Read Gaddi यूहन्‍ना 3 Bible Online

यूहन्‍ना 3 - Gaddi bible

यूहन्‍ना 3

¹फरीसी धर्मगुरू मन्ज नीकुदेमुस नां रा अक्क मणु थू, सो यहूदी रा सरदार थू।

²सो राती यीशु वलै ईच्ची करी बलणा लगा, “हे गुरू अहै जाणदै कि तुहै प्रमात्मैं री कनारी थऊँ भैजुरै गुरू हिन, क्ओकि जैड़ै चमत्कार तुहै करदै, अगर तुहै प्रमात्मैं री कनारी थऊँ ना भुन्दै ता न करी सकदै थियै।”

³यीशुऐ तैसिओ जवाव दिता, “अऊँ तिजो सोगी सच बलदा, अगर कोई नोए तरीकै सितै ना जन्म लेआ ता सो प्रमात्मैं रै राज्य जो ना हेरी सकदा।”

⁴नीकुदेमुस तैस सोगी वलु, “मणु जैहणै स्याणा भूच्ची गान्दा ता कियां जन्म लेई सकदा? कै सो अपणी मौआ रै पेटा मन्ज फिरी गिचीकरी पैदा भूच्ची सकदा हा?”

⁵यीशुऐ जवाव दिता, “अऊँ तिजो सितै सच-सच बलदा हा, जैहणै तक कोई मणु पाणी अतै आत्मा[3] थऊँ ना पैदा भोआ ता सो प्रमात्मैं रै राज्य मन्ज ना ईच्ची सकदा।

⁶क्ओकि जैडा शरीरा थऊँ जमुरा हा, सो शरीर हा, अतै जैडा आत्मा थऊँ जमुरा, सो आत्मा हा।

⁷हैरान मत भो कि मैंई तिजो सितै बलुरा, कि ‘तुसिओ नौआ जन्म लैणा जरूरी हा।’

⁸हवा जैस कनारी चाहन्दी हा तैरा चलदी हा, अतै तू तठेरी छेड़ हुणदा, पर जाणदा नियां कि सो करा थऊँ इन्दी अतै करा गान्दी हा? जैडा पवित्र आत्मा मन्ज पैदा भुन्दा सो इन्‍ना हि हा।”

⁹नीकुदेमुस तैसिओ जवाव दिता, “ऐह गल्ला कियां भूच्ची सकदी हिन?”

¹⁰ऐह हुणी करी यीशुऐ तैसिओ वलु, “तू इस्त्राएली रा गुरू भूच्ची करी भी कै ईयां गल्ला जो ना जाणदा?”

¹¹यीशुऐ वलु “अऊँ तूसु सितै सच बलदा कि अहै जैडा जाणदै, सो बलदै हिन, जैडा अहै हेरूरा तठेरी गवाही दिन्दै, अतै तुहै इन्दी गवाही रा विस्वास ना करदै।

¹²जैहणै मैंई तूसु सोगी धरती री गल्ला करी, तुहै विस्वास ना करू, अतै अगर अऊँ तूसु सोगी स्वर्गा री गल्ला करू ता तुहै कियां विस्वास करलै?

¹³अऊँ ही मणु रा पुत्र सिर्फ स्वर्गा जो गो अतै स्वर्गा थऊँ आ।

¹⁴जैस तरीकै मूसै रेगीस्तान मन्ज पितळी रै बणुरै कीड़ै जो डंडै रै सहारै ऊंचाई पुर लटकऊरा थू ताकि जैडा कोई तैसिओ हेरा सो चंगा भूच्ची गच्छा। तैस तरीकै ही जरूरी हा कि मणु रै पुत्रा जो भी ऊंचाई पुर लटकाया गच्छा।

¹⁵ताकि जैडा कोई तैस पुर विस्वास करा सो अनन्त जिन्दगी पा।”

¹⁶“क्ओकि प्रमात्मैं ऐस संसार रै मणु सोगी ऐसा प्रेम रखू कि तिनी अपणा इकलौता पुत्र दि दिता, ताकि जैडा कोई तैस पुर विस्वास करा सो नाश ना भोआ पर अनन्त जिन्दगी पा।

¹⁷प्रमात्मैं अपणै पुत्रा जो ऐस संसारा मन्ज ठेरै तांयें ना भैजू कि ऐस संसारा जो सजा रा हूक्म देआ पर ठेरै तांयें कि ऐह संसार तसेरै द्धारा उद्धार पा।

