Read Gaddi मत्ती 9 Bible Online

मत्ती 9 - Gaddi bible

मत्ती 9

¹फिरी सो किस्ती पुर चड़ी करी पार गो; अतै अपणै नगरा मन्ज आ।

²फिरी मतै मणु अक्क अधरंगी जो मन्जै पुर चुक्की करी तैस बल्लै लेई आये; यीशुऐ तंयारा विस्वास जो हेरी करी, तैस अधरंगी सोगी बल्लू; “हे पुत्र हिम्मत रख; मैंई तेरै पाप माफ करी दितै।”

³अतै हेरा, कई शास्त्री सोचणा लगै, कि “ऐह ता प्रमात्मैं री बुराई करू करदा।”

⁴यीशुऐ तंयारै मना री गल्ला जो जाणी करी बल्लू, कि “तुहै मणु अपणै मना मन्ज ऐह कजो सोचु करदै हिन?

⁵कै तुहै ऐह ना जाणदै कि ठीक करनै थऊँ पापा जो माफ करना आसान हा क्ओकि तैतिओ हेरी ना सकदै। पर चंगाई रै कम्मा जो हेरी सकदै हिन कि सो ठीक भूआ कि ना?

⁶पर ठेरैतांये कि तुसै जाणी लैन कि मणु रै पुत्रा जो धरती पुर पाप माफ करनै रा अधिकार हा।” तिनी अधरंगी सोगी बल्लू उठ “अपणी खाट चुक, अतै अपणै घरा जो चली गा।”

⁷सो उूठी करी अपणै घरा जो चली गो।

⁸मणु ऐह हेरी करी डरी गै अतै प्रमात्मैं री जय-जयकार करना लगै जिनी मणु जो ऐसा अधिकार दितुरा हा।

⁹तैड़ी थऊँ अगो गिचीकरी यीशुऐ मत्ती नां रै अक्की मणु जो चुंगी लैणै बाळी चौकी पुर बैहुरा हेरू, अतै तैस सोगी बल्लू, “मेरै पिचो चली पै।” सो उूठी करी तेसेरै पिचो चली पैऊ।

¹⁰अतै जैहणै यीशु अतै तसेरै चेलै मत्ती रै घरै खाणा बैईठै ता मतै चुंगी लैणैबाळै अतै पापी[4] ईच्ची करी सो भी तियां सोगी खाणा बैईठै।

¹¹ऐह हेरी करी फरीसी तसेरै चेलै सोगी बल्लू; “तून्दा गुरू चुंगी लैणैबाळै अतै पापी सोगी कजो खान्दा?”

¹²यीशुऐ ऐह हुणी करी तियां सोगी बल्लू, “बैईद खरै भलै चंगै तांयें ना भुन्दा पर बमारा तांयें भुन्दा।

¹³ता तुहै गिच्ची करी ठेरा अर्थ सीखी लेआ, कि ‘अऊँ बलिदान ना पर दया चाहन्दा।’ क्ओकि अऊँ जैड़ै अपणै आपा जो धर्मी समझदै हिन तियां जो ना पर पापी मणु जो हैदणा छूरा।”

¹⁴ता यूहन्‍ना रै चेलै तैस बलै ईच्ची करी बल्लू; “कै वजह हा कि अहै फरीसी ऐतनै व्रत करदै हिन, पर तेरै चेलै व्रत ना करदै?”

¹⁵यीशुऐ तियां सोगी बल्लू; “कै बराती, जैहणै तक दूल्हा तियां सोगी हा, शौक करी सकदै हिन? पर सो दिन ईणै जैहणै दूल्हा तियां थऊँ अलग करी दिणा, तैस टैमैं तियां व्रत करनै।”

¹⁶कोई भी नोए कपड़ै री टल्ली छकी करी पूराणै कपड़ै मन्ज टल्ली ना लान्दा, क्ओकि नोए कपड़ै सो सब कुछ खिन्जी लैणा, अतै तैस होर छकी गाणा।

¹⁷नौआ दाखरस पुराणी खलड़ी मन्ज ना पान्दै; क्ओकि ऐसा करनै थऊँ खलड़ी फटी गाणी, अतै दाखरस निकळी गाणा अतै खलड़ी बर्बाद भूच्ची गाणी, पर नौआ दाखरस नोई खलड़ी मन्ज ही भरदै हिन अतै दोनो बची रैहन्‍दी हिन।

¹⁸सो तियां सोगी ऐह बल्लू ही करदा थू, कि हेरा, यहूदी रै सभागार थऊँ अक्क सरदार ईच्ची करी तसेरै पैरै पैई करी बिनती करना लगू, “मेरी कुल्ळी हबजु ही मरी गई हा, पर चली करी अपणा हत्थ तैहा पुर रख, ता सो जिन्दी भूच्ची गाणीआ।”

