Read Gaddi लूका 23 Bible Online

लूका 23 - Gaddi bible

लूका 23

¹ता धर्म सभा रै सब सदस्य उठै अतै यीशु जो पिलातुस बल्लै लेई आये

²तैठी ईच्ची करी सो यीशु पुर ऐह दोष लाणा लगै कि, “ऐह यीशु मणु जो भकान्‍दा अतै ऐह महाराजा जो चुंगी दिणै जो ना करदा अतै अपणै आपा जो मसीहा बल्‍दा।”

³पिलातुस राजै यीशु थऊँ पूछु, “कै तू यहूदी रा राजा हा?” यीशुऐ जवाव दिता, “हाँ जियां कि तू अप्पू ही बल्लू करदा।”

⁴ता पिलातुसै प्रधान याजका अतै मणु जो बल्लू, “मिन्जो ता ऐस मणु मन्ज कोई दोष नजर ना ईन्दा।”

⁵पर सो होर भी जोरा सितै बलणा लगै, “ईनी सारै यहूदी इलाकै मन्ज मणु जो अपणै बचना सितै भड़काई दितुरा। ईनी गलील परदेसा थऊँ शुरू करूरा थू अतै हेरा अबै ऐह ऐठी भी ईच्ची पुज्‍जु हा।”

⁶ऐह हुणी करी पिलातुसै पूछु, “कै ऐह मणु गलीली हा?”

⁷पर जैहणै तैस जो पता लगु कि ऐह ता हेरोदेस रै परदेस रा हा ता तिनी यीशु जो यरूशलेम जो भैजी दिता क्ओकि हेरोदेस तैस टैमैं यरुशलेम मन्ज थू।

⁸राजा हेरोदेस यीशु जो हेरी करी बड़ा खुश भुआ, कओकि सो कईआ दिन थऊँ चाऊ करदा थू कि सो यीशु जो हेरा, तिनी यीशु रै बारै मन्ज हुणुरा थू अतै सो यीशु थऊँ कुछ हैरान करनै बाळै चमत्कार हेरनै री उम्मीद रखदा थू।

⁹तिनी यीशु थऊँ कैई गल्ला पुछी, पर यीशुऐ कोई उतर ना दिता।

¹⁰प्रधान याजक अतै शास्त्री तैठी खड़िऊरै थियै अतै सो यीशु पुर जैतूणै करी दोष लगाई सकदै थियै, लगाऊ करदै थियै।

¹¹फिरी हेरोदेसै अतै तसेरै सपाई यीशु री बेईज्ती करी अतै मजाक उड़ाऊ। हेरोदेसै यीशु जो राजै बाळै कपड़ै लोआई करी बेईज्जती करी अतै फिरी पिलातुस बलै फेरी भैजू।

¹²ऐस ही दिन पिलातुस अतै हेरोदेस अपणी दुश्‍मणी जो छड़ी करी अक्की दुऐ रै सजण बणी गै।

¹³पिलातुसै प्रधान याजका, अफसरा अतै मणु जो हैदी करी तियां सितै बल्लू

¹⁴“तुसै ऐस मणु पुर मुकदमैं तांई दोष लगाई करी मिन्जो बलै लेई आये हिन कि ऐह मणु जनता जो लड़ाई झगड़ै तांऐ भकान्‍दा। हेरा मैंई तून्दै सामणै सेरी जाँच पड़ताल करी हा, पर जैड़ै मुकदमैं तांई दोष तुसै ऐस पुर लऊ करदै हिन, सो दोष ता मिन्जो ऐस मन्ज कुछ ना हुज्‍जु हा।

¹⁵हेरोदेस जो भी कोई गुनाह ना हुज्‍जु हा कजो कि तिनी भी सेरी हुणी करी ऐस जो मिन्जो बल्लै वापस भैजी दिता। हेरा ईनी कुछ भी ईना कम निआं करूरा जैस व्जहा थऊँ ऐस जो मौती री सजा दितिआ गच्छा।

¹⁶ऐत तांई मुँ ऐस जो कोड़ै मरवाणै अतै छड़ी दिणा।”

¹⁷[रीति रै मुताबक सो फसह रै त्यौहारा रै टैमैं तियां तांई अक्क कैदी कैदा थऊँ छड़ी दिन्दा थू।][12]

¹⁸ता सब बक्की उठै, “ऐस जो मारी देआ अतै असु तांई बरअब्बा जो छड़ी देआ।”

¹⁹बरअब्बा कसी लड़ाई-झगड़ै री व्जहा थऊँ जैडा कि शहरा मन्ज भच्छुरा थू अतै कसी कत्ला रै केस मन्ज कैद कट्‍टू करदा थू।

