Read Gaddi यूहन्‍ना 13 Bible Online

यूहन्‍ना 13 - Gaddi bible

यूहन्‍ना 13

¹फसह रै त्यौहारा थऊँ पैहलै, जैहणै यीशु जो पता लगी गो कि मेरा सो टैमं चली आ कि मिन्जो संसार छड़ी करी अपणै पितै बलै वापस फिरी गाणा। ता सो अपणै चेलै सितै जैड़ै ऐस संसारा मन्ज थियै, जैसा प्रेम सो रखदा थू, अन्त तक तिन्ना ही प्रेम करदा रैऊ।

²ता राती रै खाणै रै टैमैं, शैतान शमौना रै पुत्र यहूदा इस्करियोती रै मना मन्ज ऐह गल्ल पाई चुकुरा थू कि तैसिओ पकडा,

³यीशुऐ, ऐह जाणी करी कि पितै सब अधिकार मिन्जो दितुरा, अतै अऊँ प्रमात्मैं थऊँ छूरा अतै प्रमात्मैं बलै ही चलूरा हा,

⁴यीशुऐ खाणै थऊँ उूठी करी अपणा लाऊरा ऊपरा रा चोळा उतारू अतै परना लेई करी अपणी कमरा मन्ज बनी लैऊ।

⁵ता अक्की भान्डै मन्ज पाणी भरी करी चेलै रै पैर धूणा अतै जैडा परना कमरा मन्ज बनुरा थू तैत सोगी पून्जणा लगा।

⁶जैहणै सो शमौन पतरस बलै आ ता, पतरसै तैस सोगी बल्लू, “हे प्रभु, कै तू मेरै पैर धून्धा?”

⁷यीशुऐ तैसिओ जवाव दिता, “जैडा अऊँ करदा, तू तठेरा मतलब हालि ना समझदा, पर ऐस थऊँ बाद समझणा।”

⁸पतरसै तैस सोगी बल्लू, “तुद मेरै पैर कदी ना धोई पाणै।” ऐह हुणी करी यीशुऐ तैस सोगी बल्लू, “अगर अऊँ तिजो धोऊ ता तुद सदा मेरै रैहणा।”

⁹शमौन पतरसै तैस सोगी बल्लू, “हे प्रभु, ता तू मेरै पैरा ही ना पर, मेरै हत्था अतै मुण्डा भी धोई दे।”

¹⁰यीशुऐ तैस सोगी बल्लू, “जैडा नैहई बैहुरा तैसिओ पैरा रै सिवा होर कुछ धूणै री जरूरत निय्आ, पर सो बिलकुल शुद्ध हा; अतै तू शुद्ध हा, पर सबी रै सब शुद्ध ना हिन।”

¹¹सो अपणै पकड़ाणै बाळै जो जाणदा थू ठेरैतांये तिनी बल्लू, “तुहै सबी रै सब शुद्ध ना हिन।”

¹²जैहणै यीशु तंयारै पैर धोई बैईठा, अतै अपणा चोळा लाई करी फिरी बैही गो, ता तियां सितै कणैणा लगा, “कै तुहै समझी गै कि मैंई तून्दै सोगी कै करूआ?

¹³तुहै मिन्जो गुरू अतै प्रभु बलदै हिन, अतै ठीक भी बलदै हिन, क्ओकि अऊँ सो ही हा।

¹⁴अगर मैंई प्रभु अतै गुरू भूच्ची करी तून्दै पैर धोऐ, ता तुसिओ भी अक्की दूये रै पैर धूणा चहिन्‍दै।

¹⁵क्ओकि मैंई तुसिओ तरीका दसी दिता हा कि जिंआं मैंई तूसु सोगी करू हा, तुहै भी तियां ही करू करा।

¹⁶अऊँ तूसु सोगी सच बलदा कि दास अपणै स्वामी थऊँ बडा निय्आ, अतै ना भैजुरा प्रेरित अपणै भैजणैवाळै थऊँ।

¹⁷तुहै ऐह गल्ला जाणदै हिन, अतै अगर इआं पुर चलदै हिन ता धन्य हिन।”

¹⁸“अऊँ तूसु सबी रै बारै मन्ज ना बलदा; जियां जो मैंई चुणी लैऊरा, तियां जो अऊँ जाणदा हा; पर ऐह ठेरैतांये हा कि पवित्रग्रन्था रा ऐह बचन पुरा भोआ, जैडा मिन्जो सोगी रोटी खान्दा, तिनी मिन्जो सोगी दुश्‍मणा सांईयै व्यवहार करू हा।”

