Read Gaddi यूहन्‍ना 2 Bible Online

यूहन्‍ना 2 - Gaddi bible

यूहन्‍ना 2

¹फिरी त्रियै दिनै[1] गलील जिलै रै काना नां रै ग्राँ मन्ज कसकि रा बैह थू। यीशु री माँ भी तैठी ही थी।

²यीशु अतै तसेरै चेलै भी तैस बैह मन्ज हैदुरै थियै।

³तैड़ी जैहणै दाखरस मुक्‍की गो ता यीशु री माँ बलणा लगी, “ईयां बलै अबै होर दाखरस नियां।”

⁴यीशुऐ तैहा जो बल्लू, “ओ जनानी तू मिन्जो कजो बल्लू करदी हा? हल्ली तिकर मेरा ऐह दसणै रा टैमं ना आ कि अऊँ कुण हा।”

⁵फिरी तसेरी माँ नौकरा सोगी बलणा लगी, “जैडा ऐ बलदा तियां ही कम्मा।”

⁶तैड़ी यहूदी रै शुद्धी करन करनै री रवाजा अनुसार पत्थर रै छिया घड़ै रखुरै थियै, जियां मन्ज दोई-दोई त्राई-त्राई मण[2] इन्दा थू।

⁷यीशुऐ तियां जो बल्लू, “घड़ै मन्ज पाणी भरी देआ।” अतै तियैं घड़ै जो पुरा भरी दिता।

⁸तैहणै यीशुऐ नौकरा जो बल्लू, “अबै ऐतिओ कड़ी करी बोटी वलै लेई गच्छा।” अतै सो लेई गै।

⁹जैहणै बोटिऐ सो पाणी चक्खू ता सो दाखरस बणी गच्छुरा थू, तैसिओ पता ही ना चलु कि सो दाखरस कठी थऊँ आ (पर तियां नौकरा जो पता थू, जियें पाणी कड्‍डूरा थू) फिरी बोटिऐ घरावाळै जो हैदी करी तैस सोगी बल्लू,

¹⁰“सब मणु पैहलै खरा दाखरस दिन्दै अतै जैहणै परौणै पी करी मतवाळै भूच्ची गान्दै ता मध्यम दाखरस, पर तुहै ता खरा जिन्‍ना दाखरस हलि तिकर बचाई रखूरा।”

¹¹यीशुऐ गलीला जिलै रै काना ग्राँ मन्ज अपणा ऐह पैहला चमत्कार दसी करी अपणी जय-जयकार करवाई अतै तसेरै चेलै तैस पुर विस्वास करू।

¹²ऐत थऊँ बाद यीशु, तसेरी माँ, तसेरै भाई अतै तसेरै चेलै कफरनहूम शहर जो गै अतै तैड़ी सो थोड़ै दिन रैह।

¹³यहूदी मणु रा फसह रा त्यौहार नेड़ै थू अतै यीशु यरुशलेम शहर जो गो

¹⁴तिनी तैड़ी मन्दरा मन्ज बाल्द, भैड़ा अतै कबूतरा बेचणै बाळै पैसै बदलणै बाळै वैपारियो बैहुरै हेरी।

¹⁵ता तिनी जोडै रा कोडा बणाई करी, सबी भैड़ा अतै बाल्दा जो मन्दरा थऊँ कडी दिता, अतै व्यपारी रै सब पैसै रगांडी दितै अतै तंयारै बैहणै बाळै पटड़ै जो फैंकी दिता,

¹⁶अतै कबूतरा बेचणै बाळै सितै बल्लू, “ईयांईं जो ऐठीआ थऊँ लेई गच्छा। मेरै पिता रै घरा जो बजार मत बणा।”

¹⁷तैहणै तसेरै चेलै जो हेत आई कि पवित्रग्रन्था मन्ज लिखुरी हा, “तेरै घरा री लगन मिन्जो खाई गाणा।”

¹⁸ऐह हेरी करी यहूदी धर्मगुरू तैसिओ बळणा लगै, “तू जैडा ऐ करदा ता ऐत थऊँ असिओ कुण जिन्‍ना चमत्कार दसदा?”

¹⁹यीशुऐ जवाव दिता, “ऐस मन्दरा जो ढ़ाई देआ, अऊँ ऐसिओ त्राई दिना मन्ज बणाई दिला।”

²⁰यहूदी अधिकारी बल्लू, “ऐस मन्दरा जो बणाणै तांयें छताळी साल लगै, अतै कै तू ऐसिओ त्राई दिन मन्ज बणाई सकदा?”

²¹पर यीशु अपणै शरीरा रै मन्दरा रै बारै मन्ज बल्लू थू।

²²अतै जैहणै सो मरी करी जी भूआ तैहणै तसेरै चेलै जो ऐह गल्ल याद आई, अतै तियैं तैस पवित्रग्रन्थ रै बचना अतै यीशु मसीह री कणैऊरी गल्ला रा विस्वास करू।

²³जैहणै यीशु यरूशलेम शहर मन्ज फसह रा त्यौहार मन्ज थू, ता मतै मणुऐ तियां चमत्कार जो हेरी करी जैडा सो दसदा थू ता तैस पुर विस्वास करू।

²⁴पर यीशुऐ अपणै आपा जो संसारा रै भरोसै ना छडु, क्ओकि सो सबी जो जाणदा थू;

²⁵अतै तैसिओ जरूरत ना थी कि मणु रै बारै मन्ज कोई गवाही देआ, क्ओकि सो अप्पू ही जाणदा थू कि मणु रै मना मन्ज कै हा?