Read Gaddi मरकुस 16 Bible Online

मरकुस 16 - Gaddi bible

मरकुस 16

¹जैहणै विश्रामदिन बीती गो, ता मरियम मगदलीनी, अतै याकूब री माँ मरियम अतै सलोमी छैळ मुसकी बाळी चिजा खरीदी ताकि सो तैतिओ यीशु री लाशा पुर मळन।

²हप्तै रै पैहलै दिन भ्यागा ही जैहणै सूरज नकैऊ ही थू, सो कब्रा पुर आई,

³अतै अप्पू मन्ज कणैऊ करदी थी कि, “असु तांयें कब्रा रै द्धारा पुर रखूरा पत्थर कस घेरना भोला?”

⁴जैहणै तियैं हाख्री चुकी हेरू, ता पत्थर कब्रा थऊँ घिरूरा थू-सो बडा भारी बड्‍डा थू।

⁵कब्र रै अन्दर गिचीकरी तियैं अक्की जवान जो हच्छै कपड़ै लाऊरै खब्बी कनारी बैहुरै हेरू, अतै हैरान भूई।

⁶तिनी तियां सितै बल्लू, “हैरान मत भोआ, तुहै नासरत रै यीशु जो जैडा क्रूस पुर चढाऊरा थू, तैसिओ तोपदी हिन। सो जी भुआ, पर सो ऐठी निय्आ; हेरा, ऐह सो ही जगह हा, जैड़ी तैसिओ रखूरा थू।

⁷पर तुहै गच्छा, तसेरै चेलै अतै पतरस जो बला कि तूसु थऊँ पैहलै यीशु गलील परदेस जो गाणा। जिंआं तिनी तूसु सोगी पैहलै बलुरा थू, तूसु तैठिये तैसिओ हेरना।”

⁸अतै सो कब्र थऊँ नकैई करी नह्ही गई; क्ओकि सो कमी नकैऊरी थी अतै डरूरी भी थी। तिन्यै कसी सोगी कुछ ना बल्लू, क्ओकि सो ड़रदी थी।

⁹[15]हप्तै रै पैहलै दिन भ्यागा ही जैहणै सो जी भुआ ता पैहलै-पैहल मरियम मगदलीनी जो जैसा थऊँ यीशुऐ सत दुष्‍टात्मा कडुरी थी तैहा जो हुजु।

¹⁰तैहै ऐह खबर गिचीकरी यीशु रै चेलै जो जैड़ै शौक मन्ज डुबुरै थियै अतै रूणा लगुरै थियै, हुणाई।

¹¹तिन्यै चेलै जैहणै ऐह हुणु कि सो जिन्दा अतै तैहै सो हेरूआ, विस्वास ना करू।

¹²ऐत थऊँ बाद सो अलग ही रूपा मन्ज तियां चेलै मन्ज दूँ होर चेलै जो हुजु, जैहणै सो ग्राँ री कनारी चलुरै थियै।

¹³तिन्यै भी गिचीकरी होरी जो ऐह खबर हुणाई, पर तिन्यै तंयारा भी विस्वास ना करू।

¹⁴फिरी सो तियां ग्यारह चेलै जो भी, जैहणै सो खाणा बैहुरै थियै हुजु, अतै तंयारै अविस्वास अतै मना री कठोरता पुर झिड़कू, क्ओकि जिन्यैं तसेरै जी भूणै थऊँ बाद तैसिओ हेरू थू, तिन्यै भी विस्वास ना करू।

¹⁵यीशुऐ तियां सितै बल्लू, “तुहै पूरी दुनिया मन्ज गिचीकरी सबी मणु जो सुसमाचार प्रचार करा।

¹⁶जैडा मिन्जो पुर विस्वास करा अतै बपतिस्मा लेय्आ तसेरा ही उद्धार भूणा, पर जैस विस्वास ना करना सो दण्ड रा हकदार भूणा।

¹⁷विस्वास करनैवाळै मन्ज ऐह चिन्ह भूणै कि तियां मेरै नां सितै दुष्‍टात्मा जो कड़णा, नोई नोई बोली बलणी।

¹⁸तियां कीड़ै जो चुकी लैणा, अतै अगर जहर भी पी गाहलै ता भी कुछ ना भूणा; तियां बमारा पुर हत्थ रखणै अतै तियां ठीक भूच्ची गाणा।”

¹⁹प्रभु यीशु चेलै सोगी गल्ला करनै थऊँ बाद प्रमात्मैं तैसिओ स्वर्गा जो चुकी लैऊ, अतै प्रमात्मैं री सज्जै कनारी बैही गो।

²⁰तसेरै चेलै यरूशलेम थऊँ निकळी गै अतै हर जगह प्रचार करदै रैह, अतै जैड़ी भी गै प्रभु तियां सोगी कम करदा रैऊ, अतै तियां चिन्ह द्धारा जैड़ै सो करदै थियै, मणु जो दसणा लगै कि प्रमात्मैं रा बचन सचा हा। आमीन