Read Gaddi यूहन्‍ना 4 Bible Online

यूहन्‍ना 4 - Gaddi bible

यूहन्‍ना 4

¹फिरी जैहणै प्रभु जो पता लगू कि फरीसीये हुणु हा कि यीशु यूहन्‍ना थऊँ भी मतै चेलै बणान्दा अतै तियां जो बपतिस्मा भी दिन्दा हा।

²[असल मन्ज यीशु अप्पू ना पर तसेरै चेलै बपतिस्मा दिन्दै थियै]

³ता यीशु यहूदिया परदेस जो छड़ी करी गलील परदेस जो चली गो।

⁴अतै प्रमात्मैं री इच्छा थी की सो सामरिया परदेस मितै भूच्ची करी गच्छा।

⁵ठेरैतांये सो सामरिया रै सूखार नां रै ग्राँ मन्ज आ, जैडा तैस जमीना रै नेड़ै हा, जैतियो याकूबे अपणै पुत्र यूसुफ जो दितुरा थू।

⁶अतै तैड़ी अक्क खूह थू जैतिओ याकूबे बणाऊरा थू। यीशु रस्तै रा खिजुरा तैस खूह पुर इआं ही बैही गो। अतै ऐह गल्ल दफारा रै टैमं री थी।

⁷ऐतनै मन्ज तैठी अक्क सामरी जनानी पाणी भरना आई। यीशुऐ तैहा सोगी वलु, “मिन्जो पाणी पैय्आ।”

⁸क्ओकि तसेरै चेलै नगरा मन्ज खाणा खरीदणा गच्छुरै थियै।

⁹सामरी जनानी तैस सितै वलु, “तू यहूदी भूच्ची करी मिन्जो थऊँ पाणी कजो मंगदा?” (क्ओकि यहूदी सामरी सोगी कोई भी व्यवहार ना रखदै थियै)।

¹⁰यीशुऐ जवाव दिता, “अगर तू प्रमात्मैं रै वरदाना जो जाणदी, ता ऐह भी जाणदी कि अऊँ कुण हा जैडा तिजो ऐह वलु करदा, मिन्जो पाणी पैय्आ, ता तू तैस थऊँ मंगदी, अतै सो तिजो जिन्दगी रा पाणी दिन्दा।”

¹¹जनानी तैस सोगी वलु, “हे स्वामी, तिजो बल्लै पाणी भरनै जो ता कुछ भी निय्आ, अतै खूह भी ढूगा; ता फिरी सो जिन्दगी रा पाणी तिजो बल्लै कठी थऊँ आ?

¹²कै तू इन्दै पूर्वज याकूब थऊँ भी बड़ा हा, जिनी असिओ ऐह खूह दितुरा अतै अप्पू भी अपणै बच्चै, गोरू-पैहरू समेत ऐस थऊँ ही पिऊरा हा?”

¹³यीशुऐ तैहाओ जवाव दिता, “जैस कसी ऐह पाणी पीणा तैस फिरी त्रिहणै रैहणा,

¹⁴पर जैडा कोई तैस पाणी थऊँ पिला जैडा मुँ तैसिओ दिणा, तैस फिरी सदा तक त्रिहणै ना रैहणा; पर तैस अक्क अनन्त जिन्दगी तांयें पाणी रा झरना वणी करी नकैन्दै रैहणा।”

¹⁵जनानी तैस सोगी वलु, “हे प्रभु, सो पाणी मिन्जो भी दे ताकि अऊँ कदी भी त्रिहणी ना रैऊ अतै ना पाणी भरनै तांयें ऐतनी दूर ईच्छु।”

¹⁶यीशुऐ तैहा जो वलु, “गा अपणै घरवाळै जो ऐठी हैदी करी लेई।”

¹⁷जनानी जवाव दिता, “अऊँ ता बिना घरवाळै री हा।” यीशुऐ तैहा सितै वलु, “तू ठीक बलदिआ, ‘कि अऊँ बगैर घरवाळै हा।’

¹⁸क्ओकि तू पँज घरवाळै करी बैहुरी हा, अतै जैस सोगी तू अबै हा सो भी तेरा घरावाळा निय्आ। ऐह तैंई सच बल्लू हा।”

