Read Gaddi मरकुस 9 Bible Online

मरकुस 9 - Gaddi bible

मरकुस 9

¹यीशुऐ तियां सितै बल्लू, “अऊँ तूसु सोगी सच बलदा कि जैड़ै ऐठी खडुरै हिन, तियां मन्ज कैई ऐसै हिन, जैहणै तक सो प्रमात्मैं रै राज्य जो सामर्थ सोगी इन्दा ना हेरी लैन तैहणै तक तियां ना मरना।”

²छिया दिन बाद यीशुऐ पतरस, याकूब, अतै यूहन्‍ना जो सोगी लैऊ अतै अक्क सुनसान उच्चै जिन्‍नै पहाडा जो लेई गो। तैड़ी तंयारै सामणै तसेरा रूप बदली गो,

³तसेरै कपड़ै ऐसै चमकणा लगै अतै ऐसै चमकीलै भूच्ची गै कि धरती पुर कोई धोबी तिनां ना चमकाई सकदा थू।

⁴अतै तियां जो भविष्‍यवक्ता मूसा अतै एलिय्याह भी हुजै सो यीशु सोगी गल्ला करू करदै थियै।

⁵ऐह हेरी करी पतरसै यीशु सोगी बल्लू, “हे रब्बी, (मतलब हे गुरू) इन्दा ऐड़ी रैहणा ही खरा, ठेरैतांये असु त्राई झोपड़ी बनाणी, अक्क तिजो तांयें, अक्क मूसै तांयें, अतै अक्क एलिय्याह तांयें।”

⁶(पर पतरस ना जाणदा थू कि कै बल्ला, ठेरैतांये सो बड़ै डरी गै थियै।)

⁷तैहणै तियां जो अक्की बदळै घेरी लैऊ, अतै तैस बदळा थऊँ ऐह आकाशवाणी भूई, “ऐह मेरा प्यारा पुत्र हा, सेरी हुणा।”

⁸ता तियैं चेलै अकदम अपणी चऊँ कनारी हेरू, तियां जो यीशु ही हुजु बाकी कोई होर ना थू।

⁹पहाडा थऊँ ओसदै टैमैं तिनी चेलै जो हूक्म दिता कि मणु रा पुत्र जैहणै तक मरी करी दोबारा ना जी भोआ, तैहणै तक जैडा कुछ तुहै हेरूआ सो कसिओ मत दसदै।

¹⁰तियैं जैड़ा हेरू सो कसी जो ना दस्सु अतै अप्पू मन्ज वाद-विवाद करना लगै, “मरूरै थऊँ जी भूणै रा मतलब कै भोला?”

¹¹ता तियैं यीशु थऊँ पूछु, “शास्त्री कजो बलदै कि भविष्‍यवक्ता एलिय्याह रा मसीह थऊँ पैहलै ईणा जरूरी हा?”

¹²यीशुऐ जवाव दिता, “एलिय्याह सच मन्ज पैहलै ईच्ची करी सब कुछ सुधारना पर मणु रै पुत्रा रै बारै मन्ज ऐह कजो लिखुरा कि तैस बडा दुख भोगणा, अतै तुच्छ समझया गाणा?

¹³पर अऊँ तूसु सोगी बलदा कि ऐह सो ही एलिय्याह ता ईच्ची बैहुरा, अतै जैडा तसेरै बारै मन्ज पवित्र शास्‍त्रा मन्ज लिखुरा, मणु तैस सोगी बड़ा बुरा व्यवहार करू, जियां सो करना चाहन्दै थियै।”

¹⁴जैहणै यीशु तियां त्रीं चेलै सोगी बाकी चेलै बलै फिरी आ ता हेरू कि तंयारै चऊँ कनारै मणु री बड़ी भीड़ लगुरी हा अतै कुछ शास्त्री तियां सोगी बैंहसणा लगुरै हिन।

¹⁵तैसिओ हेरी करी सब हैरान भुएै, अतै तसेरी कनारी दौड़ी आये अतै तैसिओ नमस्ते करै।

¹⁶तिनी तियां थऊँ पूछु, “तुहै इन्या सोगी कै बैंहसणा लगुरै?”

