Read Gaddi लूका 7 Bible Online

लूका 7 - Gaddi bible

लूका 7

¹जैहणै यीशु मणु जो उपदेश दी बैहु ता सो कफरनहूम मन्ज आ।

²तैस शहरा मन्ज अक्क रोमी फौजा रा सुबेदार रहन्‍दा थू अतै तसेरा अक्क प्यारा जिन्‍ना नौकर बमारी सितै मरना लगुरा थू।

³जैहणै तिनी यीशु री चर्चा हुणी ता तिनी कुछ स्याणै यहूदी मणु तैस बलै भैजै कि सो छन्‍दै मिनती करीके यीशु जो लेई ईन, ताकि सो ईच्ची करी मेरै नौकरा जो ठीक करी देआ।

⁴स्याणैं यहूदी यीशु बलै आये अतै बड़ी छन्‍दै मिनती करीके बलणा लगै, “यीशु जी तू सुबेदारा रै सेवका जो ठीक करनै रै काबल हा,

⁵कओ की सो इन्दै मणु सोगी प्‍यार करदा अतै तिनी असु यहूदी तांई अक्क सभागार भी बणऊरा।”

⁶ता यीशु तियां सोगी चली गो पर जैहणै सो सुबेदारा रै घरा रै नजदीक ही थू ता, सूबेदारै अपणै कुछ मणु ऐह संदेसा लेई करी यीशु बलै भैजै कि, “हे प्रभु, मेरै घरा जो ईणै रा कष्‍ट मत करा, कजो कि अऊँ ऐस काबल निय्आ कि तुसै मेरै घरै ईन।

⁷ऐस कारण मैंई अपणै आपा जो ऐस काबल ना समझू कि अऊँ तूसु वलै ईच्छुं, पर जे तुहै जेठी हिन तैठी थऊँ ही बली दिल्लै ता मेरै सेवका ठीक भुच्‍ची गाणा।

⁸क्ओकि अऊँ भी कसी अफसरा थलै कम करदा अतै मेरै थलै भी कुछ सपाई कम करदै हिन। जैहणै अऊँ अक्की जो बल्‍दा कि, ‘गा,’ ता सो गाहन्‍दा अतै दूये जो बलदा कि, ‘अई,’ ता सो ईन्दा अतै अपणै दासा जो बलदा कि, ‘ऐह कम कर,’ ता सो करदा।”

⁹ऐह हुणी करी यीशु बड़ा हैरान भुआ अतै अपणै पिचो चलुरी भिड़ा री कनारी हेरी करी बल्लू, “हुणा अऊँ तूसु सोगी बलदा कि मैंई तूणा विस्वास ता इस्त्राएली मणु मन्ज भी ना हेरूआ।”

¹⁰पर जैहणै भैजुरै मणु घरै फिरी करी आये ता तियैं हेरू कि सो सेवक ठीक भुच्‍ची गछूरा।

¹¹थोड़ै दिन बाद यीशु नाईन नां रै अक्की शहरा जो गो। तसेरै चेलै अतै मणु री भीड़ भी तैस सोगी थी।

¹²जैहणै यीशुऐ शहरा मन्ज पैर पाऊ ही थू तिनी हेरू कि मणु अक्की मुरदै जो फुक्णै तांई शहरा बाहर लेई चलुरै हिन। सो अपणी विधवा मौआ रा अक्क ही पुत्र थू। शहरा रै मतै भारी मणु ऐस मुरदै सोगी चलुरै थियै।

¹³यीशु जो तैसा रून्‍दी विधवा मौआ जो हेरी करी तरस आ अतै सो बलणा लगा, “मत रो।”

¹⁴यीशुऐ नेड़ै गिचीकरी अर्थी जो छुऊँ अतै अर्थी जो लेई चलुरै मणु रूकी गै। यीशुऐ बल्लू, “ओ नौजवाना, अऊँ तिजो बल्‍दा कि, उठ।”

¹⁵ता सो मुरदा उूठी बैहु अतै कणैणा लगी पैऊ। यीशुऐ तैस जो तसेरी मौआ जो संभाळी करी दी दिता।

¹⁶ऐह हेरी करी सब मणु डरी गै अतै सो प्रमात्मैं री जय-जयकार करीके बलणा लगै, “असु मन्ज अक्क बड़ा भविष्‍यवक्ता आ अतै प्रमात्मैं अपणै मणु पुर कृपादृष्‍टि करीआ।”

¹⁷यीशु रै बारै मन्ज ऐह सब गल्ला यहूदा परदेस रै अखै-ब्रखै सब इलाकै मन्ज फैली गैई।

¹⁸यूहन्‍ना बपतिस्मा दिणैबाळै रै चेलै ईयां सबनी गल्ला रा समाचार यूहन्‍नै जो हुणाऊ।

¹⁹ता यूहन्‍नै अपणै चेलै थऊँ दूँ चेलै जो अप्पू बलै हैदी करी यीशु बलै ऐह पुछणै तांई भैजै कि, “कै ईणैबाळा तुहै हि हिन या अहै कसकि होरी री भाळ करन?”