²⁰पिलातुसै यीशु जो छड़णै री मनसा सितै मणु जो फिरी समझऊ।

²¹पर तियैं जोरा-जोरा सितै डडी करी बल्लू, “ऐस जो क्रूसा पुर टुन्गी देआ, ऐस जो क्रूसा पुर टुन्गी देआ।”

²²तिनी तियां थऊँ त्रीं बारी पूछु, “कजो, ईनी कुण जिन्‍ना गुनाह करूरा? मैंई ऐस मन्ज मौती री सजा बाळा कोई भी गुनाह ना हेरूआ ऐत तांई मुँ ऐस जो कोड़ै मरवाई करी छड़ी दिणा।”

²³पर मणुऐ बड़ी हलो-हलि पाई अतै सो तसेरी पिचो पैई गै कि “ऐस जो क्रूसा पुर टुन्गी देआ” इन्‍नी साभै तंयारा हल्ला पाणा होर बधी गो।

²⁴पिलातुसै सपाई जो हूक्म दिता कि जियां मणु चाहन्दै हिन तियां ही कम्मा।

²⁵ता तिनी तैस मणु जो तियां मणु री इच्छा रै मुताबक जैडा कि लड़ाई-झगड़ै अतै कत्ला रै केस मन्ज सजा कट्‍टू करदा थू, छड़ी दिता अतै यीशु जो तिआंरी इच्छा री मुताबक क्रूसा पुर टुंगणै तांई सपाई जो दी दिता।

²⁶जैहणै सपाई यीशु जो लेई चलुरै थियै ता चलदै चलदै तियां जो रस्तै मन्ज कुरैनी नगर रा अक्क मणु मुळु जैसेरा नां शिमौन थू, तियैं तैसिओ पकड़ी करी क्रूस तैस पुर लदी दिता अतै सो यीशु पिचो चली पैऊ।

²⁷मणु री बड़ी भारी भीड़ यीशु रै पिचो चलुरी थी। ऐसा भिड़ा मन्ज मती भारी जनानी रून्‍दी पिटिन्‍दी चलुरी थी

²⁸यीशु तंयारी कनारी फिरी करी बलणा लगा, “ओ यरुशलेम री कुळियों मिन्जो तांई मत रोआ, पर अप्पू तांई अतै अपणै बच्चै तांई रोआ।

²⁹हेरा, सो दिन ईच्छु करदै हिन, जैहणै मणु बलणा, धन्य हिन सो बे औलादी जनानी! धन हा सो पेट जिन्‍नी बच्चै पैदा ना करै! धन्य हा सो छाती जठेरा दुध बच्चै ना पियू।”

³⁰तैस टैमैं मणु पहाड़ा सितै बलणा, “असु पुर ढैई पेआ, अतै हपड़ा सितै बलणा कि असु जो ढक्की लेआ।”

³¹“कजो कि जैहणै मणु सैलै रूखा सितै तूणा बुरा करी सकदै हिन ता हुक्‍कै रूखा सितै कतूणा बुरा करलै।”

³²सपाई दूँ होरी अपराधी जो यीशु सोगी क्रूसा पुर मारनै तांई लेई गै।

³³जैहणै सो खोपड़ी नां री जगहा पुजै ता तियैं यीशु अतै तियां दूँ अपराधी जो क्रूसा पुर टुन्गी दिता। अक्क अपराधी सज्जै कनारी टुन्‍गू अतै दुआ खब्बै कनारी टुन्‍गू।

³⁴ता यीशुऐ बल्लू, “हे पिता, ईयां जो माफ करै, कजो कि ऐह ना जाणदै कि ऐह कै करू करदै हिन?” तियैं कपड़ै तांयें चिट्ठी पाई की कसिओ कै कै मुळदा, अतै अप्पू मन्ज बन्डी लै।

³⁵मणु अक्क नजर करीके ऐह सब हेरू करदै थियै। यहूदी रै सभागार रै अफसर यीशु रा मजाक ऊड़ारी करी बल्लू करदै थियै, “ऐह ता दुऐ जो बचान्‍दा थू अबै जे ऐह प्रमात्मां रा मसीहा हा अतै तसेरा चुणुरा हा ता अपणै आपा जो बचाई करी दसा।”

³⁶सपाई भी यीशु रै नेड़ै आये अतै तसेरा मजाक उड़ाणा लगै। तियैं यीशु जो सिरका पिआऊ, अतै बलणा लगै,

