Read Gaddi मत्ती 8 Bible Online

मत्ती 8 - Gaddi bible

मत्ती 8

¹जैहणै सो तैस पहाड़ा थऊँ ओसु, ता अक्क बड़ी भारी भीड़ तैस पिचो चली पैई।

²अतै अक्क कोढ़ी तैस बलै ईच्ची करी घुटनै रै भारै बैही करी तैस सोगी बिनती करना लगा, कि “हे प्रभु अगर तुहै चाहन, ता मिन्जो ठीक करी सकदै हिन।”

³यीशुऐ हत्थ अगो करीके तैसिओ छुऊँ, अतै बल्लू, “अऊँ चाहन्दा, तू ठीक भूच्ची गच्छा” ता सो तैहणै ही कोढ़ थऊँ ठीक भूच्ची गो।

⁴यीशुऐ तैसिओ बल्लू; “हेर, कसी सोगी मत बलदा पर गिच्ची करी अपणै आपा जो याजका जो दस अतै जैडा चढ़ावा मूसै दसुरा सो चढ़ा, ताकि तियां तांयें गवाही भोआ।”

⁵अतै जैहणै सो कफरनहूम मन्ज आ ता अक्क सूबेदारै तैस बलै ईच्ची करी तैस सोगी बिनती करी।

⁶कि “हे प्रभु, मेरा सेवक घरै अधरंगा रा मारा दुखी पेऊरा।”

⁷यीशुऐ वलु; “अऊँ ईच्ची करी तैसिओ ठीक करला।”

⁸सूबेदारै जवाव दिता; कि “हे प्रभु, अऊँ ऐस काबल निय्आ कि तुहै मेरै घरै ईन, पर सिर्फ अपणै मुँहा थऊँ ऐड़ी थऊँ ही बली दिल्लै ता मेरै सेवका ठीक भूच्ची गाणा।

⁹क्ओकि अऊँ भी कसी अफसरा थलै कम करदा अतै मेरै थलै भी कुछ सपाई कम करदै हिन। जैहणै अक्की जो बलदा, गा! ता सो गान्दा; अतै दूये जो बलदा कि अई! ता सो इन्दा; अतै अपणै दासा जो बलदा कि, ऐह कम कर ता सो करदै हिन।”

¹⁰ऐह हुणी करी यीशु बड़ा हैरान भुआ, अतै अपणै पिचो चलुरी भिड़ा री कनारी हेरी करी बल्लू, “हुणा अऊँ तूसु सोगी सच बलदा, कि मैंई तूणा विस्वास करनै बाळा कोई अक्क मणु भी इस्त्राएली मणु मन्ज भी ना हेरू।

¹¹अतै अऊँ तूसु सितै बलदा, कि मतै गैर यहूदी मणु पूर्व अतै पश्‍चिम थऊँ ईच्ची करी अब्राहम अतै इसहाक अतै याकूब सोगी स्वर्गा रै राज्य मन्ज बैहणा।

¹²पर राज्य री सन्तान (यहूदी अतै इस्त्राएली) बाहर अन्धकार मन्ज पाई दिणिआ अतै तैड़ी तियां रूणा अतै दन्द पीणै हिन।”

¹³अतै यीशुऐ सुबेदारा सोगी बल्लू, “घरा जो गा, जिन्‍ना तेरा विस्वास हा, तियां ही तिजो तांयें भोआ।” अतै तसेरा दास तैहणै ही चंगा भूच्ची गो।

¹⁴अतै यीशुऐ पतरस रै घरै ईच्ची करी तसेरी हहुआ जो बुखार मन्ज पैऊरी हेरी।

¹⁵तिनी तसारा हत्थ छुऊँ अतै तसारा बुखार उतरी गो; अतै सो उूठी करी तसेरी सेवा करना लगी।

¹⁶संझा रै टैमैं जैहणै सूरज डूबी गो ता मणु तैस बलै कई मणु जो लेई करी आये जिंआ मन्ज दुष्‍टात्मा थी अतै तिनी आत्मा जो अपणै बचन थऊँ कड़ी दिता, अतै सब बमारा जो ठीक करू।

