Read Gaddi लूका 3 Bible Online

लूका 3 - Gaddi bible

लूका 3

¹तिबिरियुस महाराजा रै पन्द्रमें साला मन्ज पुन्‍तियुस पिलातुस यहूदा परदेस रा राज्यपाल थू। तैस ही टैमैं हेरोदेस तैस रियासत रै चौं इलाकै थऊँ गलील इलाकै रा राजा थू। तसेरा अक्क भाई फिलिप्पुस इतूरैया अतै त्रखोनितिस ईयां दूनी इलाकै रा राजा थू। अतै अबिलेने जिलै पुर लिसानियास राज्य करू करदा थू।

²तैस टैमैं हन्ना अतै कैफा यरूशलेम शहरा मन्ज महायाजक थियै। यूहन्‍ना जैडा कि जकरिया रा पुत्र थू सो बियावान जगहा मन्ज रैहन्दा थू। तैस बलै प्रमात्मैं रा संदेसा पुजु।

³यूहन्‍ना यरदन नदी री कनारी अखै ब्रखै बसुरै परदेसा मन्ज ईच्ची करी, पापा री माफी तांयें पापा थऊँ मन फेरनै रै बपतिस्मा रा प्रचार करना लगा।

⁴जियां कि यशायाह नां रै भविष्‍यवक्ता रै पवित्रग्रन्था मन्ज लिखिऊरा: “उूजाड़ जगहा थऊँ कोई हक्का पान्दा हुणु करदा कि, ‘प्रभु रा रस्ता तैयार करा, अतै ऐसा बत्ता जो सिधा भी करा।

⁵सब फाटी भरी गाहणी, अतै सारै टिलै पलेन भूच्ची गाणै ऊबड़-खाबड़ रस्तै जो सिधा अतै जैड़ै ऊचै निचै हिन सो चौरस बणाऐ गाणै हिन।

⁶अतै सब मणु तैस जो हेरना जैसिओ प्रमात्मैं उद्धार करनै तांयें भैजुरा हा।’”

⁷मणु री टोली री टोली यूहन्‍नै बलै बपतिस्मा लैणा ईन्‍दी थी। सो तियां जो बलदा थू, “हे कीड़ै सांई जहरीलै मणुओ, तूसु जो कुणी दस्सी दिता कि प्रमात्मैं रै ईणैबाळै गुस्सै थऊँ नह्ही पैय्आ।

⁸ठेरै तांयें सवूत देय्आ कि तुहै अपणै मन पापा थऊँ फेरै। पर अपणै-अपणै मना मन्ज ऐह सोचणा छड़ी देय्आ कि अब्राहम तून्दा पिता हा क्ओकि अऊँ तूसु सोगी सच बलदा कि प्रमात्मां ईयां पत्थरा थऊँ भी अब्राहम तांयें औलाद पैदा करी सकदा।

⁹अतै अबै कुहाड़ी रूखा रै मोळा पुर रखी दितुरी हा, ठेरै तांयें जैडा भी रुख खरा फळ ना दिन्दा तैस बड्‍ड़ी करी अगी मन्ज फूकी दिन्दै।”

¹⁰ता मणुऐ यूहन्‍नै थऊँ पूछु, “प्रमात्मैं री सजा थऊँ बचणै तांयें अहै कै करन?”

¹¹तिनी तियां जो जवाव दिता, “जैस बलै दुई कुरतै भून सो तैस जो अक्क कुरता दी देआ जैस बलै अक्क भी नियां, अतै जैस बलै खाणै जो भोआ ता सो भी ईयां ही करा।”

¹²चुंगी लैणैं बाळै भी बपतिस्मा लैणा आये अतै पुछणा लगै, “हे गुरू अहै कै करन?”

¹³ता तिनी तियां जो बल्लू, “जैडा तूसु जो चुंगी लैणै तांई सरकारै दसुरी हा तैतनी ही लैऊ करै, पर धोखा धड़ी सितै तैत थऊँ मता मत लैन्दै।”

¹⁴फिरी सपाई भी तैस थऊँ पुछणा लगै, “अहै कै करन?” तिनी तियां जो बल्लू, “रिश्‍वत मत लैन्दै, ना ही कसी पुर झूठा मुकदमा चलान्‍दै अतै जतूणी तनखा तूसु जो मुलदीआ तैत मन्ज ही गुजारा करै।”

¹⁵जैहणै मणु मसीह री भाळा बैहुरै थियै ता यूहन्‍नै जो हेरी करी अपणै-अपणै मन मन्ज सोच विचार करना लगै कि करखी ऐह ही मसीहा ता नियां?

