Read Gaddi यूहन्‍ना 1 Bible Online

यूहन्‍ना 1 - Gaddi bible

यूहन्‍ना 1

¹सबी थऊँ पैहलै बचन थू, अतै बचन प्रमात्मां सोगी थू, अतै ऐह बचन ही प्रमात्मां थू।

²ऐह बचन ही शुरू थऊँ प्रमात्मैं सोगी थू।

³सब कुछ तैस थऊँ ही पैदा भच्छुरा, अतै जैडा कुछ भी हा सो तसेरै बगैर पैदा ना भच्छुरा

⁴सो ही जीवन दिणै बाळा थू अतै सो जीवन मणु री ज्योती थू।

⁵ज्योती नैहरै मन्ज ही चमकदी हा अतै नैहरै ज्योती जो ना अपनाऊ।

⁶अक्क मणु प्रमात्मैं री तरफा थऊँ आ जैसेरा ना यूहन्‍ना थू।

⁷सो ठेरै तांयें छूरा थू कि, तैहा ज्योती री गवाही दी सका, ताकि सब तसेरै द्धारा विस्वास करन।

⁸यूहन्‍ना अप्पू ता सो ज्योती ना थू पर सो प्रमात्मैं री तैहा ज्योती री गवाही दिणा छूरा थू।

⁹सो मणु जैड़ा सच्ची ज्योती थू, अतै जैड़ी हरेक मणु जो प्रकाश दिन्दा हा ऐस संसारा मन्ज ईणैबाळा थू।

¹⁰सो ऐस संसारा मन्ज थू, ऐह संसार तैस थऊँ ही पैदा भच्छुरा अतै ऐस संसारा रै मणुऐ तैसिओ ना पच्छैणु।

¹¹सो अपणै देशा रै मणु मन्ज आ पर तसेरै अपणै तैसिओ ना अपनाऊ।

¹²जैडा तैस पुर विस्वास रखदै हिन अतै जैतणै मणुऐ तैसिओ अपनाऊ तिनी तियां जो प्रमात्मैं री औलाद भूणै रा हक्क दिता।

¹³सो ना ता खूना थऊँ, ना शरीरा री मर्जी थऊँ अतै ना मणु री मर्जी थऊँ पर प्रमात्मां थऊँ पैदा भच्छुरै हिन।

¹⁴बचनै देहधारण करू; अतै तिनी कृपा अतै सच्चाई सितै भरी करी असु मन्ज डेरा करू, अतै अहै तसेरी ऐसी जय-जयकार हेरी जिंआ पिता रै इकलोतै पुत्रा री।

¹⁵यूहन्‍नै तसेरै बारै मन्ज गवाही दिती अतै जोरा सितै बल्लू, “ऐह सो ही हा, जसेरै बारै मन्ज मैंई दसुरा थू कि सो मेरै बाद ईणा लगुरा सो मिन्जो थऊँ भी बदिकरी हा, क्ओकि सो मिन्जो थऊँ भी पैहलै रा थू।”

¹⁶क्ओकि तसेरै कृपा री भरपुरी सोगी अहै सबीये कृपा पुर कृपा पाईआ।

¹⁷क्ओकि व्यवस्था बनाणै बाळा ता मूसा थू पर प्रमात्मैं री कृपा अतै सच्चाई यीशु मसीह रै द्धारा प्रकट करी हा।

¹⁸प्रमात्मैं जो कुणिए भी कदी भी ना हेरूरा, इकलौता पुत्र जैडा पिता री गोदी मन्ज हा, तिनी ही तैसिओ प्रकट करू हा।

¹⁹यूहन्‍ना री गवाही ऐह हा कि जैहणै यहूदी अगुवै यरूशलेम थऊँ याजका अतै लेवी जो तैस थऊँ ऐह पुछणै तांयें भैजु कि, “तू कुण हा?”

