Read Gaddi मरकुस 8 Bible Online

मरकुस 8 - Gaddi bible

मरकुस 8

¹तियां ही दिना मन्ज फिरी जैहणै बड़ी भीड़ इकट्ठी भूई ता तियां बलै खाणै जो कुछ ना थू, ता यीशुऐ अपणै चेलै जो अप्पू बलै हैदी करी तियां जो बल्लू,

²“मिन्जो ऐसा भिड़ा पुर तरस इन्दा, क्ओकि ऐह त्राई दिन थऊँ लगातार मिन्जो सोगी हिन, अतै अबै इन्या बलै खाणै जो कुछ भी ना बचु हा।

³अगर अऊँ इन्या जो भूखा घरा जो भैजी दिच्छु, ता इन्या बता मन्ज कमजोर भूच्ची करी रैई गाणा; क्ओकि ईयां मन्ज कई दूरा-दूरा थऊँ छुरै हिन।”

⁴तसेरै चेलै तैस सोगी बल्लू, “ऐठी सुनसान जगह मन्ज ऐतनै मणु जो रोटी कड़ी थऊँ लैईन कि ऐह सब रजी गान?”

⁵यीशुऐ तियां थऊँ पूछु, “तूसु बलै कैतनी रोटी हिन?” तियैं बल्लू “सत।”

⁶ता तिनी भीड़ जो जमीना पुर बैहणै रा हूक्म दिता, अतै सो सत रोटी लेई करी प्रमात्मैं रा धन्यवाद करीके त्रोड़ी, अतै अपणै चेलै जो दिन्दा गो। चेलै तियां रोटी जो मणु मन्ज बड़ी दिता।

⁷तियां बलै थोड़ी जिनी हल्की हल्की मछली भी थी; तिनी धन्यवाद करीके सो भी मणु मन्ज बड़णै जो दिती।

⁸सो खाई करी रजी गै अतै चेलै बचुरै टुकड़ै री सत टोकरी भरी करी चुकी।

⁹अतै मणु लगभग चऊर हजार थियै ता यीशुऐ तियां मणु जो वापस भैजी दिता।

¹⁰यीशु तैहणै ही अपणै चेलै सोगी किस्ती पुर चड़ी करी दलमनूता परदेसा जो चली गो।

¹¹फिरी फरीसी ईच्ची करी तैसिओ परखणा लगै सो तैसिओ परखणै तांयें तैस थऊँ कोई स्वर्गीय चिन्ह री मांग करना लगै कि सो प्रमात्मैं भैजुरा हा।

¹²तिनी आह भरी करी बल्लू, “ऐस युगा रै मणु कजो चिन्ह तोपदै हिन? अऊँ तूसु सोगी सच बलदा कि ऐस युगा रै मणु जो कोई चिन्ह ना हुजणा हा।”

¹³अतै सो तियां मणु जो छड़ी करी फिरी किस्ती पुर चड़ी गो अतै गलील झीला पार चली गो।

¹⁴चेलै रोटी लैणा भुली गै थियै, अतै किस्ती मन्ज तियां बलै अक्क ही रोटी थी।

¹⁵तिनी तियां जो टणकाई के बल्लू, “हेरा, फरीसी अतै हेरोदेस रै खमीरा [7] थऊँ चौकस रेय्आ।” (ठेरा अर्थ ऐह हा कि तुहै फरीसी री झूठी शिक्षा अतै हेरोदेस रै अविस्वास थऊँ बची करी रेय्आ।)

¹⁶पर चेलै तसेरी गल्ला जो ना समझै अतै अप्पू मन्ज कणैणा लगै कि, “ऐह ठेरै तांयें बल्लू करदा कि असु बलै रोटी ना हिन।”

¹⁷तंयारै मना री गल्ला जो जाणी करी यीशुऐ तियां सितै बल्लू, “तुहै कजो अप्पू मन्ज ऐह विचार करू करदै हिन कि असु वलै रोटी ना हिन? कै हालि तिकर ना जाणदै अतै ना समझदै? कै तून्दा मन कठोर भूच्ची गछूरा हा।

¹⁸कै हाख्री भुन्दै भी तुहै ना हेरी सकदै, अतै कै कना भुन्दै भी तुहै ना हुणी सकदै? अतै कै तुसिओ याद ही निय्आ?