¹⁶ता यूहन्‍नै तियां जो बल्लू, “अऊँ ता तूसु जो पाणी सितै बपतिस्मा दिन्दा, पर जैडा ईणैबाळा सो ता मिन्जो थऊँ भी ताकतवर हा। अऊँ ता ऐस काबल भी नियां कि तसेरै जुटै रै तस्मै भी खोली सकू। तैस तूसु जो पवित्र आत्मा अतै अगी रा बपतिस्मा दिणा।

¹⁷अपणा त्रोंगळा तिनी हथै पकडुरा अतै तैस अपणी बगड़ी खरी करी सोती दिणी अतै कणक-कणक अपणै पेडू मन्ज कठेरनिआ अतै भू ऐसी अगी मन्ज फुकणा जैड़ी कि कदी भी हिहणै बाळी निआं।”

¹⁸ईनी साहबै यूहन्‍ना खरी-खरी गल्ला हुणाई करी मणु जो सुसमाचार हुणान्दा रैऊ।

¹⁹(पर जैहणै यूहन्‍नै, गलील जिलै रै राजा हेरोदेस जो अपणै ही भाई फिलिप्पुस री घरावाळी हेरोदियास जो अपणी बणाणै रै बारै मन्ज अतै तियां सबी कुर्कम रै बारै मन्ज जैड़ै तिनी करूरै थियै दसु ता,

²⁰हेरोदेसै यूहन्‍नै जो कैदी बणाई करी अक्क होर जुल्‍म करी दिता।)

²¹सबी मणु रै बपतिस्मा लैणै थऊँ बाद जैहणै यीशु भी बपतिस्मा लेई करी प्रार्थना करना लगू ता, स्वर्ग खुली गो।

²²ता पवित्र आत्मा शारीरिक रूप मन्ज कबूतरा रै रूपा मन्ज तैस पुर ऊतरू अतै अम्बरा थऊँ ऐह आकाशवाणी भूई, “तू मेरा प्यारा पुत्र हा अतै अऊँ तिजो थऊँ खुश हा।”

²³जैहणै यीशु प्रमात्मैं रै बचना री सेवा करना लगा ता सो लगभग कोई तिहा साला रा थू। जियां कि मणु यीशु जो यूसुफ रा पुत्र समझदै थियै ता तसेरी वंशावली ईयां हा कि, यीशु यूसुफ रा पुत्र थू अतै यूसुफ एली रा,

²⁴एली मत्‍तात रा, मत्‍तात लेवी रा, लेवी मलकी रा, मलकी यन्‍ना रा, यन्‍ना यूसुफ थू।

²⁵यूसुफ मत्तित्याह रा, अतै मत्तित्याह आमोस रा, आमोस नहूम रा, नहूम असल्‍याह रा, असल्‍याह नोगह रा,

²⁶नोगह मात रा, मात मत्तित्याह रा, मत्तित्याह शिमी रा, शिमी योसेख रा, योसेख योदाह रा,

²⁷योदाह यूहन्‍ना रा, यूहन्‍ना रेसा रा, रेसा जरूब्‍बाबिल रा, जरूब्‍बाबिल शालतियेल रा, शालतियेल नेरी रा,

²⁸नेरी मलकी रा, मलकी अद्दी रा, अद्दी कोसाम रा, कोसाम इलमोदाम रा, इलमोदाम एर रा,

²⁹एर यहोशुआ रा, यहोशुआ इलाजार रा, इलाजार योरीम रा, योरीम मत्‍तात रा, मत्‍तात लेवी रा,

³⁰लेवी शमौन रा, शमौन यहूदाह रा, यहूदाह यूसुफ रा, यूसुफ योनान रा, योनान इलयाकीम रा,

³¹इलयाकीम मेलिया रा, मेलिया मिनाना रा, मिनाना मत्‍तात रा, मत्‍तात नातान रा, नातान दाऊद रा,

³²अतै दाऊद यिशै रा, यिशै ओबेद रा, ओबेद बोअज रा, बोअज सलमोन रा, सलमोन नहशौन रा,

³³नहशौन अम्मीनादाब रा, अम्मीनादाब अरनी रा, अरनी हिस्रोन रा, हिस्रोन फिरिस रा, फिरिस यहूदाह रा,

³⁴यहूदाह याकूब रा, याकूब इसहाक रा, इसहाक अब्राहम रा, अब्राहम तिरह रा, तिरह नाहोर रा,

³⁵नाहोर सरुग रा, सरुग रऊ रा, रऊ फिलिग रा, फिलिग एबिर रा, एबिर शिलह रा,

³⁶शिलह केनान रा, केनान अरफक्षद रा, अरफक्षद शेम रा, शेम नूह रा, नूह लिमिक रा,

³⁷लिमिक मथूशिलह रा, मथूशिलह हनोक रा, हनोक यिरिद रा, यिरिद महललेल रा, महललेल केनान रा,

³⁸केनान एनोश रा, एनोश शेत रा, शेत आदम रा, अतै आदम प्रमात्मैं रा थू।