Read Gaddi यूहन्‍ना 18 Bible Online

यूहन्‍ना 18 - Gaddi bible

यूहन्‍ना 18

¹ऐह प्रार्थना करनै थऊँ बाद यीशु अपणै चेलै सोगी किद्रोन नाळा रै पारा जो गो।

²तैसिओ पकडाणैवाळा यहूदा भी तैहा जगह जो जाणदा थू, क्ओकि यीशु अपणै चेलै सोगी तैहा जगहा जो गान्दा रैहन्दा थू।

³तैहणै यहूदा, फौजी री अक्क टुकड़ी अतै प्रधान याजका अतै फरीसी री कनारी थऊँ सपाई सोगी, जंगणी, मशाला अतै हथियारा जो लेई करी तैड़ी आ।

⁴ता यीशु, तियां सबी गल्ला जो जैड़ी तैस सोगी भूणैबाळी थी जाणी करी, निकळू अतै तियां सितै बल्लू, “कसिओ तोपू करदै हिन?”

⁵तियैं तैसिओ जवाव दिता, “यीशु नासरी जो।” यीशुऐ तियां सितै बल्लू, “अऊँ ही हा।” तैसिओ पकडाणैवाळा यहूदा भी तियां सोगी खडूरा थू।

⁶तसेरै ऐह बलदै ही, “अऊँ ही हा,” सो पिचो घिरी गै अतै जमीना पुर पैई गै।

⁷ता फिरी तिनी तियां थऊँ पूच्छु, “तुहै कसिओ तोपू करदै हिन।” सो बलणा लगै, “यीशु नासरी जो।”

⁸यीशुऐ जवाव दिता, “अऊँ तूसु सितै बली बैईठा कि अऊँ ही हा, अगर मिन्जो तोपू करदै हिन ता ईयां जो गाणा देय्आ।”

⁹ऐह ठेरैतांये भूआ कि सो बचन पुरा भोआ जैडा तिनी बल्लू थू “जियां जो तैंई मिन्जो दिता तियां मन्ज मैंई अक्की जो भी ना खोऊ।”

¹⁰ता शमौन पतरसै अपणी तलवार कड्ड़ी करी अक्क महायाजक रै दासा पुर चलाई दिती अतै तसेरा खब्बा कन कटी दिता। तैस दासा रा नां मलखुस थू।

¹¹ता यीशुऐ पतरस सोगी बल्लू, “अपणी तलवारा जो म्याना मन्ज रखी लै। जैड़ा दुख रा कटोरा मिन्जो पितै पीणै जो दिणा, कै अऊँ तैत जो ना भोगू?”

¹²तैहणै फौजी अतै तंयारै सुबेदारा अतै यहूदी रै सपाई यीशु जो पकड़ी करी बनी लैऊ,

¹³अतै पैहलै तैसिओ हन्ना बलै लेई गै, क्ओकि सो तैस साला रा महायाजक काइफा रा ससुर थू।

¹⁴ऐह सो ही काइफा थू, जिनी यहूदी जो सलाह दितुरी थी कि असु तांयें अक्की मणु रा मरना खरा हा।

¹⁵शमौन पतरस अतै अक्क होर चेला भी यीशु रै पिचो चली पै। ऐह चेला महायाजक रा जाणा-पछैणा थू, ठेरैतांये सो यीशु रै सोगी महायाजक रै अँगणा मन्ज गो,

¹⁶पर पतरस दारा मन्ज खड़ड़ी रैऊ। ता सो दुआ चेला आ जैडा महायाजक रा जाण-पछैण बाळा थू अतै दारा मन्ज खडुरै द्धारपाळणी सोगी कणैई करी पतरस जो भी अन्दर लेई आ।

¹⁷तैहै दासीये जैड़ी द्धारपाळणी थी, पतरस सोगी बल्लू, “करखी तू ऐस मणु रै चेलै मन्ज अक्क ता निय्आ?” तिनी बल्लू, “ना अऊँ निय्आ।”

¹⁸दास अतै सपाई सर्दी री वजह थऊँ कोयलै बाळी करी अगी सेकू करदै थियै, अतै पतरस भी तियां सोगी अग सेकणा खड़ड़ी गो।

¹⁹ता महायाजकै यीशु सोगी तसेरै चेलै रै बारै मन्ज अतै तसेरै उपदेशा रै बारै मन्ज पुछताछ करी।

²⁰यीशुऐ तियां जो जवाव दिता, “मैंई मणु सोगी खुलीकरी गल्ला करी; मैंई यहूदी रै सभागार मन्ज अतै मन्दरा मन्ज गिचीकरी जैड़ी सब यहूदी किठिन्दै थियै, सदा उपदेश करै अतै लूकी करी कुछ भी ना बल्लू।

²¹तू मिन्जो थऊँ कजो पूच्छु करदा? हुणनैबाळै थऊँ पुछ कि मैंई तियां सोगी कै बल्लू। हेर, सो जाणदै हिन मैंई कै कै बल्लू हा।”

²²जैहणै तिनी ऐह बल्लू, ता सैनका मन्ज अक्कीयै जैडा तसेरै नेड़ै खडूरा थू, यीशु जो थप्पड़ मारी करी बल्लू, “कै तू महायाजक जो ऐस तरीकै जवाव दिन्दा हा?”

