Read Gaddi लूका 12 Bible Online

लूका 12 - Gaddi bible

लूका 12

¹तूणै ही टैमां मन्ज तैठी मणु री भीड़ ऐतनी भारी भूच्ची गई कि सो अक्की दुऐ पुर चड़ी चलू करदै थियै, ता यीशु सबी थऊँ पहलै अपणै चेलै सितै बलणा लगा कि, “तुसै ईयां फरीसी री कपट रूपी सोचा थऊँ जैड़ी कि, खमीरा सांई हा, चौकस रेय्आ।” “ठेरा अर्थ ऐह हा कि तुहै तंयारी गलत शिक्षा थऊँ बची करी रेय्आ।

²कजो कि कुछ भी ऐसा निआ जैडा छिपुरा हा अतै ना ही कुछ ऐसा जैडा छिपाई रखूरा, कि जैतियो कोई जाणी ना सका।

³ठेरैतांये जे कुछ भी तूसु सोगी नैहरै मन्ज कणैऊरा, सो उजालै मन्ज हुणना अतै जे कुछ तुसै औवरी मन्ज कना सितै कन लगाई करी कणैऊरा, सो उच्ची जगहा थऊँ हुणाणा।”

⁴“मेरै मित्रो अऊँ तुसिओ बलदा कि, जैड़ै शरीरा जो मारदै हिन पर आत्मा जो ना मारी सकदै, तियां थऊँ मत डरदै।

⁵अऊँ तूसु जो दसदा कि, सिर्फ तैस प्रमात्मैं थऊँ ही डरा जैस जो मारनै थऊँ बाद नरका मन्ज फैंकणै रा भी अधिकार हा, अऊँ फिरी बलदा, तैस थऊँ ही डरा।

⁶कै दूँ पैसै री पँज चिड़ी ना बिकदी? फिरी भी प्रमात्मां तियां कसी जो ना भूलदा।

⁷तून्दै ता हैरा रै बाळ भी सब गीणुरै हिन। डरा मत, तुन्दी किमत प्रमात्मैं रै सामणै मती चिड़ी री किमत थऊँ भी ज्यादा हा।

⁸“अऊँ तूसु जो बल्‍दा कि जैस कसी मिन्जो मणु सामणै मनी लैणा, सो मुँ भी प्रमात्मैं रै स्वर्गदूता रै सामणै मनी लैणा।

⁹पर जैस कसी मणु सामणै मेरा इन्कार करना मुँ भी सो प्रमात्मैं रै स्वर्गदूता रै सामणै नकारी दिणा।

¹⁰“जैडा कोई मणु रै पुत्रा री निन्दा करला ता सो ता माफ भुच्‍ची गाणा, पर जैडा पवित्र आत्मा रा वरोध करला सो माफ ना भूणा।

¹¹“जैहणै तुसिओ मणु पकड़ी करी यहूदी रै सभागार अतै राजा अतै अफसरा रै सामणै लेई गाहलै ता चिन्ता मत करदै कि तूसु के बलणा अतै कै जवाव दिणा।

¹²क्ओकि पवित्र आत्मा तैहणै ही तूसु जो दसि दिणा कि तूसु कै कणैणा।”

¹³फिरी भिड़ा थऊँ अक्की मणुऐ यीशु सितै वल्‍लु, “हे गुरू, मेरै भाई सितै बल्ला कि सो पितै री जायदात मिन्जो सोगी बण्ड़ी लेआ।”

¹⁴यीशुऐ तैस सितै वल्‍लु, “ओ भलेया-मणुआ मिन्जो तेरा न्याय अतै जायदात रा बंड़-बड़ारा करनै तांयें कुणी बणाऊरा?”

¹⁵“चौकनै रेआ अतै सबी किस्‍मां रै लोभ-लालच थऊँ अपणै आपाओ बचाई करी रखा, क्ओकि जरूरता थऊँ ज्यादा जायदात भूणै पर जिन्दगी रा मतलब ऐह निआ कि तैतिओ होर कठेरा।”

¹⁶फिरी यीशुऐ मणुओ अक्क उदाहरण हुणाऊ, “कसकि मणु री जिंमी मन्ज बड़ी पैदावार भूई।

¹⁷ऐह हेरी करी सो अपणै मना मन्ज सोच-विचार करना लगु, अबै अऊँ कै करला? मिन्जो वलै ऐतिओ रखणै तांयें जगह निआ।”

¹⁸तिनी वल्‍लु, “अबै मुँ ऐसा करना, कि अपणै पेडू भनी करी होर मोटै पेडू बनाणै अतै तैत मन्ज सब अनाज रखणा।

¹⁹अतै फिरी अपणै मना जो बलणा कि ओ मेरेआ मना, तिजो तांयें कई साला तिकर अनाज कठेरी रखुआ, खा-पी अतै सुखा-चैना सितै रैह।”

²⁰पर प्रमात्मैं तैस सितै वलु, “ओ मूर्खा! तेरै प्राण-पखेरू ता अज राती ही उडरी गाणै अतै जैडा कुछ तैंई कठेरूरा सो कसेरा भूणा?”

