Read Gaddi लूका 22 Bible Online

लूका 22 - Gaddi bible

लूका 22

¹बिना अखमीरी रोटी रा त्यौहार भूणैवाळा थू, जैतियो फसह रा त्यौहार भी बलदै थियै;

²प्रधान याजक अतै शास्त्री ऐस सोच-विचार मन्ज रैहन्दै थियै कि यीशु जो कियां जानी थऊँ मारन, पर सो मणु थऊँ डरदै थियै।

³फिरी शैतानै यीशु रा यहूदा इस्करियोती नां रा अक्क चेला भटकाऊँ।

⁴यहूदै प्रधान याजक अतै तंयारै नेता सोगी सोच-विचार करू कि सो यीशु जो कियां पकड़ाई सकदा।

⁵तियैं बड़ै खुश भूच्ची करी यहूदा जो बचन दिता कि जे तू यीशु जो पकड़ाई दिला ता अहै तिजो पैसै दिल्लै।

⁶यहूदा मन्‍नी गो अतै यीशुओ पकड़ाणै रा मौका तोपणा लगा कि जैहणै भीड़ ना भोली तैहणै यीशु तंयारै हत्थै पकड़ाई दिणा।

⁷फिरी फसह रा त्यौहार चली आ, ऐस त्यौहारा बाळै दिन मणु भेडू रा बलिदान करदै थियै।

⁸यीशुऐ पतरस अतै यूहन्‍ना जो ऐह बल्लू; “गच्छा सबी तांयें फसह री तैयारी करा।”

⁹तियैं यीशु थऊँ पूछु, “तू कड़ी चाहन्दा कि अहै तिजो तांयें फसह तैयार करन?”

¹⁰यीशुऐ जवाव दिता, “यरूशलेम मन्ज तून्दै पैर पान्दै हि अक्क मणु पाणी रा घडा चुकुरा तुसिओ मुळना। जैस घरा मन्ज सो गच्छा; तुहै तसेरै पिचै चली गच्छैं।

¹¹ता तैस घरा रै मालका सितै बल्लैं कि ‘अहै यीशुऐ तिजो थऊँ पुछणै जो भैजै हिन कि तिजो बलै परौणै जो रैहणै रा कमरा कुण जिन्‍ना हा, जैड़ी यीशु अपणै चेलै सोगी फसह खाई सका?’

¹²तैस तुसिओ बोढ़ीओ लेई गाणा जैड़ी अक्क कमरा पैहला थऊँ ही सजाई करी थैऊँरा भूणा; तूसु तांयें सो ही जगह भूणी हा अतै तैड़ी ही तुहै फसह तैयार करै।”

¹³ता चेलै तैस नगरा जो गै, अतै तियैं सब कुछ यीशु रै कणैणै रै मुताबक हेरू अतै फसह तैयार करू।

¹⁴जैहणै त्यौहारा रा टैमं चली आ ता, यीशु अपणै बारह प्रेरिता सोगी खाणा बैईठा।

¹⁵ता यीशुऐ अपणै चेलै सोगी बल्लू, “मेरी बड़ी तमन्ना थी कि अऊँ दुख भोगणै अतै मरनै थऊँ पैहलै ऐह फसह रा खाण तूसु सोगी खाऊँ।

¹⁶क्ओकि अऊँ तूसु सोगी बलदा जैहणै तक प्रमात्मैं रै राज्य मन्ज ऐस त्यौहारा रा मकसद पुरा ना भूच्ची गाला तैहणै तक ऐह फिरी कदी ना खाणा।”

¹⁷ता यीशु दाखरस सितै भरूरा कटोरा लैऊ अतै प्रमात्मैं रा धन्यवाद करू अतै बल्लू, “ऐतिओ लेय्आ अतै अप्पू मन्ज बण्ड़ी करी पी लेआ।

¹⁸क्ओकि अऊँ तूसु सोगी बल्‍दा कि जैहणै तिकर प्रमात्मैं रा राज्य ना चली अईआ, तैहणै तक मुँ दाखरस कदी ना पीणा।”