¹⁷भिड़ा थऊँ अक्कीयै जवाव दिता, “हे गुरू, अऊँ अपणै पुत्रा जो तूसु बलै अन्दा हा कि तुहै ऐसिओ ठीक करन क्ओकि ऐस मन्ज दुष्‍टात्मा हा जैहै ऐसिओ गूंगा बणाई दितुरा।

¹⁸दुष्‍टात्मा मेरै पुत्रा जो मरोड़दी रैहन्‍दी हा ऐह तैठी ही पैई गान्दा, सेरै मुँहा मन्ज झाग चली इन्दा अतै दन्दा पिन्दा, अतै कमजोर भूच्ची गच्छुरा। मैंई तून्दै चेलै जो बल्लू कि सो ऐसिओ ठीक करी दीन पर सो ना करी सकै।”

¹⁹ऐह हुणी करी तिनी तियां जो जवाव दिता, “ऐस युगा रै अविस्वासी मणुओ, मुँ कहणै तिकर तूसु सोगी रैहणा? अतै कहणै तक मुँ तुसिओ सैहणा? तैस दब्बू जो मिन्जो बलै लेई अईआ।”

²⁰ता सो दब्बू जो यीशु बल्लै लेई आये, जैहणै यीशुऐ तैसिओ हेरू, ता दुष्‍टात्मा तैहणै ही सो मरोडु अतै सो जमीना पुर पैऊ, तसेरै मुँहा थऊँ झाग चली पैऊ, अतै सो धरती मन्ज बेलिणा लगु।

²¹यीशुऐ तसेरै पिता थऊँ पूछु, “ईना जिन्‍ना हाल सेरा कैहणै थऊँ हा?” तिनी बल्लू, “बचपना थऊँ ही।

²²दुष्‍टात्मैं ऐसिओ मारनै तांयें कदी पाणी मन्ज फैन्कू ता कदी अगी मन्ज, पर जे अगर तुहै कुछ करी सकदै हिन ता, असु पुर तरस खा अतै ऐसिओ ठीक करी दे। अगर तू करी सकदा ता!”

²³यीशुऐ तैसिओ बल्लू, “हाँ अऊँ करी सकदा! विस्वास करनै बाळै तांयें सब कुछ भूच्ची सकदा।”

²⁴तैस दब्बू रा पिता झट गिड़गिड़ाई करी बल्लू, “हे प्रभु, अऊँ विस्वास करदा तुहै मेरै अविस्वास जो दूर करा।”

²⁵जैहणै यीशुऐ हेरू कि मणु ईच्ची करी भीड़ लाणा लगै, ता तिनी दुष्‍टात्मा जो झिड़की करी बल्लू, “हे गूंगी अतै बैहरी आत्मा, अऊँ तिजो हूक्म दिन्दा ऐस थऊँ नकैई गा, अतै फिरी ऐस मन्ज मत गान्दी।”

²⁶ता सो दुष्‍टात्मा लेरा पान्दी अतै तैसिओ परछाडी करी नकैई गई, सो दब्बू अधमरै सैईयें पैई गो, मणु बलणा लगै कि ऐह मरी गो हा।

²⁷पर यीशुऐ तसेरा हत्थ पकड़ी करी तैसिओ चुकु, सो ठीक भूच्ची गो अतै सो खड़ी गो।

²⁸जैहणै यीशु घरै आ, ता तसेरै चेलै सो अकेला पूछु, “अहै तैहा दुष्‍टात्मा जो कजो ना कड़ी सकै?”

²⁹यीशुऐ तियां सितै बल्लू, “होर जैतना मर्जी जोर लाई लेय्आ पर ऐह दुष्‍टात्मा री जाति सिर्फ प्रार्थना [8]सितै ही नकैन्दी हा।”

³⁰फिरी यीशु अतै तसेरै चेलै तैड़ी थऊँ चली गै अतै सो गलील परदेस मितै भूच्ची करी चलुरै थियै। सो चाहन्दा थू कि कसिओ पता ना लगा।

³¹क्ओकि सो अपणै चेलै जो उपदेश दिन्दा अतै बलदा थू कि, “मणु रा पुत्र, दुश्‍मणा रै हत्थै पकड़ाया गाणा, मारया गाणा; अतै मरनै थऊँ बाद त्रियै दिन दोबारा जी भूणा।”

³²पर ऐह गल्ल तंयारी समझा मन्ज ना आई, अतै सो तैस थऊँ पुछणै थऊँ भी डरदै थियै।

³³फिरी यीशु अतै चेलै कफरनहूम ग्राँ मन्ज आये; अतै घरै मन्ज ईच्ची करी यीशुऐ तियां थऊँ पूछु, “बत्ता मन्ज तुहै कस सोगी बैंहसणा लगुरै थियै?”