¹⁹यीशु उूठी करी अपणै चेलै समेत तैस सोगी चली पैऊ।

²⁰अतै बत्ता मन्ज, अक्क जनानी जेहा जो बारह साला थऊँ खून चलनै री बमारी थी, अतै सो अपणै मना मन्ज ऐह सोचदी थी, कि “अगर अऊँ तसेरै कपड़ै रै पल्लै जो छुई लैली ता मुँ ठीक भूच्ची गाणा।”

²¹फिरी तैसै जनानी तसेरै पिचो ईच्ची करी यीशु रै कपड़ै रै पल्लै जो छुई लैऊ।

²²यीशुऐ फिरी करी तैहा जो हेरू, अतै बल्लू, “पुत्री हिम्मत रख; तेरै विस्वासै तिजो ठीक करूआ।” ता सो जनानी तैहा घड़ी ही ठीक भूच्ची गई।

²³जैहणै यीशु तैस सरदारा रै घरै पुजु ता रूणै पिटिणै बाळै री भीड़ अतै हौ हल्ला करदै मणु जो हेरू ता तिनी बल्लू,

²⁴“घिरी गच्छा, कुल्ळी मरूरी निय्आ, पर सोऊ करदी हा।” ऐह हुणी करी सब हासणा लगै।

²⁵पर जैहणै भीड़ कड्ड़ी दिती ता, तिनी अन्दर गिच्ची करी कुल्ळी रा हत्थ पकडु, अतै सो जी भूई।

²⁶ऐसा गल्ला री चर्चा तैस पूरै देशा मन्ज फैली गई।

²⁷जैहणै यीशु तैड़ी थऊँ अगो गो ता दोई अन्धै तैस पिचो ऐह बलदै चली आये, कि “हे दाऊद री सन्तान, असु पुर दया कर!”

²⁸जैहणै सो घरै पुजु, ता सो अन्धै तैस बलै आये, अतै यीशुऐ तियां सितै बल्लू, “कै तुसिओ विस्वास हा, कि अऊँ तिजो ठीक करी सकदा?” तिन्यै तैस सोगी बल्लू, “हा, प्रभु! मिन्जो विस्वास हा तुहै ठीक करी सकदै हिन।”

²⁹ता तिनी तंयारी हाख्री छुई करी बल्लू, “तून्दै विस्‍वासा रै अनुसार तुहै ठीक भूची गै हिन।”

³⁰अतै तंयारी हाख्री हेरना लगी पैई। यीशुऐ तियां जो टणकाई करी बल्लू, “सावधान, कसी जो ऐसा गल्ला रै बारै मन्ज मत दसदै कि मैंई तुसिओ ठीक करूआ।”

³¹पर तिन्यै पूरै देशा मन्ज तसेरी चर्चा फैलाई दिती।

³²जैहणै सो बाहर चलुरै थियै, ता हेरा, मणु अक्क गूंगै जो जैस मन्ज दुष्‍टात्मा थी तैस बलै लेई आये।

³³जैहणै यीशुऐ दुष्‍टात्मा कड्ड़ी दिती, ता गूंगा बलणा लगी पैऊ। अतै भीड़ हैरान भूच्ची करी बलणा लगी, कि “अहै इस्त्राएल मन्ज इन्‍नै कम कदी भी ना हेरै।”

³⁴पर फरीसी बलणा लगै, “ऐह ता शैतान री मदद सोगी दुष्‍टात्मा जो कड़दा।”

³⁵यीशु अतै तसेरै चेलै गलील परदेस रै कई नगरा अतै ग्राँ मन्ज फिरदै रैह। सो यहूदी रै सभागार मन्ज उपदेश करदा रैऊ, अतै प्रमात्मैं रै राज्य रा सुसमाचार प्रचार करदा, अतै हर तरह री बमारी अतै कमजोरी जो दूर करदा रैऊ।

³⁶जैहणै तिनी भिड़ा जो हेरू ता तैसिओ मणु पुर तरस आ, क्ओकि सो तियां भैड़ा सैईयें व्याकुल अतै भटकुरै थियै जंयारा कोई भी पाहल ना भुन्दा।

³⁷ता तिनी अपणै चेलै सोगी बल्लू, “फसल ता बड़ी पक्की गछुरिआ पर कम कमाणै बाळै मजदूर थोड़ै हिन।

³⁸ठेरैतांये बगड़ी रै मालका सितै बिनती करा कि सो अपणी फसल कटणै तांयें मजदूर भैजी देय्आ।”