¹⁹फिरी तिनी रोटी लेई, अतै प्रमात्मैं रा धन्यवाद करीके त्रोड़ी अतै चेलै जो ऐह बल्ली करी दिती कि, “ऐह मेरा शरीर हा जैडा कि तूसु तांयें दितुरा मिन्जो याद रखणै तांयें ऐस कमां करू करै।”

²⁰इन्‍नी साहबै यीशुऐ खाणै थऊँ बाद कटोरै जो भी ऐह बल्ली करी चेलै जो दिता कि, “ऐह दाखरस रा कटोरा मेरै तैस खूना मन्ज जैडा कि तूसु तांयें बहाऊरा, अक्क नौआ वायदा हा।

²¹पर हेरा, मिन्जो पकड़ाणै बाळा ता मिन्जो सोगी रोटी खाऊ करदा।

²²क्ओकि मणु रै पुत्रा सोगी ता प्रमात्मैं री इच्छा रै मुताबक ईयां ही भूणा, पर मिन्जो पकड़ाणै बाळै पुर बड़ा बुरा टैमं ईणै बाळा हा!”

²³ता चेलै अप्पू मन्ज अक्की दुयेओ पुछणा लगै कि असु मन्ज ऐसा कुण हा जैस ऐह कम कमाणा?

²⁴ता फिरी तैड़ी चेलै मन्ज बैहंस-बाजी शुरू भूच्ची गई, कि असु मन्ज मोट्आ कुण हा।

²⁵ता यीशुऐ चेलै सितै बल्लू, “ऐस दुनिया रै राजा अतै बड़ै-बड़ै नेता लोग अपणै मणु पुर हक्क जमांदै हिन, अतै तियां जो मणु उपकार करनै बाळै बलदै हिन।

²⁶पर तुहै इन्या मत बणदै; अतै तूसु मन्ज जैडा मोट्आ भुला सो हल्कै साईयें अतै जैडा प्रधान भुला सो सेवक बणा।

²⁷क्ओकि मोट्आ कुणआ, जैडा खाणा बैहुरा सो या जैडा सेवा करू करदा सो? कै मोट्आ सो निआ जैडा खाणा बैहुरा? पर अऊँ ता तूसु मन्ज सेवक बणा।

²⁸तुसै सो हिन, जैड़ै मेरी परीक्षा रै टैमैं मेरी सोगी-सोगी रैह;

²⁹अतै जियां मेरै पितै मिन्जो तांयें अक्क राज्य दितुरा, तिआंई अऊँ भी तूसु तांयें अक्क राज्य दिन्दा,

³⁰ताकि तुहै मेरै राज्य मन्ज मिंजो सोगी बैही करी खान-पीण ही ना, बल्कि सिंहासना पुर बैही करी इस्त्राएल रै बारह गोत्रा रा न्याय भी करन।”

³¹“शमौन, हे शमौन! हेर, शैतानै तूसु मणु जो प्रमात्मैं थऊँ मँगी लैऊरा हा कि सो तूसु जो कणका सैईये फटका

³²पर मैंई तेरै तांयें प्रमात्मैं सितै प्रार्थना करीआ कि तेरा विस्वास कमजोर ना भोआ; अतै जैहणै तू पच्छतावा करा ता तू अपणै विस्वासी भाई जो भी विस्वास मन्ज पक्का बणाई सका।”

³³पर पतरस बलणा लगा, “हे प्रभु, अऊँ तिजो सोगी जेला मन्ज गाणा ता छड़ पर मरनै जो भी तैयार हा।”

³⁴यीशुऐ बल्लू, “ओ पतरसा, अऊँ तिजो सोगी बल्‍दा कि अज कुक्कड़ा री बाँग दिणै थऊँ पैहलै तुद त्राई बरी मिन्जो ना पछैन्णा, तुद बलणा कि अऊँ तिजो ना जाणदा।”

³⁵फिरी यीशुऐ चेलै सितै बल्लू, “जैहणै मैंई तुसिओ बटुए, झोल्ळी, अतै बिना जुटै रा सुसमाचार करनै तांयें भैजु थू। ता कै तुसिओ कसकि चिजा री कमी भूई थी?” तियैं बल्लू, “कसी भी चिजा री कोई कमी ना भूई।”

