Read Gaddi लूका 19 Bible Online

लूका 19 - Gaddi bible

लूका 19

¹जैहणै यीशु यरीहो नगर मन्ज पुजणै बाळा ही थू,

²ता तैड़ी अक्क जक्कई नां रा मणु थू जैडा चुंगी लैणै बाळा रा अफसर थू अतै सो बड़ा अमीर थू।

³सो यीशु जो हेरना चाहन्दा थू कि सो कुण जिन्‍ना हा। पर सो मणु री भिड़ा री वजह थऊँ हेरी ना सकदा थू, क्ओकि सो बड़ा ही नाटा मणु थू।

⁴ता सो तैसिओ हेरन तांयें खिट लाई के अगो नकैई गो अतै अक्की त्रैमळू रै रूखा पुर चड़ी गो जैडा तैहा बत्ता मन्ज लगुरा थू जिन्ची यीशु गाणा थू।

⁵जैहणै यीशु तिन्ची नकैऊ ता तैस रूखा पुर बैहुरै जक्कई री कनारी हेरी करी वलु, “हे जक्कई, झट ओसी अई; क्ओकि अज मुँ तेरै घरा जो जरूर गाणा।”

⁶सो झट ओसी करी खुशी सितै तैसिओ अपणै घरा जो लेई गो।

⁷ऐह हेरी करी सब मणु अप्पू मन्ज बुड़बुड करना लगै कि, “ऐह ता अक्क पापी मणु रै घरै परोणा बणी करी गो हा।”

⁸अपणै घरै जक्कई खड़ी करी प्रभु सितै बलणा लगा, “हे प्रभु यीशु, हेरा, अऊँ अपणी कमाई गरीबा जो दिन्दा हा, अतै कसकि रा अगर कुछ धोखै सितै लेई लैन्दा ता तैसिओ चंऊर गुणा फेरी दिन्दा।”

⁹ता यीशुऐ तैस थऊँ बल्लू, “अज ऐस घरा मन्ज रैहणै बाळै मणु पुर उद्धार आ हा, ठेरैतांये कि ऐह मणु भी पूर्वज अब्राहम रै ही वंशा थऊँ हा।

¹⁰क्ओकि मणु रा पुत्र गवाचुरै मणु जो तोपणा अतै तियां जो बचाणै तांयें छूरा हा।”

¹¹जैहणै सो ऐह गला हुणु करदै थियै तैहणै सो यरूशलेम रै नेड़ै थियै, अतै सोचु करदै थियै कि प्रमात्मैं रा राज्य हबजु ही प्रकट भूणै बाळा हा। ता यीशुऐ तियां जो अक्क उदाहरण हुणाऊ।

¹²तिनी वलु, “अक्क अमीर मणु दूये देशा जो चलु कि राजै सांईयै अधिकार पाई करीके फिरा।

¹³तिनी अपणै नौकरा थऊँ दस नौकरा जो हैदी करी तियां सबी जो दस मोहरा[11] दिकरी बल्लू, ‘मेरै फिरी करी इन्दै तक व्यपार करदै रेय्आ।’”

¹⁴पर जनता तैस सोगी बैर रखदी थी, तियैं तसेरै पिचो ऐह संदेसा भैजु कि अहै ना चाहन्दै कि ऐह मणु असु पुर राज्य करा।

¹⁵जैहणै सो तरक्की करीके फिरू ता तिनी अपणै नौकर अप्पू बलै हैदै ताकि तैसिओ पता लगा कि कै-कै कमाऊ।

¹⁶ता पैहलै नौकरै ईच्ची करी बल्लू, “हे स्वामी, तेरी दितुरी मोहरा थऊँ मैंई दस होर मोहरा कमाई हिन।”

¹⁷ता तिनी वलु, “धन्य हा खरै जिन्‍नै नौकरा! तू थोड़ै जिन्‍नै कम्मा मन्ज ही बड़ा विस्वासी रैऊ हा अबै दस नगरा पुर हक्क रख।”

¹⁸दूये ईच्ची करी बल्लू, “हे स्वामी, तेरी दितुरी मोहरा सितै पँज होर मोहरा मैंई कमाँऊरी।”

¹⁹तिनी फिरी तैस सोगी बल्लू, “तू भी पँजा नगरा पुर राज्य कर।”

²⁰त्रिऐ ईच्ची करी वलु, “हे मालका, तेरी मोहर ऐह हा, हेर, जैतियो मैंई अपणै पल्लै सितै वनी के रखूरा थू।

²¹तू बड़ा ही सख्त मणु हा, ठेरैतांये अऊँ तिजो थऊँ ड़रदा थू कि; जैडा तैंई ना रखूरा तैतिओ चुक्की लैन्दा, अतै जैड़ी ना बान्दा तैड़ी थऊँ कटदा हा।”

²²तिनी मालकै वलु, “हे दुष्‍ट अतै कामचोर नौकरा, अऊँ तेरी ही गल्ला सोगी तेरा न्याय करदा, हे दुष्‍ट अतै कामचोर नौकरा, जैहणै तू ऐह जाणदा थू कि जैड़ी अऊँ ना बान्दा तैड़ी थऊँ कटदा, अतै जैड़ी अऊँ ना खलारदा तैड़ी थऊँ बिणदा।

