Read Gaddi लूका 1 Bible Online

लूका 1 - Gaddi bible

लूका 1

¹श्रीमान थियुफिलुस जी, कईये मणुऐ यीशु री गल्ला रा जैड़ी कि असु मन्ज भच्छुरी थी, इतिहास लिखणै तांई ईन्दा साथ दितुरा।

²जियां कि सो मणु जियें कि ईयां गल्ला जो पैहलै थऊँ ही अपणी हाख्री हेरूरा थू अतै सो बचना रै सेवक थियै, तियैं ही ऐह सब गल्ला असु तिकर पुजाई

³ता मिन्जो भी ऐह ठीक लगु कि ईयां सब गल्ला रा पुरा हाल ठीक-ठीक जाँच-परख करनै थऊँ वाद ही तियां जो अक्क-अक्क करीके तूसु तांई लिखूँ

⁴ताकि तुहै जाणी लैन कि सो गल्ला जठेरी तुहै सिख लैऊरीआ सो कतूणी सच हिन।

⁵ऐह तैस टैमां री गल्ल हा जैहणै यहूदिया परदेसा मन्ज राजा हेरोदेसा रा राज्य थू। ता तैड़ी अबिय्याह नां रै अक्की याजका री मण्ड़ळी मन्ज, जकरिया नां रा अक्क याजक थू। तसेरी घरावाळी रा नां इलीशिबा थू सो हारून नां रै अक्की याजका रै खानदाना थऊँ थी।

⁶जकरिया अतै इलीशिबा प्रमात्मैं रै सामणै बड़ै ही धर्मी थियै, अतै तसेरी सबी आज्ञा अतै व्यवस्था पुर सिधै मना सितै चलदै थियै।

⁷तंयारी कोई भी औलाद ना थी क्ओकि इलीशिबा बाँझ थी, अतै दोनों बुढै भी थियै।

⁸अक्क दिन जकरिया अपणी मण्ड़ळी सोगी प्रमात्मैं रै सामणै याजकी कमाऊ करदा थू।

⁹ता याजक मण्ड़ळी री रीति रै मुताबक तिन्यै सबी रै नां री पर्ची पाई अतै पर्ची जकरिया रै नां री निकळी कि सो प्रमात्मां रै मन्दरा मन्ज गिच्ची करी धूप बाळा।

¹⁰धूप बाळणै रै टैमैं पूजा करनै बाळै मणु री सब मण्ड़ळी बाहर प्रार्थना करू करदी थी।

¹¹ता तसेरै सामणै प्रमात्मैं रा अक्क स्वर्गदूत धूप बाळणै बाळी जगहा री खब्बी कनारी प्रकट भुआ।

¹²जकरिया तैसिओ हेरी करी विजकु अतै मना मन्ज डरना लगा।

¹³ता स्वर्गदूतै तैसिओ बल्लू, “हे जकरिया, डरैं मत! क्ओकि प्रमात्मैं तेरी प्रार्थना हुणी लैईआ। तेरी घरावाळी इलीशिबा थऊँ तिजो तांई अक्क पुत्र पैदा भूणा। तू तसेरा नां यूहन्‍ना रखैं।

¹⁴तसेरै पैदा भूणै पुर तूसु ता खुश भूणा हा पर होरी मतै मणु भी तसेरै पैदा भूणै री खुशी मनाणी हा,

¹⁵कजो कि सो प्रभु रै सामणै महान भूणा। तैस मदिरा शराब कदी ना पीणा। तैस अपणी मौआ रै पेटा मन्ज ही पवित्र आत्मा री सामर्थ सोगी भरी गाणा।

¹⁶तैस इस्त्राएली मणु थऊँ मतै जो प्रभु प्रमात्मैं री कनारी फेरना।

¹⁷यूहन्‍ना सो मणु भूणा जैड़ा प्रमात्मैं रै भविष्‍यवक्ता एलिय्याह री आत्मा अतै सामर्थ सितै भरूरा भूणा। तैस प्रमात्मैं रै रस्तै जो तैयार करना। तैस माँ-बुड्‍ड़ै रा मन बाल-बच्चै री कनारी फेरना अतै अणमन्ना जो धर्मी साईं समझ दिणिआ, ताकि प्रभु तांई अक्क खरी प्रजा तैयार भुच्‍ची सका।”