³⁶ता यीशुऐ फिरी चेलै सितै बल्लू, “पर अबै जैस बलै बटुए भून सो बटुए लेआ अतै जैस वलै झोल्ळी ना भोआ सो झोल्ळी लेआ, अतै जैस वलै तलवार ना भोआ सो अपणै चोळा बेचीकरी तलवार खरीदी लेआ।

³⁷क्ओकि अऊँ तूसु सोगी सच बलदा, कि पवित्रग्रन्था मन्ज मिन्जो तांयें लिखुरा सो पुरा भूणा चहिन्दा।” “पवित्रग्रन्था मन्ज लिखुरा कि ‘तसेरी गिणती अपराधी सोगी भुणीआ’ ऐसी गल्ला सच मन्ज पूरी भूच्छु करदी हिन।”

³⁸तियैं बल्लू, “हेर प्रभु, ऐठी दोई तलवारा हिन यीशुऐ बल्लू बड़ी हिन।”

³⁹ता फिरी यीशु तैस कमरै थऊँ नकैई करी रोजा सैईये जैतून नां रै पहाड़ा जो गो। तसेरै चेलै भी तैस सोगी चली पै।

⁴⁰तैहा जगह पुजीकरी यीशुऐ चेलै जो बल्लू, “प्रार्थना करा की तुन्दी कोई परीक्षा ना भोआ।”

⁴¹यीशु अप्पू तियां थऊँ थोड़ी दूर गिच्ची करी पैरा रै भारै बैही करी प्रार्थना करना लगु,

⁴²“हे पिता, अगर तू चाह ता ऐस दुखा रै कटोरै जो मिन्जो थऊँ दूर करी लेआ, तांभी मेरी ना पर तेरी ही इच्छा पूरी भोआ।”

⁴³ता तैहणै स्वर्गा थऊँ अक्क स्वर्गदूत सामणै आ अतै तिनी यीशु जो ताकत दिती।

⁴⁴यीशु बड़ा ही परेशान भूच्ची करी प्रार्थना करना लगा, सो ऐतना आत्मा मन्ज दुखा सितै भरी करी प्रार्थना करना लगु, अतै यीशु रा पसीना ईयां निकलणा लगा जिंआ कि खून टपकणा लगुरा भोआ।

⁴⁵फिरी सो प्रार्थना थऊँ ऊठु अतै अपणै चेलै बलै ईच्ची करी तियां जो सुसति मन्ज सून्‍दा हेरू।

⁴⁶ता यीशुऐ चेलै जो बल्लू, “तुसै सुतुरै कजो हिन? उठा, प्रार्थना करा कि तुन्दी कोई परीक्षा ना भोआ।”

⁴⁷यीशु तूणा बल्लू ही करदा थू कि, तैठी अक्क बड़ी भारी भीड़ आई अतै यीशु रै बाहरा चेलै थऊँ, जैसेरा नां यहूदा थू, तंयारी अगो-अगो चलूरा थू। सो यीशु बल्लै आ ताकि सो यीशु रा पोक्कु लेई सका।

⁴⁸पर यीशुऐ तैस सोगी बल्लू, “ओ यहूदा, कै तू पोक्कु लेई करी मणु रै पुत्रा जो पकड़ाऊ करदा?”

⁴⁹जैड़ै यीशु रै सोगी थियै तियां हेरू कि ऐठी ता कुछ होर ही भूणै बाळा, ता सो बलणा लगै, “हे प्रभु कै अहै तलवार चलान?”

⁵⁰पर तियां थऊँ अक्की चेलै तलवार चलाई करी महायाजक रै अक्की दासा रा कन ही कटी दिता।

⁵¹ऐह हेरी करी यीशुऐ बल्लू, “अबै बस करा! अतै यीशुऐ तसेरा कन छुई करी ठीक करी दिता।”

⁵²ता यीशुऐ प्रधान याजका, मन्दरा रै पैहरैदारा रै नेता अतै स्याणै धर्मी मणु सितै, जैड़ै कि यीशु जो पकड़ना छूरै थियै, बल्लू, “कै तुसै मिन्जो डाकू समझी करी तलवारा अतै होठे लेई करी पकड़ना आये हिन?