¹⁹जनानी तैस सोगी बल्लू, “हे प्रभु, मिन्जो लगदा कि तू कोई भविष्‍यवाणी करनैवाळा हा।

²⁰इन्दै स्याणैं ऐस ही पहाडा पुर प्रार्थना करी, अतै अबै तुहै यहूदी मणु बलदै हिन कि सो जगह यरूशलेम मन्ज हा जैड़ी असिओ भजन करना चहिन्दा।”

²¹यीशुऐ तैहा सितै वलु, “ओ जनानी, मेरी गल्ला रा विस्वास कर कि सो टैमं ईणैबाळा हा कि ना ता तूसु ऐस पहाडा पुर पिता री पूजा करी सकणा ना ही यरूशलेम मन्ज।

²²तुहै सामरी मणु जैसियो ना जाणदै हिन तसेरा भजन करदै हिन, अतै अहै यहूदी जैसियो जाणदै हिन तसेरा भजन करदै हिन, क्ओकि उद्धार यहूदी थऊँ ही हा।

²³पर सो टैमं ईणैबाळा हा, बल्कि चली ही आ जैहणै सचै भक्ता पिता रा भजन आत्मा अतै सच्चाई सितै करना हा, क्ओकि परम पिता अपणै तांयें इन्‍नै ही भक्त तोपदा हा।

²⁴प्रमात्मां आत्मा हा, ठेरैतांये जरूरी हा कि जैड़ै तसेरी पूजा करन सो आत्मा अतै सच्चाई सितै पूजा करन।”

²⁵तैहै जनानी तैसिओ बल्लू, “अऊँ जाणदी हा कि मसीह जैसियो ख्रिस्त भी बलदै हिन ईणैबाळा हा; जैहणै तैस ईणा ता असिओ सब गल्ला दसी दिणी।”

²⁶यीशुऐ तैहा सितै बल्लू, “अऊँ सो ही हा जैडा तिजो सितै बल्लू करदा।”

²⁷ऐतनै मन्ज तसेरै चेलै फिरी आये, अतै तियां जो ऐह हेरी करी हैरानी भूई कि सो अक्क जनानी सितै गल्ल करू करदा थू; ता भी कसी जो ऐह हिम्मत ना भूई कि कोई तैस थऊँ पूछा, “तू कै चाहन्दा?” या “ऐसा सितै कजो गल्ला करू करदा?”

²⁸ता सो जनानी अपणा घडा छड़ी करी अपणै नगरा जो चली गई अतै मणु सितै बलणा लगी,

²⁹“अईआ, अक्की मणु जो हेरा, जिनी मेरै सब करूरै कम मिन्जो दस्सी दितै। करखी ऐह ही मसीहा ता निय्आ?”

³⁰अतै सो मणु नगरा थऊँ नकैई करी यीशु वलै ईणा लगै।

³¹इतनै मन्ज तसेरै चेलै यीशु सितै ऐह प्रार्थना करना लगै कि, “हे गुरू, कुछ खाई लै।”

³²पर तिनी अपणै चेलै सितै बल्लू, “मिन्जो बलै खाणै तांयें ऐसा खाणा हा जैतियो तुहै ना जाणदै।”

³³ता चेलै अप्पू मन्ज कणैणा लगै, “कै कुणकी ऐसिओ खाणै तांयें कुछ अन्दुरा?”

³⁴यीशुऐ तियां सितै बल्लू, “मेरा खाणा ऐह हा कि अऊँ अपणै भैजणै बाळै री इच्छा रै अनुसार चलुँ अतै तसेरै कम्मा जो पुरा करूं।

³⁵कै तुहै ना बलदै कि, ‘वढाई वड़णै जो हालि तिकर चंऊर महीनै पैऊरै हिन?’ हेरा, अऊँ तूसु सोगी बलदा, अपणी हाख्री चुकी करी बगड़ी मन्ज नजर फेरा कि फसल पक्की गच्छुरी हा।

³⁶फसला जो बड़णै बाळै जो धैडी मुलदी हा अतै अनन्त जिन्दगी तांयें फल पान्दा, ताकि बाणैबाळा अतै कटणैबाळा दोनो मिलीकरी मजा करन।

³⁷क्ओकि ऐठी ऐह गल्ल ठीक बैहन्दी हा कि, ‘बाणैबाळा होर हा अतै कटणैबाळा होर हा।’