²¹“ऐस ही तरीकै सो मणु भी हा जैडा अप्पू तांयें जायदात कठेरी करी अमीर ता बणदा पर प्रमात्मैं री नजरा मन्ज गरीब हा।”

²²फिरी तिनी अपणै खास चेलै सितै वल्‍लु, “कि अपणै प्राणा तांयें ऐह चिन्ता मत करदै कि असु कै खाणा? अतै कै पीणा? अतै न अपणै शरीरा तांयें कि कै लाणा? कै प्राण खाणै थऊँ, अतै शरीर कपड़ै थऊँ बदिकरी

²³क्ओकि प्राण खाणै थऊँ, अतै शरीर कपड़ै थऊँ बदिकरी हा।

²⁴काऑ री कनारी धैन देआ, ना ता सो बान्दै, ना ता सो कटदै, ना ता सो कठेरदै अतै ना ही इन्यारै पेडू हिन, फिरी भी पिता प्रमात्मां तियां जो खुआन्दा ता तुन्दी ता किमत इआं काऑ थऊँ कई गुणा ज्यादा हा।

²⁵तूसु मन्ज ऐसा कुणआ जैडा चिन्‍द करीके उमरा री अक्क घड़ी बधाई सका?”

²⁶जे तुहै छोटा जिन्‍ना कम ना करी सकदै ता, जिन्दगी री होरी गला तांयें कओ चिन्‍द-फिकर करदै?

²⁷“जंगली फूला री कनारी ध्यान देय्आ सो कियां फूलदै हिन। सो ना ता मेहनत करदै, ना कतदै ता भी अऊँ तुसिओ बलदा कि राजा सुलैमान भी अपणी पूरी वैभवी जिन्दगी मन्ज ईयां फूला सैईं ना सजी सकू।

²⁸प्रमात्मां जमीना रै घा जो, जैडा कि अज हा अतै दोतै सो अगी मन्ज फूकी दिणा, ईना छैळ सजान्दा ता हे अल्पविस्वासिओ तुसिओ ऐत थऊँ ज्यादा छैळ कजो ना सजाला?

²⁹ठेरैतांये चिन्ता करीके ऐह मत बलदै, कि असु कै खाणा, या कै पीणा, या कै लाणा?

³⁰कओकि संसार ईयां चिजा री खोज मन्ज रैहन्दा पर तून्दा पिता प्रमात्मां जाणदा कि तुसिओ ईयां चिजा री जरूरत हा।

³¹ठेरैतांये पैहलै तुहै तसेरै राज्य अतै धर्मा री तोप करा ता ऐह सब चिजा भी तुसिओ मुळी गाणी।”

³²“हे हल्कै झुण्ड़, मत ड़रा, क्ओकि तून्दै पिता प्रमात्मां री ऐह इच्छा हा, कि तुहै राज्य करन।

³³अपणी जायदात बेचीकरी दान करी देआ अतै अपणै तांयें इन्‍नै बटुए बणा जैड़ै कदी भी पूराणै ना भुन्दै, मेरी गला रा मतलब ऐह हा कि स्वर्गा तांयें ईनी कमाई करा जैड़ी कदी भी ना घटदी, ना चोर तैसिओ चोरी सकदा अतै ना ही कीड़ा तैसिओ खाई सकदा।

³⁴क्ओकि जैड़ी तेरा धन हा तैड़ी ही तेरा मन भी लगी रैहणा।”

³⁵“सेवा करनै तांई तुसै हमेशा तैयार रेय्आ अतै तून्दै दीयै सदा बळदै रैहन।”

³⁶यीशुऐ बल्लू, “तुसै तियां मणु सांईं बणा, जैड़ै अपणै मालका री बैह थऊँ फिरी करी ईणै री भाळ करदै हिन, कि जैहणै सो ईच्ची करी दारा बजा ता सो झट खोलण।

³⁷धन्य हा सो नौकर जैस जो तसेरा मालक ईच्ची करी जागदा हेरदा। अऊँ तूसु सितै सच बलदा कि, तैस नौकरा तसेरी सेवा तांई कमर कसी करी तैयार रैहणा अतै तैस जो खाणा खोआणा।

³⁸जे सो अध्धी राती या भ्यागा रै टैमैं अईआ अतै अपणै नौकरा जो जागदा हेरला, ता सो नौकर धन्य हा।

³⁹पर तुहै ऐह गप्‍प जाणी लेय्आ कि अगर घरा रा मालका जो पता भोआ कि चोरा कैहणै चोरी करना ईणा ता तैस जागदै रैहणा अतै अपणै घरा मन्ज चोरी ना भूणा दिणी।

⁴⁰तुसै भी तैयार रेय्आ क्ओकि जैस टैमां रै बारै मन्ज तुहै सोचदै भी ना हिन तैस ही टैमैं मणु रै पुत्रा ईच्ची रैहणा।”

⁴¹ता पतरस बलणा लगा, “प्रभु जी, कै ऐह उदाहरण तुसै असु जो ही हुणाऊ करदै हिन कि सबी जो हुणाऊ करदै हिन?”