¹⁸ता जकरिया स्वर्गदूता थऊँ पुछणा लगू, “ऐह अऊँ कियां मन्‍नी लैऊ? क्ओकि अऊँ अतै मेरी घरावाळी ता बुढढै भुच्‍ची गच्छुरै।”

¹⁹स्वर्गदूतै जवाव दिता, “मेरा नां जिब्राएल हा, अऊँ प्रमात्मैं रै सामणै खडी रैहन्दा, मिन्जो प्रमात्मैं तिजो बलै ऐह सुसमाचार हुणाणा भैजुरा हा।

²⁰अबै हुण, जैहणै तिकर ऐह गल्ला पूरी ना भुच्‍ची गाहली, तैहणै तिकर गूंगै भूच्ची गाणा। ऐह ठेरैतांये भूणा कि तैंई मेरी गल्ला पुर विस्वास ना करू जैड़ी कि अपणै टैमां पुर पूरी भुणीआ।”

²¹बाहर मणु जकरिया री भाळा मन्ज खडुरै थियै। सो सोचणा लगै कि, जकरिया जो मन्दरा मन्ज ऐतनी देर कजो लगी भुल्‍ली?

²²जैहणै सो बाहरा जो आ, ता सो तियां जो सिनका लाणा लगु, क्ओकि तसेरी जवान ना चल्‍लु करदी थी। ता बाहर खडुरै मणु सब जाणी गै कि मन्दरा अन्दर जरूर ऐसिओ कसकि रै दर्शन भुएै हिन।

²³जैहणै तसेरी सेवा करनै रै दिन पूरै भुच्‍ची गै, ता सो अपणै घरा जो चली गो।

²⁴कुछ दिना बाद तसेरी घरावाळी इलीशिबा गर्भवती भूई, पर तैहै पँजा महीनै तिकर ऐह गल्ल मणु थऊँ लुक्‍काई रखी।

²⁵सो बल्‍दी थी कि, “मणु मन्ज मेरी बदनामी दूर करनै तांई प्रमात्मैं ईयां दिना मन्ज मिन्जो पुर ऐह दया दृष्‍टि करी हा।”

²⁶जैहणै इलीशिबा जो छिठा महीना लगु, ता प्रमात्मैं जिब्राएल स्वर्गदूता जो, गलील नां रै जिलै रै नासरत परदेसा मन्ज, मरियम नां री अक्की कुँवारी कुल्ळी बल्लै भैजु।

²⁷मरियम मंगणी यूसुफ नां रै मणु सितै भच्छुरी थी जैडा कि राजा दाऊद रै वंशा रा थू।

²⁸स्वर्गदूतै तैहा बल्लै ईच्ची करी बल्लू, “मरियम तेरी जय भोआ! तिजो पुर प्रमात्मैं री दया भूई हा अतै प्रमात्मां तिजो सोगी हा।।”

²⁹स्वर्गदूता री ऐसा गल्ला हुणी करी मरियम ड़री गई, अतै सोचणा लगी कि “ऐसा गल्ला रा कै मतलब भोल्ला”?

³⁰स्वर्गदूतै तैसा जो बल्लू, “हे मरियम, डरैं मत! कि प्रमात्मां तिजो पुर दयावान भुआ।

³¹तुद गर्भवती भूणा, अतै अक्क पुत्र जमणा। तू तसेरा नां यीशु रखैं।

³²सो महान अतै परमप्रमात्मैं रा पुत्र भूणा। प्रभु प्रमात्मैं तैसिओ तसेरै पूर्वज राजा दाऊद सांईयै राजा बणाणा, मतलब अपणै मणु पुर राज करनै रा अधिकार।

³³तैस याकूब रै घरानै यानी की इस्त्राएली मणु पुर सदा राज्य करना, अतै तसेरै राज्य रा कदी अन्त ना भूणा।”

³⁴ता मरियमें स्वर्गदूता थऊँ पूछु, “ऐ कियां भुच्‍ची सकदा अऊँ ता कुँवारी हा।”

³⁵ता स्वर्गदूतै जवाव दिता, “पवित्र आत्मा अतै परमप्रमात्मैं री सामर्थ तिजो पुर बणी रैहणी हा। ऐत तांई सो जैडा कि तिजो थऊँ पैदा भूणै बाळा सो पवित्र पुत्र भूणा, अतै प्रमात्मैं रा पुत्र भूणा।”