²⁰ता यूहन्‍नै बिना झिझका रा ऐह मनी लैऊ कि, “अऊँ मसीह निआं।”

²¹ता तियैं यूहन्‍नै थऊँ पूछु, “ता तू कुण हा? कै तू एलिय्याह भविष्‍यवक्ता हा?” ता यूहन्‍नै जवाव दिता, “ना अऊँ सो निआं।” यहूदिये पूछु “कै तू भविष्‍यवक्ता हा?” ता तिनी जवाव दिता “ना अऊँ निय्आ।”

²²तियैं तैस थऊँ पूछु “फिरी ता तू हा कुण? ताकि अहै अपणै भैजणै बाळै जो जवाव दीन, कि तू अपणै बारै मन्ज कै बलदा?”

²³यूहन्‍नै बल्लू “जियां यशायाह भविष्‍यवक्तै बलुरा हा अऊँ सो आवाज हा जैडा बियावान मन्ज जोरा जोरा सितै बल्लू करदा हा प्रमात्मैं री कनारी फिरा अतै अपणै मना जो सिधै रस्तै मन्ज लैईआ।”

²⁴ऐ सब मणु फरीसी री तरफा थऊँ भैजुरै थियै।

²⁵तियैं मणुऐ फिरी तैस थऊँ पूछु, “अगर तू न ता मसीह हा, ना एलिय्याह हा, ना ही कोई भविष्‍यवाणी करनै बाळा ता मणु जो बपतिस्मा कजो दिन्दा?”

²⁶यूहन्‍नै तियां जो जवाव दिता, “अऊँ ता पाणी सितै बपतिस्मा दिन्दा पर तूसु मन्ज अक्क ऐसा मणु आ हा जैड़ा मसीहा हा, जैसियो तुहै ना जाणदै।

²⁷ऐह सो ही हा जैडा मेरै बाद ईणैबाळा हा, अऊँ ता तसेरै जुटै रै तस्मै खोलनै रै काबल भी नियां।”

²⁸ऐह सब गल्ला यरदन नदी रै पार बैतनिय्याह नां रै ग्राँ मन्ज भूई जैड़ी यूहन्‍ना बपतिस्मा दिन्दा थू।

²⁹अगलै दिन यूहन्‍नै यीशु जो अपणी कनारी इन्दै हेरू अतै तैड़ी मणु सितै बल्लू, “हेरा, ऐह प्रमात्मैं रा मेम्ना हा जैडा ऐस संसारा रै पापा जो अप्पू पुर लेई लैन्दा।

³⁰ऐह सो ही हा जसेरै बारै मन्ज अऊँ बलदा थू, ‘अक्क मणु मेरै बाद ईणा जैडा मिन्जो थऊँ भी महान हा, क्ओकि सो मिन्जो थऊँ पैहलै रा थू।

³¹अऊँ भी तैसिओ ना जाणदा थू कि सो मसीहा हा, पर अऊँ पाणी रा बपतिस्मा ठेरै तांयें दिन्दा आ कि इस्त्राएल रै मणु तैसिओ जाणी लैन।’”

³²फिरी यूहन्‍नै अपणी ऐह गवाही दिती, “मैंई आत्मा जो कबूतरा रै रूप मन्ज स्वर्गा थऊँ उतरदै तैस पुर बैहन्‍दै हेरू हा।

³³अऊँ भी तैसिओ मसीहा रै रूपा मन्ज ना पछैणी पाऊ, पर जिनी मिन्जो पाणी सितै बपतिस्मा दिणै तांयें भैजुरा थू तिनी मिन्जो सितै बलुरा थू, ‘तुद आत्मा जो उतरी करी जैस पुर टिकदै हेरना। ऐह सो ही मणु भूणा जैस पवित्र आत्मा सितै बपतिस्मा दिणा।

³⁴मैंई तैसिओ हेरूरा अतै मैंई ऐह सच बल्लू हा कि ऐह ही प्रमात्मैं रा पुत्र हा।’”

³⁵अगलै दिन यूहन्‍ना अपणै दूँ चेलै सोगी फिरी तैहा जगहा खडूरा थू,

³⁶जैहणै तिनी यीशु जो तिन्ची गान्दै हेरू ता तिनी बल्लू, “हेरा, ऐह प्रमात्मैं रा मेम्ना हा।”

³⁷जैहणै यूहन्‍ना रै दूनी चेलै सो ऐह कणैन्दा हुणु ता सो यीशु पिचो चली पै।

³⁸जैहणै यीशुऐ मुड़ीकरी हेरू कि सो पिचो ईणा लगुरै ता तियां जो वलु, “तुहै कसिओ तोपू करदै?” तियैं जवाव दिता, “हे रब्बी, (हे गुरू) तू कड्ड़ी रैहन्दा हा?”