²⁰यूहन्‍नै रै दोनों चेलै यीशु बलै ईच्ची करी बलणा लगै, “यूहन्‍ना बपतिस्मा दिणैबाळै असिओ तिजो बलै ऐह पुछणै तांई भैजुआ कि ईणैबाळा तू ही हा, या अहै कसी होरी री भाळ करन?”

²¹तैस टैमैं यीशुऐ कईआ किस्‍मां रै बीमारा जो, पीड़ा बाळै जो अतै दुष्‍टात्मा रै सताऊरै मणु जो ठीक करू अतै कई अन्धै मणु हेरना लगै।

²²ता यीशुऐ तियां सितै बल्लू, “तुहै जैडा कुछ हेरदै अतै हुणदै हिन, सो सब गिच्ची करी यूहन्‍नै जो दसी देय्आ कि अन्धै हेरना लगै, लटै चलना लगै, कोढ़ी ठीक भुच्‍ची गै, टोणै हुणदै, मरुरै जिन्दै भुन्दै अतै गरीबा जो सुसमाचार हुणाया गान्दा।

²³अतै धन्य हिन सो जैड़ै मिन्जो थऊँ कदी दूर ना भुन्दै अतै जैडा अऊँ करदा तैतिओ हेरदै अतै जैडा अऊँ सखांदा तैतिओ करदै।”

²⁴जैहणै यूहन्‍नै रै चेलै चली गै ता यीशु यूहन्‍नै रै बारै मन्ज मणु सितै बलणा लगा, “तुहै बियावान जगह मन्ज कै हेरना गच्छुरै थियै? कै हवा सितै हिलदै सरकण्ड़ैं जो?

²⁵ता फिरी तुहै कै हेरना गच्छुरै थियै? कोमल कपड़ै लाऊरै मणु जो? हेरा किमती भड़कीलै कपड़ै लाणै बाळा अतै सुखा-चैना अतै मौज-मस्‍ती सितै रैहणै बाळा ता राज मैहला मन्ज रैहन्दा।

²⁶ता तुसै फिरी कै हेरना गच्छुरै थियै? कै कसकि भविष्‍यवक्ता जो? हाँ, अऊँ तूसु जो बलदा कि, भविष्‍यवक्ता ना पर तैस थऊँ भी बड़ै जो।”

²⁷ऐह ता सो मणु हा जसेरै बारै मन्ज धर्म-शास्‍त्रा मन्ज लिखिऊरा “हेर अऊँ अपणै दूता जो तेरै अगो भैजू करदा, तैस तिजो थऊँ पहलै तिजो तांई वत्त सिधी करनी हा।”

²⁸“अऊँ तूसु सोगी बलदा कि, जैड़ै अजा तिकर जनानी थऊँ पैदा भच्छुरै, तियां सबी मन्ज यूहन्‍नै थऊँ बड़ा कोई नियां : पर प्रमात्मां रै राज्य मन्ज जैडा हल्कै थऊँ भी हल्का हा, सो यूहन्‍नै थऊँ भी बड़ा हा।”

²⁹सबी आम मणुऐ अतै चुंगी लैणैबाळै यीशु री गल्ला हुणी करी यूहन्‍नै थऊँ बपतिस्मा लैऊ अतै प्रमात्मैं जो धर्मी मनी लैऊ।

³⁰पर फरीसी अतै शास्त्री यूहन्‍नै थऊँ बपतिस्मा ना लेई करी प्रमात्मैं री तियां तांई कै मनसा थी तैत जो टाळी दिता।

³¹“ता अऊँ ऐस युगा रै मणु री तुलना कस सोगी करू?

³²सो तियां बच्चै सांईं हिन जैड़ै बजारा मन्ज बैही करी अक्की दुऐ जो बल्‍दै कि, अहै तूसु तांई बंसरी बजाई पर तुसै ना नचै, अहै रोऐ पर तुसै ना रोऐ।

³³कओकि यूहन्‍ना ना ता रोटी खान्दा, ना ही दाखरस पिन्दा अतै तुसै बल्‍दै कि ‘तैस मन्ज दुष्‍टात्मा हा?’

