Read Gaddi लूका 4 Bible Online

लूका 4 - Gaddi bible

लूका 4

¹यीशु बपतिस्मा लैणै थऊँ बाद पवित्र आत्मा सितै भरी करी यरदन नदी थऊँ फिरू अतै चाळी दिन तक आत्मा रै चलाणै सितै सो बियावान मन्ज फिरदा रैऊ

²अतै शैतान तैहा जगह तसेरी परीक्षा करदा रैऊ, चाळी दिन तक कुछ भी ना खाणै री व्जहा थऊँ तैसिओ भूख लगी।

³फिरी शैतान तैस जो बलणा लगा, “अगर तू प्रमात्मैं रा पुत्र हा ता, ऐस पत्थरा जो बल कि, रोटी बणी गा।”

⁴यीशुऐ तैस जो जवाव दिता, “शास्‍त्रा मन्ज लिखुरा, ‘मणु जो जिन्दा रैहणै तांई रोटी ही जरूरी नियां।’”

⁵फिरी शैतान यीशु जो लेई गो अतै संसारा रै नजारै जो दसी करी बलणा लगा,

⁶“अऊँ ऐस संसारा रा पुरा हक्क अतै वैभव तिजो दी दिला, क्ओकि ऐह सब मिन्जो दितुरा, अतै अऊँ जैसियो चाऊ तैसिओ दी सकदा।

⁷अगर तू मिन्जो मन्ना अतै मेरी पूजा करा ता ऐह सब कुछ तेरा भूच्ची गाणा।”

⁸यीशुऐ तैस जो जवाव दिता, “पवित्रग्रन्था मन्ज लिखुरा कि ‘तू प्रभु प्रमात्मैं री ही पूजा कर अतै सिर्फ तैस जो ही मन्‍नु कर।’”

⁹ता शैतान यीशु जो यरूशलेम जो लेई गो अतै मन्दरा री उच्ची जिनी चून्डी पुर खडेरी दिता, अतै बल्लू, “अगर तू प्रमात्मैं रा पुत्र हा ता अपणै आपा जो ऐठी थऊँ फैंकी दे।

¹⁰क्ओकि शास्‍त्र मन्ज लिखुरा कि, ‘प्रमात्मैं अपणै स्वर्गदूता जो हूक्म दिणा कि सो तिजो बचाई लैन,

¹¹अतै तियां तिजो हत्थै हत्थ चुकी लैणा करखी ईयां ना भोआ कि तेरै पैरा मन्ज पत्थरा सितै ठोकर लगा।’”

¹²यीशुऐ तैस जो जवाव दिता, “शास्‍त्रा मन्ज ईयां लिखुरा कि, ‘तू अपणै प्रमात्मैं री परीक्षा मत लैन्दा।’”

¹³ता जैहणै शैतान यीशु री परीक्षा लेई बैहु ता नोए मौके री भाळा मन्ज कुछ टैमां तांई तैस जो छड़ी करी चली गो।

¹⁴यीशु पवित्र आत्मा री सामर्थ सितै भरी करी अपणै गलील परदेसा जो फिरी आ अतै तसेरै ईणै री खबर चौं कनारी भूच्ची गैई

¹⁵सो यहूदी रै सभागार मन्ज प्रचार करना लगा अतै सब मणु तसेरी खराई करदै थियै।

¹⁶यीशु नासरत ग्राँ मन्ज फिरी आ जेठी सो पळुरा थू, अतै अपणै रीति-रवाजा रै मुताबक सो विश्रामदिन यहूदी रै सभागार मन्ज गो अतै पवित्रशास्त्र जो पढ़नै तांई ऊठु।

¹⁷तैस जो भविष्‍यवक्ता यशायाह री कताब पढ़नै तांई दिती। तिनी कताबा जो खोलू अतै ऐह पढ़ी करी हुणाऊ कि

¹⁸“प्रभु प्रमात्मैं रा आत्मा मिन्जो पुर हा, तिनी मिन्जो पुर अभिषेक करूआ कि अऊँ गरीबा जो सुसमाचार हूणाऊ, अतै तिनी मिन्जो भैजुरा कि शैतान री कैद मन्ज फसुरै मणु जो छुटकारै रा अतै अंधे जो तंयारी हाख्री खोलणै रा सुसमाचार प्रचार करू अतै मणु रै सतऊरै जो छुड़ाऊँ,

¹⁹अतै प्रभु प्रमात्मैं री कृपा अतै दया रै टैमां रा प्रचार करूं।”

²⁰ता तूणा पढ़नै थऊँ बाद यीशुऐ कताब बन्द करीके सेवका रै हथै पकड़ाई दिती अतै बैही गो। यहूदी सभागार रै सबी मणु री नजरा तैस पुर लगुरी थी।

²¹ता यीशु तियां सितै बलणा लगा, “अज तून्दै हुणदै ही पवित्रग्रन्था रा ऐह बचन पुरा भुआ।”

²²सब मणु तैस जो सराऊ करदै थियै अतै सो तसेरै मुआँ थऊँ निकळदै बचना जो हुणी करी हैरान थियै। सो बलणा लगै, “ऐ ता यूसुफ रा पुत्र हा।”

²³यीशुऐ तियां जो बल्लू, “मिन्जो पता हा तूसु मिन्जो पुर ऐह पखैण जरूर दिणा कि, ‘ओ बैईदा पैहलै अपणै आपाओ ता ठीक करी लै!’ जैडा कुछ अहै हुणुरा कि तैंई कफरनहूम नगर मन्ज कमऊरा तिनां जिन्‍ना ऐठी अपणै देशा मन्ज भी कम्मा।”