³⁴सो चुप रैह, क्ओकि बत्ता मन्ज सो अप्पू मन्ज ही बैंहसणा लगुरै थियै कि असु मन्ज बडा कुण हा।

³⁵ता यीशुऐ बैही करी बारह चेलै जो हैदी करी बल्लू, “अगर कोई बडा भूणा चाहन्दा, ता सो सबी थऊँ हल्का बणा अतै सबी रा सेवक बणा।”

³⁶अतै तिनी अक्की बच्चा हैदी करी तंयारै मन्जै खड़ेरू, अतै तैस बच्चै जो अपणी गोदा मन्ज लेई करी बल्लू,

³⁷“जैडा कोई मेरै नां सितै ऐसै बच्चै जो ग्रहण करदा, सो मिन्जो प्रेम करदा; अतै जैडा कोई मिन्जो ग्रहण करदा सो मिन्जो ना पर मेरै भैजणै बाळै प्रमात्मैं जो ग्रहण करदा।”

³⁸ता यूहन्‍नै यीशु सोगी बल्लू, “हे गुरू, अहै अक्की मणु जो तेरा नां लेई करी दुष्‍टात्मा जो कड़दै हेरूआ अतै अहै तैसिओ ऐसा करनै थऊँ मना करू, क्ओकि सो असु सोगी ना चलदा।”

³⁹यीशुऐ बल्लू, “तैसिओ ना मत करा; क्ओकि ऐसा कोई जैडा मेरै नां लेई करी सामर्थ रै कम करा सो मेरै बारै मन्ज बुरा ना बल्ली सकदा,

⁴⁰क्ओकि जैडा कोई इन्दी कनारी हा सो इन्दै वरोधा मन्ज निय्आ।

⁴¹जैड़ा कोई तुसिओ अक्क गलास पाणी सिर्फ ऐह समझी के पयांदा कि तुहै मसीह रै बन्दै हिन ता अऊँ तूसु सोगी सच बलदा कि तियां जो तंयारा इनाम जरूर मुळना हा।”

⁴²“जैडा कोई ईयां हल्कै मन्ज हल्का बच्चै सांईयै मिन्जो पुर विस्वास करदा अगर तसेरी वजह थऊँ अक्की जो भी पाप री कनारी लेई गान्दा ता तैस तांयें ऐह ठीक हा कि तसेरै गल्ळै मन्ज चक्की रा पाट लटकाई करी समुन्द्रा मन्ज फैंकी दिच्छी।

⁴³अतै अगर तेरा हत्थ तिजो थऊँ पाप करांदा ता तैसिओ अप्पू थऊँ बडी फैंक, क्ओकि अक्की हत्था सोगी स्वर्गा जो गाणा तिजो तांयें खरा, कि बजाय तेरा शरीर नरका मन्ज पाया गच्छा। जैड़ी अग कदी भी ना हिहदी।

⁴⁴[जैड़ी तंयारा कीड़ा भी ना मरदा अतै अग भी ना हिहदी।][9]

⁴⁵अगर तेरा पैर तिजो ठोकर खुआन्दा ता तैसिओ कटि दे। लट्टै भूच्ची करी जिन्दगी मन्ज प्रवेश करना तिजो तांयें ऐत थऊँ खरा बजाय ठेरै कि तू दूँ पैरा रै भुन्दै नरका री अगी मन्ज गच्छा

⁴⁶[जैड़ी तंयारा कीड़ा भी ना मरदा अतै अग भी ना हिहदी।][10]

⁴⁷अगर तेरी हाख्री तिजो थऊँ पाप करा, ता तैहा जो नकाळी फैंक; क्ओकि तिजो तांयें प्रमात्मैं रै राज्य मन्ज प्रवेश करना खरा हा। तेरै अंगा थऊँ अक्क अंग भलै ही नाश भूच्ची गच्छा, पर तेरा पुरा शरीर नरका मन्ज ना पाया गच्छा।

⁴⁸जैड़ी तंयारा कीड़ा भी ना मरदा अतै अग भी ना हिहदी।

⁴⁹क्ओकि हर कोई मणु अगी मन्ज शुद्ध करया गाणा जियां हरेक बलिदान जो लूण पाई करी शुद्ध करया गान्दा।”

⁵⁰“लूण खरा, पर जे अगर लूणा मन्ज स्वाद ना भोआ ता सो कत सोगी लूणका करना? अपणै आपा मन्ज लूणा सांईयै गुण रखा अतै आपस मन्ज मेल मिलाप सोगी रेय्आ।”