²³ता तैंई मेरी मोहरा बैंका मन्ज कजो ना रखी दिती कि जैहणै अऊँ इन्दा ता इआं मोहरा रा ब्याज भी लेई लैंदा।”

²⁴जैड़ै मणु तैठी खडुरै थियै तिनी तियां सोगी वलु कि, “ऐस मणु थऊँ मोहरा लेई लेय्आ अतै जैस वलै दस मोहरा हिन तैस जो दी देय्आ।”

²⁵तिनी नौकरै वलु “हे स्वामी तैस वलै ता दस मोहरा पैहलै ही हिन।”

²⁶“क्ओकि जैड़ा मेरी शिक्षा जो हुणदै अतै समझदै हिन तियां जो होर समझ दिणिआ, पर जैड़ी ना हुणदै ता तियां बलै जैड़ी समझ हा सो भी तियां थऊँ लेई लैणीआ।

²⁷अबै तियां बैरी जो मेरै सामणै लैईआ अतै तियां जो जानी थऊँ मारी देय्आ जैडा ना चाहन्दै थियै कि अऊँ तियां पुर राज्य करूं।”

²⁸ऐह सब कणैई करी यीशु चेलै सोगी तंयारी अगै-अगै यरूशलेम जो चलु।

²⁹जैहणै सो जैतून नां रै अक्की पहाड़ पुर बसुरै बैतफगे अतै बैतनिय्याह नगर मन्ज पुजै ता तिनी अपणै दूँ चेलै जो अगो भैजू।

³⁰अतै वलु, “सामणै ग्राँ मन्ज गच्छा; अतै अक्क गदही रा बच्चा जैस पुर कुणिए भी सवारी न करूरी भोली, जेठी भी वजूरा हूजला ता तैसिओ खोली लैईयेंं।

³¹अगर तूसु थऊँ कोई पुछला कि कजो खोलू करदै, ता ऐह वलै कि प्रभु जो सेरी जरूरत हा।”

³²जैड़ै भैजै थियै तियैं तियां ही करू जिंआं दसुरा थू।

³³जैहणै सो गदहै रै बच्चै जो खोलू करदै थियै ता मालक पुछणा लगै, “ऐस बच्चै जो कओ खोलू करदै हिन?”

³⁴ता तियैं चेलै वलु, “प्रभु जो सेरी जरूरत हा।”

³⁵सो तैस गदहै जो यीशु वलै लेई आये अतै तैस पुर अपणै ओड़णा री काठी बणाई करी यीशु जो तैस पुर बहाली दिता।

³⁶जैहणै सो गदहै पुर बैही करी यरूशलेम जो चलु ता मणु री भीड़ अपणै ओड़णा बत्ता मन्ज वछान्दी गैई।

³⁷यरूशलेम रै नेड़ै जैहणै सो जैतून पहाड़ री सोआली ओसणा लगै ता तसेरै चेलै अतै सब मणु तसेरै सब चमत्कार जो जैड़ै तियैं अपणी हाख्री हेरूरै थियै याद करीके जोरा जोरा सितै गान्दै-बजान्दै अतै प्रमात्मैं री जय-जयकार करना लगै

³⁸“धन्य हा सो राजा, जैडा प्रभु रै नां सितै इन्दा हा! स्वर्गा मन्ज शान्ती अतै अम्बरा मन्ज जय-जयकार भोआ!”

³⁹ता भिड़ा थऊँ कुछ फरीसी तैस सोगी बलणा लगै, “हे गुरू, अपणै चेलै जो झिड़क।”

⁴⁰ता यीशुऐ वलु, “अऊँ तूसु सोगी बलदा अगर ऐह मणु चुप भूच्ची गै ता इन्या पत्थरा बक्की नकैणा।”

⁴¹जैहणै सो यरूशलेम रै नेड़ै पुजु ता तैस नगरा जो हेरी करी सो रूणा लगु

⁴²अतै बलणा लगु, “कै ही भला भुन्दा कि तू, हाँ हाँ, तू ही अगर कुशलता री गल्ला जो जाणदा, पर अबै तेरी हाख्री मन्ज पर्दा पेऊरा।

⁴³क्ओकि ऐसै दिन ईणै बाळै हिन जधैड़ी तेरै विरोधी मोर्चा वनी करी तिजो घेरी लैणा, अतै चौं तरफा थऊँ तिजो दबाणा,

⁴⁴अतै तेरै बच्चै अतै तिजो मिट्टी मन्ज मिलाई दिणा, अतै तेरै बैरी तिजो पूरै तरीकै बरबाद करी दिणा, क्ओकि तैंई तैस टैमां री किमत ना जाणी जैहणै तिजो पुर कृपा भूई थी।”

⁴⁵सो मन्दरा मन्ज गिच्ची करीके तैड़ी बैहुरै व्यपारी जो कड़णा लगा,

⁴⁶ता यीशुऐ वलु, “पवित्रग्रन्थ मन्ज लिखुरा कि, ‘मेरा घर प्रार्थना रा घर हा,’ पर तुहै ऐतिओ डाकू रा खोह बणाई दितुरा।”

⁴⁷सो रोज मन्दरा मन्ज उपदेश करना लगा; अतै प्रधान याजक, शास्त्री अतै मणु रै नेता तैसिओ मारनै री योजना बणाणा लगै।

⁴⁸पर कोई पा ना नकैऊ की कै करन, क्ओकि मणु बड़ै चा सितै तैसिओ हुणदै थियै।