Read Gaddi लूका 11 Bible Online

लूका 11 - Gaddi bible

लूका 11

¹यीशु अक्की जगह प्रार्थना करू करदा थू। जैहणै सो प्रार्थना करी बैहु ता तसेरै अक्की चेलै तैस सितै बल्लू, “हे प्रभु, जियां यूहन्‍नै अपणै चेलै जो प्रार्थना करना सखऊरी थी तियां ही तुहै असिओ भी सखा।”

²ता यीशुऐ वल्‍लु, “जैहणै तुहै प्रार्थना करलै ता इआं करै, “हे इन्दै पिता, तू जैडा स्वर्गा मन्ज हा, तेरा नां पवित्र मनया गच्छा, तेरा राज्य अईआ। तेरी इच्छा जियां स्वर्गा मन्ज पूरी भून्दिआ, तियां ही धरती पुर भी भोआ।

³इन्दी दिन भरी री रोटी अज असिओ देआ।

⁴अतै इन्दै पापा जो माफ करै, क्ओकि अहै भी तियां जो माफ करदै जैड़ै इन्दै विरोधी हिन, इन्दा कदी भी इम्तेहान मत लैंदा।”

⁵ता यीशुऐ तिआंओ वल्‍लु, “सोचा तून्दा कोई मित्र भोआ, जैस वलै तुहै अध्धी राती गिच्ची करी बलन कि, मिन्जो त्राई रोटी दे भला।

⁶क्ओकि अक्क मुसाफिर मित्र मिन्जो वलै आ अतै ऐस टैमैं मिन्जो वलै तैसिओ खुआणै तांयें कुछ निया।”

⁷ता जरा सोचा कि सो अन्दरा थऊँ ऐह जवाव देआ कि, “मिन्जो तंग मत कर क्ओकि अऊँ दारा-भिता दिकरी अपणै टबरा सोगी सुतुरा अतै अऊँ उूठी करी तिजो कुछ ना दी सकदा”

⁸यीशुऐ वल्‍लु, “अऊँ तुसिओ बलदा कि भलै ही सो तसेरा मित्र भूच्ची करी भी तैसिओ उूठी करी कुछ न देआ, फिरी भी वेशर्म भूच्ची करी घड़ी-घड़ी मंगणै री वजह थऊँ तैस तसेरी जरूरता रै मुताबक उूठी करी दिणा।”

⁹“अऊँ तुसिओ बलदा कि मंगलै, ता तुसिओ दिणा, तोपलै ता तुसिओ मुळना अतै दारा खटखटालै ता तूसु तांयें खुलणा।

¹⁰क्ओकि जैडा कोई मंगदा, तैसिओ दिन्दै, जैडा कोई तोपदा, सो पान्दा अतै जैडा खटखटान्दा, तैस तांयें खोलया गाणा।”

¹¹“तूसु मन्ज ऐसा कुण पिता भोल्ला, जैडा अपणै पुत्रा जो रोटी मंगणै पुर पत्थर देला, जे मच्छी मंगला, ता कीड़ा देला

¹²या अण्ड़ा मंगला ता बिच्छु देला?

¹³हेरा जे, तुहै बुरै भूच्ची करी अपणी औलादा जो खरी चिजा दिणा जाणदै, ता तून्दा स्वर्गीय पिता अपणै मंगणै बाळै जो पवित्र आत्मा कओ न देला।”

¹⁴फिरी यीशुऐ अक्क गुँन्‍गी दुष्‍टात्मा गुँन्‍गे मणु थऊँ कड़ी। जैहणै दुष्‍टात्मा निकळी गई ता गुँन्‍गा कणैणा लगी पैऊ ऐह हेरी करी मणु हैरान भूच्ची गै

¹⁵पर तियां मणु मन्ज कुछ बलणा लगै, “ऐह ता शैतान री मदद सोगी मणु थऊँ दुष्‍टात्मा जो कड़दा।”

¹⁶कैई मणुऐ यीशु जो परखणै तांयें तैसिओ बल्लू असिओ कोई स्वर्गीय चमत्कार दस्स।

¹⁷पर यीशुऐ तंयारै मना री गला जाणी करी तिआंओ वल्‍लु, “जैस भी देशा मन्ज फूट पैई गच्छा ता सो कियां टिकी सकदा हा? ईयां ही जैस घरा मन्ज फूट पैई गच्छा सो भी उजड़ी गान्दा।

¹⁸ता जे अगर शैतान अपणा ही वरोधी भूच्ची गल्ला ता तसेरा राज्य कियां चलना क्ओकि तुहै मेरै बारै मन्ज ता बलदै कि अऊँ शैतान री मदद सितै दुष्‍टात्मा जो कड़दा।

¹⁹भला जे अऊँ शैतान री मदद सितै दुष्‍टात्मा कडदा ता तून्दै चेलै-जोगी कसेरी मदद सोगी दुष्‍टात्मा कड़दै हिन? ठेरै बारै मन्ज सो ही तून्दा न्याय करलै।