²⁴“अऊँ तूसु सितै सच बलदा कि, कोई भी भविष्‍यवक्ता अपणै देशा जो छड़ी करी बाकी सब जगह मान सम्मान पान्दा हा।

²⁵अतै ऐह गप्‍प भी सच हा कि, एलिय्याह भविष्‍यवक्ता रै टैमैं साढ़ै त्राई साला तिकर अम्बर बन्द रैऊ मतलब बरखा ना भूई अतै पूरै इस्त्राएल देशा मन्ज अकाल पैऊ, तैस टैमैं मती भारी विधवा तैस देशा मन्ज थी।

²⁶पर एलिय्याह सैदा नगरा रै सारफत ग्राँ री गैर यहूदी विधवा जो छड़ी करी कसी होरी बलै ना भैजू।

²⁷ईयां ही एलीशा भविष्‍यवक्ता रै टैमैं भी इस्त्राएल मन्ज मतै भारी कोढ़ी थियै, पर प्रमात्मैं सीरिया देशा रै गैर यहूदी नामान कोढ़ी जो छड़ी करी होर कोई ठीक ना करू।”

²⁸बस तूणा हुणदै ही यहूदी रै सभागार मन्ज जैतूणै भी थियै सो गुस्सै भूच्ची गै

²⁹अतै उूठी करी यीशु जो अपणै पहाड़ी शहरा थऊँ बाहर कडी करी रिड़ी री कनारी लेई गै ताकि तैठी थऊँ तैसिओ थला जो फैंकी दीन।

³⁰पर सो तियां थऊँ निकळी करी चली गो।

³¹फिरी यीशु गलील परदेसा रै कफरनहूम ग्राँ मन्ज आये। सो विश्रामदिन यहूदी रै सभागार मन्ज मणु जो उपदेश दिच्छु करदा थू।

³²मणु तसेरै उपदेशा जो हुणी करी हैरान भूच्ची गै कजो कि तसेरा उपदेश अधिकारा सोगी भुन्दा थू।

³³यहूदी रै सभागार मन्ज अक्क मणु थू जैस मन्ज दुष्‍टात्मा थी। सो जोरा सितै बलणा लगा,

³⁴“हे यीशु नासरी, असिओ तिजो सितै कै कम? कै तू असिओ खत्म करना आ? अऊँ जाणदा हा कि तू कुण हा? तू प्रमात्मैं रा पवित्र पुत्र हा।”

³⁵यीशुऐ तैसिओ झिड़की करी बल्लू, “चुप रैह, अतै ऐस मणु थऊँ निकळी गा।” ता तैस मणु जो दुष्‍टात्मा सबी मणु रै सामणै मरोड़ी करी थलै फैंकू अतै कोई नूकसान करूरै बगैर तैस थऊँ निकळी गैई।

³⁶ऐह हेरी करी सबी जो बड़ी हैरानी भूई अतै सो अप्पू मन्ज गल्ला करना लगै कि, “ऐह किन्है ताकतवर अतै सामर्थी बचन हिन? ऐह अधिकार अतै सामर्थ सोगी दुष्‍टात्मा जो हूक्म दिन्दा, अतै सो कणैणा मन्‍नी करी मणु थऊँ नकैई गान्दी!”

³⁷यीशु रै नां री चर्चा पूरै गलील परदेसा मन्ज फैली गई।

³⁸यीशु यहूदी रै सभागार थऊँ नकैई करी शमौन रै घरा जो गो। तैस टैमैं शमौन री हहुआ जो बुखार चढुरा थू। ता तियैं तैस सितै बिनती करी।

³⁹यीशु तसारै नेड़ै गो अतै बुखारा जो फटकार लाई अतै तसारा बुखार उतरी गो। सो तैहणै ही उूठी अतै तसेरी सेवा करना लगी पैई।

⁴⁰संझा रै टैमैं जैस कसी रै घरै अगर कोई बमार थियै ता मणु तियां जो यीशु बलै लेई आये अतै यीशुऐ अक्की अक्की मणु पुर हथ रखी करी ठीक करू।

⁴¹अतै दुष्‍टात्मा भी डडदी अतै ऐह बल्‍दी कि, “तू प्रमात्मैं रा पुत्र हा,” मतै मणु थऊँ निकळी गैई पर यीशु तियां जो फटकारदा थू अतै कणैणा ना दिन्दा थू, कजो कि सो जाणदी थी कि यीशु ही मसीह हा।

⁴²जैहणै भ्याग भूई ता यीशु तैठी थऊँ नकैई करी अक्क सुनसान जगहा जो गो फिरी भी मणु री भीड़ तैस जो तोपदी तसेरै पचूँह चली आई। तैस जो ऐह बल्ली करी रोकणा लगी कि असु जो छड़ी करी मत गच्छैं।

⁴³पर यीशुऐ तियां सितै बल्लू, “हेरा! मिन्जो दुऐ शहरा मन्ज भी गिचीकरी प्रमात्मैं रै राज्य रा सुसमाचार हुणाणा जरूरी हा क्ओकि अऊँ ऐस कमां तांई ही भैजुरा हा।”

⁴⁴इन्‍नी साहबै सो गलील परदेस रै सब यहूदी रै सभागार मन्ज प्रचार करदा रैऊ।