¹⁸जैडा तैस पुर विस्वास करदा, तैस पुर सजा रा हूक्म ना भुन्दा, पर जैडा तैस पुर विसवास ना करदा, सो गुनागार हा; ठेरैतांये कि तिनी प्रमात्मैं रै इकलोतै पुत्रा रै नां पुर विसवास न करू।

¹⁹पर सजा रै हूक्मा री वजह ऐह हा कि ज्योती ऐस संसारा मन्ज आई, अतै मणु जो नैहरा ऐसा ज्योती थऊँ ज्यादा पैरा लगू क्ओकि तंयारै कम बुरै थियै।

²⁰क्ओकि जैडा कोई बुरा करदा, सो ज्योती थऊँ बैर रखदा, अतै ज्योती रै नेड़ै ना इन्दा क्ओकि ज्योती मन्ज तसेरै कम सबी सामणै चली ईणै।

²¹पर जैडा सच्चाई पुर चलदा, सो ज्योती रै नेड़ै इन्दा, ताकि तसेरै कम्मा थऊँ पता लगा कि सो प्रमात्मैं री कनारी थऊँ करै गै हिन।”

²²ऐत थऊँ बाद यीशु अतै तसेरै चेलै यहूदिया देशा मन्ज आये; अतै सो तैठी तियां सोगी रैई करी बपतिस्मा दिणा लगु।

²³अतै यूहन्‍ना भी ऐनोन ग्राँ जैड़ा सामरिया परदेस मन्ज हा बपतिस्मा दिन्दा थू। क्ओकि तैठी बडा भारी पाणी थू, अतै मणु तैठी ईच्ची करी बपतिस्मा लैन्दै थियै।

²⁴यूहन्‍ना तैस टैमां तक जेलखानै मन्ज ना पाऊरा थू।

²⁵तैठी यूहन्‍नै रै चेलै रा कसकि यहूदी धर्मगुरू सोगी शुद्धी रै बारै मन्ज बैहंस बाजी भूई।

²⁶फिरी यूहन्‍नै रै चेलै तैस बलै ईच्ची करी यूहन्‍ना सोगी वलु, “हे गुरू, जैडा मणु यरदन रै पार तिजो सोगी थू, अतै जसेरी तैंई गवाही दिती हा, हेर सो भी बपतिस्मा दिन्दा अतै सब तैस बलै इन्दै हिन।”

²⁷यूहन्‍नै जवाव दिता, “जैहणै तक मणु जो स्वर्गा थऊँ ना दितिआ गच्छा सो कुछ भी ना पाई सकदा।

²⁸तुहै ता अप्पू ही हुणी चुकुरै हिन, मैंई वलु अऊँ मसीह निआं पर तसेरै अगो भैजुरा हा।

²⁹जसेरी दुल्हन हा, सो ही दूल्हा हा पर दूल्है रा जैडा मित्र सोगी खडूरा सो दूल्है रै बोल हुणी करी बडा खुश भुन्दा। अबै मेरी ऐह खुशी पूरी भुईआ।

³⁰जरूरी हा कि सो बढ़ा अतै अऊँ घटूं।”

³¹“जैडा स्वर्गा थऊँ इन्दा सो सबी थऊँ बदिआ हा, जैडा धरती थऊँ ईन्दा सो धरती रा हा, अतै धरती ही री गल्ला करदा; जैडा स्वर्गा थऊँ ईन्दा सो सबी थऊँ ऊपर हा।

³²जैडा कुछ तिनी हेरूआ अतै हुणुआ, तठेरी ही गवाही दिन्दा; अतै बडै थोड़ै मणु तसेरा विस्वास करदै अतै तैसिओ ग्रहण करदै।

³³पर जिनी तसेरी कणैऊरी गल्ला पुर विस्वास करी लैऊआ तिनी ऐसा गल्ला पुर मोहर लाई दिती हा कि प्रमात्मां ही सचा हा।

³⁴क्ओकि जैसियो प्रमात्मैं भैजुरा, सो ही प्रमात्मैं री गल्ला करदा; क्ओकि सो पवित्र आत्मा नापी-नापी करी ना दिन्दा।

³⁵पिता पुत्रा सितै प्रेम रखदा, अतै तिनी सब चिजा तसेरै हत्था मन्ज दि दितुरी।

³⁶जैडा प्रमात्मैं रै पुत्र पुर विस्वास करदा, अनन्त जिन्दगी तसेरी हा; पर जैडा पुत्र री ना मन्दा तैस जिन्दगी ना पाणिआ, पर प्रमात्मैं रा क्रोध तैस पुर रैहन्दा।”