Read Gaddi यूहन्‍ना 10 Bible Online

यूहन्‍ना 10 - Gaddi bible

यूहन्‍ना 10

¹“अऊँ तूसु सोगी सच बलदा कि जे कोई भैड़ा रै ओबरै मन्ज दारा मितै ना गान्दा पर दीवार ऊपरा मितै लन्गी गान्दा सो चोर या डाकू हा।

²पर जैडा भैड़ा रा पाअल हा सो दारा मितै अन्दरा जो गान्दा।

³तैस तांयें द्धारपाल दारा खोली दिन्दा, अतै भैड़ा तैस पाअला री बोली हुणदी हिन, अतै सो अपणी भैड़ा जो नां लेई-लेई के हैददा अतै बाहर लेई गान्दा।

⁴जैहणै सो अपणी भैड़ा जो बाहर लेई गान्दा ता सो तंयारै अगो अगो चलदा, अतै भैड़ा तैस पिचो चलदी, क्ओकि सो तसेरी बोली पच्छैन्दी हिन।

⁵पर तियां कसी पखलै पिचो ना गाणा, पर पखलै थऊँ नह्ई पैणा, क्ओकि सो पखलै री बोली ना पच्छैन्दी”

⁶यीशुऐ तियां सोगी ऐह उदाहरण बल्लू, पर सो तैसा गल्ला रा मतलब ना समझी पायै कि ऐह कै गल हा जैड़ी सो असु सोगी बल्लू करदा हा।

⁷ता यीशुऐ फिरी तियां सोगी बल्लू, “अऊँ तूसु सोगी सच बलदा हा, प्रमात्मैं बल्लै गाणै रा दार अऊँ हा।

⁸जैतणै भी मिन्जो थऊँ पैहलै छुरै सो सब चोर अतै डाकू हिन, पर भैड़ै तंयारी ना हुणी।

⁹प्रमात्मैं बल्लै गाणै रा दार अऊँ हा; अगर कोई मेरै द्धारा अन्दर गच्छा ता, तैस उद्धार पाणा, अतै अन्दर बाहर ईच्ची गिच्ची सकणा अतै तैसिओ घा मुलणा।

¹⁰चोर सिर्फ चोरी करना इन्दा, हत्या करना अतै नष्‍ट करना ही इन्दा; अऊँ ठेरैतांये छूरा कि सो जिन्दगी पान अतै मती सारी पान।”

¹¹“खरा पाअल अऊँ हा; खरा पाअल अपणी भैड़ा तांयें अपणी जान दिन्दा।

¹²मजदूर जैडा ना ता पाअल हा अतै ना ही भैड़ा रा मालक, भेड़िये जो इन्दा हेरदा ता सो भैड़ा जो छड़ी करी नह्ई गान्दा; अतै भेड़िये तियां भैड़ा पुर हमला करदै अतै ऐरा औरा नहाई दिन्दा।

¹³सो ठेरैतांये नह्ई गान्दा कि सो ता मजदूर हा, अतै तैसिओ भैड़ा री चिन्ता निय्आ।”

¹⁴“खरा पाअल अऊँ हा; अऊँ अपणी भैड़ा जो जाणदा, अतै मेरी भैड़ा मिन्जो जाणदी हिन।

¹⁵जियां पिता मिन्जो जाणदा अतै अऊँ पिता जो जाणदा हा अतै अऊँ अपणी भैड़ा तांयें अपणी जान दिन्दा हा।

¹⁶मेरी होर भी भैड़ा हिन, जैड़ी ऐस भेड़शाला री ना हिन। मिन्जो तियां जो भी लैईणा जरूरी हा। जैहणै तियां मेरा बोल हुणना, तैहणै अक्क ही झुण्ड़ अतै अक्क ही पाअल भूणा।

¹⁷पिता ठेरैतांये मिन्जो सोगी प्‍यार रखदा कि अऊँ अपणी जान दी दिन्दा कि अऊँ फिरी जिन्दा भूच्ची सकू।

¹⁸कोई मेरै प्राणा जो मिन्जो थऊँ ना खुसदा, पर अऊँ अप्पू ही दिन्दा हा। मिन्जो तैसिओ दिणै रा अतै फिरी लैणै रा हक भी हा। ऐह हूक्म मेरै पितै थऊँ मिन्जो मुळुरा।”

¹⁹ईयां गला री वजह थऊँ यहूदी मणु मन्ज फिरी फूट पैई गई।

²⁰तियां मन्ज मतै मणु कणैणा लगै, “ऐस मन्ज दुष्‍टात्मा हा, अतै ऐह पागल हा; सेरी कजो हुणदै हिन?”