²³यीशुऐ तैसिओ जवाव दिता, “अगर मैंई बुरा बल्लू हा, ता तैहा बुराई री गवाही दे; पर अगर भला बल्लू, ता मिन्जो कजो मारदा हा?”

²⁴हन्नै तैस जो बनुरा ही महायाजक काइफा बलै भैजी दिता।

²⁵शमौन पतरस खड़ी करी अग सेकू करदा थू। ता तियैं तैस सोगी बल्लू, “करखी तू तसेरै चेलै मन्ज ता निय्आ?” तिनी इन्कार करीके बल्लू, “अऊँ निय्आ।”

²⁶महायाजक रै दास मन्ज अक्कीयै, जैडा तसेरै कुटुम्ब थऊँ थू जैसेरा कन पतरसै कटी दितुरा थू, बलणा लगा, “कै मैंई तिजो तैस सोगी बगीचे मन्ज ना हेरू थू?”

²⁷पतरसै फिरी ना करी, अतै तैहणै ही कुक्कड़ै बाँग दिती।

²⁸तैहणै सो यीशु जो काइफा महायाजक थऊँ पिलातुस रै किलै जो लेई गै, अतै भ्यागा रा टैमं थू, पर सो अप्पू किलै रै अन्दर ना गै ताकि अशुद्ध ना भून पर फसह जो खाई सकन।

²⁹ता पिलातुस तियां बलै बाहर निकळी के आ अतै बलणा लगा, “तुहै ऐस मणु पुर कहा गल्ला रा आरोप लगाऊ करदै हिन?”

³⁰तियैं तैस जो जवाव दिता, “ऐह कुकर्मी हा ता अहै ऐसिओ सज्जा दिणै तांई तिजो बलै लेई आये हिन।”

³¹पिलातुसै तियां सितै बल्लू, “तुहै ही ऐसिओ नी करी अपणै नियमा रै मुताबक सेरा न्याय करा।” यहूदी अगुवै तैस सोगी बल्लू, “असिओ हक्क नियां कि अहै कसकि रै प्राण लैन।”

³²ऐह ठेरैतांये भुआ कि यीशु री सो गल्ल पूरी भोआ जैड़ी तिनी ऐह इशारा करदै कणैऊरी थी कि तसेरी मौत कियां भूणी हा।

³³ता पिलातुस फिरी किलै रै अन्दर गो अतै यीशु जो हैदी करी पूच्छु, “कै तू यहूदी रा राजा हा?”

³⁴यीशुऐ जवाव दिता “कै तू ऐह गल्ल अपणी तरफा थऊँ बल्लू करदा हा या होर मेरै बारै मन्ज ईयांईं बलदै हिन?”

³⁵पिलातुसै जवाव दिता, “कै अऊँ यहूदी हा? तेरी ही जाति अतै प्रधान याजकै तिजो मेरै हत्था मन्ज सौंपू हा। तैंई कै करूरा हा?”

³⁶यीशुऐ जवाव दिता, “मेरा राज्य ऐस संसारा रा निय्आ; अगर मेरा राज्य ऐस संसारा रा भुन्दा ता मेरै सेवक लड़दै कि अऊँ यहूदी रै हत्था मन्ज ना सौंपया गान्दा पर मेरा राज्य ऐठीआ रा निय्आ।”

³⁷पिलातुसै तैस सोगी बल्लू, “ता कै तू राजा हा?” यीशुऐ जवाव दिता कि, “तू बलदा हा कि अऊँ राजा हा। मैंई ठेरैतांये जन्म लैऊरा अतै संसारा मन्ज छूरा कि सच्चाई री गवाही दिच्छु। जैडा कोई सच्चाई सोगी प्रेम रखदा हा, सो मेरा बोल हुणदा।”

³⁸पिलातुसै तैस सोगी बल्लू, “सच्चाई कै हा?” ऐह बली करी सो फिरी यहूदी अगुवै बलै चली गो अतै तियां सितै बल्लू, “अऊँ ता ऐस मन्ज कोई गुनाह ना पान्दा

³⁹पर तुन्दी ऐह रीति हा कि अऊँ फसह मन्ज तूसु तांयें अक्क मणु छड़ी दिच्छु। ता कै तुहै चाहन्दै कि अऊँ तूसु तांयें यहूदी रै राजै जो छड़ी दिच्छु?”

⁴⁰ता तियैं जोरा सितै बल्लू, “ऐसिओ ना पर असु तांयें बरअब्बा जो छड़ी दे।” बरअब्बा अक्क डाकू थू।