²⁰पर जे अगर अऊँ प्रमात्मैं री सामर्थ सितै दुष्‍टात्मा जो कडदा, ता समझा प्रमात्मां रा राज्य तूसु बलै ईच्ची पुजुरा हा।

²¹जैहणै तिकर ताकतवर मणु हथियारा सितै लदूरा अपणै घरा री पैहरैदारी करदा, तैहणै तिकर तसेरी जायदात बची रैहन्‍दी हा।

²²पर जैहणै कोई तैस थऊँ भी ज्यादा ताकतवर तसेरै हथियारा जो जिआं पुर सो भरोसा करदा थू, तैतिओ खुस्सी करी तैसिओ जित्ती लैन्दा अतै तसेरी जायदात भी लुटी लैन्दै।

²³जैडा मिन्जो सोगी नियां सो मेरा विरोधी हा अतै जैडा मिन्जो सोगी मणु जो प्रमात्मैं री कनारी ना फेरदा सो तियां मणु जो वगाड़दा।

²⁴“जैहणै कोई दुष्‍टात्मा मणु थऊँ नकैई गान्दीआ ता सो सुनसान जगह मन्ज घुमदी-फिरदी आराम करनै जो जगह तोपदीआ, पर जगह न मुळन पुर बलदिआ, ‘मुँ तैस मणु मन्ज फिरी चली गाणा जैस थऊँ अऊँ नकैऊरी थी।’

²⁵अतै सो ईच्ची करी तैसिओ झाडूरा-झमुंरा अतै सजुरा-सजाऊरा अतै खाली हैरदीआ।

²⁶सो फिरी करी अप्पू थऊँ भी ज्यादा बुरी सत होर दुष्‍टात्मा जो लेई इन्दीआ अतै सो तैस मन्ज वास करदी हिन अतै तैस मणु री दशा पैहली दशा थऊँ भी ज्यादा खराब भूच्ची गान्दी हा।”

²⁷जैहणै यीशु इआं गल्ला कणैऊ करदा थू ता भिड़ा थऊँ अक्क जनानी जोरा सितै बलणा लगी, “धन्य हा सो माँ जैहै तिजो जन्म दिता अतै दुध पिआऊ।”

²⁸ता यीशुऐ वल्‍लु, “ऐह गल ता ठीक हा पर धन हिन सो मणु जैड़ै प्रमात्मैं रा बचन हुणदै अतै तैतिओ मन्दै।”

²⁹जिआं भीड़ बदणा लगी ता यीशु बलणा लगा, “ऐह बुरै मणु रा युग हा, ऐह चमत्कार हेरना चाहन्दै हिन पर योना भविष्‍यवक्ता री नशाणी जो छड़ी करी होर कोई चिन्ह तियां जो ना दसया गाणा।

³⁰क्ओकि जिआं योना नीनवे शहरा रै मणु तांई चिन्ह थू, तियां ही ऐस युग रै मणु तांई मणु रा पुत्र ही चिन्ह भूणा।

³¹जैहणै दक्षिण दिशा री राणी न्याय बाळै दिन ऐस युगा रै मणु सोगी उूठी करी, तियां जो दोषी ठहराणा क्ओकि सो धरती री दूई दिशा थऊँ राजा सुलैमान रा ज्ञान हुणनै तांयें आई अतै अबै हेरा ऐठी ता कोई सुलैमान थऊँ भी बड़ा हा।

³²नीनवे शहर रै मणु न्याय बाळै दिन ऐस युगा रै मणु सोगी उूठी करी तियां जो दोषी ठहराणा, क्ओकि तियैं योना रा बचना जो हुणी करी मन फिराऊरा थू। अतै ऐठी ता सो हा जैडा योना थऊँ भी बड़ा हा।”

³³कोई भी मणु दीयै जो बाळी करी टोकरू थलै ढ़की ना रखदा, बल्कि उच्ची जगह पुर रखदा ताकि अन्दरा जो ईणै बाळैओ लौ भोआ।

³⁴शरीरा रा दीया हाख्री हिन ठेरैतांये अगर तेरी हाख्री साफ हिन, ता तेरा पुरा शरीर भी उजियाला भूणा, पर जे तून्दा हेरना बुरा ता तून्दा पुरा शरीर हिहुरै दीयै सांई हा।

³⁵ठेरै तांयें चौकनै रेआ ताकि जैड़ी लौ तूसु मन्ज हा सो बूझी ना गच्छा।

³⁶जे तेरा पुरा शरीर चमकदार हा अतै ठेरा कोई भी हिस्सा नैहरै नियां ता पूरै रा पुरा शरीर ईयां चमकणा चहिन्दा जियां कि बळुरा दीया अपणी चमकदार लौ तिजो पुर दिन्दा।