⁴²यीशुऐ बल्लू, “सो विस्वास लायक अतै अक्‍लमंद खजांची कुण भोला जसेरा मालक तैस जो अपणै नौकरा-चाकरा पुर चौंकीदार बणाई देआ अतै सो भी मालका जो ठीक-ठीक हिसाब दसा।”

⁴³धन्य हा सो दास, जैस जो तसेरा मालक इन्‍नी साभै कम करदा हेरदा।

⁴⁴अऊँ तूसु सोगी सच बलदा कि, तैस मालका सो दास अपणी पूरी जायदात पुर अधिकारी बणाई दिणा।

⁴⁵पर जे सो दास सोचणा लगा कि हल्ली तिकर ता मालका रै ईणै जो देर हा अतै सो होरी नौकरा-चाकरा जो मारा जक्का अतै खाई-पी करी मतबाळा रैहणा लगी पेआ,

⁴⁶ता तैस दासा रा मालक ऐसै टैमैं चली ईणा जैहणै तैस दासा जो मालका री भाळ ना भोआ या तैस ऐसी घड़ी ईणा जैतियो सो जाणदा भी ना भूणा, तैस टैमैं मालका दासा जो फटकार मारी करी सो अविस्वासी सोगी करी दिणा।

⁴⁷फिरी यीशु बलदा, “ऐसा नौकर जैडा कि मालका री ईच्‍छा जाणदै भी तैयार ना रैहन्दा अतै जियां मालक चाहन्दा तियां ना करदा ता तैस नौकरा जो बड़ी मार पैणीआ

⁴⁸पर जैडा नौकर जैसिओ पता ना भोआ कि मालक कै चाहन्दा, अतै ऐसा कोई कम करा जैडा मालका जो पसन्द ना भोआ, ता तैस जो थोड़ी मार पैणी हा। ठेरैतांये जैस जो ज्यादा दितुरा हा, तैस थऊँ ज्यादा हिसाब लैणा अतै जैस जो ज्यादा सम्भाळणै जो दितुरा तसेरा ज्यादा हिसाब भूणा।”

⁴⁹यीशुऐ बल्लू, “अऊँ धरती पुर अग लाणा छूरा अतै अऊँ चाहन्दा कि ऐह अग जतूणी तोऊळी भड़की सकदी हा भड़का!

⁵⁰मिन्जो अक्क बड़ा ज्यादा दुख भरा बपतिस्मा लैणा हा अतै जैहणै तिकर ऐह भुच्‍ची ना गान्दा, अऊँ परेशान हा!

⁵¹तुसै के समझदै कि अऊँ धरती पुर मेल मिलाप करवाणा छूरा? अऊँ तूसु जो बलदा कि अऊँ ता अक्की दुऐ थऊँ तूसु जो दूर कराणा छूरा।

⁵²अजा थऊँ बाद हर घरा रा हर सदस्य अक्की दुऐ रा वरोधी भूणा। अगर घरा मन्ज पँज सदस्य हिन ता त्रीं मिन्जो पुर विस्वास करना दूँ ना करना।

⁵³पिता पुत्रा रा अतै पुत्रा पिता रा वरोध करना, मौआ कुल्ळी सितै अतै कुल्ळी मौआ सितै बैर रखणा, हहुआ नुहहा सितै अतै नुहहा हहुआ सितै बैर रखणा।”

⁵⁴यीशुऐ भिड़ा सितै भी बल्लू, “जैहणै तुसै घरिन्‍दी कनारी बदळा जो हेरदै हिन ता तुसै झट बलदै हिन कि बरखा भुणीआ अतै ईयां ही भुन्दा।

⁵⁵जैहणै तुसै दक्षिणी हवा हेरी करी बल्‍दै हिन कि अबै लू चलणीआ अतै ईयांईं ही भुन्दा।

⁵⁶हे कपटिओ, तुसै अम्बरा अतै धरती रै रंगा जो हेरी करी तसेरै भेदा जो जाणी सकदै हिन, ता तुसै ऐस युगा रै बारै मन्ज भेद करना कजो ना जाणदै?”

⁵⁷यीशुऐ बल्लू कि, “तुसै अपणै बारै मन्ज अप्पू ही फैसला करा कि तूसु तांई कै ठीक हा?

⁵⁸जैहणै तुसै अपणै विरोधी सोगी कोर्ट कचैहरी जो मुकदमैं तांई गांदै हिन ता तैस सितै रस्तै मन्ज ही समझौता करनै री सोची लेआ, ईयां ना भोआ कि सो तिजो जजा बलै लेई गच्छा अतै जज तिजो सपाई रै हवालै दी करी तिजो जेला मन्ज पाई देआ

⁵⁹अतै अऊँ तूसु सोगी सच बलदा कि जैहणै तक तू पाई पाई ना भरी देला तैहणै तक तैड़ी थऊँ ना छुटी सकदा।”