³⁷“जे तू यहूदी रा राजा हा ता अपणै आपा जो बचा।”

³⁸यीशु रै क्रूसा पुर अक्की तख्ती पुर लिखीकरी लगाई दिता कि, “ऐह यहूदी रा राजा हा।”

³⁹जैड़ै दुई अपराधी सोगी क्रूसा पुर लटकऊरै थियै, तैत मन्ज अक्क यीशु री निन्दा करीके बलणा लगा, “कै तू मसीहा निआं? जे तू हा ता अप्पू जो अतै असु जो भी बचा।”

⁴⁰पर दुआ तैस जो फटकारी करी बलणा लगा, “कै तू प्रमात्मैं थऊँ भी ना डरदा? तू भी मरनै बाळा।

⁴¹असु जो ता कानून रै मुताबक सजा मुळु करदी हा। कजो कि अहै ता कम ही इन्‍ना करूरा, पर इन्‍नी ता कोई ऐसी सजा बाळा कम नियां करूरा।”

⁴²ता फिरी सो यीशु सितै बलणा लगा, “यीशु जी जैहणै तुसै अपणै राज्य मन्ज इल्लै ता मेरी सुध जरूर लैं।”

⁴³यीशुऐ तैस जो बल्लू, “अऊँ तिजो सितै सच बलदा कि, अज ही तुद मिन्जो सोगी स्वर्गलोक मन्ज भूणा।”

⁴⁴कोई दिन रै त्रियै पैहरा तिकर सारै देशा मन्ज घोर नैहरा भूच्ची गो।

⁴⁵अतै सूरज नैहरा भूच्ची गो। यहूदी मन्दरा मन्ज पवित्र जगह रा पर्दा मन्जा थऊँ फटी करी दुई हिस्‍सै भुच्‍ची गो।

⁴⁶यीशुऐ जोरा सितै हक्क पाई करी बल्लू, “हे पिता प्रमात्मां, अऊँ अपणी आत्मा तेरै हत्था मन्ज दिन्दा।” अतै तूणा बलदै ही प्राण निकळी गै।

⁴⁷ऐह हेरी करी फौजा रा अफसर प्रमात्मां री जय-जयकार करीके बलणा लगा, “जरूर ऐह मणु धर्मी थू।”

⁴⁸अतै जैड़ी भीड़ तैड़ी ऐह हेरनै जो किठूरै थी, सो ऐसा घटना जो हेरी करी हिक्का जकदै अतै रून्दै तैठी थऊँ अपणै-अपणै घरा जो फिरी गै।

⁴⁹पर यीशु रै सब जान-पहचान बाळै मणु, अतै जनानी जो कि गलील थऊँ यीशु सोगी छुरी थी, दूर खड़ी करी ऐह सब कुछ हेरदै रैह।

⁵⁰तैस टैमैं यहूदी धर्म मण्ड़ळी रा अक्क मणु जैसेरा नां यूसुफ थू बड़ा ही धर्मी अतै सज्‍जन मणु थू।

⁵¹सो यहूदी मणु रै ऐस कम्मा अतै तंयारै विचारा थऊँ खुश ना थू। सो यहूदी मणु रै शहर अरिमतिया रा रैहणै बाळा थू। सो प्रमात्मैं रै राज्य री भाळ करू करदा थू।

⁵²सो पिलातुस बल्लै गो अतै तैस थऊँ यीशु री लाहश मन्‍गी

⁵³तिनी क्रूसा थऊँ यीशु री लाहश उतारी अतै मलमल री चादरा मन्ज लपेटी करी अक्की हपड़ा मन्ज कूड्‍डा सांईं कोरूरी कब्रा मन्ज रखी दिती। ऐसा कब्रा मन्ज अजा तिकर कोई भी लाहश ना रखुरी थी।

⁵⁴ऐह विश्रामदिन री तैयारी रा दिन थू अतै विश्राम रा दिन शुरू भूणै बाळा थू।

⁵⁵जैड़ी जनानी यीशु सोगी गलीला थऊँ छुरी थी सो भी यूसुफ रै पिचो-पिचो गैई अतै तियैं भी तैसा कब्रा जो हेरू। तियैं ऐह भी हेरू कि यीशु री लाहश कियां रखी हा।

⁵⁶जनानी अपणै घरा जो फिरी करी आई अतै ईच्ची करी तियैं यीशु रै शरीरा पुर पाणै तांयें खुश्‍बुदार चिजा अतै इत्र तैयार करू। फिरी तियैं मूसा री व्यवस्था रै मुताबक विश्रामदिन मन्ज विश्राम करू।