता अबै ऐसिओ छुड़ाई लेय्आ, क्ओकि ईनी बलुरा, ‘अऊँ प्रमात्मैं रा पुत्र हा’।”

⁴⁴ऐस तरीकै डाकू भी जैड़ै तैस सोगी क्रूसा पुर चढ़ाऊरै थियै, तसेरी बुराई करदै थियै।

⁴⁵दोफारा थऊँ लेई करी त्रियै पैहरा तक तैस पूरै देशा मन्ज नैहरा छाई रैऊ।

⁴⁶त्रियै पैहरा रै नेड़ै यीशुऐ जोरा सितै बल्लू, “एली, एली, लमा शबक्तनी?” मतलब “हे मेरै प्रमात्मां, हे मेरै प्रमात्मां, तैंई मिन्जो कजो छड़ी दिता?”

⁴⁷जैड़ै तैड़ी खडुरै थियै, तियां मन्ज कैतनै ऐह हुणी करी बल्लू, “ऐह ता भविष्‍यवक्ता एलिय्याह जो हक्का पाऊ करदा।”

⁴⁸तियां मन्ज अक्क झट दौड़ी करी स्पंज जो सिरकै मन्ज डुबाई करी अतै सरकण्ड़ैं पुर रखी करी तैसिओ चुसाऊ।

⁴⁹कई बलणा लगै, “रैहणा दे, हेरदै एलिय्याह ऐसिओ बचाणा इन्दा कि ना।”

⁵⁰ता यीशुऐ जोरा सितै बल्लू अतै मरी गो।

⁵¹अतै हेरा मन्दरा मन्ज पवित्र जगह रा पर्दा ऊपरा थऊँ थला तक छकी करी दोई टुकड़ै भूच्ची गो अतै धरती हिली गई अतै चट्टाना त्रिड़की गई,

⁵²अतै कब्रा खुली गई, अतै मरूरै थऊँ कई पवित्र मणु जी भुएै,

⁵³अतै दोबारा जीणै थऊँ बाद कब्रा थऊँ नकैई करी सो पवित्र नगरा जो गै अतै मतै सारै मणु जो हुजै।

⁵⁴जैडा सुबेदार अतै जैड़ै तैस सोगी पैहरा दिच्छु करदै थियै, हिल्‍लण अतै जैडा कुछ भुआ थू तैतिओ हेरी करी बड़ै ड़री गै अतै बलणा लगै, “सच मन्ज ऐह प्रमात्मैं रा पुत्र थू!”

⁵⁵तैड़ी मती सारी जनानी जैड़ी गलील थऊँ यीशु री सेवा करदी तैस सोगी छुरी थी, दूरा थऊँ ऐह हेरू करदी थी।

⁵⁶तियां मन्ज मरियम मगदलीनी, याकूब अतै योसेस री माता मरियम, अतै जबदी रै पुत्रा री माता थी।

⁵⁷जैहणै सँझ भूई ता यूसुफ नां रा अरिमतिया रा अक्क अमीर मणु, जैडा अप्पू ही यीशु रा चेला थू, आ।

⁵⁸तिनी पिलातुस बलै गिच्ची करी यीशु री लाश मँगी। ता पिलातुसै तैसिओ लाशा दिणै रा हूक्म दि दिता।

⁵⁹यूसुफ लाश लेई करी तैतिओ छैळ कपड़ै मन्ज लपेटु,

⁶⁰अतै तैतिओ अक्क नोई कब्रा मन्ज रखू, जैड़ी अक्की चट्टाना मन्ज खुदबाऊरी थी, अतै कब्रा रै मुँहा पुर अक्क बड़ा पत्थर रखी करी चली गो।

⁶¹मरियम मगदलीनी अतै दूई मरियम तैड़ी कब्रा रै सामणै बैहुरी थी।

⁶²दूये दिन जैडा विश्रामदिन थू, प्रधान याजका अतै फरीसी पिलातुस बलै इकट्ठै भूच्ची करी बल्लू,

⁶³“हे महाराजा, असिओ याद हा कि भरमाणै बाळै यीशुऐ जैहणै सो जिन्दा थू, बलुरा कि, ‘मुँ त्राई दिन बाद जी भूणा।’

⁶⁴ता ऐस करीके हूक्म देय्आ कि त्राई दिन तक कब्रा री रखवाली भोआ। ऐसा ना भोआ कि तसेरै चेलै ईच्ची करी तसेरी लाशा जो चोरी लैन, अतै मणु सोगी बलन कि, ‘सो मरूरै थऊँ जी भुआ।’ ता ऐह धोखा पिछलै धोखै थऊँ भी बुरा भूणा।”

⁶⁵पिलातुसै तैस सोगी बल्लू, “तूसु बलै पैहरैदार ता हिन। गच्छा, अपणी समझा अनुसार रखवाली करा।”

⁶⁶ता सो पैहरैदार जो सोगी लेई करी गै, अतै पत्थर पुर मोहर लाई करी पैहरैदारी करी।