³⁷जैहणै यीशु गल्ला करू करदा थू ता, अक्की फरीसीये यीशु सितै बिनती करी कि, “मेरै घरै खाण खाणा चला।” ता यीशु तसेरै घरा जो खाण खाणा गो।

³⁸फरीसी ऐह हेरी करी हैरान भूच्ची गै कि यीशु बिना हत्थ धोऐ रोटी खाणा बैही गो हा।

³⁹प्रभुऐ तैसिओ वल्‍लु, “हे फरीसीयों, तुहै अप्पू जो कटोरै अतै थाली सांईं बाहरा थऊँ ता मांजदै हिन, पर तून्दै अन्दर कपट अतै लालच भरूरा।

⁴⁰हे मूर्खा, जिनी बाहरा रा हिस्सा बणाऊरा, कै तिनी अन्दरा रा हिस्सा ना बणाऊरा?

⁴¹पर हाँ जे तुसै अन्दरा बाळी चिजा रा दान करी दीन, ता हेरा सब कुछ तूसु तांयें शुद्ध अतै पवित्र भूच्ची गाणा।”

⁴²“पर हे फरीसीयों, हाय तूसु पुर! तुसै पुदिनै, ब्रह्‌मी अतै कईआ किस्‍मां रै सागा सब्जी रा ता दसवां हिस्सा दान करदै हिन, पर न्याय अतै प्रमात्मैं रै प्रेमा जो टाळी दिन्दै हिन, तूसु जो ता ईयां करना चहिन्दा थू कि तुसै ईयां दुनीं कमां करदै रैहन्दै।

⁴³हे फरीसीयों, तूसु पुर धिक्‍कार हा! तुहै ता चाहन्दै कि यहूदी रै सभागार मन्ज मणु तुसिओ नमस्कार अतै तुन्दी जय जय करन।

⁴⁴तूसु पुर हाय! क्ओकि तुहै तियां कब्रा साईयें हिन जियां पुर मणु चलदै, पर सो ना जाणदै कि थलै कै दभिऊरा।”

⁴⁵ता अक्क शास्त्री बलणा लगा, “हे गुरू, तुहै ईयां गल्ला कणैई करी इन्दी बुराई करू करदै हिन।”

⁴⁶ता यीशुऐ वल्‍लु, “हे शास्त्री, धिक्‍कार हा तूसु पुर! तुहै ऐतना भार मणु पुर लद्‍दी दिन्दै हिन जैतियो चुकणा मुसकिल हा, पर अप्पू ता तैस भारा जो अपणी उँगळी सोगी सरकाणा भी ना चाहन्दै।”

⁴⁷“तूसु पुर हाय! तुसै प्रमात्मैं रै भविष्‍यवक्ता री कब्रा जो सँवारदै हिन, जंयारा कत्‍ल तून्दै ही बजुर्गे करूरा थू।

⁴⁸ईयां कमाई करी तुसै ऐह दसणा चाहन्दै हिन कि तुसै अपणै बजुर्गा रै कमां थऊँ सहमत हिन कओकि तियैं ता तंयारा कत्‍ल ही करू पर तुसै ता इन्यारी कब्रा खोदू करदै हिन।

⁴⁹ऐत तांई प्रमात्मैं रा ज्ञान भी दसदा कि, मुँ भविष्‍यवक्ता अतै प्रेरित तियां बलै भैजणै हिन, पर कुछ जो ता तियां दुख दिणा अतै कुछ तियां मारी दिणै हिन।

⁵⁰ता संसारा रै शुरू थऊँ जैतूणै भी भविष्‍यवक्ता रा खून भच्छुरा तटेरा हिसाब कताब ऐसा पीढ़ी रै मणु थऊँ लैणा।

⁵¹यानी की हाबील रै खूना थऊँ लेई करी जकरिया री हत्या तिकर जैडा कि प्रमात्मैं रै मन्दरा मन्ज वेदि रै सामणै भूई थी। हाँ अऊँ तूसु सितै सच बल्‍दा, कि ऐसा पीढ़ी रै मणु थऊँ ही ऐसा गल्ला रा लेखा जोखा लैणा।”

⁵²“हा शास्त्री हाय हा तूसु पुर! तूसु बल्लै ज्ञान ता हा पर ऐत सितै ना ता तुहै प्रमात्मां रै राज्य मन्ज हाजर भुन्दै अतै जैड़ै कि ऐत मन्ज हाजर भूणा चाहन्दै हिन तिआंओ भी तुसै भूणा ना दिन्दै तियां तांई तां तुसै रोड़ा बणी गांन्‍दै हिन।”

⁵³जैहणै यीशु तैठी थऊँ चली गो, ता शास्त्री अतै फरीसी तैस सितै बैर रखणा लगी पै कि यीशु तंयारै प्रश्‍ना रा जवाव देआ।

⁵⁴सो ऐसा गल्ला री खोज-बीन करू करदै थियै कि कहणै जिन्‍नै यीशु रै मुँह री कोई गप्‍प पकडन अतै दोषी बणान।