¹⁷ताकि सो बचन जैडा यशायाह भविष्‍यवक्तै बलुरा थू पुरा भोआ कि; “तिनी अप्पू इन्दी कमजोरी जो लेई लैऊ अतै इन्दी बमारी जो चुकी लैऊ।”

¹⁸जैहणै यीशुऐ अपणै चौं कनारी मणु री बड़ी भारी भीड़ हेरी ता तिनी चेलै जो गलील झीला रै पारीयें कनारी गाणै रा हूक्म दिता।

¹⁹जैहणै सो गाणै री तैयारी करू करदै थियै ता अक्की शास्त्री यीशु बल्लै ईच्ची करी बल्लू, “हे गुरू, जैड़ी कड़ी तूसु गाणा, मुँ भी तून्दै पिचो चलना।”

²⁰यीशुऐ तैस सोगी बल्लू, “लोमड़ी रै रैहणै जो कूड्‍ड भुन्दै अतै अम्बरा रै पखेरू रै रैहणै तांई अल्लै भुन्दै हिन; पर मणु रै पुत्रा रा कोई रैहणै रा ठकाणा निय्आ।”

²¹अक्की होरी चेलै तैस सोगी बल्लू, “हे प्रभु, मिन्जो पैहलै घरा जो गाणा देआ, कि मेरै पिता रै मरनै थऊँ बाद तसेरा दाह संस्कार करनै थऊँ बाद तेरै पिचो चलूं”

²²यीशुऐ तैस सोगी बल्लू, “तू मेरै पिचो चली पै, अतै आत्मा मन्ज मरूरै जो अपणै मुरदै रा दाह संस्कार करना दे।”

²³जैहणै सो किस्ती पुर चढु, ता तसेरै चेलै तैस पिचो चली पै।

²⁴ता, झीला मन्ज अक्क ऐसा बड़ा तूफान आ कि किस्ती लैहरा मन्ज डुबणा लगी, अतै सो सुतुरा थू।

²⁵ता तिन्यै ईच्ची करी तैसिओ जगाऊ, अतै बल्लू, “हे प्रभु, असिओ बचा, अहै मरना लगै।”

²⁶तिनी बल्लू, “हे विस्‍वासा मन्ज कमजोर मणुओ, कजो डरदै हिन?” ता तिनी उूठी करी तूफान जो झिड़कू, अतै सब शान्त भूच्ची गो।

²⁷ता चेलै हैरानी करीके बलणा लगै, कि “ऐह किना मणु हा, कि तूफान अतै पाणी भी सेरै हूक्मा जो मन्दै हिन।”

²⁸जैहणै सो गदरेनियो रै देशा मन्ज पुजु, ता दोई मणु जिंआ मन्ज दुष्‍टात्मा थी तैसिओ मुळै। सो कब्रिस्तान मन्ज रैहन्दै थियै, सो ऐतनै खतरनाक थियै कि, कोई भी तैस रस्तै मितै ना गान्दा थू।

²⁹ता तिन्यै जोरा सितै हक्क पाई करी बल्लू; “हे परमप्रधान प्रमात्मैं रै पुत्रा, तेरा असु सोगी कै कम? कै तू टैमां थऊँ पैहलै ही असिओ दुख दिणा चली आ?”

³⁰तियां थऊँ कुछ दूरी पुर सूअंरा री गुआली चरू करदी थी।

³¹दुष्‍टात्मा ऐह बली करी तैस सोगी बिनती करना लगी, कि “अगर तू असिओ कढणा चाहन्दा, ता सूंरा री गुआली मन्ज गाणा दे।”

³²तिनी तियां सितै बल्लू, “गच्छा!” सो निकळी करी सूंरा मन्ज बड़ी गई, ता सब सूंरा री गुआली झपटी करी पाणी मन्ज पैई गई अतै डूबी मरै।

³³गुआलु ऐह हेरी करी नह्ही गै, अतै ग्राँ मन्ज गिचीकरी ऐह सब गल्ला अतै जिंआ मन्ज दुष्‍टात्मा थी तंयारा भी पुरा हाल हुणाई दिता।

³⁴अतै ग्राँ अतै शहरा रै सब मणु यीशु सोगी मिलणा चली आये अतै तैसिओ हेरी बिनती करना लगै, कि इन्दै बनै थऊँ बाहर चली गा।