³⁴अतै ऐठी मणु रा पुत्र खान्दा-पिन्दा ता तुसै मिन्जो पुर दोष लगान्दै कि हेरा ऐह पेटू अतै पियक्कड़ हा जैडा चुंगी लैणैबाळै अतै पापी रा मित्र हा।

³⁵पर प्रमात्मैं रा ज्ञान तसेरी पिचो चलनै बाळै सबी मणु मन्ज सचा समझिया गान्दा।”

³⁶फिरी अक्की फरीसीये यीशु सितै मिनत करी, कि मेरै घरै मिन्जो सोगी खाणा खा। ता ऐह हुणी करी यीशु तसेरै घरा जो गो, पर जैहणै सो खाणा खाणा बैहै ता,

³⁷तैस शहरा री अक्की व्यभिचारिणी जनानी जो ऐह पता लगु कि यीशु फरीसी रै घरै खाणा बैहुरा, ता तैसै संगमरमर रै अक्की भाण्ड़ै मन्ज किमती इत्र अन्दा।

³⁸सो पिचो खड़ी करी रून्‍दी-रून्‍दी यीशु रै पैरा जो टिपळै सोगी सेड़ी करी हैरा रै बाळा सितै पून्जणा लगी। तैसै यीशु रै पैरा पुर इत्र मळी करी पोक्कु दितै।

³⁹ऐह हेरी करी सो फरीसी जिन्‍नी यीशु अपणै घरा जो खाणैओ हैदुरा थू, अपणै मना मन्ज सोचणा लगा, “अगर ऐह भविष्‍यवक्ता भुन्दा ता जाणी गान्दा कि ऐह पैरा जो छुणै बाळी जनानी किनी हा अतै कुणआ, कओकि ऐह ता व्यभिचारिणी हा।”

⁴⁰तसेरै मना री जाणी करी यीशुऐ तैस फरीसी जो बल्लू, “हे शिमौन, अऊँ तिजो सितै कुछ कणैणा चाहन्दा।” सौ बलणा लगा, “हे गुरू, बल्ला।”

⁴¹यीशुऐ अक्क उदाहरण बल्लू, “कसी महाजणा रै दुई दीणदार थियै, अक्की तसेरै पँज सौ दीनार[2] अतै दुऐ तसेरै पजाँह दीनार दिणै थियै।

⁴²जैहणै तियां बल्लै दिणै जो कुछ ना रैऊ ता, महाजणै दूनी रा कर्जा माफ करी दिता। अबै तू मिन्जो दस कि तियां दूनी मन्ज कुण जिन्‍ना महाजणा सितै ज्यादा प्रेम करला?”

⁴³शमौन जवाव दिता, “मेरी समझा मन्ज ता तैस ही करना जसेरा ज्यादा कर्जा माफ भुआ।” यीशुऐ तैसिओ बल्लू, “तू ठीक बलदा।”

⁴⁴फिरी तैसा जनानी री कनारी फिरी करी शिमौन सितै बल्लू, “कै तू ऐसा जनानी री कनारी हेरू करदा? अऊँ तेरै घरै आ पर तैंई मेरै पैरा जो धूणै जो पाणी तक ना दिता, पर ऐसै मेरै पैर अपणै टिपळै सितै धोऐ अतै बाळा सितै पुन्जै!

⁴⁵तैंई ता कोई पोक्कु ना दिता, पर जैहणा थऊँ अऊँ ऐठी छूरा ऐसै जनानी मेरै पैरा जो पोक्कु दिणा ना छड्‍डै!

⁴⁶तैंई ता मेरै सिरा पुर तेल तक ना मळु, पर ऐसै मेरै पैरा जो इत्र सितै मळूआ!

⁴⁷ठेरैतांये अऊँ तिजो बलदा कि ऐसा जनानी रै पाप जैड़ै मतै थियै, माफ भुएै, कओकि ऐसै ज्यादा प्रेम करूआ पर जसेरै थोड़ै पाप माफ भुएै, तैस थोड़ा ही प्रेम करना।”

⁴⁸यीशुऐ तैसा जनानी जो बल्लू, “तेरै पाप माफ भुएै।”

⁴⁹ता जैड़ै मणु यीशु सोगी खाणा बैहुरै थियै, सो अपणै मना मन्ज सोचणा लगै, “ऐह कुण हा जैडा पापा जो भी माफ करदा? पाप ता प्रमात्मां ही माफ करी सकदा।”

⁵⁰यीशुऐ जनानी सितै बल्लू, “तैंई उद्धार पाई लैऊ हा क्ओकि तैंई मिन्जो पुर विस्वास करूआ, शान्ती सोगी चली गा।”