³⁹यीशुऐ तियां जो जवाव दिता, “अईआ अतै हेरी लेय्आ।” तियैं तैस सोगी गिचीकरी तसेरै रैहणै री जगह हेरी, सो दिन भरी तैस सोगी रैह ऐह लगभग संझा रै चंऊर बजै रा टैमं थू।

⁴⁰सो दोई जिणै जैड़ै यूहन्‍ना री गल्ल हुणी करी यीशु पिचो गै थियै, तियां मन्ज अक्क शमौन पतरस रा भाई अन्द्रियास थू।

⁴¹अन्द्रियास अपणै भाई शमौन सितै मुळी करी तैसिओ बल्लू, “असिओ ख्रिस्त, यानी मसीहा मुळी गो हा।”

⁴²फिरी अन्द्रियास शमौन जो यीशु वलै लेई आ। यीशुऐ तैसिओ हेरू अतै वलु, “तू यूहन्‍ना रा पुत्र शमौन हा अज थऊँ बाद तुद कैफा यानी पतरस कहलाणा।”

⁴³दूये दिन यीशुऐ गलील परदेस गाणै रा फैसला करू। यीशु फिलिप्युस नां रै मणु जो मुळु अतै तैस जो वलु “मेरै पिचो चली आई।”

⁴⁴फिलिप्युस भी अन्द्रियास अतै पतरस रै नगरा बैतसैदा रा रैहणै बाळा थू।

⁴⁵फिलिप्युस नतनएल नां रै अक्की मणु सोगी मुळु अतै तैस सोगी बल्लू कि, “जसेरै बारै मन्ज मूसा रै व्यवस्था अतै भविष्‍यवक्तै बलदै हिन, सो मुळी गो हा; सो यूसुफ रा पुत्र यीशु नासरी हा।”

⁴⁶नतनेले तैस सोगी बल्लू, “कै कोई खरी चिज भी नासरत थऊँ निकळी सकदी हा?” फिलिप्युस बलणा लगा, “चली के हेरी लै।”

⁴⁷यीशुऐ नतनएल जो अपणी कनारी इन्दै हेरी करी तसेरै बारै मन्ज बल्लू, “हेरा, ऐह सच मन्ज ही इस्त्राएली हा; ऐस मन्ज कोई कपट निया।”

⁴⁸नतनेले यीशु सोगी बल्लू, “तू मिन्जो कियां जाणदा?” यीशुऐ तैस जो जवाव दिता; “तिजो फिलिप्युस रै हैदणै थऊँ पैहलै ही मैंई तिजो अंजीरा रै रूखा थलै हेरू थू।”

⁴⁹नतनेले यीशु जो बलै कि “हे रब्बी, (हे गुरू) तू प्रमात्मैं रा पुत्र हा; तू इस्त्राएल रा महाराजा हा।”

⁵⁰यीशुऐ नतनएल जो जवाव दिता; “मैंई जैडा तिजो सोगी बल्लू हा, कि मैंई तिजो अंजीरा रै रूखा थलै हेरू हा, कै तू ठेरै तांयें विस्वास करदा? तुद ऐस थऊँ भी बड़ै-बड़ै कम हेरन हिन।”

⁵¹फिरी यीशुऐ तैस सोगी बल्ळू, “अऊँ तूसु सोगी सच बलदा कि तूसु स्वर्गा जो खुलदै अतै प्रमात्मैं रै स्वर्गदूता जो मणु रै पुत्र बलै ओसदै कुऐंदैं हेरना।”