Read Gaddi मत्ती 28 Bible Online

मत्ती 28 - Gaddi bible

मत्ती 28

¹विश्रामदिन थऊँ बाद हप्तै रै पैहलै दिन भ्याग भुन्दै ही मरियम मगदलीनी अतै दूई मरियम कब्रा जो हेरना आई।

²अतै हेरा, अक्क बड़ा हिल्‍लण भुआ, क्ओकि प्रभु रा अक्क स्वर्गदूत स्वर्गा थऊँ ऊतरू अतै नेड़ै ईच्ची करी तिनी पत्थर जो हिलाई दिता, अतै तैस पुर बैही गो।

³तसेरा रूप बिजळी सांईयै अतै तसेरै कपड़ै पाळै सांईयै चंमकू करदै थियै।

⁴तसेरै ड़रा रै पैहरैदार कंमी पै, अतै मरूरै सांईयै भूच्ची गै।

⁵स्वर्गदूतै जनानी सोगी बल्लू, “मत ड़रा, अऊँ जाणदा कि तुहै यीशु जो जैडा क्रूस पुर चढाऊरा थू हेरना आई।

⁶सो ऐड़ी निय्आ, पर अपणै बचना अनुसार जी भच्छुरा। अईआ ऐह जगह हेरा, जैड़ी प्रभु पेऊरा थू,

⁷अतै झट गिच्ची करी तसेरै चेलै सोगी बला कि सो मरी करी जी भूआ, अतै तैस तूसु थऊँ पैहलै गलील जो गाणा, तैड़ी तूसु तसेरा दर्शन पाणा! हेरा, ऐह गल्ल मैंई तूसु तक पुजाई दितिआ।”

⁸सो ड़रा सोगी अतै बड़ी खुशी सोगी कब्रा थऊँ झट तसेरै चेलै जो ऐह खबर हुणाणा दौड़ी गई।

⁹ता यीशु तियां जो मुळु। अतै बल्लू, “प्रणाम”। तियैं नेड़ै ईच्ची करी अतै तसेरै पैर पकड़ी करी तैसिओ दण्डवत् करू।

¹⁰ता यीशुऐ तियां जो बल्लू, “मत डरा; मेरै चेलै सोगी बला कि गलील जो चली गच्छा, तैड़ी तियां मिन्जो हेरना।”

¹¹सो जनानी गाणा लगुरी थी कि पैहरैदारै नगर मन्ज ईच्ची करी पुरा हाल प्रधान याजका जो हुणाई दिता।

¹²ता तिन्यै स्याणै सोगी किठ्ठी करी सलाह करी अतै सपाई जो मती सारी चाँदी दी करी बल्लू,

¹³“सबी जो ऐह बलै कि राती जैहणै अहै सोऊ करदै थियै ता चेलै ईच्ची करी यीशु री लाहश जो चोरी लेई गच्छुरै हिन।

¹⁴अतै अगर हाकमा रै कना तक पुजली कि तुहै सोऊ करदै थियै ता अहै तैसिओ समझाई लैलै अतै तुसिओ सजा थऊँ बचाई लैलै।”

¹⁵ता तियैं पैसा लेई करी जियां प्रधान याजकै बलणै जो सखाये तियां ही तिईयें करू। ऐह गल्ल अजा तक यहूदी मन्ज प्रचलित हा।

¹⁶ग्यारह चेलै गलीला मन्ज तैस पहाड़ा पुर गै, जैतिओ यीशुऐ तियां जो दसुरा थू।

¹⁷तियैं तसेरा दर्शन पाई करी तैसिओ प्रणाम करू, पर कसकि कसकि जो शक भुआ।

¹⁸यीशुऐ तंयारै नेड़ै ईच्ची करी बल्लू, “स्वर्ग अतै धरती रा पुरा हक्क मिन्जो दितुरा हा।

¹⁹ठेरैतांये तुहै गच्छा अतै, सब जाति रै मणु जो चेला बणा तियां जो पिता, पुत्र अतै पवित्र आत्मा रै नां रा बपतिस्मा देय्आ,

²⁰अतै तियां जो सब गल्ला जैड़ी मैंई तुसिओ हूक्म दितुरै मनणा सिखा अतै हेरा, अऊँ संसार रै अन्त तक तून्दै सोगी हा।”