³⁸मैंई तुसिओ सो बगड़ी री फसल बडणै तांयें भैजुरा जैत मन्ज तुहै मेहनत ना करूरी; होरी मणुऐ मेहनत करी अतै तुहै तंयारै फला रै हकदार भुएै।”

³⁹तैस नगरा रै बडै़ सामरी मणुऐ तैहा जनानी रै बलणै थऊँ यीशु पुर विस्वास करू; क्ओकि तैहै ऐह गवाही दिती थी कि, “जैडा कुछ मैंई करूरा ईनी सब कुछ मिन्जो दस्सी दिता।”

⁴⁰ठेरैतांये जैहणै ऐह सामरी मणु यीशु बलै बिनती करना लगै कि इन्दै नगरा मन्ज रैह। ता सो तैठी दोई दिन रैऊ।

⁴¹तसेरै बचना रै कारण होर भी मतै मणुऐ विस्वास करू।

⁴²ता तियैं मणुऐ तैहा जनानी जो बल्लू, “अबै अहै सिर्फ तेरै कणैणै पुर विस्वास ना करदै पर अबै अहै हेरी भी लैऊ हा अतै जाणी गै कि ऐह ही सच मन्ज संसारा रा उद्धारकर्ता हा।”

⁴³फिरी सो दूँ दिना बाद तैठी थऊँ गलील जो चली गो,

⁴⁴क्ओकि यीशुऐ अप्पू ही बलुरा कि “कोई भी भविष्‍यवक्ता अपणै देशा जो छड़ी करी बाकी सब जगह मान सम्मान पान्दा हा।”

⁴⁵ऐस तरीकै जैहणै सो गलील मन्ज आ, ता गलीली मणुऐ तसेरा स्वागत करू; क्ओकि तियैं सब कुछ हेरूरा थू, जैडा तिनी यरूशलेम मन्ज अक्क त्यौहारा रै दिनै करूरा थू, क्ओकि सो सब मणु भी ऐस त्यौहारा मन्ज सामल थियै।

⁴⁶सो फिरी गलील रै काना ग्राँ जो आ, जेठी तिनी पाणी रा दाखरस बणाऊरा थू। तैठी राजा रा अक्क अधिकारी थू जैसेरा पुत्र कफरनहूम मन्ज बीमार थू।

⁴⁷सो ऐह हुणी करी कि यीशु यहूदिया थऊँ गलील मन्ज आ, ता सो तैस बलै गो अतै तैस सितै बिनती करना लगू कि चली करी मेरै पुत्रा जो ठीक करी दे क्ओकि सो मरना लगुरा थू।

⁴⁸यीशुऐ तैस सोगी बल्लू, “जैहणै तक तूसु चमत्कार अतै हैरानी बाळै कम ना हेरन तैहणै तक कदी भी विस्वास ना करना।”

⁴⁹राजा रै तिनी अधिकारी यीशु सोगी बल्लू, “हे प्रभु, मेरै पुत्रा रै मरनै थऊँ पैहलै चली पै।”

⁵⁰यीशुऐ तैस सितै बल्लू, “गच्छ तेरा पुत्र जिन्दा हा।” तिनी मणुऐ यीशु री कणैऊरी गल्ला रा विस्वास करू अतै चली गो।

⁵¹सो बता मन्ज चलूरा थू, कि तसेरै नौकर ईच्ची करी मुळै अतै बलणा लगै कि, “तेरा पुत्र जिन्दा हा।”

⁵²तिनी अपणै नौकरा थऊँ पूछु, “कस टैमां रा सो ठीक भूणा लगुरा?” तियैं जवाव दिता, “पिछलै कल दोफारा रै लगभग तसेरा बुखार उतरी गो थू।”

⁵³तैस बच्चै रै पिता जो ध्यान आ कि ऐह ठीक सो ही टैमं थू जैहणै यीशुऐ तैस सोगी बलुरा थू, “तेरा पुत्र जिन्दा हा,” ता सो ऐस तरीकै अपणै पूरै परिवार सोगी विस्वासी बणी गो।

⁵⁴ऐह दुआ चिन्ह थू जैडा यीशुऐ यहूदिया परदेस थऊँ गलील मन्ज ईच्ची करी दस्सु।