Read Gaddi लूका 6 Bible Online

लूका 6 - Gaddi bible

लूका 6

¹विश्रामदिन यीशु अपणै चेलै सोगी कणका री बगड़ी मितै चलुरै थियै ता चेलै कणका रै हिल्लै जो त्रोड़ी त्रोड़ी करी हथा मन्ज मळी करी खाणा लगै।

²ता फरीसी धर्मगुरू बलणा लगै, “तुहै सो कम कजो करू करदै हिन जैडा विश्रामदिन करना ठीक निय्आ।”

³यीशुऐ तियां जो जवाव दिता, “कै तुहै पवित्रग्रन्था मन्ज ना पढुरा कि, जैहणै राजा दाऊद अतै तसेरै साथी भूखै थियै ता तियैं कै करू थू?”

⁴“कै सो प्रमात्मैं रै तम्बू मन्ज ना गो अतै तैड़ी चढ़ाऊरी रोटी ना खाई लेई, हालांकि तियां रोटी जो प्रमात्मैं रै याजका जो छड़ी करी कोई होर ना खाई सकदा थू।”

⁵यीशुऐ तिआंओ वलु हुणा, “अऊँ मणु रा पुत्र विश्रामदिन रा भी प्रभु हा।”

⁶अक्क होर विश्रामदिन बाळै दिन यीशु यहूदी रै सभागार मन्ज गिच्ची करी बचन हुणाणा लगु; ता तैड़ी अक्क मणु थू जसेरा सज्जा हत्थ डुण्ड़ा थू।

⁷शास्त्री अतै फरीसी यीशु पुर दोष लाणै रा मौका तोपू करदै थियै, सो बलणा लगै, “हेरदै अज यीशु विश्रामदिन कसकि जो ठीक करदा कि ना?”

⁸पर यीशु तंयारै मनां री जाणदा थू; ठेरै तांयें तिनी तैस डुन्डै मणु सोगी बल्लू, “उठ अतै सामणै ईच्ची करी खड़ी गा,” सो ऊठु अतै तैठी खड़ड़ी गो।

⁹यीशुऐ तियां थऊँ पूछु, “अबै मिन्जो तुसै ऐह दसा कि विश्रामदिन भला करना ठीक हा कि बुरा करना, कसकि रै प्राण बचाणा खरा या प्राण लैणा?”

¹⁰ता यीशुऐ तैड़ी बैहुरै सबी मणु री कनारी हेरू अतै तैस डुण्‍डै जो वल्‍लु, “अपणै हत्था जो मेरी कनारी कर,” अतै तिनी जियां ही हथ्‍थ तसेरी कनारी करू, हथ्‍थ ठीक भूच्ची गो।

¹¹पर शास्त्री अतै फरीसी धर्मगुरू ऐ हेरी करी अपणै मना मन्ज ऐह योजना बणाणा लगै अतै सोचणा लगै कि, “अहै ऐस यीशु सोगी कै करन?”

¹²तियां दिन मन्ज यीशु अक्की पहाड़ा पुर प्रार्थना करना गो, अतै पूरी रात प्रमात्मैं सोगी प्रार्थना करदै बताई।

¹³जैहणै भ्याग भूई ता तिनी अपणै सब चेलै अप्पू बलै हैदै अतै तियां थऊँ बारह चेलै जो चुणी करी अपणा खास प्रेरित बणाई दिता।

¹⁴जयारैं नां हिन शमौन जैसेरा नां तिनी पतरस भी रखू, तसेरा भाई अन्द्रियास, याकूब, यूहन्‍ना फिलिप्पुस, बरतुल्मै,

¹⁵मती, थोमा, हलफई रा पुत्र याकूब, शमौन जैसेरा नां जेलोतेस भी हा,

¹⁶याकूब रा पुत्र यहूदा, अतै यहूदा इस्करियोती जिनी बाद मन्ज यीशु जो पकड़ाऊ थू।

¹⁷यीशु अपणै चेलै सोगी पहाड़ा थऊँ ओसी आ अतै अक्क खुली जिन्‍नी जगहा मन्ज ईच्ची खडू। ता तैठी तसेरै होर चेलै अतै यहूदिया देशा रै, यरूशलेम रै, सूर अतै सैदा रै, अतै दूरा-दूरा रै समुन्द्री इलाकै थऊँ मतै मणु किठूरै थियै।