³⁶होर कै बल्लू, तेरी रिस्तेदार इलीशिबा, जेहा जो मणु बाँझ बलदै थियै, गर्भवती हा, अतै तैहओ छिठा महीना लगुरा।

³⁷क्ओकि प्रमात्मैं तांई सब कम आसान हिन।

³⁸ता मरियमें बल्लू, “हेर, अऊँ ता प्रभु री दासी हा। जियां सो चाहन्दा तियां ही भोआ।” फिरी स्वर्गदूत तैठी थऊँ चल्ली गो।

³⁹थोड़ै दिन बाद मरियम झटफट तैयार भुच्‍ची करी पहाड़ी इलाकै रै यहूदा परदेसा रै अक्की शहरा जो गई।

⁴⁰तैसै जकरिया रै घरै पुजीकरी इलीशिबा सितै पैरी करी।

⁴¹जियां ही मरियम पैरी करू करदी थी ता, तियां ही इलीशिबा रै पेटा मन्ज बच्चा उटकु अतै इलीशिबा पवित्र आत्मा सितै भरी गई।

⁴²सो जोरा सितै बलणा लगी, “मरियम तू सबी जनानी मन्ज धन्य हा! अतै धन्य हा तेरै पेटा रा फळ।”

⁴³ऐह मेरै तांयें बड़ै सौभाग्य री गल्ला हा कि मेरै प्रभु री माँ मिन्जो वलै आई हा?

⁴⁴हेर जियां ही तैंई मिन्जो सितै पैरी करी तियां ही मेरा बच्चा पेटा मन्ज खुशी सितै ऊटकुआ।

⁴⁵“धन्य हा तू जहै प्रमात्मां री गल्ला पुर विस्वास करू, जैड़ी भी स्वर्गदूतै तिजो सोगी बल्ली सो जरूर पूरी भूणी।”

⁴⁶ता मरियम बल्लू, “मेरा प्राण प्रभु री तरीफ करा।

⁴⁷मेरी आत्मा मेरा उद्धार करनै बाळै प्रमात्मैं मन्ज खुश हा,

⁴⁸क्ओकि प्रमात्मैं अपणी दासी री दीनता पुर कृपादृष्‍टि करी हा अतै अजा थऊँ बाद मिन्जो जुगा-जुगा रै मणु बलणा कि धन्य हा ऐह जनानी।

⁴⁹सर्वशक्तिमान प्रमात्मैं मिन्जो तांई बड़ै-बड़ै कम करूरै, तसेरा नां पवित्र हा,

⁵⁰जैड़ै तसेरा ड़र मन्दै तियां पुर तसेरी दया पीढ़ी थऊँ पीढ़ी तिकर वणी रैहन्‍दी हा।

⁵¹जैड़ै मणु अपणै-आपाओ बड़ै समझदै थियै, तियांओ तिनी अपणी शक्ति सितै तितर-बितर करी दितुरा।

⁵²तिनी राजा-महराजा री बादशाही जो खत्म करी दिता पर दीन मणु रै दरीद्रा जो दूर करू हा।

⁵³तिनी भूखै भाणै जो ता खरी चिजा सितै रजेरूआ पर रजुरै पूजुरै खाली हथै कड्ड़ी लायै।

⁵⁴तिनी अपणै सेवक इस्त्राएली मणु जो सम्भाळी लैऊआ कि अपणी तैहा दया जो याद करा।

⁵⁵जियां तिनी ईन्दै पूर्वजा सितै बल्लुरा थू कि तैस अब्राहम अतै तसेरै वंशा पुर सदा दया करनी हा।”

⁵⁶मरियम कोई त्राई महीनै इलीशिबा बलै रैई करी अपणै घरा जो फिरी आई।

⁵⁷फिरी इलीशिबा रै लोकिणै रै धैङै पूरै भुएै, ता तैसै अक्की पुत्रा जो जन्म दिता।

⁵⁸तहारै अड़ेही-पड़ेही अतै रिस्तेदार ऐह हुणी करी बड़ै खुश भुएै, कि प्रभुऐ तैहा पुर दया करी हा।

⁵⁹अठुऐं धैड़ै जैहणै मणु बच्चै रा खतना करना आये ता तसेरा नां भी तसेरै पितै रै नां पुर जकरिया रखणा लगै।

⁶⁰पर तसेरी मोऐ बल्लू, “ना-ना सेरा नां यूहन्‍ना रखणा।”

⁶¹तिन्यै तैसा जो बल्लू, “तेरै खानदाना मन्ज ता ऐह नां कसी रा भी ना हा!”