¹⁹कि जैहणै मैंई पँज हजार मणु तांयें पँज रोटी त्रोड़ी थी ता तुहै बचुरै टुकड़ै री कैतनी टोकरी भरी करी चुकी?” तियैं यीशु सोगी बल्लू, “बारह टोकरी”।

²⁰“अतै जैहणै चंऊर हजार तांयें सत रोटी थी ता तुहै बचुरै टुकड़ै री कैतनी टोकरी चुकी थी?” तियैं तैस सोगी बल्लू, “सत टोकरी।”

²¹यीशुऐ तियां सोगी बल्लू, “ऐस टैमां तक ता तुसिओ समझी गाणा चहिन्दा थू।”

²²यीशु अतै तसेरै चेलै बैतसैदा ग्राँ मन्ज आये; अतै कुछ मणु अक्की अन्धै मणु जो लेई आये अतै यीशु सोगी बिनती करी कि तैसिओ छु अतै ठीक करा।

²³सो तैस अन्धै रा हत्थ पकडी करी तैसिओ ग्राँ थऊँ बाहर लेई गो। यीशुऐ तसेरी हाख्री पुर अपणा थूक लगाई करी तैस पुर हत्थ रखै, अतै तैस थऊँ पूछु, “कै तिजो कुछ हुजु करदा?”

²⁴तिनी मणुऐ अपणी नजरा चुकी करी हेरू अतै बल्लू, “अऊँ मणु जो हेरू करदा; पर सो साफ ना हुजु करदै सो मिन्जो रूखा सांईयै चलदै हुजु करदै हिन”

²⁵ता यीशुऐ फिरी तसेरी हाख्री पुर हत्थ रखै, अतै अन्धै फिरी ध्याना सोगी हेरू। सो तैहणै ही ठीक भूच्ची गो अतै सब कुछ साफ साफ हेरना लगी पैऊ।

²⁶यीशुऐ तैसिओ ऐह बल्लू “ऐस ग्राँ जो गाणै थऊँ पैहलै अपणै घरा जो चली गा।”

²⁷यीशु अतै तसेरै चेलै तैस ग्राँ जो छड़ी करी कैसरिया फिलिप्पी शहरा रै नेड़ै रै ग्राँ जो चलै ता यीशुऐ अपणै चेलै थऊँ पूछु, “मणु कै बलदै हिन कि अऊँ कुण हा?”

²⁸तियैं जवाव दिता, कोई मणु बलदै कि तुहै “यूहन्‍ना बपतिस्मा दिणैबाळा हिन; पर कोई मणु बलदै एलिय्याह भविष्‍यवक्ता या कोई बलदै पूराणै जमानै रा भविष्‍यवक्ता हिन।”

²⁹यीशुऐ तियां थऊँ पूछु, “पर तुहै कै बलदै हिन? कि अऊँ कुण हा?” पतरसै तैसिओ बल्लू, “तू मसीह हा।”

³⁰ता यीशुऐ तियां जो टणकाई करी बल्लू कि मेरै बारै मन्ज कसी सोगी मत बलदै।

³¹ता यीशु चेलै जो सखाणा लगा कि “मणु रा पुत्र जरूरी हा कि अऊँ दुख भोगूं अतै स्याणै, प्रधान याजक, अतै शास्त्री तैसिओ तुच्छ समझी करी मारी दिन, अतै त्राई दिन बाद फिरी जी भोआ।”

³²तिनी ऐह गल्ला तियां सितै साफ साफ बली दिती। तां फिरी पतरस तैसिओ अलग लेई गो अतै ऐह बली करी झिड़कणा लगा।

³³पर यीशुऐ मुड़ीकरी अपणै चेलै री कनारी हेरू, अतै पतरसा जो झिड़की करी बल्लू, “हे शैतान मेरै सामणै थऊँ चली गा क्ओकि तू प्रमात्मैं सांईयै ना पर मणु सांईयै सोचदा हा।”

³⁴यीशुऐ मणु री भीड़ अतै चेलै अप्पू बलै हैदी करी बल्लू, “जैडा कोई मेरा चेला बणना चाहन्दा, सो अपणै आपा रा इन्कार करा अतै अपणा क्रूस चुका सो ही मेरा चेला बणी सकदा।

³⁵क्ओकि जैडा कोई अपणा प्राण बचाणा चाह तैस खोई दिणै, पर जैडा कोई मेरै सुसमाचार तांयें अपणा प्राण गुआला, सो तैस बचाणा।

³⁶अगर मणु जैडा इच्छा रखदा सो पाई भी लेय्आ पर अगर सो अपणै प्राणा ही गुआई देय्आ ता संसार री चिजा रा कोई फायदा निय्आ।

³⁷कै मणु रै प्राणा थऊँ बढ़ीकरी कुछ होर हा?

³⁸जैडा कोई ऐसा अविस्वासी अतै पापी युगा रै मन्जै मिन्जो अतै मेरी गल्ला थऊँ शर्माला, मणु रा पुत्र भी जैहणै पवित्र स्वर्गदूता सोगी अपणै पिता री महिमा करदै ईणा ता तैस मणु थऊँ भी शर्माणा।”