Read Gaddi यूहन्‍ना 5 Bible Online

यूहन्‍ना 5 - Gaddi bible

यूहन्‍ना 5

¹ईयां गला थऊँ बाद यहूदिया मन्ज अक्क त्यौहार आ अतै यीशु यरूशलेम जो गो।

²यरूशलेम मन्ज अक्क भैड़ा रै ओबरै रै दारा बलै अक्क कुण्ड़ थू जैतियो इब्रानी बोली मन्ज बैतहसदा बलदै हिन, अतै तियां मन्ज पँज बराण्ड़ै हिन।

³ईयां बराण्ड़ै मन्ज बमार, अन्धै, लट्टै अतै हुकुरै अंगा बाळै (पाणी रै हिलणै री उम्मीद मन्ज) रैहन्दै थियै।

⁴(क्ओकि ठीक टैमां पुर प्रमात्मैं रै स्वर्गदूत कुण्ड़ा मन्ज ईच्ची करी पाणी जो हिलांदै थियै पाणी हिलदै ही जैडा पैहलै उतरी गान्दा थू सो ठीक भूच्ची गान्दा थू चाहे जिनी भी बमारी कजो ना भोआ।)[4]

⁵तैड़ी अक्क मणु जैडा अठत्‍ती साला रा बमारी मन्ज थू।

⁶यीशुऐ तैसिओ बमार हेरी करी अतै ऐ जाणी करी की सो मतै दिना रा ऐसा हाळति मन्ज पेऊरा हा, तैस थऊँ पूच्छु, “कै तू खरा भूणा चाहन्दा हा?”

⁷तिनी बमारै तैसिओ जवाव दिता, “हे प्रभु, मिन्जो बलै कोई भी मणु निआं कि जैहणै पाणी जो हिलांदै ता तैहणै मिंजो तैस कुंडा मन्ज सोआली देआ; पर मेरै पुजणै थऊँ पैहलै दुआ मणु तैस मन्ज ओसी गान्दा हा”

⁸यीशुऐ तैसिओ बल्लू, “उठ अपणी खाट चुक अतै चल फिर।”

⁹सो मणु तैहणियै ठीक भूच्ची गो, अतै अपणी खाट चुकी करी चलना फिरना लगी पैऊँ, अतै ऐह विश्रामदिन थू।

¹⁰ठेरैतांये यहूदी अगुवै तैस मणु जो जैडा ठीक भच्छुरा थू, बलणा लगै, “अज ता विश्रामदिन हा, ता मूसा री व्यवस्था रै अनुसार तेरा खाट चुकणा ठीक निय्आ।”

¹¹तिनी मणुऐ तियां जो बल्लू, “जिन्‍नी मिंजो ठीक करूरा, तिनी मिंजो सितै बलूआ, ‘अपणा मन्जा चुक अतै चल फिर।’”

¹²तियैं यहूदी मणुऐ तैस थऊँ पूच्छु, “सो कुण मणु हा जिनी तिजो बलूआ मन्जा चुक अतै चल फिर?”

¹³पर जैडा ठीक भूच्ची गो थू, सो ना जाणदा थू कि कुणी ठीक करू हा, क्ओकि यीशु तैहा जगहा थऊँ चली गच्छुरा थू।

¹⁴ईयां गला भूणै थऊँ बाद सो यीशु जो मन्दरा मन्ज मूलु। यीशुऐ तैसिओ बल्लू, “हेर तू ठीक भूच्ची गो हा अबै फिरी पाप मत करदा, ईयां ना भोआ कि अबै तू भारी मुसिवता मन्ज फसी गच्छा।”

¹⁵तिनी मणुऐ गिचीकरी यहूदी अगुवै मणु सितै बली दिता कि जिनी मिन्जो ठीक करू हा सो यीशु हा।

¹⁶ऐसा गल्ला थऊँ यहूदी अगुवै यीशु जो सताणा लगै, क्ओकि सो इन्‍नै कम विश्रामदिन ही करदा थू।

¹⁷ता यीशुऐ तियां जो बल्लू, “मेरा पिता हालि तिकर कम करू करदा, अतै अऊँ भी कम करू करदा।”

¹⁸ठेरैतांये यहूदी अगुवै यीशु जो मारनै री होर भी ज्यादा कोशिश करना लगै, क्ओकि सो ना सिर्फ विश्रामदिन रै नियम जो तोडदा थू पर प्रमात्मैं जो अपणा पिता बली करी अपणै आपा जो प्रमात्मैं रै बराबर बणान्दा थू।

¹⁹ईयां गल्ला पुर यीशुऐ तियां जो बल्लू, “अऊँ तूसु सोगी सच बलदा, पुत्र अपणै आपा थऊँ कुछ ना करी सकदा, सिर्फ तियां कम्मा करी सकदा जैडा सो अपणै पितै जो करदै हेरदा।

²⁰क्ओकि पिता अपणै पुत्रा सोगी प्रेम रखदा अतै जैडा-जैडा कम सो अप्पू करदा, अपणै पुत्रा जो दसदा; अतै पुत्रा ऐत थऊँ भी बडै बडै कम तैसिओ करीके दसणै ताकि तुहै हैरान भून।

²¹जियां पिता मरूरै जो ऊठाल्दा अतै जियान्दा तियां ही पुत्र भी जियां जो चाहन्दा तियां जो जियान्दा।

²²पिता कसी रा न्याय ना करदा, पर न्याय करनै रा सब कम पुत्रा जो सौंपी दितुरा,

²³ठेरैतांये कि सब मणु पुत्रा रा तियां ही आदर करन जियां पिता रा करदै हिन, जैडा पुत्रा रा आदर ना करदा, सो पितै रा भी आदर ना करदा जिनी तैसिओ भैजुरा।”

