Read Gaddi लूका 16 Bible Online

लूका 16 - Gaddi bible

लूका 16

¹यीशुऐ अपणै चेलै जो अक्क उदाहरण हुणाऊ, “कसी अमीर मणु रा अक्क भण्डारी थू। मणुऐ तैस भण्डारी रै सामणै ही अमीर मणु सितै तैस पुर ऐह इलजाम लऊ कि, ‘ऐह तून्दै सारै धन दौलता जो बर्बाद करू करदा।

²अमीर मणुऐ सो भण्डारी हैदी करी पूछु, “ऐह कै गल्ला जैड़ी अऊँ तेरै बारै मन्ज हुणु करदा?” अपणा सारा बही-खाता लेई करी मिन्जो बल्लै आई कजो कि ऐस थऊँ बाद तू नौकरी पुर ना रखणा।’ ”

³“ता भण्डारी सोचणा लगा, अबै अऊँ कै करू? मेरा मालक ता मिंजो कड़णा लगी पेऊरा अतै मजदूरी ता मिन्जो थऊँ भूणी नियां अतै भीख मंगणै थऊँ मिन्जो शर्मा लगदी हा।” ऐह सोचणै थऊँ बाद तिनी अपणै मनां मन्ज सोचु,

⁴“अबै अऊँ समझी गो हा कि मिन्जो कै करना चहिन्दा ताकि जैहणै अऊँ नौकरी थऊँ नकैई भी गच्छू ता मणु मेरा अपणै घरा मन्ज इजत मान करन।”

⁵तिनी अपणै मालका रै सबी कर्जदारा जो अप्पू बलै हैदी करी पूछु, “तूसु पुर मेरै मालका रा कतूणा-कतूणा कर्जा हा।”

⁶ता अक्की बल्लू, “सौ मण[7] तेल।” ता तिनी तैस सितै बल्लू, “अपणा बही-खाता लेई अतै तैत मन्ज मटाई करी पजाँह मण लिखी लै।”

⁷फिरी तिनी दुऐ थऊँ पूछु, “तू दस भैई तिजो पुर कतूणा कर्जा?” तिनी बल्लू, “सौ मण कणक।” ता तिनी भण्डारी बल्लू, “अपणा बही-खाता लेई अतै अस्‍सी लिखी दे।”

⁸यीशुऐ बल्लू, “तिनी मालकै तैस अधर्मी भण्डारी री सराहणा करी, कजो कि तिनी बड़ी चलाकी सितै कम करू। ऐस संसार रै मणु अपणै जमानै रै मणु सोगी रीति रवाजा मन्ज यीशु सितै चलनै बाळै मणु थऊँ ज्यादा चलाक हिन।”

⁹यीशुऐ बल्लू, “अऊँ तूसु सितै बलदा कि संसारा री कमाई सितै अप्पू तांई मित्र बणाई लेआ, ताकि जैहणै धन मुक्‍की गच्छा ता, ता सो अनन्त डेरै मन्ज तून्दा स्वागत करन।”

¹⁰“जैडा थोड़ै मन्ज सचा सो मतै मन्ज भी सचा; अतै जैडा मतै मन्ज अधर्मी हा सो थोड़ै मन्ज भी अधर्मी हा।

¹¹जे तुसै संसारा रै धना मन्ज सचै ना रै, ता स्वर्गीय धन तूसु जो कस दिणा?”

¹²फिरी यीशुऐ बल्लू, “जे तुसै पराऐ धना मन्ज सचै ना ठेहरै, ता जैडा तून्दा सो तुसिओ कस दिणा?”

¹³“कोई मणु दूँ मालका री सेवा न करी सकदा, क्ओकि तैस अक्की सोगी बैर अतै अक्की सोगी प्रेम रखणा, तैस अक्की सोगी मिली रैहणा अतै दूये जो बुरा मनणा; तुहै प्रमात्मैं अतै धना दूनी री सेवा ना करी सकदै।”

¹⁴फरीसी धना रै लोभी थियै। सो यीशु री गल्ला हुणी करी तैस पुर हासणा लगै।

¹⁵ता यीशुऐ बल्लू, “तुसै मणु रै सामणै अपणै आपा जो बडै धर्मी समझदै हिन। पर प्रमात्मां तून्दै मनां जो जाणदा; कजो कि जैड़ी चिज मणु री नजरा मन्ज बडी महान हा, सो प्रमात्मैं री नजरा मन्ज नक्कमा हा।”