¹⁸सो मणु तसेरै बचना हुणना अतै अपणी बीमारी थऊँ ठीक भूणै तांई छुरै थियै। तियां मणु थऊँ यीशुऐ कैई दुष्‍टात्मा कड्ड़ी करी सो मणु ठीक करै।

¹⁹सब मणु तैसिओ छुणा चाहन्दै थियै, क्ओकि तैस थऊँ सामर्थ नकैई करी सबी जो ठीक करदी थी।

²⁰ता यीशुऐ अपणै चेलै री कनारी हेरी करी बल्लू, “धन्य हिन तुहै जैड़ै कि मना रै दीन हिन, क्ओकि प्रमात्मैं रा राज्य तून्दा।”

²¹“धन्य हिन तुहै जैड़ै कि ऐस टैमैं भूखै हिन, कओकि तुसिओ रजी मुळना।” “धन्य हिन तुहै जैड़ै कि ऐस टैमैं रोऊ करदै हिन, क्ओकि तूसु हासणा।”

²²“धन्य हिन तुहै जैहणै कि मणु रै पुत्रा री वजह थऊँ, मणु तून्दै बैरी भूणा, तुसिओ समाजा थऊँ कड़ी दिणा या तुन्दी बुराई करन, अतै तून्दा नां बदनाम करना।”

²³जैहणै इआं तूसु सोगी भोल्ला ता तुहै बड़ै खुश भुंयैं, क्ओकि तूसु तांयें स्वर्गा मन्ज बडा इनाम हा; इन्‍ना कम करनै बाळै रै स्याणैं भी पूराणै जमानै रै भविष्‍यवक्ता सोगी भी ईयां ही कमाऊरा।

²⁴“पर लाणत हा तूसु पुर जैड़ै घमण्‍ड़ी अमीर हिन, क्ओकि तुहै अपणी शान्ती पाई चुकै हिन।”

²⁵“लाणत हा तियां पुर जैड़ै अबै रजुरै-पुजुरै हिन, क्ओकि टैमां ईणै पुर तूसु भूखै रैहणा।” “लाणत हा तियां पुर जैड़ै कि ऐस टैमैं हासदै, क्ओकि सो समा भी इन्दा जैहणै तियां शौक करना अतै रूणा।”

²⁶“लाणत हा तूसु पुर जैहणै सब मणु तुसिओ खरा बलन, क्ओकि तून्दै स्याणैं भी झूठै भविष्‍यवक्ता जो खरा समझदै थियै।”

²⁷“पर अऊँ तूसु सोगी बलदा, कि अपणै बैरी सोगी भी प्रेम करा; जैडा तूसु सोगी बैर रखा, तसेरा भी भला करा।

²⁸जैडा तुसिओ हराप दिन्दा तैसिओ अशीर्वाद देआ, अतै जैडा तुन्दी बेईज्ती करदा तसेरै तांऐ प्रमात्मां सितै प्रार्थना करा।

²⁹अगर पर जैडा कोई तेरै मुँहा रै सज्जै कनारी थप्पड़ मारा ता तसेरी कनारी दुआ पासा भी फेरी दे।; अगर कोई तुन्दी चादर खूसणा चाहन्दा, तैसिओ अपणा कुरता निणै थऊँ भी मत रोका।

³⁰जैडा कोई तूसु थऊँ मंगदा, तैसिओ देआ; अगर तून्दा कोई कुछ रखी लैन्दा ता तैतिओ फेरी करी मत मंगा।

³¹जियां तुहै चाहन्दै कि मणु तूसु सोगी करन, तियां तुहै भी मणु सोगी वैसा ही वर्ताव करा।

³²“अगर तुहै अपणै प्रेम रखणै बाळै सोगी प्रेम करन, ता ऐतमा कुण जिनी बड़ी गल्ल हा? क्ओकि पापी भी ता सिर्फ अपणै प्रेमी सोगी ही प्रेम रखदै।

³³अगर जे तुहै सिर्फ अपणा भला करनै बाळै सोगी ही भला करन, ता ऐतमा कुण जिनी बड़ी गल्ल हा? क्ओकि पापी भी ता ईयां ही करदै।

³⁴अगर तुहै सिर्फ ऐसै मणु जो उधार दिन जैस थऊँ फिरी पाणै री उम्मीद रखन, ता ऐत मन्ज कुण जिनी बड़ी गल्ल हा? क्ओकि पापी भी ता पापीओ उधार दिन्दा कि फेरी करी ब्याजा समेत तैसिओ पैसा मूल्ळा।