²¹होर मणु बलणा लगै, “ऐह गला ईनै मणु री ना हिन जैस मन्ज दुष्‍टात्मा भोआ। कै दुष्‍टात्मा अंधे री हाख्री खोली सकदी हिन?”

²²यरूशलेम मन्दरा रा प्रतिष्‍ठा रा त्यौहार मनाणा लाऊरा थू; अतै सर्दी रा मौसम थू।

²³यीशु मन्दरा मन्ज सुलैमान रै बराण्ड़ै जैड़ा कि मन्दरा मन्ज थू घुमु करदा थू।

²⁴ता यहूदी मणुऐ तैसिओ ईच्ची के घेरी लैऊ अतै पूछु, “तू ईन्दै मना जो कैहणै तक दुविधा मन्ज रखला? अगर तू मसीह हा ता असिओ साफ साफ दसी दे।”

²⁵यीशुऐ तियां जो जवाव दिता, “मैंई तूसु सोगी बली दितुरा पर तुहै विस्वास करदै ही ना हिन। जैड़ै कम अऊँ पिता रै अधिकारा सितै करदा सो ही मेरै गवाह हिन,

²⁶पर तुहै ठेरैतांये विस्वास ना करदै क्ओकि तुहै मेरी भैड़ा थऊँ ना हिन।

²⁷मेरी भैड़ा मेरा बोल हुणदी हिन; अऊँ तियां जो जाणदा हा, अतै सो मेरै पिचो पिचो चलदी हिन;

²⁸अतै अऊँ तियां जो अनन्त जिन्दगी दिन्दा हा। सो कदी भी नष्‍ट ना भूणी, अतै कोई भी तियां जो मेरै हथा थऊँ खुस्सी ना सकदा।

²⁹मेरा पिता, जिनी तियां जो मिन्जो दितुरा, सबी थऊँ बडा हा अतै कोई तियां जो पिता रै हत्था थऊँ खुस्सी ना सकदा।

³⁰अऊँ अतै पिता अक्क ही हिन।”

³¹यहूदी मणुऐ तैस जो मारनै तांयें पत्थर चुकै।

³²ऐह हुणी करी यीशुऐ तियां सोगी बल्लू, “मैंई तुसिओ अपणै पितै री तरफा थऊँ मतै सारै भलै कम दस्सै; तियां मन्ज कस जिन्‍नै कम्मा तांयें तुहै मिन्जो पत्थर मारू करदै हिन?”

³³यहूदिये तैसिओ जवाव दिता, “भलै कम्मा तांयें अहै तिजो पत्थर ना मारना लगुरै पर प्रमात्मैं री बुराई करनै तांयें; अतै ठेरैतांये कि तू मणु भूच्ची करी अपणै आपा जो प्रमात्मां भूणै रा दावा करदा।”

³⁴यीशुऐ तियां जो जवाव दिता, “कै पवित्रग्रन्था मन्ज ऐह ना लिखुरा, ‘मैंई बल्लू, तुहै ईश्‍वर हिन?’

³⁵अगर तिनी तियां जो ईश्‍वर बल्लू जियां बलै प्रमात्मैं रा बचन पुजुरा (अतै पवित्रग्रन्था री गल्ल झूठ ना भूच्ची सकदी),

³⁶ता जैसियो पितै पवित्र बणाई करी ऐस संसारा मन्ज भैजुरा, तुहै तैस सितै बलदै, ‘तू बुराई करदा हा,’ ठेरैतांये कि मैंई बल्लू, ‘अऊँ प्रमात्मैं रा पुत्र हा?’

³⁷अगर अऊँ अपणै पितै रा कम ना करदा, ता मेरा विस्वास मत करा।

³⁸पर अगर अऊँ करदा हा, ता चाहे मेरा विस्वास करा भी मत, पर तियां कम्मा रा ता विस्वास करा। ताकि तुहै जाणन अतै समझन कि पिता मिन्जो मन्ज हा अतै अऊँ पिता मन्ज।”

³⁹ता तियैं फिरी तैसिओ पकड़णै री कोशिश करी पर सो तंयारै हत्था थऊँ नकैई गो।

⁴⁰फिरी यीशु यरदन झीला रै पार तैसा जगहा जो चली गो, जैड़ी यूहन्‍ना पैहलै बपतिस्मा दिन्दा थू, अतै तैड़ी ही रैऊ।

⁴¹मतै सारै मणु तैस बलै ईच्ची करी बलदै थियै, “यूहन्‍नै ता कोई चमत्कार ना दसुरै, पर जैडा कुछ यूहन्‍नै सेरै बारै मन्ज बलुरा थू, सो सब सच थू।”

⁴²अतै तैड़ी मतै मणुऐ यीशु पुर विस्वास करू।