¹⁶यीशुऐ बल्लू, “मूसा री व्यवस्था अतै भविष्‍यवक्ता यूहन्‍नै तिकर ही रेआ। तैस टैमां थऊँ लेई करी अज तक प्रमात्मां रै राज्य रा सुसमाचार हुणाया गच्छू करदा। हर कोई ऐत मन्ज बडै जोशा सितै दाखल भूच्छु करदा।

¹⁷भलै ही स्वर्ग अतै धरती खत्म भूच्ची सकदै हिन पर मूसा री व्यवस्था री अक्क-अक्क गप्‍प अटल हा। उदाहरण तांई,

¹⁸“जैडा कोई अपणी घरावाळी जो छड़ी करी कसी होरी सितै बैह करदा ता सो व्यभिचार करदा हा, अतै जैडा ऐसी छडुरी सितै बैह करदा, सो भी व्यभिचार करदा।”

¹⁹यीशुऐ अक्क होर उदाहरण हुणाऊ कि : “अक्क अमीर मणु थू। सो जामणी[8] रंगा रै किमती कपड़ै अतै रेशम पैहन्दा अतै रोज मौज सितै रैई करी सुख भोगी मणु थू।

²⁰अतै अक्क लाजर नां रा गरीब मणु भी थू। तसेरा सारा जिस्म फोडै सितै भरिऊरा थू। मणु लाजर जो रोज ही तैस अमीर मणु रै गेटा पुर छड़ी गान्हदै थियै।

²¹लाजर चाहन्दा थू कि अगर अमीर मणु रा जुठा खाणा ही मुळी गच्छा ता अऊँ पेटा भरी लैऊ। कुतर ईच्ची करी तसेरै फोडै जो चटदै थियै।”

²²“अक्क दिन गरीब लाजर मरी गो। स्वर्गदूतै लाजर नी करी इन्दै पूर्वज अब्राहम री गोदी मन्ज पुजाई दिता। सो अमीर मणु भी मरी गो; अतै दव्बी दिता।

²³अतै सो नरका मन्ज पुजी गो। तैठी थऊँ तिनी दूर हेरू कि अब्राहम री गोदी मन्ज लाजर बैहुरा हा।

²⁴तिनी हक्क पाई करी बल्लू, ‘हे इन्दै पूर्वज अब्राहम, मिन्जो पुर दया कर अतै लाजर जो मिन्जो बल्लै भैज, ताकि सो अपणी उँगळी जो पाणी मन्ज डुबाई करी मेरी जीभा जो ठण्डी करी गच्छा; क्ओकि अऊँ ता नरका री ऐसा अगी मन्ज फुकू करदा।’ ”

²⁵ता अब्राहमे बल्लू, “हे पुत्रा, याद कर तू अपणी जिन्दगी मन्ज खरी चिजा जो भोगी चुकुरा अतै लाजर बुरी चिजा जो। पर अबै ऐस जो शान्ती मुळुरीआ अतै तू तडफू करदा।

²⁶ईयां सबी गल्ला रै बाद भी असु अतै तिजो मन्ज अक्क बडी भारी खाई बणुरिआ कि जैडा ऐठी थऊँ तिजो बलै गाहणा चाह, सो ना गिची सका, अतै ना ता कोई ओठी थऊँ असु बलै ऐठी ईच्ची सका।”

²⁷अमीर मणुऐ बल्लू, “ता हे पूर्वज, अऊँ तिजो सितै बिनती करदा कि तू लाजर जो मेरै पितै रै घरा जो भैजी दे।

²⁸मेरै पँज भाई हिन अतै लाजर ईयां गल्ला री चेतावनी तियां सामणै देआ। करखी ईयां ना भोआ कि सो भी ऐसा दुखा री जगहा ईन।”

²⁹अब्राहमे तैस जो बल्लू, “तियां बलै ता मूसा अतै भविष्‍यवक्ता री कताबा हिन, सो तियां कताबा थऊँ हुणन।”

³⁰अमीर मणुऐ बल्लू, “हे पूर्वज, अब्राहम, जे कोई मरुरै थऊँ जी करी तियां बलै गच्छा, ता तियां मन फेरी लैणा।”

³¹अब्राहमे तैस सितै बल्लू, “जैहणै सो मूसा अतै भविष्‍यवक्ता री ना हुणदै ता जे कोई मरी करी भी जी उठा तांभी तियां तसेरी ना हुणनी।”