⁵³जैहणै जे अऊँ मन्दरा मन्ज तूसु सोगी हर बेलै थू, तैहणै ता तुसै मिन्जो सोगी हत्थ ना लऊ। पर ऐह तून्दा टैमं हा कि जैहणै शैतान राज्य करदा।”

⁵⁴जैड़ै यीशु जो पकड़ना छूरै थियै तियैं यीशु पकडु अतै लेई गै। अतै महायाजक रै घरा मन्ज आये। पतरस दूर-दूर रैई करी यीशु रै पिछै-पिछै आ।

⁵⁵पर मणु जैहणै अँगणा मन्ज अगी जळाई करी तठेरी चौं कनारी बैहै ता पतरस भी तियां सोगी बैही गो।

⁵⁶अगी री लौई मन्ज अक्की नौकरैणी पतरस तैठी बैहुरा हेरू। तैसै तसेरी कनारी हेरी करी बल्लू, “ऐह मणु भी यीशु सोगी थू।”

⁵⁷पर पतरस ना करीके बलणा लगा, “ओ जनानी, अऊँ ऐस मणु जो ना जाणदा।”

⁵⁸थोड़ी देरी बाद अक्क होर मणु पतरस जो हेरी करी बलणा लगा, “तू भी ता यीशु री टोली थऊँ अक्क हा।” पर पतरसै बल्लू, “ओ भलया माणसा अऊँ सो नियां जैडा तू मिन्जो समझू करदा।”

⁵⁹कोई ज्यादा देर ना भूई थी कि अक्क होर मणु बड़ा जोर दी करी बलणा लगा, “जरूर ऐह मणु यीशु सोगी थू। क्ओकि हेरा ऐह ता गलीलवासी हा।”

⁶⁰पर पतरसै बल्लू, “ओ भलया मणुआ, अऊँ ना जाणदा तू कसेरै बारै मन्ज गप्‍प करू करदा।” सो हल्ली गप्‍प करू ही करदा थू कि तैस टैमैं कुक्कड़ै बाँग दी दिती।

⁶¹अतै यीशुऐ पतरसा री कनारी नजर लाई करी हेरू। ता पतरसा जो यीशु रा बलुरा बचन याद आ कि, “अज कुक्कड़ा रै बाँग दिणै थऊँ पैहलै तुद मेरा त्राई बरी इन्कार करना।”

⁶²तूणा याद ईन्दै सितै ही सो बाहरा जो चली गो अतै फुटी-फुटी करी रूणा लगू।

⁶³जियां मणुऐ यीशु जो पकडुरा थू सो तसेरी बेईज्ती करीके तैसिओ मारना लगै।

⁶⁴यीशु री हाख्री पुर पट्टी बन्‍नी करी पुछणा लगै, “भविष्‍यवाणी कर कि तिजो कुणी मारूआ?”

⁶⁵अतै तियैं मणुऐ यीशु री निन्दा करनै तांई कई बुरी-बुरी गल्ला बल्ली।

⁶⁶जैहणैं दिन भुआ ता प्रधान याजक, धर्मशास्त्री अतै मणु रै स्याणै नेता री सभा भूई अतै सो यीशु जो अपणी यहूदी सभा मन्ज लेई गै।

⁶⁷तियैं पूछु, “असु जो दस कि तू मसीह हा कि कुण हा?” यीशुऐ बल्लू, “जे अऊँ तूसु जो बल्लू ता तूसु मेरा विस्वास ना करना।

⁶⁸अतै जे अऊँ पूछु ता तूसु जवाव ना दिणा।

⁶⁹पर अजा थऊँ बाद सर्वशक्तिमान प्रमात्मैं मणु रै पुत्र जो अपणी सज्जी कनारी बहालना।”

⁷⁰सो सब बलणा लगै, “ता कै तू प्रमात्मैं रा पुत्र हा?” यीशुऐ बल्लू, हाँ अऊँ हा।

⁷¹ता तियैं बल्लू, “अबै असु जो कसी भी किस्‍मां रै सबूता री जरूरत नियां। अहै खुद सेरै मुऐ ऐह सब गल्ला हुणी हिन।”