²⁴अऊँ तूसु सोगी सच बलदा जैडा मेरा बचन हुणी करी मेरै भैजणै बाळै पुर विस्वास करदा, अनन्त जिन्दगी तसेरी ही हा। तैसिओ कसी दण्ड रा हूक्म ना हुणाया गाणा, पर मरनै थऊँ बाद भी तैस जिन्दगी पाणी हा।

²⁵“अऊँ तूसु सोगी सच बलदा सो टैमं ईणै बाळा, अतै अबै भी हा कि जैहणै मरूरै मणु भी प्रमात्मैं रै पुत्रा री हक्का हुणी करी जी भूणा।

²⁶क्ओकि जियां प्रमात्मां अपणै आपा मन्ज जिन्दगी रखदा, तैसा ही रीति सितै तिनी पुत्रा जो भी जिन्दगी रखणै रा हक्क दितुरा।

²⁷बल्कि तैसिओ न्याय करनै रा भी हक दितुरा, क्ओकि सो मणु रा पुत्र हा।”

²⁸“ईयां गल्ला हुणी करी हैरान मत भोआ, क्ओकि सो टैमं ईच्छु करदा जैहणै कब्रा मन्ज दबाऊरै मणु तसेरी आवाज हुणी करी नकैई ईणा।

²⁹जियें खरै कर्म करूरै तियां अनन्त जिन्दगी पाणै तांयें दोबारा जी भूणा, जियें बुरै कर्म करूरै तियां दण्ड पाणै तांयें।”

³⁰“अऊँ अपणै आपा थऊँ कुछ न करी सकदा; जियां हुणदा तियां ही न्याय करदा, अतै मेरा न्याय सचा भुन्दा, क्ओकि अऊँ अपणी ना पर अपणै भैजणै बाळै री इच्छा चाहन्दा।”

³¹“अऊँ अगर अपणै बारै मन्ज ही गवाही दिच्छु ता सो सच ना भूणी।

³²मेरै बारै मन्ज गवाही दिणैबाळा मेरा पिता हा, अतै जैड़ी गवाही सो मेरै बारै मन्ज दिन्दा सो ही सच हा।”

³³तुहै यूहन्‍नै थऊँ भी पुच्छुवाऊ थू अतै तिनी सच री ही गवाही दिती हा।

³⁴पर अऊँ अपणै बारै मन्ज मणु री गवाही ना चाहन्दा; पर ऐह गल्ला अऊँ ठेरैतांये कणैन्दा कि तुहै उद्धार पान।

³⁵सो ता बलदै अतै चमकदै दीयै सांईयै थू, अतै तुसिओ थोड़ी देरा तक तसेरी ज्योती मन्ज मगन भूणा खरा लगू।

³⁶पर मेरी गवाही यूहन्‍नै थऊँ बडी करी हा, क्ओकि पितै जियां कम्मा जो पुरा करनै री जिमेंबारी मिन्जो दितुरी हा। अऊँ तियां कम्मा करदा, सो कम ही मेरै गवाह हिन कि मिन्जो मेरै पितै भैजुरा हा।

³⁷जिनी मिन्जो भैजुरा तिनी मेरै बारै मन्ज गवाही दितुरी हा, तुहै ता ना कदी तसेरा अक्क बोल भी हुणुरा अतै ना कदी सेरा रूप हेरूरा।

³⁸तुहै तसेरै बचना जो ना मन्दै, क्ओकि जिनी तैसिओ भैजुरा हा तुहै तसेरा विस्वास ना करदै।

³⁹तुहै पवित्रग्रन्था मन्ज तोपदै हिन, अतै सोचदै हिन कि अनन्त जिन्दगी तैत मन्ज ही हा, अतै ऐह ग्रन्थ ही मेरै बारै मन्ज गवाही दिन्दा हा।

⁴⁰फिरी भी तुहै मिन्जो बलै ईणा ना चाहन्दै कि तुहै अनन्त जिन्दगी पान।

⁴¹अऊँ मणु थऊँ बड़ाई पाणा ना चाहन्दा।

⁴²पर अऊँ तुसिओ जाणदा कि तूसु मन्ज प्रमात्मैं रा प्रेम निय्आ।

⁴³अऊँ अपणै पितै रै अधिकार सोगी छूरा, अतै तुहै मिन्जो ना अपनांदै, पर जे कोई अपणै अधिकार सोगी तूसु बलै इन्दा ता तूसु सो अपनाई लैणा।

⁴⁴तुहै कियां विस्वास करी सकदै हालांकि तुहै अक्की दुऐ थऊँ आदर चाहन्दै, अतै सो आदर जैडा सिर्फ अक्क सचा प्रमात्मां हा तैस थऊँ ना पाणा चाहन्दै।

⁴⁵“ऐह मत सोचा कि मुँ प्रमात्मैं रै सामणै तूसु पुर दोष लाणा, तूसु पुर दोष लाणै बाळा ता मूसा हा, जैस पुर तुहै उम्मीद रखुरी हा।

⁴⁶क्ओकि अगर तुहै मूसा रा विस्वास करदै ता तुहै मेरा भी विस्वास करदै, ठेरैतांये कि तिनी मेरै बारै मन्ज लिखुरी।

⁴⁷पर जे तुहै तसेरै लिखुरै लेखा पुर विस्वास ना करदै, ता मेरै बचना पुर कियां विस्वास करना?”