³⁵पर अऊँ बलदा अपणै बैरी सोगी प्रेम करा, भलाई करा, अतै फिरी करी न मुळन री उम्मीद रखी करी उधार देआ; ऐस तरीकै तून्दा इनाम बड़ा भूणा अतै तूसु परमप्रमात्मैं री औलाद ठहरना, क्ओकि सो तियां बुरै मणु पुर भी दयावान हा जैडा कदी भी तसेरा धन्यवाद ना करदै।

³⁶जियां तून्दा पिता प्रमात्मां दयावान हा तियां तुहै भी दयावान वणा।

³⁷“कसी पुर दोष मत ला कि तूसु पुर भी दोष ना लगाया गच्छा। माफ करलै, ता तुसिओ भी माफी मुळणिआ।

³⁸तुहै दिल्लै, ता तुसिओ भी मुळना। तून्दा हेसा नापी-तोली, जिकी-जिकी, हिलाई-हिलाई अतै रूढ लाई के तून्दै पल्लै मन्ज पाणा, अतै ध्याना सितै हुणा। जैस नापा सितै तुसै नापदै हिन तैस ही नापा सितै तूसु तांयें भी नापया गाणा, बल्कि तुसिओ मता ही दिणा हा।”

³⁹यीशुऐ तिआंओ अक्क उदाहरण हुणाऊ “अगर कोई अंधा अगर अंधे जो रस्ता दसणा लगा ता? कै तियां दुनीं करखी गत्ता मन्ज ना पैई गाणा?

⁴⁰चेला अपणै गुरू थऊँ बड्‍डा ना भुन्दा, पर जैडा कोई पढ़ी लिखी करि ज्ञानवान भुन्दा, ता सो अपणै गुरू रै बराबर भुन्दा।

⁴¹तू दुऐ पुर दोष लाणै थऊँ पैहलै अपणै मंजै थलै ता होठा फेरी लै।

⁴²जे तिजो अपणी हाख्री मन्ज पेऊरा द्रुबड़ ना हुजु करदा, ता तू अपणै भाइयो कियां बली सकदा कि, भाई; ठैहर अऊँ तेरी हाख्री रा द्रुबड़ कडी दिन्दा? हे कपटी, पैहलै अपणी हाख्री थऊँ द्रुबड़ा ता कड़ी लै, ता फिरी जैडा द्रुबड़ तिजो अपणै भाई री हाख्री मन्ज हुजदा, तैतिओ ठीक-ठाक हेरी हुणी करी कड।”

⁴³कोई भी खरा रुख निक्कमा फल ना दिन्दा अतै ना ही कोई निक्कमा रुख खरा फल दिन्दा।

⁴⁴खरै रूखा री पछैण तसेरै फळा थऊँ ही भुन्‍दीआ; क्ओकि मणु झिन्ड़ा थऊँ अंजीर ना त्रोड़दै अतै ना ही जरैड़ी थऊँ अंगुर।

⁴⁵भला मणु अपणै मना रै भलै भण्ड़ारा थऊँ भली गल्ला करदा अतै बुरा मणु अपणै मना रै बुरै भण्ड़ारा थऊँ बुरी गल्ला, क्ओकि जैडा मना मन्ज भरूरा भुन्दा सो ही मुँहा थऊँ नकैन्दा।

⁴⁶“जे तुहै मेरा कणैऊरा ही ना मन्दै ता मिन्जो ‘हे प्रभु, हे प्रभु,’ कओ बलदै?

⁴⁷जैडा कोई मिन्जो वलै ईदंआ अतै मेरी गल्ला हुणी करी मन्दा, अऊँ दसदा सो मणु कस सैईऐ?

⁴⁸सो मणु तैस बुद्धिमान मणु सैईऐ हा जिनी अपणा घर हपड़ा पुर डूगी नियूँआ पाई करी वणुऊरा, जैहणै हड़ आ ता पाणी तैस घरा पुर लगु पर तैसिओ कोई नूकसान ना भुआ; क्ओकि सो पक्का बणुरा थू

⁴⁹पर जैडा कोई मेरी गल्ला हुणी करी ना मन्दा सो तैस मूर्ख मणु सैईऐ हा जिनी धरती पुर बिना नियूँआ पाई घर बणाऊ अतै जैहणै हड़ आ ता सो ढैई करी सत्यनाश भूच्ची गो।”