¹⁹“अबै अऊँ ऐह पुरा भूणै थऊँ पैहलै तुसिओ दस्सी दिन्दा कि जैहणै ऐह भूच्ची गच्छा ता तुहै विस्वास करन कि अऊँ सो ही हा।

²⁰अऊँ तूसु सोगी सच बलदा कि जैडा मेरै भैजुरै जो ग्रहण करदा सो मिन्जो ग्रहण करदा; अतै जैडा मिन्जो ग्रहण करदा सो मेरै भैजणै बाळै जो ग्रहण करदा।”

²¹ऐह गल्ला बली करी यीशु आत्मा मन्ज बड़ा परेशान भूच्ची गो अतै अपणै चेलै जो बल्लू, “अऊँ तूसु सोगी सच बलदा कि तूसु मन्ज अक्की मिन्जो पकड़ाणा हा।”

²²चेलै शका सोगी, अक्की दूये री कनारी हेरना लगै कि ऐह कसेरै बारै मन्ज बल्लू करदा हा।

²³तसेरै चेलै मन्ज अक्क चेला यूहन्‍ना जैस सोगी यीशु प्रेम रखदा थू, यीशु रै बिलकुल नेड़ै बैहुरा थू।

²⁴शमौन पतरस तसेरी कनारी इशारा करीके पूछु, “दस्स भला, ऐह कसेरै बारै मन्ज बल्लू करदा हा?”

²⁵ता तिनी तियां ही यीशु रै होर नेड़ै गिच्ची री तैस थऊँ पूच्छु, “हे प्रभु, सो कुण हा?”

²⁶यीशुऐ जवाव दिता, “जैसियो अऊँ ऐह रोटी रा टुकडा डुबाई करी दिला सो ही हा।” अतै तिनी सो टुकडा डुबाई करी शमौन इस्करियोती रै पुत्र यहूदा जो दिता।

²⁷टुकडा लैन्दै ही शैतान यहूदा इस्करियोती मन्ज समाई गो। ता यीशुऐ तैसिओ बल्लू, “जैडा तू करदा, झट कर।”

²⁸पर बैहुरै मणु मन्ज कसी जो पता ना लगू कि तिनी ऐह गल्ल यहूदा सोगी कजो बली हा।

²⁹यहूदा बलै अक्क थैली रैहन्‍दी थी, ठेरैतांये कुणकी कुणकी समझू कि यीशु तैस सोगी बल्लू करदा हा कि जैडा कुछ असिओ त्यौहारा तांयें चहिन्दा सो खरीदी लै, या ऐह कि गरीबा जो कुछ दे।

³⁰अतै यहूदा टुकडा खाई करी झट बाहर जो चली गो; अतै ऐह राती रा टैमं थू।

³¹जैहणै सो बाहर चली गो ता यीशुऐ बल्लू, “अबै मणु रै पुत्रा री महिमा भूई हा, अतै प्रमात्मैं री महिमा तैस मन्ज भूई हा।

³²ता प्रमात्मैं भी पुत्रा री महिमा करनी हा अतै झट करनी हा।”

³³“हे मेरै प्यारेओ, अऊँ थोड़ी देर ही तूसु सोगी हा फिरी तूसु मिन्जो तोपणा, अतै जिंआ मैंई यहूदी सोगी बलुरा, ‘जैहरा अऊँ चलूरा तैड़ी तुहै ना ईच्ची सकदै,’ तियां ही अबै तूसु सोगी बलदा हा।”

³⁴“अऊँ तुसिओ अक्क नौआ हूक्म दिन्दा कि अक्की दूये सोगी प्‍यार रखा; जियां मैंई तूसु सोगी प्रेम रखू हा, तियां ही तुहै भी अक्की दूये सोगी प्‍यार रखा।

³⁵अगर अप्पू मन्ज प्‍यार रखलै, ता ऐत थऊँ ही सबी जो पता लगणा की तुहै मेरै चेलै हिन।”

³⁶शमौन पतरसै तैस सोगी बल्लू, “हे प्रभु, तू करा चलूरा?” यीशुऐ जवाव दिता, “जैहरा अऊँ चलूरा तैड़ी तू मेरै पिचो ना ईच्ची सकदा; पर ठेरै बाद मेरै पिचो ईणा।”

³⁷पतरसै तैस सोगी बल्लू, “हे प्रभु, हबजु अऊँ तेरै पिचो कजो ना ईच्ची सकदा? मुँ ता तिजो पिचो अपणै प्राण भी दि दिणै।”

³⁸यीशुऐ जवाव दिता, “कै तू मिन्जो तांयें अपणै प्राण दिला? अऊँ तिजो सितै सच बलदा कि कुक्कड़ा री बाँग दिणै थऊँ पैहलै तुद मेरा त्राई बरी मेरा इन्कार करना।”