⁶²फिरी तिन्यै सिनका लाई करी जकरिया थऊँ पूच्छु, “तू सेरा नां कै रखणा चाहन्दा?”

⁶³जकरिया लिखणै जो पट्टी मंगाई करी तसेरा नां यूहन्‍ना लिखी दिता। ऐह हेरी करी सब हैरान भूच्ची गै।

⁶⁴ता तैहणै ही तसेरी जीभ भी खुली गैई अतै सो कणैणा लगी पैऊँ अतै प्रमात्मैं रा धन्यवाद करना लगु

⁶⁵ऐह सब हेरी करी तसेरै अड़ेही-पड़ेही हैरान भूच्ची करी डरना लगै अतै ऐह गल्ल पूरै यहूदिया रै पहाड़ी इलाकै मन्ज फैली गई।

⁶⁶ईयां सबी गल्ला जो हुणनै थऊँ बाद मणु अपणै-अपणै मनां मन्ज विचार करीके बलणा लगै, “ऐह बच्चा मोटि करी कै बणला”? कजो कि प्रभु री सामर्थ ऐस बच्चै सोगी थी।

⁶⁷तैस बच्चै रा पिता जकरिया पवित्र आत्मा सितै भरी करी भविष्‍यवाणी करना लगु

⁶⁸“इस्त्राएल रै प्रभु प्रमात्मैं री स्‍तुती भोआ, कओकि तिनी अपणै मणु पुर दया दृष्‍टि करीआ अतै तंयारा छुटकारा करू हा।

⁶⁹तिनी अपणै सेवका दाऊद रै वंशा थऊँ असु तांई अक्क सामर्थी उद्धारकर्ता पैदा करूआ।

⁷⁰जियां तिनी अपणै पवित्र भविष्‍यवक्ता रै मुँहा थऊँ बलौऊरा थू, जैड़ै कि पूराणै जमानै थऊँ भुन्दै आये हिन,

⁷¹कि प्रमात्मैं असु जो ईन्दै दुश्‍मणा थऊँ अतै सबी बैरी थऊँ उद्धार करू हा।

⁷²ताकि इन्दै पुरखा पुर दया करीके अपणै पवित्र सौगन्द जो याद करा।

⁷³प्रमात्मैं इन्दै कुल-पिता अब्राहम सोगी खाऊरी सौगन्द पूरी करी हा,

⁷⁴कि सो असु जो इन्दै दुश्‍मणा रै हथा थऊँ बचा,

⁷⁵ताकि अहै तसेरै सामणै पवित्र अतै धर्मी भूच्ची करी, पूरी ऊमर निडरता सितै तसेरी सेवा करदै रैहन।”

⁷⁶“हे बच्चै! तुद परमप्रमात्मैं रा भविष्‍यवक्ता बणना, क्ओकि तुद प्रभु रा रस्ता तैयार करनै तांयें तसेरै अगो-अगो चलना।

⁷⁷ताकि तसेरै मणु जो उद्धार पाणै रा ज्ञान देआ जैडा कि तंयारै पापा री माफी थऊँ भुन्दा हा।

⁷⁸ऐह तियां पुर ईन्दै प्रमात्मैं री तैसा बेथाह दया री व्जहा थऊँ भूणा, जठेरी व्जहा थऊँ असु पुर स्वर्गा थऊँ जियां कि तड़कै रा प्रगड़ा चमकणा।

⁷⁹ताकि असिओ पाप अतै अनन्त मौती रै ड़र थऊँ लौ री कनारी लेई अईआ, अतै इन्दै जिन्दगी जो शान्ती रै रस्तै पुर ठीक ठीक चला।”

⁸⁰अतै सो बच्चा यूहन्‍ना मोटीन्‍दा गो अतै आत्मा मन्ज बलवान भुन्दा गो। सो तैहणै तिकर सुनसान जगह मन्ज रैऊ, जैहणै तिकर तसेरा इस्त्राएली समाजा मन्ज प्रमात्मां रा प्रचार करनै रा टैमं ना आ।